الله أكبر ياشهيد خصه الله بالشهادة= دون دينه والوطن والعرض روحه ماذخرها
حقق الله مبتغاه وحقق الله له مراده= جنه عرض السماء والارض لمثاله عمرها
شيخنا اللي طول عمره ماتوانا في جهاده= لنتفاضه ولعت من قدحه ازناده شررها
شيخنا قايد حماس ونعم والله بالقيادة = جنن اسرائيل وأمريكا بعد معها قهرها
أحمد السيرة على الله دايم كل اعتماده= فارس مغوار روحه في سبيل الله نذرها
ما أستكان ولا قبل شوف اليهودي في بلاده= قاوم المحتل مافكر بقوّته وخطرها
عاجز الاطراف بيّن عجزنا قو اعتقاده= الشجاعه والعزم والصبر ربه به حصرها
بين موت الشيخ واستسلام صدام اقصاده= الجبان يموت عايش والبطل موته ظفرها
شيخنا مازال حي لو ترجل عن جواده= عاش مرهوب الجناب ومات وفعاله حفرها
غاله الدب الاحمر والغدر له طبع وعاده= ذاك شارون الخيانه نيته صدره ضمرها
الله أكبر ياعرب وش ذا البلاهه والبلاده= شيخها يقتل وهو منها على مدة نظرها
الله أكبر ياشعوب تدفن الرأس بو ساده= صار هز الوسط حاضرها مع مصدر فخرها
أقنعو بالذيل من عقب الزعامه والسياده= أمه ضعف العقيدة سوستن فيها نخرها
كل نار تاليتها حتى لو شبت رماده= مايفيدك ماضي إعصور توارت في غبرها
قلدوا تقليد الأعمى مظهر الغرب وفساده= أمه ضاعت هويّتها ومطموس أثرها
سووّا سوات الغراب اللي تغنى في سواده= والغراب ان جاء دليل القوم عز الله دمرها
حاول الممشى مثل ممشى الحمامه في ركاده= ضيع المشيه والأخرى من غبائه ماقدرها
التخاذل والتنازع بينهم دقوا وتاده = أمه يا للأسف من جهلها كلن حقرها
القطيع يساق والراعي تعمق في رقاده= والحقوق المهدره ضاعت وراعيها هدرها
مع فلسطين السليبه راحت عراق الرفاده= والعراق الثانيه منها على مدة بصرها
والخطر بالامه الثكلى تزايد بشتداده= والخنازير البغيضه ماحدن وقف نحرها
مالها إلا خادم البيتين في رايه سداده= سيفنا سيف الله المسلول عدوانه كسرها
المليك اللي تعجز العجز ماتنجب نداده= والليال المظلمه ماغير أبو فيصل قمرها
الزعيم اللي تلوق به الزعامه والرياده= الفهد كم ليله عدت على شعبه سهرها
الفهد للمملكه والدين سيف في غماده= مايحوف حدودها طامع ولا يذكر شبرها
الفهد عز الديار ومعه عبدالله ازناده= والي العهد الامين ولايته كلن ذكرها
وثالث الاثنين سلطان السعد وجه السعاده= قايد الجيش المظفر قوة باذنه نصرها
وآخر الدعوى عسى من ضل يهديه لرشاده= مايطاوع من كفر بأنعام ربه ماشكرها

يالمهاة اللي على القانص صعيبـه=يفشل القناص ماياصـل خبرهـا
والله أنه لو تعب وأتعب صحيبـه=ماوصلها لو تبـع جـرة أثرهـا
مكسبه من طردهـا هـمّ وغليبـه=والحظيظ اللي إلى بانـت نظرهـا
ياعنود الصيد من جيتـي نصيبـه=نعمـة والكافـر اللـي ماشكرهـا
والفياض اللي بها صرتي ربيبـه=من رضى الله دايما يخضر شجرها
وكل قاع تسلكـه ينبـت شعيبـه=يختلط ريحة نفلهـا مـع زهرهـا
وكل شعب سال يفرح بك جذيبـه=ينتحي لك ليـن قيعانـك غمرهـا
عاشقك لو حزت للقـاع الغشيبـه=مايحسب حساب للقاع أو وعرهـا
في سبيلك لو نفـد تالـي زهيبـه=ماثناه المـوت والصيـده سبرهـا
خشف ريم في طبايعهـا غريبـه=تستذير من الهواء لامـن نحرهـا
بس أنا اللي رايعت لي ذا العجيبـه=باخص في سرها واعرف ديرهـا
ياعجيبه وصف بعيونـي حبيبـه=من عرف مثلك حياته ماخسرهـا

