تدري وش اللي يجرح القلب جرحين

[معلومات العضو ساقان الدواسر]

تدري وش اللي يجرح القلب جرحيـن
ويمد حبل الحزن فيك ويشده


انك تناظر طفل من غير ابويـــــن
يمشي ودمعه سايل فوق خده


منظر صعيــب ويقسم القلب قسمين
لا قام يمسح دمعه بكف يده


يمشي ولايدري طريقه على وين
لين التعب من كثر ما تاه هــده



اثقل حروف يشيلها فيه حرفيــن
لا اب يدريبه ولا ام ترده



في خطوته رحلة ودمعة وسكين
وحظ توسد بالمراسي مخده



جيت اساله : بالله قلي ولد مين؟؟
وبغى يجاوب واختنق صوت رده



انا يــتيم وما لدربي عناوين
وجزر الحزن فيني يساوي لمده



وطعم الطفولة ماعرفته الى الحين
وثوب السعادة صرت مانيب قده



ابكي الى من شفت غيري سعيدين
لين البكى فيني يوصل لحــده



واقفي ورحت امسح دموعي من العين
وعيني تناظر دمعته فووق خده



وهذا اللي يجرح القلب جرحيــــــن
ويمد حبل الحزن غصب ويشده