دارت دواليـب الليـالـي والأيــام=وتبلّدت ياسعـود بعـض الأحاسيـس
من كثر ماشفنا وعفنـا مـن العـام=دنيًا يشيب ابها الذي يرضع الديـس
الغرب غـازي للعروبـه والإسـلام=وحنّا على الشاشات صرنا مراويـس
صرنا مسـارح للمذابـح والإجـرام=وسيوفنا بعد الفخـر عـوّدت فيـس
نزحف ورى والغرب يمشـون قـدّام=مرخيـن أذانينـا للتقريـر ميليـس
مابينـا يقضـون عبّـاد الأصـنـام=ويكذب علانا هيس بن هيس بن هيس
العام كان الذبح فـي شعـب صـدام=وهذا السنه بشـار جتـه التلاميـس
والله واعلم من هم اللي ورى الشـام=أفكارهـم واطماعهـم مالهـا قيـس
أفكارهـم تنجـح وتخطيطهـم سـام=وتخطيطنـا يفشـل بكـل المقاييـس
وصارت رجاوينا كوابيـس وأوهـام=ولا اردى من الأوهام غير الكوابيـس
ننكر..وتكتبها فقـط رؤوس الأقـلام=ونضيّـع اللّـي نكتبـه فالقراطيـس
تاسيسنـا علـى البطولـه والإقـدام=والظاهر التاسيـس يحتـاج تأسيـس
وصارت مشاكلنا صعيبـات وعظـام=كبـر الجبـال الشامخـات الدلابيـس
وشلنا حمول الظيـم بأكـوام وأكـوام=ماهي حمول العيس ياحـادي العيـس
هَمّ العرب صـار الأغانـي والأفـلام=ونطّـرد الكـوره وحنّـا مفالـيـس
وحيـاه رومنسيّـه وحُـب وأحـلام=من سالفة ليلى إلـى سالفـة قيـس
وتاريـخ فريـسً نحفظـه بالأرقـام=واليوم جات أرقام من غيـر فرّيـس
ياجبال مكه صيّحـي فـوق الاهـرام=ويجيبك المغـرب بعيـد المراميـس
يانهر دجله صيح في نجـد والشـام=وتسمع صدى سينا من جبال بالقيس
ولا والّـذي نـزل تبـارك والأنعـام=لن ماصحانا لـن نغـدي فالدهاليـس
أبليـس خلاّنـا تشاتيـت وأقـسـام=يارب تنصرنا على الغـرب وأبليـس