نايف بن مسرع .. رحلة مع الشعر

**معلومات** **العضو** · 07-05-2009, 04:13 AM

بسم الله الرحمن الرحيم

الأخوة والأخوات منسوبي هذا الصرخ الشامخ

يسرني في هذا المتصفح أن أبحر بكم في رحلة شعرية مشوقة مع شاعركم الجزل/ نايف بن مسرع ( شاعر العرب ) أحد شعراء القبيلة البارزين الذين مثلوها خير تمثيل في الكثير من المحافل والمنابر الإعلامية داخلياً وخارجيا ً
علماً بأن أغلب قصائد هذا المتصفح ( من إرشيفه القديم ) ، وأستأذن شاعرنا المبدع بأن أنشر هذه النصوص ( ولأول مرة ) حصريا ً عبر موقع القبيلة الرسمي

الوطن :

قال هذه القصيدة بعد الموقف الذي حصل بين الملك عبدالله عندما كان وليا للعهد مع الرئيس القذافي في إحدى القمم العربية:-
تسلـم لشعبـك لاعدمنـاك ياميـر
يا شـاري العليـا بغالـي ثمنهـا

لك موقف مشهود بيـن الطوابيـر
ولك كلمة في الحق ما حدت عنهـا

رفعت راس اللي براسه صعاطيـر
واخرست من نفسه تزايـد عفنهـا

ودقيت في نعش الهيامـا مساميـر
اللي تخطّا والمـرض فـي بدنهـا

وجات الحقيقة واضحة دون تزوير
للأمة اللـي عوقهـا صـار منهـا

يامـا التمسنـا للخطيـة معاذيـر
من زمرة(ن) صيت السعودي غبنها

ويامـا تحملنـا كثيـر المخاسيـر
لجل العرب من شامهـا لا يمنهـا

نعطي بـلا منـة جنيـه ودنانيـر
ودار العروبة من تضايـق زبنهـا

دار الوفا... دار الرجال المناعيـر
دار(ن) بها راع الكرامـة ضمنهـا

يا بلادي اللي حبها شلتـه صغيـر
أكبر ويكبـر لـو تطـاول زمنهـا

حبك ورثته من سيوف(ن) بواتيـر
اللي فدت بارواحهـا عـن وطنهـا

لايشغلـك يـادار خطـوا معيثيـر
اللـي حياتـه بالمهـازل قرنـهـا

إرقي سنود ولا تهـزك الاعاصيـر
مامونة(ن) شـر العفـون وفتنهـا

في ظل شيخ(ن) يحكم الراي ويشير
فهد العرب لا قـال كلمـة وزنهـا

عاش الزعيم مسطر المجد تسطيـر
اللـي يمينـه بالمكـارم دهنـهـا

ومني لابو متعب سلام(ن) وتقديـر
اللـي خـذا العليـا بغالـي ثمنهـا

وله في الأمير سلطان بن عبدالعزيز -شفاه الله- ( شيلة في قناة الصحراء) وبعض القنوات:-

وهذا رابطها على اليوتيوب ( طهور ياسلطان ) :

طهـور ياللـي للملمـات محسـوب
ياعزنـا لامـن دهتـنـا الدهـايـا

ياكاسي ٍ شعبك مـن الطايلـة ثـوب
يامسـوي ٍ حبـك بشعبـك سـوايـا

سحاب طيبك لاتـرزم لـه انصـوب
ينبت غلا لك فـي المـدن والقرايـا

لامرْض سلطان العرب تمرض شعوب
ولاطاب طابت مـن شفـاه البرايـا

شيخ ٍ بطيبه يملـك نفـوس وقلـوب
يـدوم عـزك ياحمـيـد السجـايـا

كم فرّجت وقْفتك ضيقـات وكـروب
يفرج لـك الله مـن عظيـم البلايـا

وكمّ امسحت يمناك من دمع مسكـوب
يمسح بهـا الله عنـك كـل الخطايـا

طهور ياكف ٍ من الجـود مخضـوب
أبشر بجـودٍ مـن جزيـل العطايـا

ومادام فعل الخيـر ليديـك منسـوب
أبشـر بـرده مـن عليـم الخفـايـا

طهور يامير ٍ من الشعـب محبـوب
كلن علـى شوفـك يحـث المطايـا

وقال هذه الأبيات بعد تفجير المحيا حيث كان قريباً من الموقع وأعجبه الموقف البطولي للأمير عبدالعزيز بن فهد الذي كان من أول الواصلين لميدان المواجهة:-

على ارض القصيد وساحة الشعر والاداب
بـلادٍ سمـت بيـن المياديـن نجـديـة

على ارض الرياض اللي لها فالديار حساب
وتاريخهـا الماضـي تنومـس طواريـه

أبكتب قصيده لا انفتـح للقصيـد ابـواب
وقصيدٍ بلا ماجوب مـا نيـب مـن حيـه

شعاني الامير اللي فـرق بـاول الشبـاب
ورقى في دروب المجـد لاعلـى مبانيـه

حفيد الملك وابن الملك زاكـي الانسـاب
عريب الخوال اللـي لـه البيـض مبنيـة

بليلٍ طغت به زمـرة المـوت والخـراب
تعـزوى وقـال: العـز والمـوت بيديـه

نزل للمواجه صادقٍ صامـل(ن) ماهـاب
وليـل الغـدر فيـه الخفافيـش مخفيـة

بنصف الشهر... بدر السما كاملٍ ما غاب
وبـدر الشبـاب بدارنـا بانـت اضويـة

تنومس بفعله كل عـودٍ وطفـل وشـاب
وله غطرفـت عمهوجـةٍ رمشهـا فيّـه

ونخيت القصيد وكل شيٍ يجـي باسبـاب
ولاغيـر ابـو تركـي يسيّـر قوافـيـه

جمعنا الوفا والحب لاغلى ثـرى وتـراب
وفخرنـا ليـا قالـوا: بلدكـم سعـوديـة

أجل.. ترتفع هاماتنـا والمـدى السحـاب
ورثنا المفاخـر ورث مـا جـات عاريـة

ولا من فتح لاهل الخرافـات درب وبـاب
لنا وقفةٍ فـي الحـق مـا هيـب منسيـة

يطوّل ظما من تـاه يطـرد ورا السـراب
ومن يرد صافـي العـد حاجتـه مقضيـة

وفي دارنا نعرف الكـل الكـلام اعـراب
سوى كلمـة "الارهـاب" تخسـا ومنفيـة

القصائد الدينية:-

ابتهالية:

يا الله يامحقق صعيبات الاحلام
ياللي لعسرات الأوامر يحلـي

يامنجيٍ أيوب مـن هـم وآلام
ويامخرجٍ ذا النون حيٍ يصلي

ياللي مع دورات الايام ما نـام
وياللي كلامك للخواطر يسلـي

عفوك ولطفك يارجا كل منظام
في لحظةٍ فيها الشجاعة تولي

لاجا نهارٍ كله حساب واخصام
ومن رهبته فيه الأكابر تذلـي

ألوذ أنا بحماك يـارب الانـام
عساك تلطف لي بنفسٍ تزلـي

نصيحة:

أنا البارحة يوم المخاليق كل بات
غزت قلبي افكار تزاحم على بابه

جفيت المنام وصابني ياعرب ضيقات
وقمت اتفكر وانشد الوقت وش صابه

ونويت انشد اللي يفهم العلم بالشارات
صبي إلا جات الشدايد يمارابه

يابو محمد جارك الله من العثرات
وحفظك الولي عن مدخل الشر واسبابه

إلى من تفكر عاقل في ذالزمن ساعات
عرف قيمة أوقات على الناس لعابة

تدور الليالي والعمر ينقضي بسكات
وصدوف الدهر دايم للارواح نهابة

سنين تقافا والليالي لها غارات
ومن لا اعتبر بالوقت لابد يحكابه

ومن يبغي العليا يجيه الخبر باثبات
ترى الدرب واحد يمة الخير يمشابه

وترى طاعة الله دايماً تقضي الحاجات
تنور طريقٍ لا اظلم الوقت يسرابه

وترى ساعة في الليل تبدى بها العازات
تساوي حياةٍ كلها طراد ونهابه

وحياة الفتى لاما تزود من الطاعات
تراهي ضياع الوقت والعمر يسفابه

حصاده ندامه لا تردت به الناهات
تجي ساعةٍ ماينفع الحر مخلابه

محمد الدرة:

ياصرخة تفجرت وسط صرخات
تنخى هل التوحيد واهل الحمية

صرخة صغير في حضن والده مات
ماله إجرام بس نفسه أبيه

صرخة محمد عبرة وسط عبرات
ما هي غريبة كل يوم ضحية

صرخة محمد مرت اليوم بسكات
في عالم كبرت عليه الرزية

عالم اسلام ضاع وسط الملذات
ومع زحمة العالم بليا هوية

الله يذكر صرخة وقتها فات
للمعتصم تنخى وتسمع دويه

صرخة فتاة هزت اهل المروات
قال ابشري بي والعزايم قوية

سيّر لها جيش بليا مطارات
والماء قليل والمزاهب بردية

عزيمة رجالن تقود البطولات
وتارد بيوم الهول حوض المنية

يالمتعصم وقتك تبدل به اوقات
وصارت قضيتنا بدونك قضية

يالمعتصم نصرخ ولا نسمع أصوات
وكل تناسى في زمانه خويه

أحزاب صرنا والاعادي جماعات
لقمة هنية للاعادي هنية

وآخر دليل محمد بيننا مات
يالمعتصم وينك ترد الحمية

زمان غدى فيه البطل يارجال هشام:
وهشام هو بطل " ستار أكاديمي"

زمان العجايب جيت عاري بدون لثـام
وجت عورتك تمشي مع الناس مختالة

زمان عن أهل المرجلة والمراجل شام
زمانٍ غـدوا فيـه الـ( .....) خيالـة

زمانٍ غدا فيه البطل يارجـال اهشـام
على منبر الإعلام.. ملعون مـن قالـه

خمامٍ على صدر الجريدة يـزف اخمـام
تنومس بفعله.. فـال ربـي ولا فالـه

خسيت وخسى يالهيس وان دارت الايام
بطولاتكـم محفوظـة داخـل زبـالـه

تواريخكم بيـن البغايـا تحـت الاقـدام
ولامن صفى الصافي كسبتوا به حثالـه

شبيه العذارى ياجماعة جـزاه اعـدام
وجزا من يصفق له على نفس منوالـه

متى تنتهض الامة متى ينتصر الاسـلام
متى تنتخي الفرسـان لاكبـرت القالـة

متى كوكبة الابطال ترفع لهـا الاعـلام
متى يرجـع التاريـخ ويخلـد ابطالـه

نبي فك أسيره قد لها في السجون أعوام
لها دمعةٍ فـي محجـر العيـن قتالـه

لها كل يـومٍ صرخـة تفـزع النيـام
يطول النحيب وصوتهـا كنـه لحالـه

إلى من نختنا نعتذر... للظروف أحكـام
نسينا الحمية والظفـر مالنـا ومالـه

إلى زل عامٍ ترجي القدس بعـده عـام
كما يرتجي عودٍ عجز.. خيـرة عيالـه

غدت بين أهلها ياعرب كنهـا الايتـام
غريبة... وهي من بينهم حالها حالـه

نسوها وكلن صار همه يفـوز اهشـام
لحا الله وقتٍ صـارت أذنابـه أبطالـه

دروب الخير:

مع الضيق حزن وهم والوقت كله جور
وكثر الهواجس تذبح القلب وتلوعه

أسافر على شراع الزمن بين سبع بحور
تلاطم بي الامواج والنفس مفزوعه

اخفّي هموم لاهدت في الفواد تثور
تهز الفواد وناظري يخفي دموعه

واحس بونين معذبٍ لا صرخ مقهور
يبي صرخته تسمع ولاهيب مسموعه

ومع ظلمة الموقف ظهر فالسما لي نور
يبدد ظلام يزعج القلب ويروعه

وعرفت الحقيقة ليش انا من زمان أدور
وأدوّر وانا دربي به أشواك مزروعة

ولقيت الطريق اللي يحيطه رضا وسرور
وجمال الوجود وراحة النفس مجموعه

فيا نفس يكفي ..بس يكفي ضحك وغرور
وهذي دروب الخير يا نفس مشروعه

قصائد في القبيلة:-

وقفة شرف( في حفل قبيلة الصخابرة بعد جمع القبيلة مبلغ 25 مليون لعتق رقبة أحد أبناءها ) :-