الشعر واجد والمعاني عديده=لكن دغش ماينرثى في قصيده
يرثى بدعوات الصلاة الخفيه=في حزة فيها الإجابه أكيده
حقه علينا بالدعاء في كل حزه=عساه في جناة عدن سعيده
آمين ياهل الخير وأدعوله آمين=ياجعل روحه عند ربي شهيده
خسارته على الجماعه كبيره=وأيضاً على الأجناب صدمه شديده
ياكبر فرجة طيّب الذكر كبراه=عزالله إنا فاقدين فقيده
بتغيب بغيابه جميلات الأفعال=حتى المبادي والخصال الحميده
والمرجله وعلومها للرجاجيل=ماعاد منها عقب فقده بديده
خل الشعر وأن جاء مجاله وطاريه=جزيرة فيها الكنوز الفريده
الإبداع منه وفيه لاشك مطبوع=فن ماغير أبومحمد يجيده
الله يصلح بالعطا في عياله=والبر ياصل من ولده إلى حفيده
يالله يالمرحوم تجبر عزانا=والهم ذويه الصبر باللي تريده

أي والله اطنخ وانطنخ وارفع الراس = لاقالوا اني بالهويه سعودي
من روس قوم وطيب الساس لي ساس = وبلادي الحره تغيض الحسودي
صدق انتمائي وانتسابي والاحساس = للاسره اللي عن سواها تزودي
ال سعود اضحواللامجاد مقياس = اسرة وفاء بالشعب تصعد صعودي
وتقودنا للعز والاسم نوماس = مصدر فخر للشعب حضر ونفودي
استرجع الذكرى معا كل هوجاس = من عهد ابو تركي زعيم الاسودي
وافل صفحات تلالات بقرطاس = بيضا وغير الحبر مافيه سودي
اسطورة التاريخ تحكي بها الناس = عبدالعزيز المعجزه بالوجودي
اللي خطف من بين فكين واضراس = عذرا تسما به رقت للسنودي
موحد الامه على خير نبراس = مازال نهجه في عياله يسودي
ارث مليك بالعرب ماله اجناس = ملك القلوب اللي نباه محمودي
خليفة الاسلام للدين حراس = خادم بيوت الله وعنها يذودي
عطب الضرايب عادته من الارماس = وتفكيره ارحب من الفضا والحدودي
بنك العطا للشعب مايعلن افلاس = باسط يمينه بالمكارم يجودي
تحيا به غصون من الوقت يباس = غيث عطا يمناه يروي الكبودي
من غير ابو متعب للامداح لباس = ومدح يجنب عنه مافيه فودي
ارسل في مدى الشعر عساس = وايتيه في بحر العظيم ويعودي
لوني ببحر الشعر سابح وغطاس =في بحره الطامي تخون الزنودي
ولو القصايد تنكتب در والماس = ولو هي تعلق كاالقلايد ورودي
تبقى كلامن ينكتب فوق كراس = ارتبه باحساس حسب الجهودي
والا ملكنا كل ماهب نسناس = شعبه عطاه اعظم ولاء بالعهودي
اغليه واغلي تربتن فوقها داس = والله وخلق الله عليها شهودي
حلمي يابو متعب قبل قطف الانفاس = تقبيل كتفن يحتمل كل كودي

