ياللـي تنشـد ماعليّـه تخاليـف=ولنته مداوي مقلتي مـن رمدهـا
عايش بغفله في علوم وسواليـف=وانـا لياليّـه توالـي هـددهـا
أفـز للمعـروف وافـز للضيـف=واثني الجميله لو عميلي جحدهـا
واقدّر اللي لـه عليّـه معاريـف=وربعي خطيتهم تمـوت بمهدهـا
واثني بوقت اللازمه والمواقيـف=ولحدٍ ذكر في قمـةٍ مـا صعدهـا
ودنياي عيّت لا تجيلي على الكيف=باحت خفـاي الله يبيـد جهدهـا
لو جيت اوصفها عديمة تواصيف=المسعد اللي ما يجي في نصدهـا
تغنج وخلق الله عليها مشاعيـف=تمـدهـم بحبالـهـا وتعقـدهـا
دايـم مخالبهـا حـدادٍ مهاديـف=وان مست الاطناب تثبت وتدهـا
والنفس لقمه والمنايا خواطيـف=ومن هاب له من غبةٍ ما وردهـا
ويالله في نـوٍ قنوفـه مراديـف=براقهـا يلمـع ويـرزم رعدهـا
تاخذ ثمان ايام سحبـه مقانيـف=حقوق وسميـه بحيلـك مددهـا
غثو المسايل بالشجر كنه الليـف=ديموم سبلٍ مختلـط مـع بردهـا
منه المحاجر والخباري مذاريـف=وامزونها تـردم ويكثـر لبدهـا
لين ام سالم به تجـر الغطاريـف=وتنسابه النفس الشقيـه نكدهـا
وبعد اسبوع يفع نبت الشفاشيف=وتسمن به العرا وتطنـخ ولدهـا
ولاعد تجيب البدو طار المعاليـف=-يا ونسها يا فرحهـا يـا سعدهـا
تتبع هوى شقح البكار المشاعيف=بـدوٍ ومفتـاح الجمايـل بيدهـا
والعمر عـدٍ والليالـي مغاريـف=والنفس مـا يشبعهـا الا لحدهـا

المشاركة الأصلية كتبت بواسطة ابن وتيد السباعي (المشاركة 166743) والعمر عـدٍ والليالـي مغاريـف......والنفس ما يشبعهـا الا لحدهـا الله بيت عن قصيده صح لسانك ولسان الشاعر الكبير/ سعود القت وبيض الله وجهك على هذه القصيده الجزله والرائعه

المشاركة الأصلية كتبت بواسطة صبي الملازيم (المشاركة 166753) قصيد جزلة في معانيها وافية بيض الله وجهك صح لسان القت

المشاركة الأصلية كتبت بواسطة ابو زيد الغييثي (المشاركة 166789) الاستاذ الكبيـــــــــــر/ صـــــالـــــح الجـــــعيــــدي بيض الله على وجهك على اطروحاتك الرئعة وصح اللسان الشاعر / سعـــــــود القــــت محبك ومغليك ابـــــو زيد الغييثي

المشاركة الأصلية كتبت بواسطة خـالد الودعـاني (المشاركة 166808) أفـز للمعـروف وافـز للضيـف واثني الجميله لو عميلي جحدهـا اللــه لا يهيــــنك على هذه القصيده ونتتظر منك المزيد والجــديد

المشاركة الأصلية كتبت بواسطة فيصل بن جزاء (المشاركة 166871) ابومحمد لاهنت على الاختيار الجميل والمميز وصح السان الشاعر سعود القت تقبل خالص التقدير والاحترام