من قبل ما ابـدى بالقصيـدة واجيبهـا
فـي ليلـة(ن) للعـز جانـا نديبـهـا

أبـدى بذكـر اللـي علينـا فضايلـه
مخفـف مصايبهـا مهـون صعيبهـا

اللي إلى ضاقـت علـى العبـد دنيتـه
ورفع كفوفـه.... دعوتـه يستجيبهـا

اللـي يبـدل عسـر الايـام باليـسـر
وياسعـد نفس(ن)رحمـة الله تصيبهـا

وبعده سلام يعـم مـن كـان حاضـر
في حفلة(ن) كـل أبلـجٍ ينلقـي بهـا

سـلام ياهـل الحفـل كسابـة الثـنـا
اللي مـن النامـوس تاخـذ نصيبهـا

وسـلام للحضـار مـن كـل ديــرة
اللـي بعيـد جـدود واللـي قريبـهـا

في ليلـة التاريـخ والمجـد والفخـر
نذر(ن) علي جـزل القصايـد لاجيبهـا

إن ماحضـر شعـري لتمجيـد لابتـي
باقي القصايد خلها ويـش أبـي بهـا

بالله ياتـاريـخ وقــف وسـجــل
مفاخر(ن) تبطي الـرواة تحكـي بهـا

بالله ياتـاريـخ والـيـوم يـومــك
سجل مواقـف لابـة(ن) فـاح طيبهـا

تعلـم الاجـيـال معـنـى الحمـيـة
لاصاح من غارات بقعـا... صويبهـا

سجـل لنـا بيـن المناعيـر وقـفـة
يوم إن بعض الخلق مـا ينغـزي بهـا

وقفـة شـرف نفنـى وتفنـى عيالنـا
واحفادنـا مـن بعدنـا تعتنـي بـهـا

وقفة شرف من هامـة الـراس للقـدم
للدوسريـة عادة(ن)تشتـقـي بـهـا

من يوم ابـن عـواد بالصـوت طـوّح
للابـة اللـي فـاز مـن يعتـزي بهـا

ينخى رجال(ن) جدهـا دوسـر الفحـل
... النفـس ياربعـي لحقهـا طليبهـا

وماللحمـول الكايـدة غيـر أهلـهـا
ولالي سواكـم لابـة(ن) انتخـي بهـا

جاته جموع(ن) كنها البحـر لا التطـم
كلـن يقـول الطايلـة باغـدي بـهـا

كلـن بـرك للحمـل ويـدق صــدره
هـذاك ابـو العليـا وهـذا صحيبهـا

كلـن يقـول المـال مـن دون ربعـي
والاموال غير اليوم وش ينبغـي بهـا

ماعـاد فيهـا اليـوم جـدك وجــدي
ياعزوة(ن)عنـد اللقـا يندعـي بـهـا

جينا صخابرة(ن) على صـوت داعـي
مثـل الحـرار اللـي تنصـت نديبهـا

جينا صخابـرة(ن) علـى قلـب واحـد
والكايدة لو هـي تعصّـت نجـي بهـا

صخابرة جينـا علـى شـان صرخـة
وسمعت من ديـار آل زايـد مجيبهـا

ويعيش منهـو حـاز الامجـاد كلهـا
المزنـة اللـي مايـوقـف صبيبـهـا

اللـي لبـس بشـت الامـارة وزينـه
بافعاله اللـي كـل حـي(ن) دري بهـا

عبدالعزيـز الجـود.. وابـوه تـركـي
ورّث له العليا.. وشبلـه رضـي بهـا

عبدالعزيز اللـي خوالـه هـل الظفـر
من روس قوم(ن) ما جهلهـا حريبهـا

عبدالعزيز اللي خذا المدح فـي الصبـا
وشلون لـو نفسـه تقـارب مشيبهـا

عبدالعزيز يشـاف فـي عينـه العشـا
شيخ(ن) يروم الطايلـة ويهقـي بهـا

الله لا يقـطـع لـلابـطـال تـالــي
شجرة(ن) تظلل عـن سمايـم لهيبهـا

قلته وانـا لـي لابـة(ن) لبـت النـدا
عاداتنا هـي الاولـة ونحضـي بهـا

مساعـرة لامـن حضـرنـا ظهـرنـا
وكلمـة بـلا برهـان كلـن يعيبـهـا

مساعـرة مشروبنـا ساعـة السطـر
مـن صافـي الدلـة ونتـرك سريبهـا

مساعـرة هاماتـنـا فــي الثـريـا
روس(ن) طنخها الحرب لا من عدي بها

نارد على المـوت الحمـر ورد ظامـي
إلـى اعتلينـا اللـي تركـز سبيبهـا

ونرعى صخاف الشول في كـل ديـرة
ومـن خوفنـا كـل الاعـادي تهيبهـا

والى عـوى ذيـب(ن) بديـرة ذيابـة
يبشـر بهـدات (ن) تحيـر طبيبـهـا

تجيـك مـن زايـد وتغلـب سـرايـا
رجال(ن) ثياب الطايلـة تكتسـي بهـا

بالله يـاتـاريــخ وقــــف ودوّن
حقيقـة بيـن القبايـل حكـي بـهـا

من حـرم فزعـات الغيـارى آل زايـد
نفسـه مـن الحرمـان وافٍ نصيبهـا

لله ثم للتاريخ

هواجسـي نــوادرك صفيـهـا
ولامن طلبـت اخيارهـا هاتيهـا

واياك ثـم ايـاك غيـر الجزلـة
ترى الهزيلة حالـف(ن) مابيهـا

أبغى كلام(ن) مـا يملـه سامـع
قصيدة(ن) يفخـر بهـا ملقيهـا

ويطرب لها اللي للنوادر عاشـق
واهل المعرفـة لازم(ن) توحيهـا

قصيدة(ن) مـا وجهـت للتاجـر
ولا رجيتـه حاجتـي يقضيـهـا

ولانيب أوجهها لراعـي منصـب
من شان كسب ارضاه في تاليهـا

وارفع قصيدي واحشمـه واعـزه
عن مدح ناس(ن) كان فيها.. فيها

نخيت هاجوس القصيـد وجانـي
وجهزتنا لـه دلـة(ن) مركيهـا

جلست أنا ويـاه جلسـة عاشـق
اللي نديمـه مهـرة(ن) يغليهـا

وسريت ليل الشعر لين أصبحنـا
وهواجسي عرفت وش حاديهـا !

ناديتنـا لعيـال جــدي زايــد
اللي حوت الامجاد فعـل ايديهـا

أهل الفخر والمجد وأهل الشيخـة
لا زعزع الملطـوم جـا واديهـا

وناديتنا لاهـل المفاخـر تغلـب
أهل الظفر والعـز مـن ماضيهـا

وأهل الكرم وأهل الجناب الطيـب
واهل الفعول إلـى دعـا داعيهـا

دواسـر(ن) وافعالنـا مكتـوبـة
في صفحة التاريـخ يـا قاريهـا

دواسـر(ن) وحدودنـا معروفـة
والسيف دون حدودهـا حاميهـا

دواسـر(ن) دار الغنـاة اديارنـا
يامـا نواهـا طامـع(ن) يبغيهـا

يهيم فيها طامع(ن) فـي خيرهـا
ولامن لقانا تـاب مـن طاريهـا

دواسـر(ن) وقفاتهـم مشهـودة
دون الدخيل إلـى لفـا ناصيهـا

ياما انطحوا دونه شيوخ ودولـة
وقايع(ن) ما شـك فـي راويهـا

نجلب نفوس العـز دون وجيهنـا
ونبيعها لامـن حضـر شاريهـا

دواسر(ن) للضيف يرخص مالنـا
وذبح السمينة عادة(ن) نصخيهـا

وجيراننا تبطـي وهـي تذكرنـا
بسلومنا اللـي ماحـدن يعطيهـا

ناسم عصا الجيران وسم(ن) بيّن
ويصير ضيف الدار هـو راعيهـا

مع هـل الطـالات ناخـذ حقنـا
واهل الحقـوق احقوقهـا نديهـا

ذكرت نقطة من محيـط أمجادنـا
من شان أذكّر واحد(ن) ناسيهـا !

ياعزوتـي يالابـتـي يـادوسـر
في خاطري لي كلمة(ن) بابديهـا

بعد هدوء العاصفـة يـا ربعـي
نـار الفتـن بيديـنّـا نطفيـهـا

وبعد خذا الشعـار كلـن قسمـه
عندي شهادة حـق يـا باغيهـا

لا ثـوّر الفتنـة قليـل الـدبـرة
اللـي يصـوّب يمّهـا ويخطيهـا

اللي يثـوّر فـي خبـاه سلاحـه
يبـي يجيـب علـوم ويوديـهـا

من بعد عام 2000 جانـا فـازع
بكراستـه واقلامـه يبرّيـهـا !

يحكم على هـذا.. ويدنـي هـذا
وصار الخصم في المحكمة قاضيها

يرسم على كيفه ويرضـي نفسـه
نفس(ن) جهل شيطانها مغويهـا

وطويق ثابـت والريـاح اتدفـه
والفرقديـن بعيـد... ياناويهـا !

الزايـدي والتغلبـي يـا هــذا
صفحة شرف بارواحنـا نفديهـا

الزايـدي والتغلبـي مـن قبلـك
صـوارم(ن) تاريخهـا يكفيـهـا

الزايـدي والتغلـبـي حـضـارة
سادت وقـو اعزومهـا مرسيهـا

العز جاهم كابـر(ن) مـن كابـر
ملاحم(ن) تبطي العـدا تطريهـا

وباقي القبايـل حقهـم بالوافـي
أهـل الفعـول فعولهـا تنبيهـا

محدن يحوش الطيب لـه بلحالـه
أهـل المكـارم حقهـا نعطيهـا

هذي بيوت(ن) قلتها من هاجـس
سريت به مع ليلـة(ن) ساريهـا

أبي يقـال: الله يبيـض وجهـه
من سامع(ن) لاقال: من راعيها ؟

خمسين بيت(ن) قالها ابن مسرع
وعلى الرجـال الطايلـة مهديهـا

فيا الله عساها في نظرهم جزلـة
لأن الهزيلـة حالـف(ن) مابيهـا

الدواسر 1/1/1429هـ

مافيه شك إن كل رجـل لسانـه
لاجت مواقيف القصيد حصانـه

كلن تجي الابيات مـن منظـوره
والمستمـع قدامـهـا بـآذانـه

أحدن له الجمهور يسمع منصت
وأهل الجزيل تقول: صح لسانـه

وأحدن يجي ويروح محدن يمـه
مالـه لـزوم ولالشعـره خانـه

السوق حامي والبضايـع واجـد
بس الذهب يفرق بـزود أثمانـه

والتاجر اللـي مايجيـب الغالـي
ليته قعـد وارتـاح فـي دكانـه

الشعر ديوان العرب مـن مبطـي
لكن وضعـه فـي زمنّـا هانـه

أول مع الفرّيس واهـل الحكمـة
فـرايـدٍ لايومـنـا رنـانــه

واليوم موضه من حساب الموضه
عاثـوا بعرشـه قـوم يالادانـه

وظيفة اللي مالقـى لـه شغلـة
كلن علـى ليـلاه جـرّ ألحانـه

وأكيد ماللـذوق وأهلـه حاجـة
في بيت شعر(ن) ماتعـز أركانـه

وقصيدة(ن) تنظـم بليـا معنـى
سحاب صيف(ن) ماتخال أمزانـه

وفي ليلة(ن) رفعت راسي فيهـا
اخترت من سوق القصيد اسمانه

نـوادر(ن) ماسقتهـا لسـواكـم
يامستقـر الطيـب ياشيخـانـه

نوادر(ن) باسم الدواسـر توسـم
وبأذكارهـم وامجادهـم مزدانـه

من شاعر(ن) لااستل كلن شعـره
الخيل خيلـه والسنـان سنانـه

اليوم خيل الشعـر لـه روضهـا
وأمس(ن) تهاب الخيل من جدانه

حقايق(ن) ماهي سوالف مجلـس
ياجاهل التاريخ.. عانه...عانـه

يقمح صبي(ن) ماوقف موقفهـم
ويقمح حفيد الجود لامـن خانـه

سلام ياهل العـز ياهـل الهيبـة
ياهامـة التمجـيـد ياعنـوانـه

سلام ياربعـي عصابـة راسـي
يانصرة المضيوم خيـر أعوانـه

يامكرمين الضيف ياعز الخـوي
يامهمليـن الجـار ياصـوّانـه

دواسـر(ن) وسلومنـا شاهدنـا
....بين الرجال وكل رجال وشانه

دواسـر(ن) ماتنحنـي هامتـنـا
إلا خضـوع لربنـا سبحـانـه

دواسر(ن) لاعـال عايـل علْنـا
ولاذاق سطوتنـا لعـن شيطانـه

وساع(ن) مضاربنا وخطلن يدينا
وياويـل منهـو حطنـا ديانـه

حنـا هـل الهومـات ياجاهلنـا
سـور البـلاد موسعـة حدانـه

تاريخنـا مهـوب تـوه يـبـدا
سبعة قرون تشـع فـي ديوانـه

سبعة قرون وكل قرن(ن) شاهـد
أرض العرب بامجادنـا رويانـه

أرض(ن) سكنّاها ونعم المسكـن
ولاهيب ترضـى غيرنـا سكانـه

سيل(ن) تحدر من حدود الـوادي
برقه سيوف... وهيجنـا ودّانـه

حتى ملكنا أغلى المدايـن عنـوة
والمُلك يثبـت دامنـا سيسانـه

لكن: ياهل العـز واهـل الطالـة
وش ينفع الرجال: كانه... كانـه

من كان ورثه من جدوده ثـروة
لازم يصون المال هـو واخوانـه

مادام هذي هي فعايـل جدودنـا
كلـن يحـط الطايلـة نيشـانـه

هـذي يمينـي حطهـا بيمينـك
رجل(ن) يشيد وصاحبه بوزانـه

وش صار قبل شهور في نشرتنا
وبموجز الاخبـار بـان إعلانـه

تباشـرت كـل البـلاد بشوفـه
وكلـن يلـد لدارنـا بأعيـانـه

واليوم ماله حس مالـه طـاري
تكفون ياهـل المجـد ياتيجانـه

تكفـون لايفـرح علينـا حاسـد
تكفون ياهـل الحـق ياميزانـه

وتكفى يامير الجود راس الشيخة
ياعـز نجـد وهيبتـه سلطانـه

سلمان لاكبرت بنجـد(ن) قالـه
الله يخلـي لنجـدنـا سلمـانـه

حر(ن) شهر كلن يعرف وصوفـه
وتشـرّ بـه للكايـدة جنحـانـه

سلمان تكفـى مالهـا إلا نـادر
يالول فعـل الطيـب يامرجانـه

واليوم يوم الشعر مهوب أمسـه
أطلقت من جزل القصيـد عنانـه

نـوادر(ن) ماسقتهـا لسـواكـم
يامستقـر الطيـب ياعنـوانـه

والتاجر اللـي مايجيـب الغالـي
قوموا عليـه وسكـروا دكانـه!

