الحمد لله عدما هلت أمطار = وعداد ما فاضت غروب الركايا
و عداد ما ندعيه في سر وجهار = الواحد المعبود رب البرايا
أهلا هلا يالي لفوا عد ما سار = فوق الوطى و عداد بيض النوايا
في شيحة الأجداد مارد ومصدار = مواكر السابق وساع الهوايا
بالمذنب اللي له مع الجود تذكار = أهل الشجاعة والكرم والحمايا
يولاد عمي بالمراجل لكم كار = أهل الشيم و محاربين الخطايا
و لكل له شيمه وقيمه ومقدار = الله يجنبكم دروب المنايا
لهل الفخر والجود وافين الأشبار = للمرجله يردون ورد الضمايا
ويردون حوض الموت قصاف الأعمار = أهل الشجاعة يوم صفق السرايا
عيد الذي له بالكرم صيت و أذكار = الشيخ أبو صالح وسيع الفجايا
أمير بالشدايد يوم الزمن جار = وقصر على العايل رفيع الحجايا
والنادر اللي عادته شبة النار = الشيخ أبو يحيى زبون الونايا
أهل الشجاعة يوم روغات الأبصار = و عصر المساغب من كبار العطايا
و عبدالعزيز اللي على الكون مغوار = يشهد على قولي جميع البرايا
و عياله الشجعان وافين اخيار = أهل المروه حافظين الوصايا
يوم الشماسية مقاصير واسوار = جو الزعيريه عليها حمايا
من دونها ما قدموا ملس الأعذار = كم طامع قفت سبوره فنايا
عصر مضافيها لذيذات الأثمار = كل عرفها بالمدن والقرايا
وصالح وليف الجود والوالد البار = راعي الشرف والدين عوق الوشايا
و أبو علي مثل البليهي إلى ثار = ستر الثناله يوم غيره عرايا
مني عليكم لابتي صغار وكبار = تحيه من فيض عوج الحنايا
أولاد زايد ياذرا الضيف والجار = بيض الوجيه اللي نداها هدايا
الكل منكم جاد يا سجن الأسرار = كل على العليا يسوق المطايا
سلآيل السابق مقاديم الآحرار = فيكم من أولكم وصوف و مزايا
و أنا أحمد الله شفت بالعين ما صار = والله عليم البينه والخفايا
في ظل حكام لهم مجد و طوار = وحنا لهم وقت الشدايد فدايا
وصلاة ربي عدما طاير طار = على النبي ساد كل البرايا