نصيحه لبعض الشيبان

**معلومات** **العضو** · 25-01-2011, 12:42 PM

حقيقة ان اغلب النصائح موجهه للشباب ولكني في هذه القصيدة حبيت
اوجه نصيحة لبعض الشيبان الذين نتأمل فيهم الخير
لعل يكون فيها فائدة
******

استح على لحيتك ياشايب الخير = وعرّب كلامك يارفيع المقامي
ياشايب الرحمان بعض التعابير = ترخص معانيها مقام الغلامي
وشرواك قدوه للرجال المناعير = بالعرف والحكمه وجزل الكلامي
وشرواك زيزومٍ يقود الطوابير = لا جاءْ نهارٍ فيه شدّ الحزامي
وشرواك شيخٍ حزّة الضيق ما يحير = صميدعٍ ينطح وجيه الجهامي
دليل ربعه في نهار المحاظير = قيدومهم في حرب وإلا سلامي
وله عند كل الربع حشمه وتقدير = ويفوز بالتوقير والاحترامي
وانته كبير ولك في القوم تاثير = وعلمك يكفي عن كثير العلامي
ولا صارت إلسانك سوات المناشير = وعلى عيوب الناس ميسمك حامي
وخيلك على شذب المقفي مغاوير = والهمز لك واللمز طبع وْمرامي
فهذا الذي من مثل شرواك ما يصير = وعليك يشمت من بسن الفطامي
ولو انها من جاهلٍ عمره صْغير = لمناه والبسناه ثوب الملامي
وش لون لاجت منك من غير تبرير = وانت الذي علمك فالاعلام زامي
خطا الكبير ولو تهاون به كْبير = ولا ينقبل عذره الى اخطا النظامي
وخطاك ما تمحى صداه المعاذير = لانه كبير من كبار الاسامي
شف عارضك فيه العبر والتفاكير = والشيب ما خذ له عليه اقتحامي
بيض النواصي زاحمنّ المغاتير = من التجارب والامور الجسامي
والواجب انك قدوة للجماهير = وعندك لمختلفين الارياء احتكامي
وتشارك العراف بالشور وتشير = وبالمعرفه تجلى عتيم الظلامي
وبيتك مضالٍ للوجيه المسافير = ومن يلتجي في هيبتك ما يضامي
وصلاة ربي عدّ ما غرّد الطير = على النبي فالمبتدا والختامي