يا مدور الراحه عسى سنينك طوال ... وين انت غادي عن دروب الصحابه؟

[معلومات العضو كويت الخير]

الناس تسأل بعضها كيف الاحوال
تسأل وهي اصلآ تعرف الإجابه

الناس تسأل تحسب ان بينها حبال
لكنها الدعوى كلام وذرابه

دنيا يشاركنا بها ألوان واشكال
فيها الرجل قيمته ، كم في حسابه ! ؟

عندك ريال إعرف ترا قدرك ريال
ولايهمك صوت عوي الذيابه

والناس غصب تحب من يملك المال
لو كان طول العام مقفول بابه

لامن دخل بالمجلس اهتز من جال
لو كان ما يملك صفات النجابه

دنيا نعم دنيا ويا كثر الازوال
فيها الردى والطيب تالي تشابه

ما عاد يحشم عم فيها ولا خال
كل ٍ على يمـِـه يشدد ركابه

الرجل فيها ما يتعـّـنز على عيال
يا عوين من حط الرجاء بالقرابه

حط الذهب بالشمس واقعد بالأظلال
حطه لعينك لو يتعـّب ذهابه

وانا صغير السن فيها لي آمال
لكن اشوف الوقت ركـّـز حرابه

بعض البشر تكسبه لاصرت عـذّال
والبعض يزعل من مجرد عتابه

(( ما كل رجال " يبدل برجال ))
لوه تشبه به ويلبس ثيابه

كم رجل في رجله من الحرمه عقال
وكم رجل له حرمه تسنع زهابه

الرجل سيف ٍ تصقله بنت الابطال
وكم سيف مسلول " دخل في جرابه

في عيني اشوف البشر داخل إقتال
وكل عن الاخر يخفـّـي صوابه

لاتغـّـرك دموع العرب فوق الاطلال
من بينهم لا عشت كنك بغابه

ما شفت فيهم واحد" صافي البال
ولا لقيت المهتني في شبابه

سعادة الدنيا تجي بعين الاطفال
اكبر هموم الطفل لاشفت , مابه

تدري السعاده ليه يا رجل الاعمال
مافكروا في ناطحات السحابه

ويا مدّور الراحه عسا اسنينك طوال
وين انت غادي عن دروب الصحابه

إنعيش ما كن الله بيوفْ الآجال
ما كنها الايام تنِـهب نهابه

دار الشقاء الدنيا , تعب , هم , غربال
ودار البقا الاخر وفيه الرحابه
الموت شرع الله ولا دونه إمهال

الموت سهم ٍ لانوى الشخص صابه

الموت ما ينفع به اقفاي واقبال
ياخذ غريمه لو زبن عند لابه

يقوله ابن قريش لا قيل من قال
اسمي ويحفظ لي حقوق الكتابه

لـ محمد بن قريش القحطاني

 

 

 

 

[معلومات العضو بنت الذيب]

ما عاد يحشم عم فيها ولا خال
كل ٍ على يمـِـه يشدد ركابه

^
هالبيت ذكرني بالبيت اللي يقول: كلن يهيل النار صوب قرصه


يعطيج العافيه يابنت كويت الخير على اختيارج لهالقصيده المميزه

شكري وتقديري

 

 

 

 

[معلومات العضو كويت الخير]

المشاركة الأصلية كتبت بواسطة بنت الذيب

ما عاد يحشم عم فيها ولا خال
كل ٍ على يمـِـه يشدد ركابه

^
هالبيت ذكرني بالبيت اللي يقول: كلن يهيل النار صوب قرصه


يعطيج العافيه يابنت كويت الخير على اختيارج لهالقصيده المميزه

شكري وتقديري

ياحبيبتي خليها على الله
والله يعافيج يابنت الذيب مرورج الأميز
وانا اشكرج على التقييم

 

 

 

 

[معلومات العضو شافي بن راشد النتيفات]

كالعادة ابداع رائع

وطرح يستحق المتابعة

شكراً لك

بانتظار الجديد القادم
دمت بكل خير

 

 

 

 

[معلومات العضو راشد المسعري]

صح لسان الشاعر بن قريش القحطاني

وسلمتي على النقل المميز ،،،