دواسر الكويت:-

من الديرة اللي حبها في الضماير سـاح
ولبسنا غلاهـا لبسـة الرجـل لهدومـه

ديار الملوك اللي خذوها بضرب ارمـاح
ولاجـات بالهدنـة ولاهيـب مقسومـه

ديار السعود اللي سكـن حبهـا الارواح
ومن هام في حب أطهر بقـاع مالومـه

قبل يصدع المـذن بحيـا علـى الفـلاح
غبشنا شمـال وكـل نـوام فـي نومـه

ونطحنا نسيم(ن) هب من ديرة الصبـاح
تعطّر بكـادي وازرق العـود يشمومـه

نصينا رجال(ن) برقهـم فالمراجـل لاح
وذكر الحيا يكفيك عـن باقـي علومـه

وصلنا لكم من داركم والقلـوب صحـاح
ومعنا رسايل شـوق بالحـب مختومـه

من العزوة إللي يـوم ذا ذابـح وذبـاح
لهم بصمة(ن) لاهل التواريـخ معلومـه

دواسر إلى منّـه عـلا للمغيـر صيـاح
تباشر بنطح المـوت والقومـه القومـه

ولاهيب تخلي كان جاها النذيـر امـراح
دواسر بهم خطوات الامجـاد مرسومـه

دواسر إلى من جالنا مـن زمانـه شـاح
بهجنا الصدور اللي من الوقـت مكلومـه

ودون الدخيل اللي من الوقت سـده بـاح
نبيع النفـوس الغاليـة بـاول السومـه

وقصير الدواسر بدّ من جـا ومنهـو راح
لنا سلـم ماتلقـاه فـي باقـي سلومـه

إلى منّ وسم الدوسري في عصاتـه لاح
يسج القدم وتهاب من وسمنـا خصومـه

وجار الدواسر يوم قـدّر جـداره طـاح
دفعنـا الديـة والجـار مايلحقـه لومـه

سلوم(ن) تميزنا بها والفعـول إيضـاح
لنا صفحـة التاريـخ تنقـاد مخطومـه

وباقي القبايل تكسـب أيمانهـم الامـداح
وكلن خذا من بحـر الامجـاد مقسومـه

ألا ياهل كويـت الكـرم دامـت الافـراح
بهجتوا صدور(ن) تعشق الطيب وترومه

لعبتوا بقلب ضيوفكـم لعبـة المسبـاح
وحكمتوا نفوس(ن) قبل ماهيب محكومـه

دواوينكم مـن جالهـا خاطـره ينسـاح
ومن قابل وجيه السعـد زالـت همومـه

عليكم عدد مالاح برق وحمـام(ن) نـاح
سـلام(ن) مفاهيـم المناعيـر مفهومـه

لبسنا المفاخر فوق بيض الثياب وشـاح
بعد شوف ربع(ن) عن هل الذم معصومه

كسبنا الرجال اللـي مكاسيبهـا الاربـاح
وهي راس مال(ن) حطّم المـال برقومـه

رجال الكرم الطيب وان جا السلاح سلاح
سلاح(ن) يشوق العين لاكبـرت الهومـه

وبعد ماجمعنا الله فـي دار ابـو جـراح
عسى عظام شيبانه عن النـار محرومـه

وعسى بيرق أهل الطايلة عالي(ن) ماطاح
وعسى بيت راع الطيب ماتدرس ارسومه

بياض الوجيه وفعلكـم كنـه المصبـاح
تشوفه عيون الخلق ، وتميـز وسومـه

وانا اشهد شهادة حق ماهوب وقت امزاح
ملكتوا قلوب(ن) قبل ماهيـب محكومـه

(الشكرة) :-

في ليلة(ن) من ليـال العمـر مذكـوره
ليلـه سطـع بدرهـا وأنـور محياهـا

وقفـت محتـار والابيـات منـثـورة
قصيدة(ن) في غلاكـم كيـف بابداهـا؟

لـو كنتنـا فالمحافـل مـاخـذن دوره
مقامكـم يعجـز الشـعـار وامـلاهـا

سقت القدم منتشي من (دار أخو نـوره)
مع ربعـي اللـي يشرفنـي مخاواهـا

لحفلة رجال(ن) بفعل الطيب مشهـوره
(آلا شكرن) عسى أهل الـدون تفداهـا

سـلام ياعـزوة(ن) بالعـز مـذكـوره
من يوم وقت الجهل مايقـرب إحماهـا

لاجـا نهـارن بـه الابطـال مذعـوره
يتلون شيخ(ن) على الجـزلات ضرّاهـا

من ماضي الوقت (وابن حفيظ) له دوره
شيخ(ن) يقود الجموع ويتعب اخطاهـا

ياما تعشت طيور الجـو مـن سـوره
مع لابـة(ن) ترهـب الفرّيـس لقياهـا

وحنا لهم فـي نهـارن تكثـر شـروره
لامن عوى ذيب حولـه يكثـر عواهـا

دواسـر(ن) دوّن التاريـخ بسـطـوره
أمجادنا اللـي علـى وجهـه كتبناهـا

وقول(ن) بليا دليل تبيـن بـه عـوره
واهل الحكايا مهيـب تطـول بحكاهـا

(وسم العصا) صفحة(ن) بالمجد منشوره
و إلها الفخر دام حنـا اللـي نشرناهـا

لامن زبنّا دخيـل(ن) يشتكـي جـوره
عصـاه تمّـن إلـى منّـا وسمنـاهـا

تشوفـه عـداه لـوّ تمـوت مقهـوره
من دونه (الوسم) و (أهل الوسم) عدّاها

ومادام (بعض السوالف) ذكرها عـوره
(حنا هـل الوسـم) بأولهـا وباتلاهـا

قصائد لها مناسبة:-

حفل قناة الصحراء لمزاين أجمل فحول الجزيرة العربية بدعوة من الشيخ مشعل بن خالد بن حثلين:-

يافارج الضيـق والكربـات والشـدة
مابه إلـهٍ سـواك أرفـع لـه يديـه

لاعسكرت في الفواد هجوس ممتـدة
وتزاحمت ماعرفت الحسـن والسيـة

مـرن كبيـر الامـل بيدينـي أشـده
ومـرن أعـود ولاهـذي ولا ذيــه

البارحـة والخفـوق مبيّحـن سـده
سريت ليلـي علـى ترنيـم قمريـة

كنها تحـس بنزيـل ٍ قلبـي يحـده
لكنهـا هيجنـت وانـا علـى النيـة

وماينزع الهم لامـن زاد عـن حـده
ويركي على هامته خنجـر وشبريـة

إلا حبيس ٍ إلى مـن ضقتنـا اهـده
ولامنه صـاد الجزيلـة جابهـا ليّـه

صيده ثميـن ٍ وانـا بيمينـي أمـده
للي ببيـت المراجـل نارهـم حيـة

في خاطري كلمة ٍ تجتال مـن مـدة
عاداتنا ياهـل العـادات ... مغزيـة

من عدة شهور والساحـات مشتـدة
قامت علـى تراثنـا مليـون جنيـة

صار المزايـن علـى ماروجـوا ردة
والاهتمـام بعطـايـا الله رجعـيـة

كم كاتب ٍ لا كتـب لمّـح و هـو وده
يقولهـا بالصراحـة دون رمـزيـة:

ياشيخ باب ٍ يجيبه ريـح لـك سـده
واكتب على ماضي التاريـخ مرثيـة

جيلن عن الماضي الزاهي نوى الصدة
غرتهم العولمة بأحلام وردية

ومادام كلش يبين إذا عـرف ضـده
ولا ضـرا بالمعالـي عاشـق الفيـة

عمـارةٍ ماحملهـا سـاس منـهـدة
لو كان جدرانها مـن صلـب مبنيـة

والكاتب اللي من النعمة بـرق خـده
ليته خذا اجازتـه فـجبـال تركيـة

وينشد أوروبا عـن التاريـخ وتعـده
البل واهلهـا وطـار العـز ياحيـه

ملاحم ٍ تظهـر اللـي طيـب ٍ جـده
و (راكان) فيها غدا للطيـب ماريـة

سيف ٍ على هامة (البلقـان) ياحـده
كل أصـوكٍ يفتخـر لاحـل طاريـه

يـارب يافـارج الكربـات والشـدة
ياللي إلى ضقتنا بارفـع لـه يديـه

استر عواقب الامور اللي لهـا مـدة
وفرسانها تختبط في داخـل الفيـة!

وبيض وجه من حمى الميقاف واستده
واحيا لنا ماضي ٍ ما فالعـرب زيـه

واحفظ لنا مـالخليج إلى بحـر جـده
الديـن الاول وحـكـام السعـوديـة

مقطوعتين فيهما إشارة سريعة لقامة كبيرة بحجم عبدالعزيز بن تركي بن سعود الكبير ، الأولى بعدما قرأ الشاعر خبر وقفة الامير الشهم مع خواله في أحد القضايا المصيرية:-

مادام جـده (سعـود) ووالـده( تركـي)
وخواله أهل الظفـر والجـود والفزعـة

متسلسل(ن) من شيوخٍ تحمـي المركـي
وفك النوايـب غـدا فانفوسهـم نزعـة

بشّر عيون(ن) شكت الاحـزان لاتبكـي
وطمن نفوس(ن) من أحداث الزمن جزعة

لاجا لهـا راعـي النخـوات ابوتركـي
مايشتكي مـن نخـاه الضيـم والهزعـة

والثانية فيها رد ثناء لسموه:-

شرفني اعجابك ولبستنـي تـاج
وتوجتني يامير باغلـى شهـاده

وشبّيت في دربي قناديل وسراج
يوم إن ليلي حالكن فـي سـواده

واليوم شع النور والصبح منبـاج
إشادتـك مابـي سواهـا إشـاده

ومادامني وردتنا حـوض هـداج
يكفي ولا ابغى يازمانـي زيـاده

يامير.... كلمة حق ماتقبل احراج
ياسعد من حظه لشـرواك قـاده

عندما سأله أحد أصدقائه وقت (الانتخابات الكويتية) عن د. بادي بن حسيان الرجباني وهل يعرفه!!! فأجابه قائلاً:-

إي والله أعرفه وهو بالمدح عـرف
يومن عيال اللاش محـدن عرفهـا

لامن ردي الجد (م) المرجلة صرف
(بادي) عشقها عشقة(ن) واحترفها

دكتور طيب(ن) قبل مايكتب الحرف
ماشرفته الدكتـرة... هـو شرفهـا

لاجا نهارن فيـه للطايلـة صـرف
وكلن على بنت الاصيـل التغفهـا

جاتك (بابو سلمان) ماردها جـرف
بنت الحصان و (بادي) اللي عسفها

من لابة(ن) تغرف من الطايلة غرف
مقيديـن جمالهـا مـن صلفـهـا

يآل الصباح اخوان مريم هل العرف
شيوخ البلاد اللـي كساهـا ترفهـا

عطوني الجنسية أيام لـي ظـرف
بـأرد لبنـوك المراجـل سلفـهـا

باصوّت لرجل(ن) عن الهينة صرف
والكايدة لو هـي عسيـرة ولفهـا

ومادام عرفي له يساوي مية عرف
حشو العرب مهوب شرط اعرفهـا

قصيدة " طبعها قدام ماترجع ورى " في حفل قناة الصحراء:-

السـلام ورحمـة الله يالجمـع الغفيـر
عدّ ماواد ٍ من السيـل بامـر الله جـرى

والتحيـة تنثنـي للكبـيـر وللصغـيـر
كثر مالدّت وجيـهٍ تجـاه أطهـر ثـرى

والشهر مبروك... يالله عساه هلال خير
جعل فيه إلنا عـن النـار ياربـي ذرى

وجعلنا ممن كسب جائزة ثلثـه الاخيـر
لاتزاحـم عنـد بـاب الغنـاويّ افقـرا

وقفتي ذالليل يالله عساهـا تكـون غيـر
لاحضر فالسوق بيـاع والاخـر شـرى

والشعر مافيه رجل ٍ كبيـر وذا صغيـر
كلبو عكفان الاشناب فالطيـب اخشـرا

التفاوت بينهم... بـس فالبحـر الغزيـر
مايعومه كـود سبـاح بامواجـه ضـرا

وماجهلت إن كل فارس معه سيفٍ شطير
وادري إني شاعر(ن) والرياجيل اشعـرا

بس أنا لـي مهـرة ٍ فالملاقـا ماتنيـر
طبعها في مقدم الخيـل ماترجـع ورى

في زمان ٍ كل من قال... قال: إنه جرير
وش بقى عندك من علوم ياوقت الزرى ؟

إحترم شيبة الادب لاتضاحك به غريـر
ماخذن السالفة لعـب والسـاري سـرى

ودامنا ذالليل جينا علـى دعـوة سفيـر
للكرم والطيب والذوق... كان إلْه اسفرا

مشعل إللي في سما المجد له بدر ٍ منير
شيخته من شيخة إللي على يـام أومـرا

الأدب أيقض لـه الله حييـن الضميـر
اكتست صحراه بازكى الحلل بعد العـرا

والتحية فالنهايـة لهـا الجمـع الغفيـر
من مشاعر دوسري ٍ على العليا ضـرا

حفلةٍ عند المشاهير في اليـوم العسيـر
وكلبوكم ياهل المـدح فالمـدح اخشـرا

وهذه في حفل الدواسر الثاني بمدينة الدمام عند فخذ " الغررة" وكانت رثاء في الفقيد دغش بن محمد بطي الغييثات " رحمه الله " :-

