لا شفت من يركب على قب الافراس=عظم سلام وخل ربعك يحيون
هذا ولد فهاد في يوم الادماس=اهل الشكاله علمهم له يردون
من لابة للجود تاج ونوماس=كم حلقة في درع الاعدا يحلون
لا عسعس الوقت وطغى جوس عساس=وصاح المنادي يا الدواسر يلبون
تطوي ركايبهم فلاهم من الباس=ما ريحو لين المعادي يهجدون
وان دارت الدنيا رحاها للتعاس=دارو عليها لنشايب يفكون
خطلان الايدي لابة ترفع الراس=دخيلهم دونه سيوف يسلون
دواسر ماهم بيخشون الافلاس=سباقةٍ من خير ربي يمدون
وعبدالله الفصام ساس على ساس=ماخذ جميع اللي قديم يسنون
له قيمة ماهيب تحصى بمقياس=ناره مناره فوق طود يشلون
ومنقيته عيس قليلات الاجناس=عوص النضا له والنوادر يشرون
خذ علمهم وافهم ترا العلم نبراس=ولا خير فيما لا التوارخ يقرون
ولا شفت ابن فهاد قطاع الارماس=دق التحيه خل ربعك يدقون