علمٍ لفاني كدر البال تكدير=الله لا يجزاء الرسايل بالأحسان
أفتر فكري و أختلف عندي السير=عجزت لا أقوى صدمت العلم يا أخوان
دغش رحل من عالم لعالمٍ غير=أكثر له الدعوه بعفوٍ وغفران
يوم الثلوث الصبح جات المقادير=واخذ الوداعه خالق الأنس والجان
فيالله يا عالم خفي الأسارير=يا واحدٍ لا قال كن كل شي كان
طهر ذنوبه من خطأ النفس تطهير=وجازه بعفوٍ منك يا خير رحمان
وأجعل مقره في رياضٍ مزاهير=في جنة الفردوس يا رب الأنسان
ونور ظلام القبر يالله تنوير=واجعل جليسه نور طاعات و إيمان
وأجبر عزانا فيه يا رب تجبير=والهم ذويه الصبر صبراً وسلوان
وصبر عياله من عنا البعد تصبير=وارحم صغيرٍ عبرته وسط الأعيان
يا ابو بطي تبكيك سود المحاجير=بدمعٍ تحدر وأحرق الدمع الأوجان
ويبكونك رجالٍ كرامٍ مناعير=عودتهم بالطيب لاجاو ضيفان
وتبكي عليك دلال بنٍ مناحير=هذه مبهرها وهذه بميزان
كريم سبلا ما يحسب المخاسير= ريف الضعيف اللي عليه الدهر شان
ويبكي عليك المنتدى والمشاهير=حيثك لهم محبوب في كل الأحيان
حبك بكل قلوبهم كنه النير=ماش(ن) يزيحه لو يطول(ن) الأزمان
وتبكيك جزلات البيوت المعاسير=حيثك مصخرها على كل محيان
وللجزل و الجزلين صفت طوابير=حيثه معنونها على الجزل عنوان
وأبكيك انا يا ابو بطي بالتعابير=عليك دمعي مثل همال ودان
ولولاي مؤمن بالقدر والمقادير=شقيت جيبٍ بالحزن صار مليان
فــيالله يا منشئ المزون الشخاتير=يا منزلٍ غيثك على ذيك الأوطان
ترش قبره لين يزهر نواوير=وتظل قبره من ضليلات الأغصان
وختامها صلوا على منبع الخير=محمد الهادي على خير برهان