(موتة دغش تسوى من الناس عشرة)

قالوا دعيـت لحفلـةٍ عنـد غـرره
وش عندك بنسمع مـن انتـاجٍ جديـد

في ليلة والهـا مـن العمـر ثمـره
عسى هجوسك من نوادرها تصيـد

قلت البداية بـا شكـر الله واذكـره
الواحد الرحمـن فاعـل مـا يريـد

الواحـد اللـي نعبـده ولـم نـره
الله يجملـنـا بميـقـافٍ سـديــد

سلام يا هل الحفل من قلـب شـره
على قصيد غاب في يـوم القصيـد

وسلام للي ساق رجلـه وحضـره
في ليلـة كنهـا مـن الايـام عيـد

واللي قرا في خافي الفكر اعذره
ان كان عجز اليوم عن نظم القصيد

موتة دغش تسوى من الناس عشره
انا اشهد انـه فاجعـه وانـه فقيـد

وانا اشهد انه صعب تضنابـه مـره
وصعبن تحصّل له مثل شخصه نديد

الله يبيحه كـل مـا البـال اذكـره
ويالله تبيحه لا طـرق بابـك وحيـد

واختامها وان كان جينا يـا غـرره
كلمة نعم لأمثالكـم شيـك ورصيـد

واللي عرف وش خافي القلب اعذره
ارجو المعذره..كان ما تم القصيـد

( عرضة )في حفلة الرواشدة الوداعين وآل بوسباع المساعرة:-

مرحبا عد وبلٍ هلّـت مزونـه
والتحيات لأهل الطيـب نكتبهـا

حفلنا ياهـلا باللـي يرودونـه
من بعيد العـرب ولاّ قرايبهـا

وخص ربعٍ تحفظ العهد وتصونه
لاد ودعـان لاعـدّت مناسبهـا

لابةٍ سعد منهي تحتمـي دونـه
ويوم وقت الجهل بانت مضاربها

كم عدوٍ شكا من ضربهم كونـه
وراجعٍ بالفشيلة مـن يحاربهـا

والخوي مـن قديـمٍ مايخلونـه
وقصة الشمري محدن مكذبهـا

وكانكم ياهل التاريـخ تقرونـه
لابتي كل عـزٍ فـي مشاربهـا

لاد مسعر لهيب الحرب ياطونه
سربة في اللقا تثبـت كتايبهـا

فعلهم من قديم الوقت يطرونـه
وراية العز فيديهـم مقاضبهـا

وفي القبايل ترى كل له طعونـه
وكل منهو بغى العليا يفوز بهـا

(عرضة )في حفلة للصخابرة والمساعرة:

اسم الله ابدابه ليا صرت نشاده
باثني عليه وباحمده والتجي له

سبحانه الواحد حري بالافراد
علام رزق اب ن آدم والحصيلة

ومن بعدها هاض الشعر كل قصاد
في ليلة تسوى لها الف ليلة

عمت تباشير الفرح دار الامجاد
دار ال زايد كاسبين النفيلة

غنابها الوادي وللشرق تنقاد
لاهل البديع اللي خطاهم طويلة

دارالكرم دار الوفا دار الامجاد
بنيّ عم ونعمها من قبيلة

كسابة الطولات من عصرالاجداد
وحرابهم يرجع بغدر وفشيلة

قلته وانا لي فالفخر سرج وشداد
افرخ بربع يحتمون الدبيلة

افعالنا تعرف على روس الاشهاد
وملبوسنا تاج الفخر مانزيله

وختامها يامرحبا عد الانواد
واعداد ماهل المطر من مخيله

قصيدة قالها في زواج زميله الشاعر عبدالعزيز الدلبحي:

يا بو محمد شغل الجيب ذالحين
خابرك أنا قطع الخرايم تجيده

روّح علي يا مسندي خل بعدين
ومع خط مكة ادعس البنص سيده

لا جاك مفرق (لبخه حويته) يمين
اسر معه ترى المسافة بعيدة

انحر بنا ربع(ن) حشام(ن) عزيزين
أهل الفعول الماضية والجديدة

تاريخهم ناصع وعندي براهين
الشاهد الله والخلايق شهيدة

عتيبة الهيلا صعاط المجانين
وافعالهم بين الخلايق فريدة

تشهد لهم في نجد غُبر الميادين
يوم إن كل(ن) مكسبه حوشة إيده

جينا لهم والشاهد الله طربين
في ليلة(ن) يالله عساها سعيدة

في ليلة(ن) أنا احتريها لي سنين
للصاحب اللي أشهد إنه وليده

عبدالعزيز ابو محمد ونعمين
حر(ن) ملا بنك المراجل رصيده

هو راعي المعروف الاول وذالحين
وحقه علي مهوب نظم القصيدة

حقه نجي يم الرفايع مهنين
ونشاركه ذالليل حفله وعيده

في ليل ستة عام ستة وعشرين
باول رجب عسى السعادة مديدة

خط اليراع من الشعر.. بس بيتين
ولو هو على كيفي مليت الجريدة

واختامها يا الله يا ناصر الدين
وفّق صبي الجود للي تريده

مختارات من قصائد الشاعر:ـ
(سواد ياذيك الوجيه )

ياليل وان طالك عتـاب إللـي مـن الضيقـة سـروك
أنـا بعـد لــي شـرهـة ٍ علـيـك دوك ثبوتـهـا

يوم ارتخت ضاف السدول وطـوّل الفجـر الضحـوك
والنـاس غطّـت فـي هزيـع الليـل وسـط بيوتهـا

قامت قيامة صـدري إللـي مـن عنـا وقتـه تكـوك
كـن الهمـوم السـود تمشـي بـه علـى ريموتـهـا

وسقت القدم يـمّ المكـان إللـي ولـو ممشـاه شـوك
كنـي أدوس أعتـى الهمـوم بدوجـتـي واشوتـهـا

مالـي نديـم إلا النجـوم.. ودلتـي.. واوراق بــوك
لـو كـان صوتـي لارفعتـه مايـجـاوب صوتـهـا

أرحل مع إللي لاشكى الخفـاق مـن بعـض الدكـوك
روحـي تسامـى فـي معانقهـن وتلـقـى قوتـهـا

وعلى عربسـات الفكـر جهـزت للمسـرى مكـوك
أسـجّ بـه عـن شـوف نـاس ٍ شرّعـت كبوتهـا !

سـواد ياذيـك الوجيـه إللـي تلـوك الهـرج لـوك
إللـي فتحـت لاعـراض خلـق الله غـدر تابوتـهـا

كنها علـى غـرات نـاس ٍ غافلـة تملـك صكـوك
الطيـبـة ماتـنـذكـر.. والهـيـنـة ماتفـوتـهـا

قصْرت يدين اهل الردى.. واهل الحكي.. واهل الشكوك
وتطاولـت الالسـن عسـى ربـي يطيـل سكوتـهـا

تمازعـوا عـرج السوالـف كـل منهـم: دوك.. دوك
كنهـا تجـرب فـي قفـا اهـل الطايلـة جبروتـهـا

وسـواد ياللـي فـي مفـال الهينـة دايــم بــروك
بئس الوجيـه إللـي كشـف غيـب الزمـان كروتهـا

ملبوسها لون السـواد.. ولـو تحـوك القطـن حـوك
حتيـش لـو تبـرق عمايمـهـا.. ويلـمـع بوتـهـا

وبيـاض للـي فـي رصيـد الطايلـة تملـك بنـوك
إللـي تـذري عـن سمـوم الوقـت ضـاف بشوتهـا

لاجيتهـم: يامرحبـا.. وان رحـت عنهـم ماقـفـوك
وجيـه ٍ تضاحـك للنشامـى لـو تـشـحّ وقوتـهـا

ياليـل لامنّـي شكيتـك مثـل مـن قبلـي شـكـوك
عـذري سميـن وشرهتـي عليـك هــاك ثبوتـهـا

يوم ارتخت ضاف السدول وطـول الفجـر الضحـوك
والنـاس غطـت فـي هزيـع الليـل وسـط بيوتهـا

قامت قيامة صـدري إللـي مـن عنـا وقتـه تكـوك
كـن الهمـوم السـود تمشـي بـه علـى ريموتـهـا

بين الريال وبين شيمات الريال:-

بين الريال وبيـن شيمـات الرجـال
حرب(ن) ضروس(ن) قلّ من يفطن لها

نار(ن) لها بيـن المعاليـق اشتعـال
وماتحـرق إلا مـن بجوفـه شلّهـا

أحدن رقى للعـز فـي روس العـلال
وأحدن علـى عـزه دموعـه هلّهـا

واليا خضـع للمـال (عبّـاد الريـال)
خزمـت نفسـي لـو تمـوت بغلّهـا

واللقمة اللـي تلبـس الرجـال شـال
لانيـب راجيهـا ولا مشـفٍ لّـهـا

أشـوم عنهـا عـلّ تاليهـا الـزوال
بتمـوت نفـس العـز قبـل أذلّـهـا

يالله وانـا طالبـك ياجـلّ الـجـلال
نفسـي علـى دروب المكـارم دلّهـا

واعوذبـك يـارب مـن ذل السـؤال
ومن وقفة الاقـدام عنـد أعـداً لّهـا

بلهون ياوقت(ن) على أهل الطيب مال
بوجيهنـا ليـش السيـوف تسلّهـا!

دامك عطيت الفال... فاكرم (م)العقـال
يكفي... وخل اهـل الحمـول تشلّهـا

ياصاحبـي لاعـاد تكثـر فالـجـدال
معادلـة صعبـة ولا اقـدر حلّـهـا

ولـو تتهمنـي بالتزمـت والهـبـال
النفـس هـذي هـي وهـذا اجبلّهـا

لو مت ضامي و الفخر لي راس مـال
كنـي شربـت أنهـار دجلـة كلهـا

ياما على صدر السمـا نشّـا خيـال
وتمـوت الارض وماطـره مابلّـهـا

وكم دوحة(ن) فالقيض وارفة الظـلال
لاجيـت أبيهـا قـام يقصـر ظلهـا

وكمن هلال(ن) لاح من بعـده هـلال
وأنـا اتصـبـر وانتـظـر لعلـهـا

الحـظ نـوّ(ن) فالسمـا وبلـه زلال
دارن تـعـداهـا ودارن عـلّـهــا

أسقى ديار(ن) ماتشـد إلهـا الرحـال
وارض الكـرم والجـود وبلـه زلّهـا

المـال خـلاّ فآخـر الوقـت اختـلال
كم روس قوم(ن) تشتكي مـن حلّهـا

يـوم إنّ (شيـخ المـال) لله الكمـال
فتخه وبشـت وسبحـة(ن) يستلّهـا

مهيب (شيخة يوم ضربـات السـلال)
كثـر الريـال وجابـهـا مشتلّـهـا

الله من قلب همومه تحده:

الله من قلب همومه تحده
لا قلت هانت زودت في التحدي

تجمعت ثم وقفت صف ضده
هم يجيه وهم آخر يعدي

لاشفتنا بعض الوجيه المصدة
اللي عن دروب المراجل تصدي

اللي تجيك بوجه وآخر تلده
تضحك بوجهي لكن القلب ضدي

ناس تبيت اخذ كلام ترده
وتزيد من فوقه كلام يردي

مامنهم اللي له عظام تشده
ويبين اللي وسط قلبه مصدي

قدامي منافق لسانه يمده
ويدخل مع هرجه مزوح وجدي

عيبن على الرجال يفضي بسده
لكن الاهانة يم اهلها تردي

وانا احمد اللي من مخازين مده
وهب لنا الطولات من غير حدي

متوارثين العز محدن يهده
وكلن على درب المعزة يشدي

ولامن تفاخر كل شبلن بجده
رفعتنا راسي افاخر بجدي

اللي ذكر فعله رجال تعده
لا جاء نهار فيه فعل يعدي

هرج القفا:

