عزاه من قلبا" به الفين عله=تجمعا" بالقلب وا عز تالي
من كل صوب هموم قلبي يجله=هموم قلبي شفت منهن الهوالي
والعقل يامساعد غدى فيه خله=كله سبب ياخوك سود الليالي
سبة وليف ماقرى بالمجله=عاش البداوه بين مر وحالي
صدفه صدفة ابو الرموش المظله=من عقب عشر اسنين شفته قبالي
في وسط سوق ومنزله ما ندله=عقب البطا واجهت زاهي الدلالي
قعد يراقبني وانا فاطن له=ونادى عليه وقلت عزي لحالي
رجعت له خجلان كله رضى له=وحصل اللقاء بين غالي وغالي
سلم عليه وأزرق الدمع هله=وأنا بعد دمعي على الخد سالي
قال انت شايب قلت ويش الادله=يقول شيبك ماله اول تالي
قلت الكبر يابنت الاجواد عله=هذا الصحيح وصح قول يقالي
قالت انت وينك قلت وين انت بله=فريت ادور لك بين السهالي
اول سنه فقدان خلا" لخله=من شوفت المرحان جاني هبالي
ادور لزولك وأنا مهتوي له=ومن شانكم عديت روس الطوالي
وثاني سنه الجمس يمك نتله=حروت منازلكم يمين وشمالي
خط عكاش وموتري صاحي له=بأرض خلى ماداج فيها الحلالي
الجمس طاوعني وانا منصحا" له=خوي جنب ولا يحب العطالي
وثالث سنه دوارتي لك ممله=ضيعت شخص بالمحبه صفالي
شخص ملك روحي وروحي فدله=غصب علي فرقاكم ماطرالي
ذي قصتي عطيتك العلم كله=لاشك عطني اعلومكم بالكمالي
يقول من فرقاك قلبي حصل له=دقه سريع وعندي الضغط عالي
راح الزمان الزين واقفى بحله=وبيت الشعر خلاص شي محالي
عقب البداوه ساكن لي بفله=عندي خدم وامشي على كيف بالي
وسيارة وسواقها مستقله=يمشي على كيفي ومشيه عدالي
اما انت مالي شف فيك لله=ياشايب ابعد روح لأم العيالي
ارتاح في وسط البيت والفرض صله=واستر ماواجهت باللي مضالي
وقال السموحه وقلت ماقلت زله=والله ما اتبع واحدا" مابغاني
وقال الوداع وقلت انا ما احتمله=ليتك على غيبتك وارجي الوصالي
واقفى يابوفارس وانا مشتقي له=افزع يابن عمي وهات الدواء لي