مدح الامير السديري من الشاعر سعد بن هتيل رحمهم الله

[معلومات العضو ابكي واجامل]

بالله دنوا لي من الطـرس يافهيـد
قرطاس يحصي من جوابي ثمينه
وهاتو قلم حبرٍ يصـوغ التماديـد
وحقٍ علي من كل هـرجٍ سمينـه
نوادرٍ ماهيب خطـوى الهرابيـد
من هيلـشٍ يكفيـه مـدت قرينـه
جواب أحلى من حليب المحاشيـد
عطيف نوقٍ من حصينه بصينـه
هرجٍ على معناه ماهوب تصفيـد
يعرض وتثمينـه علـى فاهمينـه
تفصيـل بيطـارٍ بجـد وتجويـد
وعرفٍ يذب الشين ويطب زينـه
أدل من مشقاص حـدب البواريـد
لاخصه الرامي على شوف عينـه
قلته ولاقصـدي يقولـون قصيـد
لاوالـذي كـل المـلا مرتجينـه
لاشك من بـالٍ وزا فيـه تنكيـد
وعبر يهج الصدر زينـه وشينـه
صدرٍ وزا به مثل طق الحداحيـد
كيرٍ هـل الصنعـات متحاودينـه
عزاه ليت الصبـر للبيـع ويفيـد
ويشرا لصدرٍ ضاق وافضا كنينـه
وقتٍ غدا واغـدا هلـه بالتقاليـد
ولاعـاد للطيـب نهـارٍ يبيـنـه
ياركب هيـا وانهجوبـي لبوزيـد
هيا ل ابـا الجـودات يامهتوينـه
واليا لفيتوا عنـد ملفـا الأجاويـد
الله علـى كثـر الملافـي يعينـه
مدوا سلامـي للسديـري تواديـد
بلبً من الخاطر برفـق وسكينـه
وقولوا سـلامٍ ياعشيـر الأواليـد
ياللي لحاجـات النشامـا رهينـه
يكرم لأجاويـد .. ويـادا مقاريـد
ويجود بالحاضـر وياخـذ بدينـه
لايابعد خطوى الشيـوخ التقاليـد
اللـي ذهبهـم للفنـا خازنيـنـه
حفاظـة الدينـار شيالـة الكيـد
والعذر من دون العطا محتسينـه
قلته ولا انشد عن طوال العجاريد
اللـي كـلام الـزور متعودينـه
مداحة الخايب خمـام القواصيـد
تفً على ذيـك الوجيـه اللعينـه
ماذعذع الغربي على جندل البيـد
يومٍ وانـا ماقلـت ابوزيـد وينـه
حر الحماد اللي بتوعٍ على الصيد
كم نادرٍ عشـاه مضـرب يمينـه
الأشقر اللي يفرج الصدر ويزيـد
هنيّ مـن شـدة سبوقـه يدينـه
الصارم الصافي نحاس الملابيـد
ماشافتـه عينـه عثابـه بحيـنـه
بدر الثلاث البيض وافي المعاديـد
هني عينه من صفـا لـه جبينـه
أبو خضير اللي لسفنـه عواميـد
يسعي معه من كل عينـه سفينـه
لاجيت خاطي بندر منـه يافهيـد
أسكن مع سكنه وربـك ضمينـه
في ساحته تلقى رجـال الموافيـد
الخيرين اللـي خطاهـم رزينـه
ينصون شيخ ٍ عندهم منـه تأكيـد
من كل شيخان العرب محتضينـه
حيثٍ ان لهم عنده حقوق ومراصيد
وياما فضا لعيونهم مـن خزينـه
لاعدو الشيخان من زيـد وعبيـد
من كـل قـومٍ شيخنـا عارفينـه
الشيخ ابو زيـدٍ ولابـه مناشيـد
والعلم منشورٍ علـى حاضرينـه
قولوا صحيح يالفهـود المجاليـد
والا خطا واصمت ولو هي غبينه
والله لـولا هرجـةٍ دون تحديـد
لا اقول ماجا في زمانـه حتينـه
هني من زاره مـن العيـد للعيـد
من قبل تالي الروح تقضي سنينـه

 

 

 

 

[معلومات العضو مبارك بن شافي النتيفات]

الله الله


يعطيك العافية على النقل المميز

تحاياي

 

 

 

 

[معلومات العضو فهد المقابله]

الله يرحم ابن هتيل ويغفرله

ولاهنت على النقل يالطيب