البارحـة مانمـت ليلـي تعاجيـب
عفت المنام إن كان غيـري هنابـه

تكدرت لـي صافيـات المشاريـب
وقلبي شكا جرح(ن) جديد صطابـه

كانت جروح القلب تعيـي التطابيـب
واليوم زاد الجـرح ظلـم القرابـة

هرج القفا يـا كاسبيـن المواجيـب
عيب(ن) على اللي في اللقاء يعتزابه

يا ربعنا ياهل الوفا منقـع الطيـب
مهوب حق السيف يجـرح انصابـه

يا شينها لاجـات بيـن الاصاحيـب
ولا العدو ما قـد حسبنـا حسابـه

من ماضي الازمان نرقى لصاعيـب
ومنزالنـا بالعـز عالـي هضابـه

نحرص على الطالات ما نقرب العيب
وميقافنا في الحـرب كلـن حكابـه

وما ننتظر في حاضر الوقت تجريب
ناخذ من الماضين فعل(ن) امشابـه

فينا الولد يمدح إلين أبيض الشيـب
يظهـر بوجهـه لاتقافـا شبـابـه

ولامـن تغربنـا حـداد المخاليـب
ما نرتضي بالهون واللـي سعابـه

وخوينـا مـا يلحقونـه عذاريـب
يفخـر بخوتنـا ويمـدح جنـابـه

ويفرح بنا اللي حاديتـه الكواليـب
نفـك قيـده ويتهـنـى شـرابـه

وما نلتفت لاهل الحكي والشواذيـب
نرقا سنـود وضدنـا فـي عذابـه

يابنـت ياللـي فارقـه فالرعابيـب
يابنت منهو في اللقـا يندعـا بـه

اللي على ظهور النضا كنـه الذيـب
يحـوف عدوانـه بيـوم الحرابـه

كبـي ردي الجـد ضخـم التلابيـب
اللي حصيله فـي المراجـل ترابـه

اللي يجنـب درب الاجـواد تجنيـب
ويبني على دروب الرخامة اطنابـه

وعليك باللي ذكرهم فيـه تطريـب
ربع(ن) على كسب المعالي تشابـه

إللي إيـلا دارت عسيـر الدواليـب
ما منهم إللي في القسا صـك بابـه

قلته وانا أونس في فوادي لواهيـب
من هاجس(ن) بين بقلبـي صوابـه

وختامها... ياحيف ياهل المواجيـب
هرج القفا نقص(ن) على من حكابه

ما نلحق الشرهات كود الميامين:

الفزعة إللي حمّلـت عاتقـي ديـن
ليت اخو شمّـا ماعرضهـا عليّـه

مادام غابت يوم نصـب الموازيـن
انفوسنـا عنهـا شبـاع وغنـيـة

قوم نعرف الزيـن ونميّـز الشيـن
ضـد الخطـا ولانحـب الخطـيـة

ولا نلحق الشرهات كـود المياميـن
إللي لهـم فالطيـب روحـه وجيّـه

ولا الـردي مانلزمـه بالقوانـيـن
مـادام مالـه فالمواقـف هـويـة

العمـر رحلـة والشدايـد براهيـن
ولاينذكـر كـود العلـوم الطـريـة

من قدم العليا فزيـن ٍ علـى زيـن
ومن قّـدم الاخـرى لقاهـا جزيّـه

وانا وقفت ووقفتي تعجـب العيـن
ولـي رايـةٍ بيـن النشامـا عليّـه

نطحـت قـوم ٍ فالملاقـا شجيعيـن
وانـا شجـاع ولابتـي صيرمـيـة

ويوم احتمى الميقاف مافيـه ثنتيـن
وكلن ذكر في ساعة الضيـق حيّـه

تلفتت عيني علـى يسـار ويميـن
ولا شفت ربع ٍ فالحرايـب عصيـة

غابوا وتجهلني السبايب إلى الحيـن
لا به عذر جانـي ولا بـه وصيـة

لاهـم بـذلان ٍ ولاهــم رديـيـن
قضيـة ٍ ياكبرهـا مــن قضـيـة

قولوا لاخـو شمّـا ترانـا غنييـن
لو غاب عني.... شمس الامداح حية

أنا عزيز ومـن رجـال ٍ عزيزيـن
أهل الفخر والجـود واهـل الحميـة

وأنـا حفيـد مرجحيـن الموازيـن
أهل الظفر من عـاد بقعـا صبيـة

الله خلقهـم روس ماهـم كراعيـن
واذكارهم فـي كـل نجـد العذيـة

ماعندهم وقـت المواجيـب بعديـن
حاضـر بحاضـر والعزايـم قويـة

.. كتبتنا موجـز فقـط بالعناويـن
وختمتهـا باغلـى سـلام و تحيـة

تحيـةٍ فيهـا عـتـب للميامـيـن
ولا الـردي مهـوب يطـري عليّـه

ولو غاب عني راعي الفزعة سنيـن
يحسب حسابه... شمس الامداح حيه

هاماتنا عليا علـى العسـر والليـن
ونفوسنا مـن فضـل ربـي غنيـة

أسير القوافي:

سهير الليالي وابدع القاف بالتسخير
ولولا معاناتي ترى الشعر ما اطريته

أسير القوافي وانتظر لحظة التحرير
وغصبٍ علي الوقت بالشعر ماشيته

إلى هاجت الذكرى تجي لحظة التعبير
وتبقى القصيدة مطلب ماتمنيته

وعسير القصايد لا بغيته يجي ويصير
قريبٍ من فوادي مع كل تنهيته

قصائد الغزل:

الحلم:

يقولون حلمك يم غيرك تسير خطاه
كثير الحلوم ومطلبك صعب تحظابه

وكلن على بيره يحسب لطول رشاه
لزومن تفوق وموقفك تحسب حسابه

وانا اقول ياللي تعذل القلب لا تقصاه
كفابه صواب بان فالقلب مضرابه

وخله يسج بحلم ليل علي مسراه
يقرب بعيد واقشر الحظ ماجابه

اسافر نجوم اللي واسلى مع ذكراه
واخاوي نسيم الشوق واقف على بابه

وازاور لطيف الروح واجيه في ممساه
واقضي معه وقت من الليل يسلابه

إلى من تبين يخجل اللي من قمراه
وإلى منه سلهم يسلب العقل باهدابه

ولامن تبسم ياخذ القلب حمر اشفاه
وبياض الثمان بحمرة الورد تزهابه

وجديل يقضه يدفي الردف لاثعاه
وحياة الشقاوي تبتهج لا تلوابه

أضمه واقول اياك والحب لا تنساه
وحذرا تبوح السد والسر يدرابه

ألا ياعذولي ليش قلبي علي تنهاه
عن الحلم واثر الحلم هوالذي جابه

أبحلم ..واسافر ..واتبع الحلم لين اقصاه
واسلي خفوق مسلك الحب ماعابه

وبارحل بعيدٍ عل حلمي يجي والقاه
وباترك كتاب الحب للناس تقرابه

الغريب:

قالت تريض خل عيني تراعيك
خل السفر يانور عيني ليالي

عندي سؤال باطرحه حايره فيك
ودي تجاوبني وتلطف بحالي

أنا معك وهجوس فكرك توديك
عني بعيد يابعد كل غالي

فعيونك الغربة وحزنك مغطيك
وخلك معك والقلب ماهوب سالي

مثلك غريب وزاد من حيرتي فيك
صمتن طويل وفي الفرح ماتبالي

قول وتكلم واظهر اللي مشقيك
حتى المدامع تظهر اللي جرالي

عانيت مثلك بس ماودي اشقيك
في غيبتك جاني من الهم صالي

إن كانك غريب وغربتك من لياليك
صرنا سوى وانا احسبني لحالي

ابشر لك بمثلك غريب يسليك
الهم واحد والليالي طوالي

في غيبتك يسري بي الطيف واجيك
ولامن صحيتا بغيك ياهملالي

تفضحني الدمعة إيلا حل طاريك
ولامن ذكرتك ارفع الصوت عالي

واقول ياغالي ترا حب مغليك
عسرن على غيرك بعيد المنالي

ياليت منهو في وصاله يهنيك
في لحظة ناصل بها النجم عالي

وتشوف بعيونك حبيبٍ حلم فيك
وعقب الظا تشرب قراحٍ زلالي

سراة أبها :

ألا ياسراة أبها عطيني علوم الزين
عسى ما اشغله زين الهوى عن هوى خله

عسى مانسى اللي تلفحه كل حين وحين
سمايم هوى نجد كما لاهب الملة

وجيه البشر من زود لفح الهبوب تشين
ومن رام نيل العز مايطري الذلة

وانا ياحبيب الروح ياقبلة الغالين
إلى ابطيتنا عن شوفتك بان بي خلة

ولامن تسلى كل حي مع السالين
سرت بي هجوس تنهب القلب وتتله

سرت بي جنوب غصب لو اللزوم يمين
على شان خل شوفته تبري العلة

وإلى طالت المدة على العاشقين تبين
يهيج الغرام وتصبح النفس منسلة

ألا ياحبيب ٍ وسط قلبي غلاه سنين
ترى منزلك في داخل القب ويشله

الحب:

ياكيف باكتب قصيدة واظهر الصورة
وانتي قصيدي وأغلى فرحة أيامي

يادانةٍ في هواها النفس مسحورة
أنتي حياتي وروحي واجمل أحلامي

لاجيت باوصف جمالك صابني ثورة
يعجز قصيدي عن التعبير واقلامي

ولاشفت عقد الجواهر فيك منثورة
غصب(ن) علي أعتزي واربّط احزامي

يابلسم القلب هاك القلب وشعوره
أغلى شعور(ن) شربته يوم أنا ظامي

الحب نعمه من الله لا سطع نوره
بدد ظلام الشقا اللي قد له أعوامي

ياملهمتني ترى الابيات مكسورة
لامن طلبتي القصيدة ضاع الالهامي

وصعب إني أكتب قصيدة تظهر الصورة
وانتي قصيدي وأغلى فرحة أيامي

قصيدة مالها عنوان:

ألا يا بنت أنا الشاعر.. وانا العاشق.. وانا الولهان
وانا اللي عانـده وقتـه وشـدة قاسـي ظروفـه

وانا اللي من صغر سنه شكى من لوعة الحرمـان
كتم جرح سكب دمعه.. وعين الناس مـا تشوفـه

تعودت الشقا من يوم أنـا فـي حسبـة البـزران
وكبرت وتكبـر أحـزانٍ معـي مهيـب معروفـه

طلبت من البشر شربه وانا اللي حايم(ن) عطشان
ورجعت بكفي الفاضـي ونفـس العـز مكسوفـه

ونخيت بداخلي فزعة صديق(ن) صـادق وانسـان
ولقيت من البشر ناس(ن) عن الفزعات مصروفه

وعرفت إني نديمي في الشدايد.. صـادق القيفـان
تجاوبنـي مـع الآهـة بشعـر عـزت حـروفـه

وعزفت بلوعة الكلمة قصيـد(ن) كلبـوه أحـزان
يترجم واقع(ن) شفته وغيـري مـا قـدر شوفـه

ألا يابنـت شوفينـي قصيـده مـا لهـا عنـوان
وإذا كانـك جهلتينـي تـرى منتيـب مكلـوفـه

تاريخ ميلادي:

يامن حسبت السنيـن الجـرد بالهجـري
تـوّي معـك مبتـدي تاريـخ ميـلادي

لاتحسب اللي مضى أو راح من عمـري
مافات مات وكفـاك حسـاب واعـدادي

من يوم جيت ونزلت و ساحتك صـدري
عرفتنا إني زمانـي عشـت بـه غـادي

ليتك لفيـت وضويـت بدنيتـي بـدري
كـان استريـح بمنامـي واهتنـي زادي

يامـن سكنـت الحنايـا كـان ماتـدري
عن مامضى من حياتي: (هم) و (سهادي)

وانكان تبغى الدلايـل لـدّ فـي شعـري
قصايدن فـي سمـا الحرمـان تنقـادي

أسري بها الليـل لـو الليـل مايسـري
أشـب نـار القصيـدة واضبـط قنـادي

أناجي اللي حفـظ فـي غيبتـي قـدري
ووطيت لاجله علـى هامـات حسـادي

ما ابيع مع غيره من الناس مـا أشـري
بيـن الحنايـا ينـادي باسمـه منـادي

الله عطاك الغـلا فـي خافقـي حصـري
لو كان غيـرك يبـي مثلـك ولا فـادي

غلاك فـي مهجتـي يامنوتـي فطـري
أحتاج لـه حاجتـي للشـرب والـزادي

كم ليلة(ن) باردة طيفـك علـي يطـري
ويشـب جمـر الغـلا فالصـدر وقّـادي

يشع نجـم القصايـد ويغـرب صبـري
لامن حـدا مهجتـي لمواصلـك حـادي

ولامن تذكـرت طلـة وجهـك العـذري
وصوت(ن) يداعب سموعي بالهوى هادي

كني ملكت المدايـن والعصـر عصـري
وصوت السعادة علـى خفاقـي ينـادي

يانعمـة(ن) ساقهـا الرحمـن للفقـري
أنـا اشهـد إنـه كريـم وبالعطـا زادي

خـل الليالـي علـى موالهـا تـجـري
واليا عرف سرنـا حسادنـا.... عـادي!

واللي أعرفه أكيـد.. إنـي أبـد مـدري
عن مامضـى واعتبـر لقيـاك ميـلادي

دمعة العيد:

الدمعة اللي حدّرت في ضحى العيـد
من موق عيني والخـدود اجرحتهـا

حاولت أخفّيها عـن أهـل المناقيـد
وخانتنـي عيـون الشقـا وذرفتهـا

كني مع جروح الزمن لـي مواعيـد
حتى نهار العيـد... وش تاليتهـا !

