::: مـنتدى قبيلـة الـدواسـر الـرسمي :::

المراجل يامحمد تبي وسعة صدر=ماتبي رجل(ن) على طول لاعبّا يثور
اقمع النفس الضعيفه وراقب وانتظر=واعرف ان الكايده تنكسر عند الصبور
انثر القوه على الحلم يصبح لك قدر =لاتفكك ذيّ عن ذيّ تدخل فــ امحظور
مهب معنى ذا توطّي ارقبتك للبشر=عز نفسك لاتولّي فــ الملاقا دبور
لويزيد الوقت جوره وحظك ينصهر=لاتحطم / رد / حاول / وخطط للعبور
ضيّر الصعبه على السهله وخلّك حذر=لاتماري بانتصارك ويذبحك الغرور
لازم انك اتحشم عمرك عن الوجه الودر=واللسان حصان لاطاش يلحق بك قصور
مد يمناك لرفيقك الى جا يعتذر=واكسبه في قولة انك امسامح وامعذور
قدّم الجزله على اللي يخالطها قشر=في المجالس فل دايم احجاجك للحضور
بالك تواجه عسر في لين .. و لين بعسر=انتصفها خل ميلتك تذكرة المرور
لاتحاقر أي كلمه لو انها من بزر=مايحكم الهرج أيام وسنين وشهور
لاتخطّم لاتحاكى عليه .. وتنفجر=اتركه لين يتكلم وعقّب في سرور
لايغط النوم عينك مع فرض الفجر =واطلب الله جعل ياقاك صكات القبور
لاتباسى في صلاتك على ان دينك يسر=الولي متوعّد اللي قضى فاسق فجور
افتح المجلس ولحّن على صوت النجر=اغد ملفى للمشاكيل وعيال الصقور
كرّم الطّرقي الى جاك تعبان وسدر=قل تقهوى ثم تعشى وهات اله البخور
خل صيتك يقهر البخل ويعز الفقر=خل من صرّ الدنانير أعصابه تفور
فوق هذا ياكحيلان خلّك تدّهر=مع قصيرك لاتردد بتضبيط الأمور
لنشغل عنّك تمرّه وتنشده الخبر=ياعسى ماشر علامك ياغايب ماتزور
ان تضايق يوم فرّج عليه امن الكدر=وقّف بحالك ومالك وصامل ماتبور
والوصل في والدينك مثل غصن الشجر=لونه أبطى مارويته بيذبل ياامعثور
ان جحدت احسانهم يوم تندم لك دهر=والليالي لازم انها على الظالم تدور
والجناحين احرص انها تعيب وتنكسر=مايهد الطير من غيرها لونه جسور
الأخو لوّك بتهديه من عمرك عمر=ماتوفّي .. لنه لك لبّ ولغيرك قشور
خذ وأنا عمّك كلامي نصيحه واعتبر=مايخسر (ونعم) رجّال في الشدّه صبور

وسلامتكم