الا يازمن كملتها وشبقى ماصار = على الوجه جتني لطمة كنت مبعدها
سواياك فيني يازمن توجع الكفار = تفرح قلوب شوفي بخير لاهدها
تِضحك جبان بالمراجل قصير اشبار = رِبوة عجوزه بالسوالف يقلدها
قضى كل عمره عندها ماظهر له كار = ردي الجهد ربعه مع الناس نقدها
صدق بالمثل لاقيل هذا الزمن دوار = ولكن زماني داربي لين زودها
ولايازماني طيحة الفارس المغوار = تصحي القلوب النايمه من مراقدها
عليك الله اكبر طال صبري ونا صبار = وعليك اشهد الله والخلايق مشهدها
ولايابو ناصر باح سدي ودمي فار = على علة من شهر شعبان اكابدها
صبرت وتحملت القهر لو دمي حار = على قول هراج المجالس توسدها
وصلت لحدود الياس واخر مدى المشوار = ونا بين هل وكيف حاير وارددها
اناجي عظيم عالم بخافي الاسرار = عليه الدعاوي في اخر الليل اسندها
سميع مجيب قادر مقتدر جبار = يحل العقد ويحاسب اللي معقدها
ولاياالغريري وانت حر ونسل احرار = مساعيك في خدمة بن اخيك جندها
وشرواك يابن اهديهد القرم مايحتار = يفّرج على روح قضاها يهددها
اليا كبرت الدعوى وجات العلوم كبار = هموم الرفيق اللي لجالك تبددها
ونا في ضميري واهج مثل وهج النار = على وهجها فاحت دلال مركدها
تلاحق رفيقك قبل تقفي به الاقدار = عسى فزعتك نيران جوفي تبردها

أن كان ربي حدني صوب عثمان=لا والله الا روح العود فيها
زول شديد مكفهر وزعلان=وازريت لفهم غايته وهتديها
ماشفت وجهه يوم يضحك وطربان=لوكان تشرى ضحكته بشتريها
طيب ولكن إختباراته أحيان=تقضي على أحلام نمت ورتجيها
نظام شمبر جير طبقه بتقان=كلمه يمين يسار لامايبيها
يقول حتى الواسطه كان من كان=عندي ماتمشي كلمتن وعتنيها
وعند إختبار المرء يكرم أو يهان=ماينجح الا من فؤاده نبيها
ومادامه مطوع وفي قلبه إيمان=عساه يرحم حالة بشتكيها
يازول هونها ترى الوضع تعبان=بعض اللوايح لاتشدد عليها
خل الضعوف تعيش تذكر بلاحسان=ونت الصفات الطيبه تحتويها
يبن السودان أرض العطا خير الأوطان=موطن رجال الجود للي يجيها
بليز هلب ادرايفر واز قود مان=تو دي كيم تو بي بروبلم هفيها
قدر ظروف الزول داير شو الان=داير لك الله حاجته تحتميها
عطني الأمان ولك جميل وعرفان=ومن يفعل المعروف ماله شبيها
حسن وعبدالله وعلي وعدنان=يرجون صادق فزعتك ونت أبيها

يابو يوسف والليالي تدور وتستدير=وأنت وين تكون في الوقت لادارت رحاه
وأنت ياغانم صديق حساوي لي نصير=والحسا ياغانم أخلاصها طاغي حلاه
طلتك في الديس باتشي كما البدر المنير=ياماشاء الله من حلافيك وش باقي وراه
أتفائل كل صبح بوجهك يالمدير=ياصديقي والصداقه لها قيمه وجاه
عدني ماليوم عندك حساوي مستجير=لجل من شفته بسوق الحسا محدن معاه
يرسل الموت المحقق من الطرف الخطير=أشهد من صابته عينها ماله نجاه
لبسته لبسة دلع تخلف العقل الخبير=والبلا والموت لابان ماتحت العباه
ريحة العطر المركز تفوح وتستثير=يوم عرض قدم عيني وهو يسحب إخطاه
قلت أكيد إن القمر مالسما حول يسير=يوم شفته كل خلق الله تهلل وراه
مترف بالحسن طاغي ولامثله نظير=كن مابالقيصريه من العالم سواه
آية في الحسن والله على خلقه قدير=ليت ياغانم تحدد لنا أرضه من سماه
يوم سلم قلت يسعد مساك الله بخير=والسلامه منك ياذابح العالم غناه
منوتي لوباتمنى فقط منوة فقير=ليت منهو لودقايق يضمه في حشاه