أحيا الجروح الميتـة شمعـة الغيـد
شبيهـة اللـي مهجتـي مانستهـا

صغيرة(ن) كنها من الحور وتزيد...
عن غيرها.... كل العيـون بهرتهـا

عرفتها من بيـن الاطفـال بالجيـد
الله فرقـهـا بينـهـم برقبـتـهـا

ولاجت تخطى كـن فارجولهـا قيـد
ريميـة(ن) ذاب العسـل فاضحكتهـا

عيون قرناس(ن) تعوّد على الصيـد
وهـي تصيـد وصيدهـا بهدبتـهـا

عكش(ن) إلى من سلهمت جات بالعيد
فيها حروف المـوت عينـي قرتهـا

قلت: اسمحي سؤال واحـد ولا ازيـد
عمّـن مكانتهـا بقلـبـي بنتـهـا

قالت: (فلانة)؟ قلتنـا إي والله أكيـد
من غيرها بعـد السنيـن أبعدتهـا!

بعد أصبحت داري عن اديارها بعيـد
كيف الليالـي فـي غيابـي قضتهـا

مدري جنت مـن حاليـات العناقيـد
ولا السنيـن اللـي حدتنـي حدتهـا

قالت البارح عرسهـا علّـه سعيـد
ياحظهـا ياسعـدهـا يابختـهـا !

تزوجت... واليـوم راحـت لمدريـد
قبـل دقايـق مقلـعـة طايرتـهـا

وقفت كنـي وسـط طابـور تجنيـد
والرجل عجـزت لاتديـر احركتهـا

كنت أرسم الاحـلام لبعيـد.. لبعيـد
وسـود الليالـي بالفـراق ادفنتْهـا

ياليتنـي ماجيتنـا قـاطـع البـيـد
ولانشـدت اللـي جروحـي نكتْهـا

راحت ورحت وراس مالـي تناهيـد
ياحظ دار(ن) شيخـة الزيـن جتهـا

أنا أشهد إنها جـات بالعيـد فالعيـد
ريمية (ن) كـن الشهـد فاضحكتْهـا

ياظامية:

ياظامية جيتك من الشوق ظميان
أبرتوي بس السواقي بعيدة

جيتك ألم جيتك شقا جيتك أحزان
مدري وراها هالليالي عنيدة

جيتك بقايا هم في صورة انسان
نار الهوى شبت بصدري وقيدة

الشوق لو باخفيه في ناظري بان
اخفيه لكن الليالي تزيده

احسب بالغربة وانا وسط الاوطان
وبين القرايب كن روحي وحيدة

ياظامية من عقبك الوقت ما زان
طال انتظاري والليالي مديدة

ياظامية مانيب للشعر طربان
بس المواجع غصب تكتب قصيدة

أرجوك كف الدمع:

ارجوك كف الدمع لا تجرح العين
ما اطيق اشوف الدمع في وسط عينك

إرحم عيون عيبها كثرة الزين
وجرح النواعس ياحبيبي يدينك

يا شينها لحظة فراق المحبين
إرحل وبارحل واتناسا حنينك

هذا القدر بدل لنا الوصل بالبين
لازم تناساني وربي يعينك

غريب وقت قدر فراق قلبين
وعقب المودة غصب تترك ظنينك

مسموح وإن كانك توفقت يازين
يا جعلها لك سفرتن في سنينك

طرد الاوهام:

يابنت انا مليت من طرد الاوهام
وشوف السراب يزيد حدة ظمايا

صبرتنا وصبري له سنين واعوام
ولاشفت من وقتي جزيل العطايا

وصحيتنا يابنت من ليل الاحلام
حلم طويل مايحقق منايا

وقرب الوداع وخاطري منك منضام
غصب علي إني أغير إخطايا

هذا قدرنا دون سبة ولا اجرام
ماهو خطاك انتي ولاهو خطايا

يابنت:

يابنت يكفي عن حياتي تسالين
خلي سوالك كل مابي كفاية

سؤالك يفجر بصدري براكين
واتيه وين ابدى ووين النهاية

كلي غموض ولاعرفت العناوين
ومع غربة الواقع تجدد شقايه

إن قلت مجروح الزمن شوفي العين
وقلتنا صابر تبين خفايه

وإن قلت جرح العين فالجرح جرحين
هي علتي واحترت لا القى دوايه

غاب الفرح في خاطري عدة سنين
وانكرت وجهي لا نظرت المراية

يابنت ضمي خافق لاعه البين
أنا الغريب وصار عمري حكاية

سود النواعس:

تركد تراني ياادعج العين خطر اموت
إلى شفت عينك من ورى الناس ترعاني

تراني مثل ولد العواجي غدت به نوت
وسيف الشجاعه تهزمه خدر الاعياني

إلى سلهمت سود النواعس يفوت الفوت
يون الخفوق ويشتكي طرفك الحاني

ولالي جدى لامن تسلى هل البيلوت
يكود السهر ومسامر النجم لا باني

وكل السبايب نظرة ٍ من عيونك موت
تركد تراني مخطر منك يالجاني

نار من غير دخان:

يامبتسم لون الجمر فالثغر بان
حاسب ترى البسمة بتحرق شفاياك

ياللغرابة نار من غير دخان
كيف البرد يسكن مع النار بحماك

في بسمتك أعيش وقتي بتحنان
ولا غابت البسمة أجي شوق لدفاك

ضم الخفوق اللي شكا طول الاشجان
وعطه الحنان وفرحته يوم لقياك

ولاتبتعد عني ترى ليل الاحزان
لاطال عقبك قمت اسولف بذكراك

ولامن لقيتك فابتسم وانت ولهان
واحذر من البسمة تعذب شفاياك

أنا دوسري:

انا دوسري من ديرة كلبوها امجاد
إلى حل وقت الضيق تذكر مفاخرها

وانا من قبيلة لا ذكرها غريب بلاد
يفاخر بربعه والشدايد يكاسرها

تغربتنا عن ديرتي والشقا بي زاد
ولي قصة مافيه غيري معاصرها

ولاني من اللي في هوى الغانيات يصاد
أنا لي حبيبة بس .. لا يمكن اخسرها

قصائد المراسلات:

يامدمنين النوم ( صوت وصدى مع الشاعر جديد العتيبي):

يامدمنين النوم فزوا من النوم
قوموا عطوني سر كثر الرقادي

ينشدكم اللي قدله سنين محروم
من شبته مالذ نوم الوسادي

لاغلمسوا بالنوم كسابة النوم
ماطاب لي نوم البشر والعبادي

من زود هم داخل القلب مرسوم
لاقلت راح الهم عوّد وزادي

تلعب بي الافكار يوم بعد يوم
وقلبي ورا كثر الهواجس يقادي

صعب المزاج اعيش آمال وحلوم
والله يسهل لي طريق الرشادي

أدله مع العالم لي اوقات واقوم
ومع نفسي اجلس واتلمس مرادي

واترجم افكاري على ظرف مختوم
واخص به منهو بروحه يفادي

ياصل جديد اللي به الظن موسوم
وللطيب بوجيه النشاما بوادي

يومه من رجالٍ إلى ردت علوم
عتيبة عذاب الخيل يوم الطرادي

جديد ماجيتك من الناس مظلوم
ولا شكيت الحب شيٍ وكادي

ولانيب من بين المناعير مضيوم
والفضل للي للسماوات شادي

احس شيٍ داخل الصدر مكتوم
ماراق لي بعده شرابي وزادي

أضحك مع العالم وانا كلي هموم
واجامل أيام الشقا والنكادي

لا واهني طير كفخ يكسر الحوم
الهم في وادي وروحه بوادي

يلعب مع الغيمة ولا سامر نجوم
خالي هموم وناطحٍ للبرادي

جديد حاول تنشد اللي هوى النوم
جب لي جديد اسرار كثر الرقادي

الرد:

ياللي بدعت القاف والقاف مرسوم
يامرحبا عد النجوم البوادي

ترحيبة يدله بها كل مضيوم
تفرح فواد اللي بلاه النكادي

مني لابن مسرع تراحيب بسلوم
بسلوم اهلنا لاطمين الاعادي

دوك الجواب اللي من المسك موشوم
والعذر كان النقص جاء فيه بادي

علاك بالتقوى وذكر الولي دوم
ترى الذكر للعبد هو خير زادي

وابعد عن الانذال تسلم من اللوم
وخلك مع اللي يتعبون الرشادي

والنوم ماهو ذخر قرم وشغموم
مايهتني بالنوم من له مرادي

يجهد ويدرك مطلبه من ورى القوم
ودنياك هذي كلها بالجهادي

قلته وانا بي خافق كله ثلوم
واونس بكبدي مثل قدح الزنادي

لاشك اجامل مانبا كثرة اعلوم
واخفي عن المخلوق غاية مرادي

وصلاة ربي عد مابانت نجوم
على شفيع الخلق يوم التنادي

صوت وصدى "بديت الطويل" مع الشاعر شجاع الخريم:-

لا والله إلا بين الشيب يا شجاع
وجالك مجال تعذرب الشيب في راسي

تقول: الشباب أقفى ولاعاد له مرجاع
...لزومن تشوف اللي بك يروف ويواسي

ولاتدري إن القلب يا مسندي ملتاع
وخاطر رفيقك من لياليه منحاسي

إلى زل نصف الليل والنايمين اهجاع
تململت من نومي ولا ذقت الانعاسي

تهز الفواد أفواج همٍ تجيه أتباع
إلى شاق ولد اللاش نومه وهو ناسي

أشوف الليالي حكمها يا ولد ينطاع
وحلو الاماني يصدمه وقتي القاسي

أجاري زمانٍ كل ما قلتنا إنه طاع
ظهر لي رصيد الحلم في بنك الافلاسي

عسى اللي حفظ يوسف على والده ما ضاع
ورد أبرهه ـمن دون بيته ـوهو خاسي

يهوّن شقا قلبن بنا الهم فيه شراع
توارد عليه هموم بقعا وهو راسي

وهذي نصيحة: إحذر الشيب يا شجاع
وخلك خلي البال يا طيب الساسي

ورد الشاعر شجاع الخريم:

بديت الطويل وكن وسط الخفوق اصداع
إلى كن جوفي تنحبس فيه الانفاسي

تنقض علي جرح الهوى اللي حسبته ضاع
واثر مستكنه في الشرايين حساسي

فيا مل قلبن ولع الشوق فيه اولاع
تويلاع جمرن تشعفه ريح نسناسي

يا نايف المسرع: ترى القلب فيه أوجاع
ترى نس حالي من هوى البيض نساسي

ترفق علي يا نايف بسيفك البتاع
ومن لايدوس الراي من قبل.. ينداسي

أنا مقصدي بالشيب لامن غزاك اتباع
يشين مزاج البيض ترفات الالباسي

فيا وجد حالي وجد منهو بغى الاطماع
عليه الخفارة والمراقيب حراسي

ويا تل قلبي تل جمسن عليه شراع
عليه النشامى اللي على الطرد مراسي

أسولف لعل القلب يدله لكن ما طاع
وترى اللي غشيم يقول ذا جاه وسواسي

وانا دمع عيني بالخفا دايماً نباع
كما جم بير(ن) هابها كل غطاسي

بغوا طولها لكن ما وصلوا للقاع
مسايل بحور(ن) مالها عد وقياسي

على اللي تمريع بالهوا عودها مرياع
عليها الضماير والمعاليق يباسي

مجاراة نايف للشاعر دسمان السبيعي:
يقول دسمان:-

يازين فعل(ن) ياالدواسر فعلتوه
فعل(ن) سبقتوا فيه كل القبايـل

حتى لو إن الناس بعدين سووه
أنتم هله من قبل وأنتم الأوايـل

قلتوا كلاماً للضيوف وحميتـوه
وعاداتكم بالضيف فعل الجمايـل

يوم المزاين بينكم ما احتكرتـوه
ماعودوا ضيفانكـم بالفشايـل

من كان معه مشاركه مامنعتوه
ماقيل ذا واجد وذولـي قلايـل

بينتوا العلم الجميـل ورفعتـوه
للي يحسّـب دقّهـا والجلايـل

تستاهلون الطيب ياللي عملتوه
ويفوز بالطالات من كان طايـل

ماهمكم مال العناء لو جمعتـوه
ماباقي إلا الفعل والمـال زايـل

هذا طريقاً للنشامـى رسمتـوه
إلا الذي سلمه عن الطيب مايل

قررتوا الدرب الصحيح وفرضتوه
مثل القلايد في رقاب الأصايـل

فقال نايف:

