نادر مايحدث في زماننا هذا..الشاعر/نايف بن مسرع

**معلومات** **العضو** · 26-07-2010, 02:27 AM

هذه قصه حصلت على الشاعر /نايف بن مسرع
عندما استقر به الامر قبل عدة سنوات في الرياض استأجر له شقة في احد احياء الرياض وكان صاحب العمارة هو/الفديع بن مبارك المشعبي السبيعي وفي احدى السنوات جاء أحد إخوان بن مسرع من الوادي لإكمال دراسته في الرياض وسكن معه مما اضطر نايف للبحث عن سكن اكبر فأستأذن شاعرنا من صاحب العمارة لانه ربطته به جيرة طيبه وافهمه السبب فقال السبيعي اجل غلق المده وجعلك ماتشوف شر وكان قد بقي من المده اربعة اشهر.وفي الصباح اتى السبيعي لبن مسرع وقال ياليت تخلون بابكم مسكر لان فيه عمال بيطلعون للسطح يبنون غرفه للحارس فماكان من نايف الا انا قال ابشر..

وبعد مضي تقريبا شهرين اتى السبيعي مسير على نايف قال يانايف هذه مفاتيح الشقه اللي فوقكم انا بنيتها إضافة على الشقة الأولى وعلى الطلاق انه مايجيني ايجار لها وحاول معه نايف بشتى الوسائل أن يسترجع عن حلفه ويقبل بالإيجار ولكنه رفض ذلك رغم ارتفاع اسعار ايجار العمائر الأخرى وارتفاع الايجارات بشكل عام إلا أنه اشترى جيرة الدواسر وقدمها على كل شيء وهذا هو ديدن عيال الحمايل والطيب لايستغرب من اهل الطيب ولايستغرب من قبيله سبيع الطيب لانهم اهلا له.

وقبل عدة أيام تم دعوة الشاعر نايف بن مسرع إلى أحد الاحتفالات لقبيلة المشاعبة من سبيع وكان الداعي هو جاره السابق الفديع بن مبارك المشعبي السبيعي ، فاستعاد نايف بن مسرع الذكريات الجميلة مع جيرانه السابقين الفديع وجماعته وقال هذه القصيدة: .

من هجوس الشاعر إللي يحسّب وش يقول = لاحضر للشعر دافع وللمعنى طراه.
هاجس أما يجمل ويلقى له قبول= ولا أريح من عنا الشعر وأسلم من غثاه.
ليلة فيها يكفّي هل الذوق المثول= بينكم في حفلة إللي لهم وجه وجاه.
حفلة السبعان والنعم قبل أنطق وأقول = كنها ملك لهم في دواوين الرواه.
عزوة يشهد لها الوقت وكبار الفعول=يوم كلن من ذراعه يعدي عن حماه.
يكرمون الضيف لازاد في الوقت المحول= وفي نهار الهوش سرحان مضمون عشاه.
سعد منهم محزمه في نهارن به ذهول = وويل منهم باشهب اللال في الحرب خصماه.
سم يافديع السبيعي ودعوتكم وصول= وتلبية دعوتك عندي مثل فرض الصلاة.
ياصحيب في ثرى الطيب تزرع لك حقول = ولاحصدت إلا المدايح وأنا عندي وصاة.
أشهد الله وأشهد الخلق في عرض وطول = من بنى البيت فوق البيت وأهداه قصراه.
غير أبوفهد السبيعي عسى سنينه تطول = والله إني ماخبر ذا الزمن سوى سواه.
طيب من طيب راسه وجدانه فحول = وتاعب قبل المناسب على خاله أباه.
أمدح بشي أعرفه وثابت ومعقول =إبن هملان القريشي وأبومحمد غذاه.
وكلن رجل يعشق الطيب تخلد له فعول = يفعل العليا وتكفيه خلقه الله وراه.
ويوم ربي ساق رجلي وقاصرت الزحول = وراح عشر من سنيني من ألذ الحياة.
صرت كني مشعبي وافتخر فيهم واطول = ولو كثر مدحي بهم والله ما آصل منتهاه.
لاظهر لي طيّب(ن) منهم ونوخت الذلول = شاق عيني نجم آخر تبين في سماه.
وكان فيهم عيب مبطي وثابت مايزول=عيبهم ينسون جار بيوتهم دار اقرباه.

