آســآليب غير مقبــوله في تعاملآتنا مع الاطفال

**معلومات** **العضو** · 18-06-2010, 10:53 PM

بسم الله الرحمن الرحيم
اليوم نقلت لكم موضوع يتكلم عن موضوع يخص الاطفآل بصورهـ بحته لانه للاسف هالشي منتشر كثير بين الاسر
في تعآملآتهم مع اطفآلهم مآراح اتكلم عن العنف الجسدي لآن الحمدالله على كثر ماانتشر الا ان هالظاهره بدا الحد منهآ في كثير من المجآلآت
[ الاساءه النفسيه العاطفيه للآطفأل ]
هذا الموضوع اليرآح اتكلم عنه لان كثير نآس تستخدم هالشي بس ماهيب واعيه باضراها وناسيه ان اضرارها مب وقتيه بل هي للمدى البعييد وهم راح يلمسونها لاكبرو
تقريبا الاساءآت هذه قسمتها لكم لـ8 آقسآم وبحط على وآحد منهم مثآل

1 تحقير الطفل والاستهانه فيه
الاهل ماعندهم غير [ ياغبي , يااهبل , انت غلطه , انت عاله علينا , لو ماجبتك كان احسن ] ومن هالكلام طبعا كل الكلمات الجارحه تزعزع ثقته بنفسه وتضربها بالصميم ويستحقر هو نفسه لان الي حوالينه مستحقرينه وخاصه لاجآت هالكلمات بصوره متكرره او مثلا لجآب الولد معدل او نسبه منخفضه
شوف وش الكلام الي الاهل بقلونه له انت فاشل ماتفهم ماترفع الراس يعني لو قالوله انت ماستغليت وقتك صح او ماجلست تذاكر بوقت كافي شوفو الفرق بين الاسلوبين يعني لو استخدمو الاسلوب الثاني راح يكون افضل عليه من اسلوب التجريح .

2 البرود
لآجآك ولدك او بنتك وراسمه هالرسمه الي هي تشوفها ممتازه بالنسبه لها ولعمرها ويوم انها تجيك ومتحمسه توريك هالرسمه تقعد تصارخ فيها او تمشيها اي اي زينه والله انك مضيعه وقتك ع الفاضي
خلآص بترسخ في بالها انكم باردين معها ولاتحمسون وماتهتمون فيها ولا بانجازاتها الكبيره بالنسبه لها والصغيره بالنسبه لكم .

3 الدلع الزايد
آآآهـ يالدلع ماقلنا لا تدلعون بس بحدود في نااس تدليعم زايد ويوصل للسماجه قسم بالله وهم ناسين انهم بدلعهم الزايد هذا انهم يخربونه لانه مآارح يعرف يتعامل مع الظروف وواقع الحياه لاكبر ولاراح يقدر يتشارك مع الناس الي حوله مثلا لاجات الساعه 11 بالليل تدق الام على ولدها يالله ارجع البيت الوقت تاخر يقلها لا مابي بقعد تسكت وتخليه هنا راح بفقد الامآن نفسيا وآن اهله مايخافون عليه بعكس الولد الي امه بالقوه تدخله غصبا عن خشمه

4 القسوه
الطفل محتاج للحب للامان يبي احد يحتويه موب العكس يعني الولد لاغلط غلطه صغيره يروحون يعاقبونه بعقاب اكبر من الغلط الي هو مسويه او يعاقبونه على عقاب هو مايعرف ليه
علموه وش السبب ثم عاقبوه

