أشوف ديّاني وقف لي على الباب=يبي الوفا منيّ ويطلب حسابه
ماينسيّ دينٍ تقفّاه طلاب=الدين مايوفيه كثر الطلابه
يافيصل أودعّك توديع الاحباب=لاتحتريه انّه يجي من غيابه
غيبة دهر ماهي شهر عدّ وحساب=في مظلمٍ ينهال فوقي ترابه
ابيك ماتجزع وتفزع وترتاب=انّ جاك من ينعي ويشلع ثيابه
عمر البكا مافاد حيٍ ولاثاب=لوّ سرّ غيرك كان سرّ الندابه
اعزم وشم وأصعد من المجد مرقاب=واطلب لبوك انّه يخفف عذابه
وعليك بخوانك وربعك والاقراب=حقيّ عليك مواصلك للقرابه
ومن بينكم لاينقل الهرج سبّاب=ترى دمار الدار نقل السبابه
ومن الرجال الى تخيّرت الاصحاب=تخيّر اللي مايغيّر جوابه
مغلاق باب الشر حلال الانشاب=زبن الدخيل الى تنصىّ جنابه
وابعد عن الدوني ولوّ مرةٍ طاب=لزوم يظهر لك مرادٍ عيابه
وانصى الرجال الى تخيّرت الانساب=كل يعوّض به يكون النسابه
وانشد عن المزبي ترى العرق جذاّب=عرق الردى لابد يجذب جذابه
بلغتك الاعلام من غير نجّاب=والحر يعرف من خطاه وصوابه