الله الله يالمخاريم مثلي وش يقول= من غلاكم كل بيت يشوقني غناه
الثنى والمدح فيكم يجي حسب الاصول = اشهدانكم كفو للمدح ماحي زهاه
الشجاعه كانها بالشجاعه يالفحول= ثاركم مدبول والعلم ياصل منتاه
لاعترض وسم المنيعي على ورك الذلول= هيبة المشعاب من هيبة قروم وراه
محزم مايرتخي في ضحى يوماً يهول= تقهر العيال ويشوف بعيونه عماه
عزوة تعجبك لاقامت تصول او تجول= تلحق المسيوق ماراح لحامو علاه
والله انهم خير من يركب ظهور الخيول= في نهارن كل فارس وجوده من جداه
هم سندنا في زمان الشدايد لو يطول = هم هل الفزعات بالوقت لادارت رحاه
والكرم لاعدو اهل الكرم ماله زحول= غير صبيان المخاريم في وجه وجاه
الكرم طبع لهم والطبايع ماتزول= في زمان فات ماياجد الطرقي عشاه
هم ملاذ اللي جثبت به من الجوع الرحول= بار به وقته وخانه وخارت به قواه
ياعجب عين الخوي لو يدور الحول حول= كل يوم يزود من زايد العشره غلاه
الشواهد ماثله والدلايل بالفعول= ومن يصم اذنيه بالعين بالصفحه قراه
يابني عمي صدى الشعر للشاعر رسول= شاعر فيكم تغنى ولايبغى وصاه
دافع التقدير ساقه عسى يلقى قبول = وانتو اهل العز لاصار للعز اتجاه
حيثكم له مكسب وراس ماله ومحصول= من طناخة روسكم معرفتكم له غناه
ايهبا شعرن تجاوز هل الطاله عجول= وايهبا من لايفاخر بكم طول الحياه
لايمي في حب ذكر المخاريم مهبول= مايعرف يميز الوقت وجهه من قفاه
قالها اللي يبدع الشعر في كل الفصول= شاعر معناه راقي وعالي مستواه
شاعر من روس قوم اليا قالت تطول= من وداعين تطوع سلاطين الطغاه
اهل سيفاً ومنسف تعرفه كل العقول= والعوارف تعرف القصد من هذا وذاه

في ليلة من ليالي العيد جيت الكويت = دارن صدوق المخايل جعله ايعلها
ديرة شيوخن لهم بالمجد ذكر وصيت = اخوان مريم هل الوقفات في حلها
افز مع ذكرها من حبها مادريت = رغم ان هذة الزياره لوله لجلها
شعور طاغي واحسه بالحشا مستميت = استوطنت ساحة ماغيرها احتلها
حفظت تاريخها من كثر ماله قريت = وعرفت ليه العرب ماهيب بتملــــها
سلام ياشعبها المضياف في كل بيت = ياديرة الخير يااللي وافرن ظلــــها
وسلام ياربعي اللي من غلاهم عنيت =اسوق نفسي لداع الواجب ارضا لها
دواسر عز راسي عزوتي لاعتزيت = العزوه اللي كثير القوم تذعن لـــــها
شاعر وامثل قبيله كامله كمبليت = من طيبهم قدموني قدر واجلـــــــــها
شاعرن ليا من على المنبر طلعت ورقيت = اطلع طلوع يشرف لابتي كلها
اشب نار القصيده كيف لامن بغيت = واحكم مقاديرها من قبل لازلـــــــــها
وامدها قدر للحضار من دون ويت = ماارتاح حتى يقولو بعدها سلــــــــها
في ملتقى منتدى خطلان الايدي حظيت = في فرصة والقصايد طاب لي هلها
في حضرة شيوخ ربعي يوم حظيت بخيت = اقدم المسك والريحان مع فلها
في منتدى دام عزه شامخن مثل هيت = مقاصده ساميه والصعبه يذلها
والطايله نلتها يااللي وفيت وكفيت = ياالفارس اللي تحّمل دقها وجلـــــــها
اخص بالذكر ابو براك لامن ثنيت = لاثقل حمل البليهي قام واشتلـــــــــــها
ياالتغلبي اشهدنك بالمراجل وفيت = للعز تبسط يمين الجود وتفلــــــــــــها
في موقع مايعبر عنه عشرين بيت = مقدام قوم مدى الهقوات ياصلـــــــها
والعز جمعا للقبيله والتفرق مقيت = خلو قلوب العدا اتموت من غلــــــــها
واخر كلامي لكم عذري على مانسيت = عذب القصايد حلاوتها مع قلــــها

