بعد ماهدا الجو وعجـاج العواصـف راح = مـراح مريـب والعواصـيـف مقفـيـه
تهيـد وتعـاود عجهـا الحـارق الذبـاح = ولاهيـب مأمونـه وحمـقـى وشـريـه
مع الوقـت داهلنـا علـى عجهـا اللفـاح = ولو هي تجور اضحت عواصف طبيعيـه
وانا باستغل الوقـت وابحـر وانـا سبـاح = وبطلـق عنـان الهجـس وعطيـه حريـه
ولا احد يلومه كـان طـول وسـده بـاح = تـراه متوقـف فتـرة مـاهـي شـويـه
بمعنى اعذرونا وصبروا والقلـوب صحـاح = وخلوا الصـدور وسـاع لبيـوت منقيـه
بخلي هجوسي في بحور الشعـر سـواح = وقدهـو شفـوق وبـه لواهيـب قيضيـه
هجوس توقف ماتوقـف عسـر وصـلاح = لاوالله يشـهـد بالخـفـا عـالـم النـيـه
يساير ظـروف الوقـت ماهمـه المـداح = ولالـه ورى القيفـان حاجـات مرجـيـه
يراعي شعور الغير وان كان هاض وساح = يـدور سمـان الهـرج ويجنـب العـيـه
وراعي الهروج العوج واللي نشد بالحـاح = قليـل المعرفـه كـل امانـيـه وهمـيـه
يروج خلافي هرج ويقـول شعـره بـاح = يشكـك بهجـس ماهـي خيـال صيفيـه
يحسب العمر كله ضحوك وحكي ومـزاح = والاشعـار طــول الـوقـت صبحـيـه وعصريه
لونه فطين فاهم ماطلب ليضـاح = غشيـم ولانـي فاضـي لــه ولازيــه
عدودي غزيره من وردها صدر مرتـاحب = فضـل الولـي بالخيـر تذكـر ومطريـه
ولا زادهـا ولا نقصهـا كـلام (ابـراح) = ضعاف النفوس اهـل القلـوب الحقوديـه
ووقت مضى كلـه جـروح والـم ونيـاح = والاسبـاب معروفـه وخطـره ومدميـه
هجوس العوارف حسب ظني تصير اشحاح = تقـل وتوقـف وان عصتـهـم فجبـريـه
وياللأسف بعض الظنون ارجعـت لريـاح = وخابت وطارت واثر الاشكـال صوريـه
بوقت عصيب فيه الاجـوا حـزن وتـراح = ونـار الحرايـب عادهـا ماطفـت حيـه
صفى جو بعض الناس للولـف والافـراح = واقامـوا امسيـات والقصايـد غرامـيـه
ثلاثـة شعاعيـر بـدو ونتهـو بالـصـاح = تواصيفهم بـه فاقـت اوصـاف حوريـه
تناسوا الظـروف وحـب خلانهـم ماتـاح = لهـم فرصـة التذكيـر باوضـاع قاسيـه
عربنا تبـاد ودمهـم مـن عداهـم سـاح = وشـعـارنـا بـاداتـهـم سـهــوم ( -- )
الاكيف طاب الجـو وصدورهـم شـراح = لسرد الغـزل باصـوات مهيـب عفويـه
وحطوا سباق من ظفر بـه ينـال وشـاح = وشـاح الحبيبـه همهـم واكبـر امنـيـه
نخاوي وفزعات وبعضهـم عقالـه طـاح = صيـاح وخـبـط ونفـعـالات مـدويـه
الى من سمعهم جاهل فـاح راسـه فـاح = يقول العـرب ماشيـن للحـرب رجليـه
وهو مادرا ان الوضـع بلـى يـالاحي لاح = فـراق وغـرام احبـاب غاليـن وشكيـه
وشعر الغزل مهوب عيب وطـب اجـراح = يداوي عليـل مونـس فـي الحشـا كيـه
ولا الوم من قالـه ابـد والليالـي مـلاح = وجو الشعر صافـي والاوضـاع مغريـه
ياطيبه بوقته والحشـا كـن فيـه ارمـاح = وضـاق الصـدر والهجـس وداك بنحيـه
يخلـي الصـدر مستانـس عايـش بفيـاح =ويبعـد هواجيـسـك وتسـلـى بقافـيـه
