لقيت في واسط رجال مشاهير = ولقيت بالحمر رجال مهيله
ياحي والله من رجال مناعير= قبيلة ياحيها من قبيله
دواسرا يثنون دون المعاشير=يوم كل يقتضي من عميله
لجا نهار فيه للثار تشهير= من طاح قدم نحورهم عزتي له
ويوم الحرايب يبعدون المشاوير=وعدوهم سو المنايا تجيله
والضيف لاجاهم بحشمه وتقدير=وقصيرهم يدله نهاره وليله
وافين بالماجوب لوهم معاسير=وفعل يمانيهم عليهم دليله
وبيوت مفتوحتة للخطاطير=ورجالهم دايم تحب الجميله
ياحي والله من رجال مسافير=وفعولهم بين القبايل جليله

الله يبيض وجه باتل وبيشان= وسفر واخوه سعيدلهم التحيه
مجيكم واجب عليه يالاخوان=مادام راسي حي فرض عليه
محبة الطيبين ذربين الايمان=تبقى بروحي دامت النفس حيه
ومن حبكم جيت هذيك الاوطان= واسط والاحمر كنها ملك ليه
ربي عساه السيل في غر الامزان=يمطر عليها كل صبح وعشيه
دارا لها بالمجد رمزا وعنوان=ورجالها بهم الكرم والحميه
دارا بها للضيف منصى ومسكان=قد سنها هذال تبقى وصيه
وصية تبقى على طول الازمان=دروبها الاجناب والأهليه
يشهد لك التاريخ ياابن وقيان=ويشهد لك الله يازبون المنيه
وتشهد لك العربان ياطير حوران=ياكم ذبح واعطى جزل العطيه
ينصونه العربان حظرا وبدوان=كريم سبلا حزة المعسريه
ومن يفعلى الاحسان يجزى بالاحسان=ويلقى ثوابه عند رب البريه
وأخر رجال شانهم في العرب شان=مامات من يخر خلافه حليه
يانعم والله يالمناعير ضفران=نسل الحرار مزبنين الجنيه
قوما لهم بالمجد ساسا وبنيان=الله يديم اهل العزوم القويه
قوما الى ركبوا على الخيل فرسان=دواسرا يردون حوض المنيه
الكم تحيه ياهل العرف والشان=من شاعر السبعان جتكم هديه

المشاركة الأصلية كتبت بواسطة مبارك الخييلي (المشاركة 185792) لاهنت يالشاعر ولد الشاعر وتقبل خالص التحيه مني والسلام عليكم ورحمته وبركاته الــخـــيـــيـــلـــــي