من مواقف الشاعر الكبير / مسعود بن عنبر

[معلومات العضو خالد المشاويه]

السلام عليكم ورحمة الله وبركاته



اخواني الاعزاء



هذه احدى قصص الشاعر الكبير / مسعود بن عنبر المقابلة الدوسري حفظه الله واطال الله عمره على الطاعه



حيث كان في سفر في لبنان للعلاج



وسمع بعض الناس يتكلمون وصالح لهم جو لبنان ويتأففون جو بلادهم





فقال :





مانيب هلباجٍ رقودٍ ومدلاه=ينسا بلاده وان ذكرها حقرها

مايدله الا الثور والخبل والشاه=والعيرت اللي حملها في ظهرها

وان كان عند الشيخ ماجد لنا جاه=لاكمل علاجي وتالي وبرها

ارخص لي ارجع فوق بنجٍ مساواه=يطلع بنا فوق الزوابع نحرها

والا هبطنا في مطارٍ عرفناه=دار الرياض اللي يقودك سفرها

ديرة هل العوجا هل الوجه والجاه=اللي يجيكم من بعيدٍ خبرها

فكلن على شفه وانا شفي انصاه=وعيون خلق الله تفرق نظرها









ومن مواقفه مع الملك عبدالعزيز طيّب الله ثراه



كان في احد الايام مخويّ مع الامير ماجد بن عبدالعزيز وسطام بن عبد العزيز آل سعود

ويقول كنا في الرياض في قصر المربع قصر الملك عبدالعزيز غفر الله له ويقول ان الملك رحمه الله يدف على عربيه في اخر حياته ويتبعه رجالين له موسى والبرقاوي يوقفون عند ظهره واحد من يمينه واحد من يساره ويصفهم الشاعر مسعود عافاه الله يقول (( تسنهم بعارين )) ويقول يوم جا ليل من الليالي من العشر الاواخر قالو الصلاة مع الملك فالمسجد

ويقول ذاك الحين مابعد شفت الملك ويقول ابي اقربه واملا نظري منه واشوفه طيّب الله ثراه ويقول قربت لين جيت فالصف اللي خلف الملك عبدالعزيز ويقول يومن سجدنا اخر سجده في صلاة التراويح ويقول انا بدوي على سجيتي ماعندي ذاك العلم فالادعية والصلاه ادعي باللي اعرفه ويخلص دعاي بسرعه ويقول واطلب الله وانا ساجد ويقول هذا الدعاء (( اللهم اقبل صلاتي واغفر زلاتي واحفظ بنياتي وبارك في نوقاتي ))

ويقول إنا ذاك الحين مابعد طلع لنا علاج الجرب الجره والسم

ولامن جا الجرب في طرف مراحك قضا على حلالك ويقول يوم قلت هذا الدعاء ولا جنبي واحدٍ ساجد



قال (( يالله ان يجعلهن للجرب)) يقول انا كل شي ادانيه الا الجرب!!



ويقول ثم قلت له انا وإنا في السجود << عسى الله يتجاوز عنهم جميعا



ويقول قلت له (( يالله جعل الجرب يحت عيونك واهلك مايشوفونك وعيالك يبكونك , حسبي الله عليك حسيبٍ يمحق عليك ويكسر يديك ويعيّب رجليك ويلعن والديك , حسبي الله عليك حسيبٍ شديدٍ جديد اسود من العبيد واثقل من الحديد تبيد الليالي وهو مايبيد )) وكانوا فالصف الخلفي مباشره للملك عبدالعزيز ويقول ولا يوم سلمنا وخلصنا من الصلاه ولا خلق الله اغلبهم حاطٍ يده على فمه ويضحك لان صوت مسعود واللي في جنبه ارتفع شوي ولا انتبه مسعود لصوته

وتفرقنا بعد الصلاه والملك عبدالعزيز طيّب الله ثراه بعد الصلاه يروح لبيوته في المربع ويوزع على العيال والنسوان جنيهات ويقول انا اوالي لهم شي بسيط اخذ شوي من ذالجنيهات والملك مايدري بسالفت مسعود بالصلاه ونقل له الكلام ويقول انا مرخي اذني عشان اسمع اسمي علشان احضر واخذ الجنيهات كون اعين شي ويقول ولا يوم نادوا بأسمي

وقلت حاضر واجيهم ويقول ولا الملك غفر الله له قدامي على عربيته يقول ولا قولت الملك يقول (( لا له لحيه )) يقول واجي واحب منكبه ثم قال الملك لمسعود بن عنبر (( انت اللي تلعب فالصلاه!! رد عليه مسعود قال عسى الله يطول عمرك ما لعبت فالصلاه قال الملك وش انت قايل رد عليه مسعود قال ياطويل العمر في دعاء دعيته لنفسي قال الملك وشهو قال طال عمرك اثناء السجود قلت اللهم اقبل صلاتي واغفر زلاتي واحفظ بنيّاتي وبارك في نوقاتي ورد علي واحدٍ بوزاني اثناء السجود قال يالله يجعلهن للجرب وابتسم الملك عبدالعزيز ويقول مسعود دعائي التالي يوم ادعي على الرجال ماعلمت به الملك ثم قال الملك تعرف الرجال قال لا ماعرفه ثم قال الملك انت متعلم قال مسعود لا ماتعلمت طال عمرك وقال الملك بنرسلك للسناري يعلمك * السناري على ما اظن كان طالب علم او مدرس في ذاك الحين كما ذكر الراوي * قال مسعود للملك طال عمرك انا رجالٍ كبير والسناري يدرس ورعانٍ مثل العصافير لكن لك وجهي ان سلمتنا من عصاك ذالليل يالصبح انا شيخ ابن بشر ولا ابن كثير !!! ويحط الملك يده على فمه ويضحك ويشر لي بيده بمعنى رح رح





اتمنى ان القصص والمواقف اللي ذكرتها نالت على اعجابكم



وعسى الله يعافي الشاعر الكبير مسعود بن عنبر المقابله الدوسري ويطول بعمره على الطاعه





وللمعلومية منقول الققص والمواقف من الراوي والشاعر / شخبوط بن سعد المقابله حفظه الله

 

 

 

 

[معلومات العضو بنت الذيب]

صح لسانه

وربي لاهانك اخوي خالد على طيب اختيارك

شكري وتقديري

 

 

 

 

[معلومات العضو الكاتم]

مسعود بن عنبر الله يختم له بخير لسانه فصيح وجليس امراء وملوك وشاعر كبير
لاهنت ياخالد