خل المعاذير عنك مالها خانه=سامحت واجد ونفس الحر لوامه
والنفس طابت وشبعانه ورويانه=والصايم افطر عقب ماطول اصيامه
عرش الغلا فأر مأرب زعزع اركانه=وانهد شوفي بعينك تالي احطامه
وش ارتجي منك عقب اليوم يافلانه=مدام قصر الغلا هديتي احلامه
روحي مراح القطا لاظف جنحانه=في كنة القيظ والميراد قدامه
والحب فالقلب مات ويبس شريانه=والحب لامات اقول ان دفنه اكرامه
والحب تاج الغلا والصدق عنوانه=وانته وشكلك حرام تلبس اوسامه
والحب باصك شباكه وبيبانه=والقلب باطوعه واللجمه بالجامه
اللي جرى مستحيل وصعب نسيانه=ماينمحي لو يطول الوقت وايامه
والرجل لاقال يحمي كلمة اللسانه=ياكود رجل ردي عزوم وهلامه
ونا حسن كان قدري جاهل شانه=خلقت من فضل ربي عالي الهامه
من روس قوم تحوش الجزل وسمانه=عن مرتع الذل عزامه وجزامه
ماذل نفسي لغير الله سبحانه=واشوم عن موقف الحقران وقزامه
والحب للي يعرف الحب وثمانه=ماهوب موضه وسياره وخدامه
هذاك بركز على المرقاب نيشانه=قربه يداوي جروح القلب وألامه
جعلك فدا اللي قريت الشوق بأعيانه=ياعل قلبي بقربه يحسن اختامه

ياأله الكون يالفرد الصمد رب الخلايق=اسألك ماغيرك اللي نسأله صبر وثباتي
مومنين بالقضاء يوم القضا ماعنه عايق=حكمة الله والقدر لاحان مامنها نجاتي
لو جزعنا في غياب اللي رحل والبال ضايق=مالنا غير التوجد والدعا له بالصلاتي
الفقيد اللي خذاه الموت والدنيا بوايق=راح جعله في جنان الخلد بأذن لله يباتي
ياحسن برثيك وعيوني من ادموعي غرايق=عقب فقدك ياحسن وش عاد باقي في حياتي
سيرتك والشاهد لله عند تفصيل الدقايق=سيرة عطرة وتحفضها دولايب الرواتي
اشهد ان ماعاد لامثالك على الدنيا علايق=كامل والكامل اللي حط بك زين الصفاتي
ياسلايل من بنا للسالفه فعل وطرايق=مودي جاره من جداره سنين ماضياتي
فيك منه وعنه وعيونك على العليا توايق=والحميه لبن عمك بالمراجل حاضراتي
مايفوقك بالشهامه والكرم والصدق فايق=غير من علمك معنا الطيب في عرض الوصاتي
المبادي ثابته والفعل مايبغي وثايق=ياعزيز النفس ماتصعب عليك الكايداتي
يوم غيرك سايقه للمصلحه عشرين سايق=يملكون المال لكن مايعرفون الزكاتي
انت بالنفس الغنيه شايقك للعز شايق=سمعتك يذكر صداها ياحسن باربع جهاتي
جعل قبرك من رضى لله روضة ازهور وحدايق=وصالح الاعمال خير الباقيات الصالحاتي
يابن جارلله مدام الشعر توثيق وحقايق=من غلاك الوصف يعجز ماتوفيه اكلماتي
كل ماكتب بيت اشوفه قاصر ماهوب لايق=انت فوق الشعر وبيوت القصيد الشامخاتي
قلت ابا كتب صادق اشعوري ولو مانيب رايق=المهم اكتب وعبر عن لهيب وسط ذاتي
ياعسى يجبر عزا قلب تواقد به حرايق=كلما تطري عليه يجر ونه وعبراتي

