أفواه الثكالى

**معلومات** **العضو** · 25-09-2012, 05:50 PM

أفواه الثكالى

مجاراه لقصيدة عروس الكفن للشاعر القدير ناصر الحمادين

***

(عروستين وكلهن لبسن ســـــــــــــواد)
والليل ضـــلماء . والمداين مضـــلمه

طاح الجمل .وايديه في وسط الــــــــقياد
واقصر جدل من طبعنا مـا نحـســـمه

طاح الجمل. وين انت يا راع الــــــشداد؟
طاح الجمل كله.. بلحمه وشــــحـمــه

طيحة جمل .ما تعتبر كبوة جــــــــــواد
ليلٍ بداه الحزن والحزن اخــتـــمـــه

والطعنة اللي في الصميم وفي الــــفـواد
في غاية الاحكام . ماهي محـــكــمـه

حلم الثرا ,والفقر,ورموز الـــفســـــــاد
تبني من اجداث الضحايا ملــحــمــه

يارحمة الله بالبلاد و بالـــعــــــــــــبــــاد
ماقيمة الانسان؟ ما قيمة دمــــــــــــه؟

الــهم دائــم . له صبــاح وله هجــاد
وان ما رحمـــه الله . من اللي يرحمــه؟

البارحة والدمع لعيوني مـــــــــــــــــــداد
كل المناظر في المداين مــؤلـــمــــــه

الحزن خيّم في سماء جده.وعــــــــــــــاد
والناس من كثر المواجع مـــعـدمـه

بنت البحر مكياجها البارح رمــــــــــــــــاد
مكلومه, و مفجوعه , ومــتحطــمـــــه

واخت الشمال من امس بثياب الــــحــــداد
الله.. ياحزن المدائن ما أعــظــمــــــــــه

راحت سعاد وراح معها مئة ســـــــــــعــاد
في صمت وافواه الثكالى مــلـــجــمـه

الحزن غيمه. والسماء كله بـــــــــــــــــلاد
واللي يصلي للصنم ما يــهـــدمــــــه

من قـــدم ارواح الطــــفوله للحصـــــــــــاد؟
لا اليوم هو يومـه . ولا هـو موســـمه

تعبت ادور للبياض ولا نشوف الا.. ســــــواد
الليل ضـــلماء . والمداين مضـــلمه

***

الشاعر محمل بن فلاح

*******************************************

عروس الكفن

***
عروستين وكلهـن لبسـن سـواد
جده وحائل والحـزن رز علمـه

في جده وحايل مصيبـه والوكـاد
ان فيـه شـئ ماقدرنـا نفهمـه

هو القدر مكتوب من رب العبـاد؟
او ان فيه يديـن كلـش تهدمـه؟

حتى حلم "طفله" وهي وسط المهاد
تغاغي وبوهـا معاهـا يحلمـه!!

والام كانت كـل ماتبكـي سعـاد
جاتك على صوت الصغيره مرزمه

كبرت سعاد وحلمهـا معهـا وزاد
كنها على وجـه الثريـا ترسمـه

الين في غفله دنا منهـا الحصـاد
بخيلـه ورجلـه وذوده وغنـمـه

هناك باقي ملزمه تحـت الرمـاد
وهناك روج وعطر وهنا مرسمه

وهناك كانت تجلس ومعهـا وداد
صديقـة العمـر الفتـاه المفعمـه

وداد كانـت دايـم تحـب العنـاد
بس تعرف فكـر سعـاد وتفهمـه

الحين من يقنـع وداد ان الجـراد
ياكل بيديّنـه ولايشبـع فمـه؟!!

الحين من يقنـع وداد ان البـلاد
بخير والتقصير لابنادم سمـه؟!!

خلو وداد وعـودوا لابـو سعـاد
اللي تحماله زمانـه واحطمـه!!

يالله يامعبـود يــارب جــواد
ياواحـدا ً نطلبـه عفـوه وكرمـه

تجبر قلوباً لفهـا حـزن وسـواد
وترحم عبادك وانت رب المرحمه

***

الشاعر ناصر الحمادين