يالله ياقابل صلاة المصلين = ياللي على الاوطان يضفي سحابه
قعادنا في البيت كنا مساجين = وارجيك ياللي سامع كل جابه
ودي نسير صوب ربعن حراجين = اهل الكرم والطيب واهل اللبابه
لبو مسلم شوق ظافي الدليقين = قرم على الجيران سهل جنابه
سلم لهم في العسر ذبح الخرافين = لاصار بعض الناس رزقه هبابه
ويشرع المجلس على العسر واللين = ولاجاء المسير قاله ياهلابه
طيبه لربعه والقرابات والاقصين = والله الا منه نوى الرزق جابه
وربعه هل الطولات نزاعة الدين = قبل الكمام وفعلهم ينحكابه
ربع على شلع الرياجيل ضارين = بمصقلات فعلهن يندعابه
سهلين بالجانب ولضد عسرين = وياسعد منهم لابته في الحرابه
ربع على نشرالمعادي جريين = كم ذود مصلاح غدوبه وجوبه
لامن تعلو فوق مثل الشياهين = طريحهم خلي عشاء للذيابه
وهذي عوايدهم على الهوش عاجيين = كم واحد من فعلهم جاء ذهابه
طريحهم خلي عشاء للسراحين = لامن غدى البارود مثل الضبابه
يردون حوض الموت وردالمحيمين = كم شيخ قوم راح يشكي صوابه
لاد لحريجي يرفقن المجنين = سقم الحريب الى نوىالله عذابه
ربع على نطح الطوابير ضارين = فعل من الجدان كل درابه
من فعلهم في الكون رد ابن حثلين = ماعاد حصل غارة وانقلابه
ردوه ربع في الملاقات ظفرين = والنصر من رب المقادير جابه
لحقو على الزلبات فهود معجين = وردوا ركايبهم مع البل نهابه
وعقب الطمع ردوا على الحزم حافين = يشمت مشير وهقه يوم جابه
سلم لهم في الهوش عند امخلين = يوردون مفتوق الجنابي نصابه
عاداتهم في الحرب نطح الملايين = ويرسون كما ترسي رواسي هضابه
وان جاء نهار فيه جموع مرزين = واشتب نار الحرب والله كفابه
يوم السبيعي ماشي له بجمعين = سهج المحل وراح ماله مهابه
جنب محله والبيوت المبنين = في شبرمن ممساه وسط الشعابه
عند المزين فعلهم يعجب العين = لعيون من كن البرد في عذابه