لكن الشعر وقت الشدايـد نبيه سـلاح = يسـاهـم ويـثـر والقـوافـي بطولـيـه
ويمدي على غض النهد والخصر مسبـاح = ابو ردف نابـي والخـدود (الدمشقيـه !)
وشعر الغزل له باب يقفـل ولـه مفتـاح = يراعي ظـروف الوقـت هـاذي وهاذيـه
وكل بكيفه قلـت وجهـة نظـر بفصـاح = وعرف الشعر جلـه غـدا طـاق طاقيـه
وصهيون مهمـا تفعلـه فالعـرب طيـاح = يبـون السـلامـه والاهـانـات عـاديـه
تلقنـهـم دروس مـريـره تبـيـد ارواح = وتسـرف ووتبطـش فالعروبـه ومحميـه
وماسوتـه عـادي وجايـز لهـا ويـبـاح = مـن العصبـه اللـي تدعـي بالحقوقيـه
ولاللعـرب فيهـا حقـوق ولا استصـلاح = وقراراتهـم فيهـا علـى طـول منفـيـه
حـرام عليهـا العـدل والظالـم البجـاح = مسيطـر عليهـا كلمتـه غصـب ماشيـه
للاسـلام سـم ولليهـود العسـل والقـاح =عسى الله يشتـت قـوة البـوش ووخيـه
لكن ياهل المله تـرا العـز يبغـى كفـاح =كفـاح موحـد لا اجتهـادات شخصـيـه
وتحقيق هـذا العـز فـي طاعـة الفتـاح = وتطبيـق شـرعـة والعقـيـده حنيفـيـه
ماهـو بالتفـرق والتغـرب والاستفـتـاح =ولا بالتطـبـع والدساتـيـر وضـعـيـه
ومدام العرب مثل التنك في البحـر طفـاح =مع الموج تمشي غصب وان كف مرميـه
بتبطـي سرائيـل وتزايـد بـلا نـطـاح =وتفـرض سيادتهـا ولاهيـب معصـيـه
وحرب جرت فيها العبر وفهمـوا اللمـاح = مخطـط لهـا تخطيـط ماجـات سـريـه
اسرائيل تبغـى فرصـة جاتهـا بالـراح = ولا للتفـاوض وقـت عـنـد اليهـوديـه
ولون الخطر محصور فالقـرد والتمسـاح = وعلى من تبعهم كانـت اخطـار مشريـه
الاول عـدو ظاهـر ذاك خلـف سـنـاح = كـلاهـم خطـيـر ذاك داب وذا حـيـه
لكن الافاعي جـرت الـداب ليـن اجتـاح = جحور الافاعي وصبحـت عمـي مطميـه
وعم الخطر وضحت لفاعي كما الاشبـاح =تهـوش وتــذرا ماتـواجـه علانـيـه
ولو كافحت وظهر لها ريش مـاش جنـاح = وريـش بـدون جنـاح مـالـه اهمـيـه
تجنت على من حولها مـا لهـا مصـلاح = سوى فزعـة ال نفـس الفصيلـه وحنيـه
وفعـلا تحقـق والمـلا ابصـاره شتـاح = بـهـا وبفاعيلـهـا وهـاذيـك منسـيـه
وهي تعتبر مـا صـار نصـر مدامه زاح = عيون الملا عـن ذيـك فالنفـس مرضيـه
ولا همها كم طاح كـم مـات كـم نـزاح = ولوهو علـى حسـاب البـلاد السياحيـه
وذيك الفصيلـه كـان ماتقـدر المسـراح = حوالـي الجحـور مكممـات ومجفـيـه
وذا الوقت هاضت وكثرت واصبح المرواح = علـى كيفهـا مهيـب تقـمـع ومنهـيـه
بعد مالمروض راح شاخن غـدن سـراح = حـرار وكاتمهـا دخـل راسـه الخـيـه
افاعي خطيره سمها في الشـدوق ذحـاح = تكنـه تبـي فرصـه لدفـقـه مواتـيـه
لااحد ينخدع فيهـا لـو اشكالهـا وضـاح = مظاهـر جميلـه والدواخـيـل زنجـيـه
على غيرنا ماظـن تقـدر عساهـا المـاح = وحنـا انشغلـنـا بـالأمـور الحياتـيـه
تراهـا بـدت تـزداد وجنودهـا جمـاح = تبـي وقفـة مـنـا سريـعـه وجـديـه