**معلومات** **العضو** · 26-07-2010, 03:00 AM

بيض الله وجهك يابومطر على نقل القصة والقصيدة

وصح لسان الشاعر الكبير / نايف بن مسرع ولا هو غريب

عليه الابداع ورد الجمايل وبيض الله وجه السبيعي على علمه

الغانم اللي يشرف ولا يستغرب فعل الطيب على سبيع الغلباء

**معلومات** **العضو** · 26-07-2010, 03:42 AM

الله لايهينك ياابو شيخة على الموضوع الطيب وصح الله لسان شاعرنا الجزل ابو عبد العزيز على قصيدته الجزلة ولاهان السبيعي وعز الله ان فعله يرفع الناس وعلمه الغانم ولايستغرب الطيب من سبيع الغلبا

**معلومات** **العضو** · 27-07-2010, 12:09 AM

شافي
محمد
لاهنتوا على تواجدكم وابوعبدالعزيز شاعر لايختلف عليه اثنين
والسبعان وسبعين نعم به

**معلومات** **العضو** · 27-07-2010, 03:22 AM

أبوعبدالعزيز بحر شعر وبحر طيب
وبيض الله وجه السبيعي على موقفه الطيب وليست غريبة عليهم
صح لسان شاعرنا القدير ولاهنت أخي العزيز ابومطر على النقل الموفق

**معلومات** **العضو** · 27-07-2010, 02:45 PM

الشاعر نايف من الشعراء الذين يفتخر بهم كل دوسري

صح الله لسانه والجزاله ملازمه لابو عبدالعزيز والله يبيض وجه السبيعي

لاهنت يابو مطر على نقلها

**معلومات** **العضو** · 28-07-2010, 03:40 AM

ابوفهد
ابوسالم
لاهنتوا على طيب تواجدكم ومروركم
تقديري واحترامي

**معلومات** **العضو** · 28-07-2010, 03:57 AM

صح الله السان ابو عبد العزيز شاعر كبير

وسبعين نعم بسبيع الغلباء

ترفع لهم البيضاء

لاهنت يابو شيخه على نقل هذه القصه والقصيده الجميله

**معلومات** **العضو** · 28-07-2010, 11:56 PM

بيض الله وجهك على نقل القصه والقصيده

**معلومات** **العضو** · 29-07-2010, 12:34 AM

بيض الله وجهك اخوي خميس الغييثي

اثلجت صدورنا بفعل الغانمين وطيبهم

صح السان ابو عبدالعزيز طيبٍ على طيب

ويستاهلون سبيع المدح لفعلهم الغانم

تحياتي وتقديري

**معلومات** **العضو** · 29-07-2010, 05:42 AM

مرحبا بكم ونورتوا الموضوع بتواجدكم النير لكم مني فائق المحبه والتقدير

**معلومات** **العضو** · 05-08-2010, 03:53 AM

ســم يافـديـع السبيـعـي ودعوتـكـم وصــول
وتلبيـة دعوتـك عنـدي مـثـل فــرض الـصـلاة.

ياصحيـب فـي ثـرى الطيـب تـزرع لـك حقـول
ولاحصـدت إلا المـدايـح وأنــا عـنـدي وصــاة.

أشهد الله وأشهد الخلـق فـي عـرض وطـول
من بنـى البيـت فـوق البيـت وأهـداه قصـراه

صح الله لساااااان ابن مسرع شاعر ورجل وفاء مايلحقه لووم
والسبعان يستاهلون لاغدوا هل الاولة والا برد الطيب والجميلة
إضاااااااءة جميييييييييلة منك يابوشيخة
قصة قرأناها وتأثرنا بما فيها وقصيدة ثرنا بها وأثريتنا بها يالقرم
خمييس الغيييييييثي كالعادة ما تدخل في موضوع إلا
ويكوووووون له طعم آخر ورؤية رائعة
استمتعت هنا يعلم الله بمروري المتواضع فتقبله نفداك..

**معلومات** **العضو** · 08-08-2010, 10:55 AM

مرحبا بك اخوي مبارك
واشكرك على هذا الاطراء الطيب منك اللذي يدل على معدنك الاصيل

خالص الود والتقدير لجنابك العزيز

**معلومات** **العضو** · 09-08-2010, 07:11 PM

الله الله

علم غانم متميز

وقصيدة ثناء متميزه

لاهنت على الموضوع المشرف

وصح الله لسان شاعرنا المدع

أسعدني المرور كثيرا

**معلومات** **العضو** · 10-08-2010, 01:57 PM

هلابك وغلا اخوي نايف ويستاهل ابوعبدالعزيز المدح ولاهي غريبه على سبيع الغلباء
ولاهنت على تواجدك

الذين يشاهدون محتوى الموضوع الآن : 2 ( الأعضاء 0 والزوار 2)

		منتديات صحيفة وادي الدواسر الالكترونية