::: مـنتدى قبيلـة الـدواسـر الـرسمي ::: - اخـوي لو فـرق الاسـم فالبطـاقـات ..

- :: قسم إبداعات شعراء المنتدى ومساجلاتهم :: (http://alduwaser.org/vb/forumdisplay.php?f=17)

- - اخـوي لو فـرق الاسـم فالبطـاقـات .. (http://alduwaser.org/vb/showthread.php?t=60512)

اخـوي لو فـرق الاسـم فالبطـاقـات ..

السلام عليكم ورحمة الله وبركاته

هذه القصيده قلتها فاخوي / سلطان بن علي الشدادي الحارثي

والحقيقه سلطان يستاهل اكثر من قصيده على مواقفه الرجوليه معي

اليكم هذه المتواضعه واتمنى تعجبكم ..

الهاجس اللـي مايحضـر بالابيـات=في ماقفـن تلـزم عليـه القصايـد
انا اشهد انه عرضتـن لاي شمـات=لاصـار مايبـدع بيوتـن جـدايـد
ياراكب اللـي مرهيـن بالمسافـات=مبعد عمـس راع الشبـوح البعايـد
جيبن جديدن من جديـد المديـلات=فكسـار والفكسـار غالـي وكايـد
مايشتريه اللـي رصيـده ريـالات=ياكـود منهـو مايحسـب الفوايـد
لكنّ من حافه علـى الجيـب نيـات=المـال فالفكسـار ماهـوب بـايـد
مطلق وجه من يعشقـون المهمـات=لاطـال نـوم مكبريـن الوسـايـد
مركب هل الطالات واهـل المـروات=اللي لهـم فعـل المراجـل شهايـد
امقـرب ديـارن مداهـن بعيـدات=لامن رسى فالخـط يطـوي البدايـد
صوتـه ليامنّـه صـرخ بالكفَـرَات=بكـي اليتيـم اللـي بلتـه الشدايـد
كن مقدمه وجـه طخمـاً مالبنيـات=اللي على العشاق جـور وضهايـد
تمشي وتعطي للعشاشيـق غمـزات=ليـن اشعلـت عشاقهـا بالوقـايـد
وكنه ليا من طاف واعطى الاشارات=حرن كفـخ ثـم ارتمـح للشرايـد
وكنـه ليامنـه تمـايـل بلـفـات=شيخن على مركـاه رايـه سدايـد
اليـا هـزع مالخـط فالجرهديـات=تسمع تقاسيـم الحصـى فالحدايـد
يفهق غبار القـاع لاشـد نمـرات=فهق الهبايـب مرزمـات الرعايـد
ياصل مواصيلـن بعيـد وصعيبـات=علـى الوعـر والمهمهيـات نايـد
واليا سرا فالليـل يكشـخ بليتـات=منهـا غـدا فالخـط مثـل القلايـد
الـوان طبلونـه تلاويـن شمعـات=في حفلة اللـي يحتـرون الوعايـد
مراتبـه مثـل الكنـب فالعمـارات=في مجلس اللـي يكرمـون الولايـد
عليـه لانتـاج الصناعـه علامـات=علامتـن تشبـه لتيجـان رايــد
صناعة اللي يبدعـون الصناعـات=فنس الخشوم اللـي سـواة الرفايـد
ياراكبـه شيـك جميـع العيـارات=واسرح مع الغطلاس والنور سايـد
انحر ديار اهل الفعـول الجميـلات=اللـي لهـم فعـل الجمايـل عوايـد
نصّه ( قيا ) ياراعي الطيب بالـذّات=بيت اصوكن فالضيق دايـم سنايـد
قرمن معرب جـد ويهـوم هومـات=صميدعـن فالحـف يـرّث نكـايـد
حفيد قومـن يعشقـون البطـولات=يوم الجزيره بيـن حـرب وزهايـد
اشاوسـن تـارد حيـاض المنيـات=ومن فعلهم فالجـرح مالـه ضمايـد
اخوي لو فـرق الاسـم فالبطاقـات=مايبعـد اصحـاب النقـى والعوايـد
عون الرفيق اللي ضروفه شديـدات=يوم الردي فالضيـق ماهـوب فايـد
سلطان كسـاب الفعـول الجزيـلات=من لاد حـارث كاسبيـن الحمايـد
انا اشهد ان لك مع هل العرف رايات=تنشر لك البيضـا علـى كـل نايـد
من دارنـا فالخـرج بلـغ تحيـات=معهـا سلامـي والبيـوت الفرايـد

( قـيـا ) .. ديرة سلطان على طريق الجنوب بعد الطايف