5 التضارب
ويااااكثر مانشوفها ياكثرها
مثآل: دخلت البنت غرفه امها وقعدت تحووس باغراضها وكسرت لها عطر جاها هديه وغالي عليها تقعد تمارس عليها كل انواع العقاب جسدي ونفسي عشان تحسسها بغلاه هالشي الس كسرته وانه شي مرره يعز عليها وتقعد تسبسب فيها ومدري وشو ثمن بعد فتره تجيك زميلتها بالبيت ويصير لها قدام الام والبنت نفس الموقف يعني ان بنت زميلتها خربت شي لامها تجي هالحرمه وتقلها خلاص لاتهاوشينها وتقدرين تجيبين الي احسن منه وماصار الا كل خير وتهديها وياحرام ياهذيك البنت راح تعيش بحييره
وبتقل ثقتها بنفسها وبامها يعني تعامل معها شين ولمن انعاد الموقف لزميلتها تعاملت بشي ثاني
لاززم يكون الاسلووب واحد ومع الكل

6 التهديد
التهديد لازم يكوون بحدود شوفو كل شي لازم بحدود معقوله الاب يقعد يهدد بولده بعقوبات قوويه وهالولد موب فاهم شي من الي يقوله ابوه بس يشوف وجه منتفخ واحمر من زود العصبيه ويزيدها مثلا لاقله بروح اسوي شغله وبرجع اعاقبك هنا بيقعد الطفل ينتظر هالعقاب وكيف شكله ووش الاداه مثلا الي ابوه بيستخدمه ووش بيصير فيه ولا يجيك تهديد بطريقه ثانيه الي هي استحقاره قدام الكل يقعد يسب فيه ولا يطرده ولا يشوته برجله هذه كلها اشياء تهدد الطفل بالاحساس بالامان بين اهله بيصير دايم متوتر ومآراح يكون علآقات مع الناس

7 العزله
عااد هذه حاله خااصه من زوود الخوف تعزله عن الناس ولا يسوي شي الا هي معه وبجنبها وقدام عيونها ماتدري ان هالتصرفات راح تجيبله اكتئاب بالمستقبل هالخوف ماراح يستمر الا ااذا هي مستمره راح يستمر لحد مايكبر ويجيب بزران بعد

8 الرفض
هذه اخر نقطه واهم نقطه المفروض نرفض تصرفاتهم موب نرفض هم شخصيا يعني لآجاب مثل ماقلت معدل منخفض المفروض حنا نقوم نرفض التصرف موب نرفضه هو شخصيا يعني اقله تقدر تكون افضل وتجيب امتياز بالدراسه انا هنا رفضت التصرف اما لو قلت له انت فاشل وكسلان وطول عمرك كسلان هنا بكون رفضته هو شخصيته

خلاصه كلامي كله
ان الاسره الناجحه هي الي تحترم مشاعر اطفالها وترفع من معنوياتها وتفتح لهم المجال يعبرون عن انفسهم بتايد وعطف وحب وصبر من الاهل

اشوفكم على خير

**معلومات** **العضو** · 18-06-2010, 11:21 PM

ناصر الفصام "
يعطيك العافيه على طرحك الجميل ..ِِِ

**معلومات** **العضو** · 18-06-2010, 11:49 PM

ناصر الفصام الله يعطيك الخير ...موضوع مهم جدااااااا

لحماية الطفل من التعرض للامور الي تاثر بشخصيتة
تقبل تحيااااااااااااتي

**معلومات** **العضو** · 19-06-2010, 01:42 AM

ناصر الفصام

بارك الله فيك على الطرح المفيد

الله يعطيك العافيه

**معلومات** **العضو** · 19-06-2010, 12:40 PM

اقتباس:المشاركة الأصلية كتبت بواسطة عبدالرحمن آل بريكناصر الفصام "
يعطيك العافيه على طرحك الجميل ..ِِِ

الله يعافيك ولآهنت على المورور

**معلومات** **العضو** · 19-06-2010, 12:41 PM

اقتباس:المشاركة الأصلية كتبت بواسطة البدورناصر الفصام الله يعطيك الخير ...موضوع مهم جدااااااا

لحماية الطفل من التعرض للامور الي تاثر بشخصيتة
تقبل تحيااااااااااااتي