ياالله وانا عبدك لوامرك طايع=ياواحد ما خاب من يلتجى به
تفرج لمن لاعه من الوقت لايع=شاف العجايب فالحياه العجيبه
الوقت عز مجالسين الربايع=والقرم والطيب تردى نصيبه
واللى من اول من حساب البضايع=اليوم له بين المناعير هيبه
والشعر جاه اليوم هافى ومايع=والكل يشكى من مفارق حبيبه
الشعر صاعه تالى الوقت صايع=متى يطيب الشعر مما بلى به
شعر ماهو حول السنع والوقايع=جره غراب فى رياض رطيبه
مادام وضعه بين شاري وبايع=حطو على الشعر الحقيقى تصيبه
ولى زمان المحكمات الروايع=اللى على اهل العرف ماهى صعيبه
وان كان مالله ثم راع الرفايع=والا ترى شعر العرب فى مصيبه
هذاك ابن جدلان بالصيت ذايع=سعد سعد ياسعد من ينتخى به
قصايده بين القصايد طلا يع=نوادر يحكى بها وتحكى به
الشاعر الوافى حميد الطبايع=ابو محمد دام راسه بطيبه
الاكلبى يستاهل انقول رايع=شعارنا فالمملكه تقتدى به
بلغ سلامى واشكره يابن شايع=عنى وعن شعار ربعى عتيبه

الله يحييى خطوتك يابن شايع=انته وعلم الطيب اللى تجيبه
يالله طلبتك طيبات الشوايع=يوم ان شايعه الفتى من نصيبه
عذب الفياض ان هب منها ذعايع=يفتخ لها المشتاق ازارير جيبه
واقلبى الالباب ظامى وجايع=سقيت ديار اهل العقول اللبيبه
العرف عند العارفين ايترايع=سيل ايترايع من مجارى شعيبه
جانى من الروقي بيوت روايع=عز الله انها يابن صالح عجيبه
وليا مشى لك عاصى الشعر طايع=ماهيب يا مدهوش روق بغريبه
لوان زين الشعر يوخذ قلايع=قوم عليكم ياعتيبه حريبه