خذو حذركم منها ولو هـي تفـح افحـاح = تراها الخطر تخفـي لنـا السـم والسيـه
وبه سوس ينخر في الجذع من تحت لحاح = جنوب وغروب وشـرق خمسيـن بالميـه
اذا ماتكـافـح بالمبـيـدات والالـقــاح = تزايـد تعـم انحـا الوسـط والشمالـيـه
ولا ياهل الملـه تـرا الفـرش والطـراح = ماهـو دايـم دافـي والاوقـات عيـديـه
الاعـدا تداعـى مابقـى للعقيـد صــاح = قـرود وخنـازيـر وكــلاب بشـريـه
الاعدا تجمع تتحـد صاحـي مـع طـاح = وحنـا مـن التشتيـت عشـنـا بـزاويـه
الاعـدا تخطـط تسهـر الليـل للاصبـاح = لهـدم العقيـده والعـرب فـي خلافـيـه
الاعـدا تعاملنـا كأنـا خشـب والــواح = وحـنـا نعاملـهـم باسالـيـب راقـيـه
كراماتنـا نزعـت وحـن دايـم صـفـاح = والاعــدا استغلـوهـا وزادو عدائـيـه
يسب النبـي ويهـان دينـه نقـوم صيـاح = جهدنـا نطـالـب باعـتـذارات خطـيـه
واذا ما حصل ولا حصل منهم استسمـاح = نهـدي القضـيـه والملـفـات مطـويـه
قبل فترة بقـر الدنمـارك فـي الصفـاح = تصـور رسـول الله برسمـات زوريـه
وياما وياما مـن التطـاول ومـن لجـراح = بياتي مـن اعـداء الديـن للديـن ونبيـه
مدام (الهبر لحمر ) ظهـر للمـلا لـواح = يلـوح بيـده ويلـقـي دروس شركـيـه
يقول النبـي خيـر المـلا كلهـم سفـاح = وهــو والله السـفـاح واب البهيمـيـه
صليب على صدره يعبـده مسـا وصبـاح = ونظـرات عينـه دايمـا فـي مواطـيـه
خضوعه ونظراته تحت وان مشى بدبـاح = ينـاظـر صليـبـه ويتبـجـح بتحتـيـه
يكن الحقد والكـره وعلـن بهـا صـراح = يوقـد شـراره حـرب شعـوى صليبيـه
ماهو جاهل يعـذر هـذا راهـب سحـاح = خـطـاه متعـمـد ويتهـكـم بسخـريـه
بابـا الفتيكـان ادواه قـوم كمـا الجـراح = تكسـر علـى راسـه صليبـه وكرسيـه
تهجده هجـاد لـو عليـه الحـرس نبـاح = تراهـم جهـام مــا يـسـاون روبـيـه
لكن وين حنا والـدواء يبغـي استصـلاح = وكيف الصـلاح ولابـه احكـام شرعيـه
صحيح العـدد واجـد يطيرهـم المسفـاح !! = جهدهـم صيـاح وثـورة فـي فضائـيـه
ومهما تغطرسـت العـدا ديننـا الرجـاح = وغيـره مـن الاديـان تبطـل ووقتـيـه
الا يالله ارحـم حالنـا وضعنـا فـضـاح = يهان النبـي والديـن والكـل فـي غيـه
وبنصح رجال عرفهم في النسب ضحضاح = يكفـون عـنـه ويسلمـونـا الحـزازيـه
وكل مثبـت منسبـه والحكـي لـو شـاح =عن الحق ماحـد لـد بـه هـو وراعيـه
نقاش النسب محتاج توثيـق راوي صـاح = ولا فيـه نـشـدة شـيـخ واراء ذاتـيـه
ولا احد مكلف به سوى العارف الصحـاح = وغير العـوارف ياهـل العـرف معفيـه
ابو جهل سيد قريش فـي الاخـره نـواح = بـنـار تلـظـى والقبيـلـه قريـشـيـه
وبلال مجهول النسب فـي عـدن صـداح = بتقـواه بالتـقـوى الكـرامـات مأتـيـه
نعيش امن وامان وبلدنـا رخـى وفسـاح =وعسى الله يديم الامن بارجـاء السعوديـه
وصلوا على خير الورى الهادي المصبـاح = وعـذري لكـم وختـم جوابـي وقافيه