ياقصيد مايطول وجه من عده وقاله =والله اني ماتنامس به ولااعده واقوله
وياقصيد مايجملني مع راعي الجماله = عقبه لو كل جمهور المسارح صفقوا له
وياقصيد يمتحني في الرخاء باعذب خياله =يبتليني وابتلش في كثرته عرضه وطوله
جاء لزومك واحتزم لاتحسب الدعوى سهاله =المهمه مدح شيخ تتعب الشاعر فعوله
والثناء والمدح يابن حفيظ لاجينا مجاله =كل شاعر ياعقيد القوم يشعب لك ذلوله
من غلاك اخترت حمرا بنت حر من سلاله =منوة الركبي الى منه تغنى في رحوله
علها تاصلك ياظابط موازين الشكاله =بالقصيد اللي يشرفني مع اللي يسمعوله
كانها من يمك غيرك كذبت خبث وحياله =الردي لامن تردى عند وجهه ومحبوله
وانت ياعز الرفيق ومن قصد بيتك وجاله =تستحق المدح من قبلي وبعدي من فحوله
يابو سالم والشعر من طلتك يبدا هلاله =وكل بيت يكتسي ثوب الفخر وانقى سموله
ياولد من سيس الشيخه على مبدا واصاله =التواضع والجناب السمح في فنه وصوله
جعل عود خلفك يرحمه ربي ويعفاله =كل سيئه بذن ربي من دعاء الابن مغسوله
والشهاده لله الفرد الصمد جل جلاله =من يحب الله حبب فيه خلقة وشهدوله
وانت ذكرك من شمال طريف لاوادي صلاله =من سمع به يالامير اثنى عليه ونعموله
من رجال بالمراجل كاسبين كل طاله =لاد شكر مايضام اللي زبنهم وافزعوله
ياوريث المجد كله من جنوبه لاشماله =ياسنام العز يوم العز شرع لك قبوله
شيختك ماهيب شيخة مال لاوالله بساله =شيخة في كل مرقاب لها راية بطوله
شيخ عز ومجلسك مدهال ويظلل ظلاله =عند بابه تنقضي الحاجات في يسر وسهوله
الشجاعه والكرم والدين من فايض اخصاله =والوفاء والحلم والحكمة مواريها جبوله
والصخاء والبذل والمدات من غالي حلاله =من كريم باسطن يمناه ماهيب مغلوله
جلسته مقطع حقوق ووقفتة وقفة صماله =كل شي ينتهي لاشر بيمناه محلوله
لابس بشت الشموخ وشامخ في كل حاله =مثل برج الخرج في وقفة صموده مع صموله
حب ربعك شاربه من طيب راسك لثماله =وانت من طيبة جنابك ساكن قلوب الحموله
الاسامي واجده والفعل ماكلن زهاله =يفحم الشيخان فعلن تفعله ماياصلوله
سيرته ماهيب حياالله تكتب في عجاله =ماحصرها كل راوي لو رواها في فصوله
قالها لك شاعر ماعد شعره راس ماله =غير عرفك وانت عرفك راس ماله ومحصوله
شاعر معاناه لامن ظاق غنى ماطراله =من زمان يشب نار الحرب ويجهز خيوله
الليالي طرفت والعمر يمضي في زواله =والسنين عجاف والماطر تاخر في هطوله
والحمول ثقال والجمال مانوخ جماله =وان تلفت زاد همه ماحدن يمه وحوله
راحت ايامه يخيال كل صبح حسب فاله =والنصيب الشين يقرع كل صبح لي طبوله
علم مدري حلم ليل طال يامطول لياله =بين ذيك وذاك عقلي طار من شي يهوله
والسؤال يدور والسائل يكرر في سؤاله =والاجابه ضحكتن صارت على وجهي خجوله
قصة ماهيب من تاليف عبدالله فضاله =قصة قدلي ونفسي من سبايبها زعوله
سقتها لك وانت ابوها وانت زيزوم العداله =نوخت قدام بيتك يامحمد ومعقوله
ماسواك اللي يوردها على الجمه احباله =دلوك اللي لاجذبته يروي الضامي زلوله
دامك الله في الوجود ودام عزك في كماله =من فزع بك بذن ربي لابغى شي ينوله
الصلاة ختامها صلو على محمد واله =النبي اللي نصره الله على الشرك وفلوله

قمة جبل صدك تغايا من بعيد=وصحراء جفاك القاحله مالها حد
يتية فيها الشوف من دون تحديد=يرجع مدى شوفي كسير ومرتد
اطرد سراب الوصل في جرهد البيد=واطلق حمام الشوق من جاير الوجد
ورقا على روس الطوال الجلاميد=اخايل ابروق الوصل من على بعد
اسوق نفسي للوعر دون تمهيد=لو كان عزمي ياشقا الحال مجهد
القيظ حامي واشهب اللالي قيد=ظامي وصالك والظما يجرح الكبد
عد الروى تاردعلية المواريد=وانا على عدك اركابي تهبد
الله حسيبك وش بقا يااتلع الجيد=تكبر وانا نا اكبر والعذاب ايتجدد
يافاتنه يامترفه سيدت الغيد=طال انتظاري في رجا موعد الغد
متى مزون الوصل تمطر مواعيد=وتجود بوعود القا واصدق الود
قدام اعيدبك قبل ساعة العيد=ماعد فيني حيل يقوى على الصد

