النفس جردا والنوايـا مطاليـب=والوقت قاسي والخطايـا شرايـا
والعين تبغا من نظرها مكاسيـب=لاشك وافت من نظرهـا خطايـا
والقلب يبني مير بنيه مع الغيـب=واليا اقبلت دورات وقته عرايـا
والفكر يحسب مير جته المحاسيب=عكس افتكاره يوم جاتـه دهايـا

رد الثنا واجب على كل وافي=واجب على من يعرف اسلوم الاجواد

يستانس الشاعر على جال ضوه=في روضةٍ ماداجها كل عساس
ارضٍ ربيع وغاشي الجو نوه=ريح الخزامى تنتعش منه الانفاس
قرب معاميلك وكيفك وسوه=سوه وبهر لك من البن بقياس
زله وصبه صافيٍ في علوه=واشرب من الفنجال مايقعد الراس
هذي طراة العمر مادام توه=هي مطلبي مادمت حيٍ مع الناس
والدوسري ياناس لازان جوه=قصايده تجلا عنا الوقت والباس

علي الحرام انك شنب يابو زياد=وانك على العليا قدحت زنادها
كفو كفو يامن ذخرته فالعناد=فعله وفا بالمرجله وشدادها
سمح النبا فالنايبه مثل القناد=اليا وقف كفا بها او زادها
بصمه يمينك مثل ختم الاعتماد=منهو لقاها بشره بسعادها
جامع امور المرجله عنده عتاد=مثل الذخاير فالحزام ارتادها

رقيت في رجمٍ طويلٍ رقابه=كم اشقرٍ يعجب اليا اقفا مطيره
وكم ذيبٍ اشهب فوق راسه عوابه=مما صدف بالوقت حاله خطيره
وجريت صوتٍ للحزن فج بابه=وهيّض عليّ صوتي امورٍ كثيره
هيضّ عليّ همٍ بجوفي صوابه=ابطا وهو فالجوف ناره سعيره
ومن رقيتي همّي تكسر جرابه=وقام يعثا بضلوع به مستديره
وازريت اكنه يوم يزمي سرابه=كنه مثل قيضٍ بوقت الظهيره
وحولت من رجمٍ شكا من رقابه=ضيم الدهر يمشي دروبه عسيره
حولت منّه مالقيت الآجابه=لا لاقيٍ حلٍ ولا من ستيره
دنيا لها في كل شخصٍ طلابه=تلقا لها في كل شيٍ مسيره

كثرت هواجيس المعنّى مواريد=وعزي لحال اللي تكاثر وروده
هواجسٍ كنها عليّه مواعيد=معا ظلام الليل باول ركوده
كنّ الحشا يونس لضرب العباريد=لين الحشا ضاقت وسايع بنوده
امشي توال الليل بين الجراهيد=وافرح بما علاّ واحاول صعوده
اشكي همومي والهواجس مناكيد=متخالف التفكير حارت جهوده
اضرب على خطٍ ويرجع لي يعيد=عيّت تحلحل كل منها بزوده

والله اني كنتنا ادراك وابحث لك عذر=واتصدد منك علّك تفارقني وراك
مير كمل تالي الصبر واحتر الجمر=واحتما في داخل الجوف شيٍ من غثاك
ذي عوايد من جهل ماتعلم واعتبر=يوم عود فالمناحي مثل دبره خطاك
السنين تدور والعمر يقضي والدهر=في قفا الحيين يطرد واذا وافق عطاك
من جهل درب المراجل تدهور وانجبر=ينقل الجمره بكفه ووضعه في هلاك

اليا جفتك الدار في كل ميراد=عقب الجفا ماعاد فيها قعادي
وشلون تقعد والجفا جاك منقاد=ماخبر قعّاد الدهور استفادي
دارٍ بدار وطيّب البعد يّراد=لاصار طبٍ للقلوب البعادي
ارض الله اوسع من خيالك للاجواد=ماينلحق لحدودها والريادي
يسكن بها منهو على الطيب وراد=ويسكن بها منهو خبيث المبادي
ويظهر بها نبت النفل ماله اعداد=والحرمله تظهر على كل وادي
ويرقا بها القرناس في روس الاشهاد=وينزل بها بوم الخراب الهمادي
ويسري بها السرحان طوّاي الاجراد=ويقعد بها الحصني خبيث المرادي
واعرف تراها ماتجمّع بالآوكاد=ولا قاصر الحصني لذيب الجلادي
دك الركايب واسنح البيد شدّاد=وحذرا تدني للرخوم الشداي
في شامخ البيدا سواميح الامهاد=تجلى هموم اللي شكا للنكادي
ولاتلتفت لمقلب الهرج عمّاد=رخو العضود اللي خبيث الفوادي
اللي على الزله خبيثٍ وغداد=لو كان في هرجه كثير الودادي

لاباس يابستان ألاشعار لو رحت=معي معي في خافقي دوم تنعاد
تبقا وليفي داخل الروح مازحت=واقبل وداعي لك هنا بين الآجواد

البارحه نومي حرام" على الراس=يحرم على عيني ولا طب راسي
وحل محل النوم تسعين هوجاس=من غالي" أخطى ولا ني بناسي
أشارت" يشر بها مالها ساس= سياست" ما لي نها يا السياسي
أنت تحسب"ني ذاخر"دونك وداس=وأنت خابر اني قد عطيتك لباسي
هذا خطى واثر على جرح الاحساس=ادرى خطى الغالي وأداري احساسي
قالو فلان" قال ثم قلت لاباس = أقول عفوييه ولا فيه باسي