لكن الشعر وقـت الشدايـد نبيـه سـلاح=يساهـم ويـثـر والقـوافـي بطولـيـه
ويمدي على غض النهد والخصر مسبـاح=ابو ردف نابـي والخـدود (الدمشقيـه !)
وشعر الغزل له باب يقفـل ولـه مفتـاح=يراعي ظـروف الوقـت هـاذي وهاذيـه
وكل بكيفه قلـت وجهـة نظـر بفصـاح=وعرف الشعر جلـه غـدا طـاق طاقيـه

صح لسانك وبيض الله وجهك وكثر الله من أمثالك
ياخي وينك المنتدى بحاجة ماسة لمن هم بمثل حضورك وتفاعلك
سجل اعجابي ومتابعتي ولك خالص محبتي ،،،،

الأخ / محمد الغريري
.
اتشرف بحضورك
.
وفي انتظارك

الاخ العزيز / عبدالله بن عريمه
صح بدنك
لاهنت على حضورك الذي شرفني
واشادتك اعتز بها

الغالي محب الجميع دغش البطي
.
مرورك مكسب وشرف لنا
.
لاهنت ولك الشكر والتقدير

الأخ العزيز / نايف بن مسرع
لاهنت على مرورك
تواجدك واشادتك نعتز بها
تقبل الشكر والتقدير

المشاركة الأصلية كتبت بواسطة دغش البطي لكن ياهل المله تـرا العـز يبغـى كفـاح كفـاح موحـد لا اجتهـادات شخصـيـه وتحقيق هـذا العـز فـي طاعـة الفتـاح وتطبيـق شرعـة والعقـيـده حنيفـيـه ماهـو بالتفـرق والتغـرب والاستفتـاح ولا بالتطـبـع والدساتـيـر وضـعـيـه الشاعر الكبير عامر النتيفات بيض الله وجهك يالقرم على هذه المعلقة وصح الله لسانك لين ترضى والله يرحم حال المسلمين تقبل ودي وتقديري محبك ومحب الجميع

الغالي نمر الاشيب
.
شرفتنا بمرورك
.
وصح الله بدنك
.
ولك كل الشكر والتقدير

الأخ العزيز الواضح
لاهنت على حضورك وغالي والطلب رخيص
وسوف يتحقق باذن الله
لاهنت وتقبل شكري وتقديري

الأخ قرم القروم
.
ابشر بمطلبك انشاء الله
وشاكر ومقدر مرورك وتفاعلك مع الموضوع

الاخ العزيز هايف العماني
حضورك وتواجدك يسعدنا
لك مني الشكر والتقدير

طير شلوى
شاكر ومقدر تواجدك
وعنوانك سوف ينظم الى العناوين المطروحه
وسوف يتم اختيار واحد منها

الاخت العزيزه الجازي
تواجدك يشرفنا
وتقبلي كل الشكر والتقدير