ياليل لو تدري بشوقي للاحباب = مالمتني لو اسهر الليل ياليل
غربه وهم وشوق الاحباب غلاب=والشوق مايحتاج ياليل تاويل
طال الغياب وغالي الناس لاغاب= ياليل ماتحلا بدونه تعاليل
من طول الغيبات ياليل وش جاب=جاب الغنايم جعلها له تساهيل
ياليل ياليل الهدى خير الاصحاب=ياماتحت جنحان سترك محاصيل
اكشف لك اسراري ولانيب مرتاب= واشعل بك حروف المشاعر قناديل
سر الغموض اللي على هامتك كاب= اكبر محفز للعنا والمواويل
ارقب قدومك واتباطاك بحساب=من عقب يوم متعبن ضّمر الخيل
اخذ فضاك الرحب بشتن وجلباب= عن عين عذالي وعن قايل قيل
ياماسريتك والدجا ثوب وحجاب=لعين الهنوف ام الرموش المضاليل
اللي دعتني دون تفصيل الاسباب=دايم تجدد لي الغلا والمواصيل
مابينها وبيني مشاريه وعتاب= تشهد على صادق وفاه المراسيل
مابيننا اكبر من عبارات الاعجاب= شي تغلل في ادّق التفاصيل
اسوقها لعيونها غيب ماهاب= ماخفت تطرحني صدوق المحابيل
لليل سر وسر الاسرار بكتاب=ماتعرف اسراره قلوب المهابيل
حاشاك ياليل السهر منت كذاب=لوان يقولو الليل مسرى جماميل

ياسراة ابها وياسودة عسير= العجايب سبع وانتي ثامنه
كل شي زين في ابها مثير= درة فوق السحايب قاطنه
المناطق من جمال ابها تغير= حطها الله فوق ماهي طامنه
جوها الخلاب منقطع النظير = يسرق الالباب وانت تعاينه
والمطر والغيم لاروح اعصير = هو شفا روح العليل الواهنه
قالها سلطان شاعرنا الكبير = مغريات العصر فيها كامنه
تغري الشاعر ومكنون الضمير = باالجمال ابها البهيه فاتنه
وش يجي مصياف باريس الشهير= واليمن والشام يوم اقارنه
جعلها دايم على عز وخير= هي مصيف اهل العقول الفاطنه
جنة في الارض والخالق قدير = لاذكرت الظاهر والباطنه
مابها عذروب والله الخبير= غير غلي اسعارها المتزامنه
والفقير يكوده الشي اليسير= كان ماعنده رصيد خازنه
مجبر يسبح مع الموج الغزير= والبحر وان ماقدرته هادنه
ماتبي الاموتر ومالن وفير =والعمر محدود ماحدن ضامنه
ذا شعوري وارسله عب الاثير= يفهمه راعي الشبح والشاحنه
قلت شي وباقين شين كثير= والغلا لبها البهيه صاينه
في كنف فيصل ملبسها الحرير= واحتضنها واطمنت وامنه
ايه ياابها عطاك الله لامير= والسعيد اللي بصدره حاضنه
عانقيه وفاخري مالك خشير= دامك اللي في فواده ساكنه
ابن خالد سيرته مسك وعبير= سعد منهو بالشدايد زابنه
مزبن الشيخان باليوم الخطير= والعدو يسحن دواه وطاحنه
فزعته تبصر بها عين الضرير= ينتصف له من زمان غابنه
فزعته يدري بها البزر الغرير= سيدي بلسم جروح مواطنه
اعشقه عن بعد لاشفته يسير= والمشاعر درهمت له حاينه
سيدي فيصل خلقه الله غير= والشعر في غير مدحه راكنه
السماحه في محياه السفير= والمكارم في جبينه باينه
مدته ماهوب فيها يستشير= من طناخة راس ماشي يوازنه
اشهد انه للشعر اكبر نصير= منه شعار الجزيره سامنه
اشهد ان شوفه على مثلي عسير= سعد من شافه وقبل ماتنه