دن القلم لي وناصع الطرس هاتوه
الوقت حـان لصادقـات المثايـل

هاج القصيد وصابني منه مشروه
ولا جت مواجيبه يجي له ملايـل

يزمر كما حر(ن) من الوكر هدوه
ولا كما واد(ن) من الغيث سايـل

سمعتنا دسمان لا فض لـه فـوه
وطربتنـا لأبياتـه اللـي دلايـل

يجبرني المعنى علـى قافيـة أوه
ولا ترى لي في قصيدك مسايـل

مدحك بربعي يافتى الجود سمعوه
وتفاخروا بـه ياكريـم السلايـل

تثني على اللي طيّب الفعل سنّـوه
وتوارثوه مـن الجـدود الأوايـل

آلاد زايد من شكى الضيـم لبّـوه
ويفرح بهم منهو زمانـه تمايـل

والطيب فنجـال إلا منـه صبّـوه
ينساق للـي يكسبـون الجمايـل

ورجم المعالي ياسبيعـي رقيتـوه
وساع البشوت وكاملين الخصايل

وبافعالكم ثوب المراجل لبستـوه
وأشباهكم بيـن القبايـل قلايـل

يقوله اللي شاف... ماقال قالـوه
وعاشر نشاماً يكسبون الطوايـل

حازوا على الفعل الجميل وتحاموه
وتميزوا بالطيـب بيـن القبايـل

وهذا جوابي ياهل العرف حطـوه
في صفحة(ن) فيها تخط الفعايـل

مجاراة نايف للشاعر سعد ابن جدلان:-
يقول ابن جدلان:

ياهل القصيد مراسلين الجرايد
تكفون صونوا كلمة الشعر تكفون

خلوه يلقى من وراها فوايد
فيدوا وخلوا غيركم يستفيدون

لاتعرضون انفوسكم للنقايد
الرابح اللي من غثا الناس مصيون

إليا بغيتوا نادرات القصايد
أصغوا لشعار الادب وش يقولون

أهل الادب والتجربة والركايد
أمثال مرشد والعطاوي وابن عون

أفكارهم ما تنتج إلا فرايد
تقول بصدور الاوادم يويقون

قلته وانا عنهم بعيد ونايد
ولاني بقايلها علشان يوحون

ولاني براجي من وراها فوايد
لكن رجل يخفي النور ملعون

وكانت المجاراة:

وينك من أول يا صدوق الوعايد
يا شاعر(ن) ترسم على الطرس بفنون

أشعلت في داخل فوادي وقايد
على الوتر تضرب وانا ارد بلحون

قريت لك وسط (الخزامى) فرايد
فيها جرس وانذار للي يحسون

ترى الشعر في نقص ماهوب زايد
مادام به ناس(ن) بساسه يحفرون

ناس(ن) تباها به بوسط الجرايد
وكلٍ على ليلاه يشكي ومفتون

الشعر ديوان الفعول الحمايد
ويذكر به اللي بالشجاعة يطرون

ويشفق على ذكره رجال العوايد
قروم(ن) على جزال المعاني يغارون

ويازين من بين النشامى شرايد
فيها عشاشيق الجوازي يغنون

وهذي نصيحة ياهواة القصايد
لازم على بيوت السديري تمرون

قلته وانا ياهل (الخزامى) محايد
وفي واجبي شاركت وانتوا تحكمون

((وقت الرمح والسيف )) بعد أن شكى له زميله جديد العتيبي فقال نايف له:-

جديد وقت الرمح والترس والسيف
ولى وجاء عقبه عصور الثعالة

وقت تغير مايعرف المعاريف
وانكر معرفة كاسبين الشكالة
ورفع قدر ناس بها كل ماعيف
ومن الردى لبست عقال وشاله

ياطيب الخوة ويامكرم الضيف
ارفق وخل الجد يوم الصمالة

فقال جديد:

يامرحبا ترحيب من دون تزييف
بالصاحب اللي ضاري بالجمالة

أهلاً هلا واعداد ماعاش بالسيف
من كاينات الله وماضم مجاله

جاني كتاب فيه للوقت توصيف
أحيا العروق اليابسات بزلاله

مليان بالحكمة ونقد العواريف
قولة عريب الجد ويا خواله

نايف خويي فالليالي المعااجيف
الصاحب الوافي قليل مثاله

يانايف الوقت الغبر فيه تحريف
حط الرخوم اسياد ياللهزالة

وطول الصبر قد الضلوع المهاديف
واركى على قلبي حمول ثقاله

وحنا هل الطولات والعز والسيف
واليوم صعلوكٍ خذاها لحاله

واقبل سلامي صافي دون تزييف
يالصاحب اللي ضاري بالجمالة

رثاء ديانا( صوت وصدى مع الامير خالد بن سعود الكبير)
الأمير خالد الكبير:

والله لا راثي ولانيب موجوع
وش لي بامير ويلز واللي هواها

لاشك انا طبعي على الحق مطبوع
ولي كلمة للي بشعره بكاها

اترك دعايا السقم واليتم والجوع
لولا جمال البنت محدن نعاها

ماتت تريزا عقبها بس باسبوع
ولاشفت حي من عربنا رثاها

وانا على الثنتين مانيب مفجوع
والله عليم بكل نفس وجزاها

نايف:

تسلم وصوتك عندنا اليوم مسموع
يابن الرجال اللي بعيد مداها

كلامكم يامير ماهوب مجبوع
فيه الحقيقة من بغاها لقاها

الشعر ينخى مثلك يقول موجوع
ويصيح من ناس ينوشه بلاها

ناس تحسب الشعر متجر ومشروع
تبي تباهابه ويظهر صداها

ينعون أميرة ويلز يبكون بدموع
وقالوا قصايد تتعب اللي قراها

كن الشعر في غيرها صار ممنوع
وقامت قصايدهم تطارد وراها

ماكن لهم في الاندلس حق منزوع
والقدس تزهمهم ولاحدن رثاها

الله يرحم شعرنا كان مرفوع
يوم المشاعر صادقة في هواها

واليوم حطو له محطات وفروع
ناسٍ تسابق في هواها خطاها

الطرفة في شعره:-

مع الشاعر مسفر بن علوش آل قرنين وكان سكنهم الجامعي واحد ثم انتقل مسفر إلى مكان آخر وكانت هذه الأبيات الطريفة:

نايف:

يا والله اللي شد عنا ولد علوش
تكبر ما يسلم علينا وهو ماشي

نسانا صبي حاش كل المراجل حوش
ومن لابة ماتحيي الضان والحاشي

وانا ظني إنه صار في ذالبلد مخشوش
أو إنه مولع في هوى ناس غشاشي

تخفى عن عيون الملا ماتجيه دشوش
ويصيب المحطة لا نوت به توشواشي

ومن باعنا بريال ما ينشرى بقروش
ومن يطرد المقفين ياهوووه ماعاشي

فلا تفتكر نفسك كلنتون ولا انته بوش
ولا انته من اللي بزنسن تملك الكاشي

ابن علوش ( لم أجد من رده إلا بيتين ):

أنا احمد الله لا كلنتون ولاني بوش
أنا مسلم في حكم ربي ومعتاشي

وطروشكم عندي لهم مجلس مفروش
ومفطح من الضان ولا لحم حاشي

مع الشاعر/ سلمان الشمري:
نايف:

يامخلف موعده ماهيب لك عادة
ماظنتي يخلف الميعاد سنعوسي

رجّال شمر كثير المدح مازاده
وما ينقصه لو يعذرب فيه بلعوسي

ربعٍ بكسب المعالي جالهم راده
يوم إن كسب المراجل فيه ناموسي

سلمان ظني غدابه لابس قلاده
أو زول ريم تشادي بسمته بوسي

واللي نسى موعده ماهيب له عاده
وابحتسي له معي بلجيكٍ أو روسي

سلمان الشمري:

ياللي كتبت القصيدة جاك مرداده
لو هو تأخر مردي جاك منكوسي

تمدح بشمر ومدحك يافتى زاده
زاده فخر واعتزاز ورفع للروسي

وإن كان شمر جبل ومثبت اوتاده
انتم كما الغيم فوق الضلع مكبوسي

يالدوسري ماني من اللي يخلف اوعاده
ولا تحتسي لي معك بلجيك او روسي

بعض مما قيل فيه :-

المرحوم دغش البطي في زواج نايف:

سلام الله عليكم عد ماذعـذع هبـوب النـود
سلام الدين والأسـلام قبـل الشعـر نبدابـه

سلامٍ كالعسل في مطعمه وأصفى من القرهـود
سـلامٍ صافـيٍ مـن خاطـرٍ قـام وتغنابـه

يعم أهل الوفاء وأهل المراجل كاسبين الفـود
عزيزين النفوس اللي لهم قـدر ولهـم جابـه

يقوله شاعرٍ مايجهـل المنطـوق والمقصـود
على سلم العوارف والمعرفـه رتََـب إكتابـه

على دعوة حليف الجود نايف بأبذل المجهـود
عسانا عند إبن مسرع نُجود ونكسب إعجابـه

من الدمام حثيت الركايـب والزمـن محـدود
شفوقٍ خاطري في طرقتـي لمواجـه أحبابـه

بغيت مشاركتكم في الفرح ياكاسبيـن الجـود
عسى ربـي يُوفـق مـن تـزوج ويتهنابـه

وعساكم ياأهل الفعل المشَرََف والفخر في زود
وعسى درب السعادة صوبكم ماينقفـل بابـه

وعساك العز ياحفلٍ على سآس الشرف مشدود
يُحاضونـه رجـالٍ للوفـاء والجـود كسَابـه

رجالٍ تكسب المجـد العـلا وأفعالهـا سنـود
مداغيشٍ تحوش الطايلـة والطيـب تشقابـه

رجالٍ في المواقف سِلْمها ماتقـرب المنقـود
شغاميمٍ الرجال اللـي لغالـي الـروح جلاَبـه

فعايلهم تنومـس ربعهـم وتُزعـل الحسـود
من الوقت القديم اللي مضى والطيب تحضابـه

بني عمي سند رآسي ليا من صك عود بعـود
وإليا منََه كشر وجـه الزمـان ودار دولابـه

سلايل لابةٍ تنشـاف لامـن قـوَس البـارود
مواقفهم نهار الحـرب بيـن النـاس يدرابـه

مساعرةٍ تُضد الضد لامـن قادهـا المقـرود
عزاويهم تروََع خصمهـم ويضَيـع إحسابـه

هل الوقفات والفزعات لامـن دبَـر الشـرود
هل الصولات والجولات يـوم النـار شبَابـه

مُتيهة العشاير للطرف يـوم البـرى مـردود
دبشهم كل ماطاح الحياء في القفـر يرعَابـه

عيال صهيب إبن زايد أُسودٍ في اللقاء وفهود
عطيبين الضرايب قاضبيـن المـدح بنصابـه

وحنا اليوم ننعم في بلدنـا والرخـاء ماجـود
تحت حُكم الزعيم اللـي حكمنـا وإرتضينابـه

زعيم العدل والأحسان والكف الصخى الممدود
زعيم الدار وأهل الـدار والأسـلام وأعرابـه

أبو متعب زعيم الطايلات اللي عليهـا شهـود
توشَح بالعلوم اللي تنومـس وأتعـب إركَابـه

عذاب المعتدين ومزبن المحتـاج والمظهـود
حكيم الرآي والمنطـوق نجـمٍ فـوق حرََابـه

عسى أيامه طويله بالمعزه والفـرح وسعـود
وعساه بخيـر والصحـة ترفَـل دوم بثيَابـه

ولاننسى ولي العهد لاجـارت علينـا السـود
لنـا سـدٍ منيـعٍ مـن الأعـادي ونتذرابـه

أبو خالد صديق المجد كسََاب الثناء المعهـود
مواقيفـه تشرفنـا ودرب الخيـر يسعـابـه

وعسى ربي يحفظ الديرة اللي بالوفاء تُجـود
ديارٍ تحت حكـم الشـرع والتوحيـد وكتابـه

وشعبٍ لأجل حب الدار والأسلام صار جنـود
تحت رهن الأشـارة لادعتنـا الـدار ثلاَبـه

وأبختم مابديتـه يالنشامـى كاسبيـن الجـود
عسى ربـي يُوفـق مـن تـزوج ويتهنابـه

قال فيه الشاعر منذر بن رشود الشكرة:-

يامرحبا يالشاعر الوافي عدا منك القصور
ياللي تشرف لابتك ونلت اعجابها

مشاعرك وارسلتها يمي مع وقت الفطور
غنيتها من زينها واللي سمع غنابها

ماعاد فيها ياهل الطالات معفي ومعذور
جزل المثايل جاتني يزهابها كتابها

وانا بعد شاعر واغوص البحر وانحت من الصخور
واعدها للي من العربان هو اولابها

دايم وهو سباق لعلوم المكارم مايشور
والتالية ماهيب له والاوله يحظابها

نايف ولد محسن عريب الجد والقرم الجسور
له وقفتن لامن وقف عند العرب يدرابها

وترا الصقور إن خلّفت ماخلفت كود الصقور
اللي ينومس هدها واللي دسم مخلابها

الشاعر عبدالعزيز الدلبحي:

بسم الذي يعلم خفيات الاسرار
أبدي كلامي واطلبه بالتساهيل

يالله يالمعبود ما غيرك أختار
رحمتك يوم الحشر يوم التهاويل

ومن بعدها بارسل سلامي للاخيار
زحول الرجال اللي لهم كل تبجيل

من ديرتي لدياركم جيت مختار
ماهمني بعد الطرق والمثاقيل

والقصد أبارك للخوي مكرم الجار
نايف ولد محسن عشير المشاكيل

من لابة(ن) تعرف على كل الاقطار
آلاد زايد نعم هاك الرجاجيل

قوم لهم في عالي المجد تذكار
أهل الكرم والطيب ذباحة الحيل

مقدارهم زايد على كل مقدار
وصبيهم يفرق عن الناس بالحيل

واختامها واعداد همال الامطار
واعداد ما طافوا ولبوا بتهليل

صلوا على المبعوث رحمة من النار
المصطفى الهادي رفيع المنازيل

بدر بن نايف بن شين الحلايا

راكب اللى مدرجها مدرج
صنع بوينغ تلاصع كالزجاجه

مامشت فالطريق اللى متعرج
مشيها مايثور للعجاجه

لبسها محتشم ماهو متبرج
لو ابوها من بلاد الخواجه

طولها طول والخشه تمرج
والجناحين ميلن وانعواجه

والمراوح على الدقه تهرج
تخلط الضغط واتزيد اللجاجه

قادها اللى من العلم متخرج
عارفن مدخله ويا خراجه

فالمطارات لو حطت تكرج
فى حدود المطار وفى كراجه

هيه ياكبتن الرحله تفرج
فى كتابي وفى قافي وتاجه

طالبك كان طرت انك تعرج
يم دار الفخر ينور سراجه

دار ربعي على الجزله تسرج
فعلها النور من بعد انفلاجه

انص نايف ولد مسرع مفرج .
ضيقتك وان حداك الوقت ناجه

عطه نظم الشعر قاف مضرج
فلادب مايجى نظم السذاجه

ولد شيخٍ على العليا تدرج
الوفا والحميه فى مزاجه

خبره كان للمهره يسرج
يبشر انى معه فى كل حاجه

ابن عمى معه مانى متحرج
جاك قافي ولى معك متواجه

وقال مبارك بن عبدالله الدوسري :

حسب الطلب وانت رجل المواقيف
إي لاعدمتك يااشجع الراس نايف

فيك المعاني جات وقف على الكيف
لانك على الشدات تاطا الكلايف

قرم عرف مبدا العرب والمعاريف
مبدا لابوك وجدك ولا تخالف

اشكي عليك جروح قلبي منازيف
واطا على جور الزمن غير خايف

دنيا غدت الايام فيها مناكيف
ومنها الليالي يابن محسن صلايف

إن كان راقي للعلا والمشاريف
فانك على اسمك عالي من مشارف

شوق العذارا المترفات الغطاريف
ام الجدايل والثمان الرهايف

وكذلك قال الشاعر عبدالعزيز الدلبحي:-

البارحة يوم العرب ممسين والعالم هجوع
وهجوس فكري في ظميري ماهتنت بمراحها

تزاحمت في خافقي من كل شكل وكل نوع
لين امتلت دلو القصيد وهاجسي مياحها

وسجلتها والقصد أبين فرحتي بين الجموع
واصوغها صوغ الذهب والفها بوشاحها

في يوم ستة من شهر شعبان واليوم الربوع
ليلة خميس وكل ليلة عامرة بافراحها

جينا نلبي دعوة(ن) من خاطر(ن) ماهو صنوع
أسبق من مهار الاصايل عديها وجماحها

للصاحب اللي ماسك(ن) درب الشكالة ما يتوع
له في ضميري منزلة ما فيه شخص(ن) زاحها

من لابة(ن) يوم الحرايب جمرها غادٍ ولوع
تارد على حوض المنايا شلفها ورماحها

آلاد زايد كاسبين النعم مع حسن الطبوع
يوم القبايل عزها تستاهله بسلاحها

قلته وانا لي لابة(ن) تقدر على دهم الجموع
نركي على كبد المعادي ما يزيد جراحها

يشهد لنا التاريخ ما فينا ضعيف ولا خنوع
ربعي عتيبة وافتخر لاصرت أنا مداحها.

وفي الختام تقبلوا ودي وتقديري ،،،،

**معلومات** **العضو** · 07-05-2009, 04:40 AM

ماشاء الله تبارك الله

اولاً اهنئيك ياراشد على هذا الطرح وبهذا الإسلوب الرائع والتسلسل في طرح الموضوع
وهذا الإختيار لقصايد المبدع نايف بن مسرع وخص ان مثل ماقلت الاغلب منها لم يطرح من قبل , حقيقه وبدون مجامله قرأت الموضوع وجميع القصايد المطروحه وطربت لقرأتها ولاغرابه فهي لشاعر جزل غني عن التعريف وغني عن شهادتي المجروحه فيه , صح لسانك يابطل وصح لسان ابو عبدالعزيز , وابيك توجه له عتابي عليه لان مقل في طرحه هنا ولاعاد له شوفه , واسمح لي انت والجميع بان مثل هذي المواضيع اللى تكون متكامله عن احد شعراء الموقع وتُطرح بهذا القسم , أشوف انا أحقيتها للتثبيت لكي يطلع عليها كل من يدخل ويتصفح هذا القسم

خالص المحبه والتقدير

**معلومات** **العضو** · 11-05-2009, 07:28 PM

صح السنتكم ياال محسن الشاعر والناقل امتعتونا جدا
ماهوغريب الابداع على ابو عبد العزيز ولاانت ياراشد سجل اعجابي بموضوعك
حلوجدا ياليت تختار مواضيع مثل هذي من مواضيع الشعار زي هذي سجل اعجابي

**معلومات** **العضو** · 11-05-2009, 08:05 PM

ررررراشد لله يبيض وجهك

انشهد انك وفيت وكفيت

صح لسان نايف بن مسرع

راشد تقبل ودي وتقديري

**معلومات** **العضو** · 11-05-2009, 11:09 PM

السلام عليكم ورحمة الله

الشاعر نايف بن مسرع غني عن التعريف صح لسانه

وجزاك الله خير أخي راشد على هذا الموضوع المتكامل

**معلومات** **العضو** · 13-05-2009, 12:02 AM

اقتباس:

المشاركة الأصلية كتبت بواسطة نايف الخييلي

ماشاء الله تبارك الله

اولاً اهنئيك ياراشد على هذا الطرح وبهذا الإسلوب الرائع والتسلسل في طرح الموضوع
وهذا الإختيار لقصايد المبدع نايف بن مسرع وخص ان مثل ماقلت الاغلب منها لم يطرح من قبل , حقيقه وبدون مجامله قرأت الموضوع وجميع القصايد المطروحه وطربت لقرأتها ولاغرابه فهي لشاعر جزل غني عن التعريف وغني عن شهادتي المجروحه فيه , صح لسانك يابطل وصح لسان ابو عبدالعزيز , وابيك توجه له عتابي عليه لان مقل في طرحه هنا ولاعاد له شوفه , واسمح لي انت والجميع بان مثل هذي المواضيع اللى تكون متكامله عن احد شعراء الموقع وتُطرح بهذا القسم , أشوف انا أحقيتها للتثبيت لكي يطلع عليها كل من يدخل ويتصفح هذا القسم

خالص المحبه والتقدير

ارحب يابو فهاد

وبيض الله وجهك على كلامك الطيب ولا يستغرب منك الطيب يالقرم

وعتبك لابو عبدالعزيز اعتبره وصل بإذن الله وهو عتب محب بلا شك

وابو عبدالعزيز مشغول جداً خارج المنتدى ولكنه معنا قلباً وقالباً وله زيارات مستمرة

لاهنت مرة اخرى على كلامك الطيب وتثبيتك للقصائد وهذا من ذوقك يابوفهاد

تقبل ودي وتقديري ،،،،

**معلومات** **العضو** · 13-05-2009, 12:08 AM

اقتباس:

المشاركة الأصلية كتبت بواسطة حسن بن بطحيّه الودعاني

صح السنتكم ياال محسن الشاعر والناقل امتعتونا جدا
ماهوغريب الابداع على ابو عبد العزيز ولاانت ياراشد سجل اعجابي بموضوعك
حلوجدا ياليت تختار مواضيع مثل هذي من مواضيع الشعار زي هذي سجل اعجابي

حسن بن بطحيه

ارحب يابو محمد تراحيب المطر ، ونوّر الموضوع بمرور شاعر بحجمك

وماعليك زود يابو محمد وانت شاعر قدير وتستاهل كل تقدير

تقبل ودي وتقديري ،،،،

**معلومات** **العضو** · 13-05-2009, 12:35 AM

ياكيف باكتب قصيدة واظهر الصورة
وانتي قصيدي وأغلى فرحة أيامي

يادانةٍ في هواها النفس مسحورة
أنتي حياتي وروحي واجمل أحلامي

لاجيت باوصف جمالك صابني ثورة
يعجز قصيدي عن التعبير واقلامي

ولاشفت عقد الجواهر فيك منثورة
غصب(ن) علي أعتزي واربّط احزامي
يابلسم القلب هاك القلب وشعوره
أغلى شعور(ن) شربته يوم أنا ظامي

الحب نعمه من الله لا سطع نوره
بدد ظلام الشقا اللي قد له أعوامي

ياملهمتني ترى الابيات مكسورة
لامن طلبتي القصيدة ضاع الالهامي

وصعب إني أكتب قصيدة تظهر الصورة
وانتي قصيدي وأغلى فرحة أيامي

الله الله الله ايييه هذا اللي نبيييه يارااشد

صح السااان شاعرنااا مدد
وتسلم على الاختياااراات

**معلومات** **العضو** · 13-05-2009, 08:23 PM

لاهنت يابومحسن على ماقمت به من مجهود تشكر عليه والله يوفق الشاعر نايف بن مسرع وعساه على القوه

**معلومات** **العضو** · 19-05-2009, 05:35 PM

اقتباس:

المشاركة الأصلية كتبت بواسطة محمد بن سالم بن فهيد

ررررراشد لله يبيض وجهك

انشهد انك وفيت وكفيت

صح لسان نايف بن مسرع

راشد تقبل ودي وتقديري

محمد بن سالم بن فهيد

ارحب ، ووجهك ابيض يالقرم

وعسى ربي يطول عمرك على طاعة

شاكر لك مرورك العطر وكلامك الطيب

وتقبل ودي وتقديري ،،،،

**معلومات** **العضو** · 19-05-2009, 05:43 PM

اقتباس:

المشاركة الأصلية كتبت بواسطة بوراجس المشاوية

السلام عليكم ورحمة الله

الشاعر نايف بن مسرع غني عن التعريف صح لسانه

وجزاك الله خير أخي راشد على هذا الموضوع المتكامل

بو راجس المشاوية

ارحب ياشيخنا تراحيب المطر

هلا وغلا ونورت الموضوع ياغالي

صح بدنك نيابه عن الشاعر

ولاهنت على المرور

وتقبل ودي وتقديري ،،،

**معلومات** **العضو** · 19-05-2009, 06:53 PM

اقتباس:

المشاركة الأصلية كتبت بواسطة king

ياكيف باكتب قصيدة واظهر الصورة
وانتي قصيدي وأغلى فرحة أيامي

يادانةٍ في هواها النفس مسحورة
أنتي حياتي وروحي واجمل أحلامي

لاجيت باوصف جمالك صابني ثورة
يعجز قصيدي عن التعبير واقلامي

ولاشفت عقد الجواهر فيك منثورة
غصب(ن) علي أعتزي واربّط احزامي
يابلسم القلب هاك القلب وشعوره
أغلى شعور(ن) شربته يوم أنا ظامي

الحب نعمه من الله لا سطع نوره
بدد ظلام الشقا اللي قد له أعوامي

ياملهمتني ترى الابيات مكسورة
لامن طلبتي القصيدة ضاع الالهامي

وصعب إني أكتب قصيدة تظهر الصورة
وانتي قصيدي وأغلى فرحة أيامي

الله الله الله ايييه هذا اللي نبيييه يارااشد

صح السااان شاعرنااا مدد
وتسلم على الاختياااراات

الكنق

هلابك انت وقلبك الاخضر

يامرحبا بك وأسعدني مرورك

وصح بدنك نيابة عن الشاعر

تقبل ودي وتقديري ،،،،

**معلومات** **العضو** · 19-05-2009, 06:55 PM

اقتباس:

المشاركة الأصلية كتبت بواسطة محمد الولامين

لاهنت يابومحسن على ماقمت به من مجهود تشكر عليه والله يوفق الشاعر نايف بن مسرع وعساه على القوه

محمد الولامين

ارحب يابو عبدالله تراحيب المطر

ومن قال مايهون يالغالي

وماقمت الا بالواجب طال عمرك

والله يوفقنا وياك لما يحب ويرضى

تقبل ودي وتقديري ،،،،

**معلومات** **العضو** · 19-05-2009, 07:21 PM

صح لسان الشاعر نايف ابن مسرع والله يطوال في عمره وعمركـ ياراشد والله لايهينكــ

على الطرح هذا المميز

ولاعدمناكـــ

تحياااااااااااااااتي

نايف ابن شميعان

**معلومات** **العضو** · 30-05-2009, 07:44 AM

صح السانك ياراشد ولسان نايف

الشاعر نايف بن مرسرع الاسم الذي جعل له بصمه في الشعر وفي قلوب محبيه
الشاعر الغني عن التعريف الشاعر الذي لم نعطيه حقه اتمنا لاخي الشاعر نايف بن مسرع التوفيق واقول له الى الامام يانجم

ووفقه الله

ولاهنت اخي الغالي ابو مسرع على الطرح الرائع

تقبل تحيات اخوك نفل ناهض الصخابره

الذين يشاهدون محتوى الموضوع الآن : 15 ( الأعضاء 0 والزوار 15)

		منتديات صحيفة وادي الدواسر الالكترونية