معاريف الرجال ديون وديون الرجال ثقال

[معلومات العضو حمد ابن فهد]

معــوّض خير ياحيٍ تهقــوى في الزمـان ومـال
سنينـك لو رقيـت بعدلهـا يطرحـك مايلهـا

تعلّم وإعرف إن الدرب قدامك سهل وجبـال
جبـال تطولهـا وجبـال بعيونــك تخايلـهـا

ومعوّض خير ياحـيٍ وردت الماء بدون حبـال
يطول بك الوقـوف وشربة المـاء ما تحصّلهـا

وقوفك عند راس البير مايسقيك لـو فنجــال
ولاينفعــك شوف الجمـه اللـي منـت طايلهـا

ومعوّض خير ياحيٍ خدعــك من الرجال أشكـال
تشوف أشكالها وتحطها أرفـع مـن منازلهـا

تعلّم من زمانك لا تصير مـن أجهـل الجهـال
ترى في كل يـوم تجيـك عبـره لاتجاهلهـا

إذا ربي وهـب لك عقـل تلقى في الرجال رجـال
تعرف اللـي يطلّـع قيمتــك واللـي ينزلهـا

ترى من بعض ما يندي الجبين ويحـرج الرجال
ليا سـاق الميانـه فـي نفـوسٍ ماتقبّلـهـا

ومهما شفت في صاحبك من نخـوه وطيبة فال
ترى بعض السجايـا كثـرة الإلحــاح يقتلهـا

معاريف الرجال ديـون وديون الرجـال ثقـــــال
ليا صرت متعافي ليش تغـرق فـي جمايلهـا

رصيـدك في حياتك سمعتـك مع طيبيـن الفـال
رجـال الطيب والمعـروف بالمعـروف عاملهـا

ولاتبدي بجاهــك فـي مقـامٍ ما يسـر الحـال
ولاتشفـع لنـاسٍ ما تنومـسـك بفعايلـهـا

ليا جاتك تعـذّرهـا مـدام العـذر لـه مدخــال
ووقت الجـد قـول لهـا الصحيـح ولاتجاملهـا

وخذ منـي نصيحـه لاتصــدق كـل ماينقـال
يجـــرك للنميمـه ليـن يطرحـك بحبايلـهـا

يجـي لك ناقـل النمّـات بهـروجٍ تغـث البـال
سوالف في قفـاك وحظك أطيب يـوم تجهلهـا

يبـرر بالحميـه والصداقـه شينـة الأفعـال
يجمّـل صورتـه بعلومـه اللـي ماتجمّلـهـا

ولو كانت حميه فيك رد المخطيه فـي الحــال
ولا كان إستمعها فـي قفـاك وجـاك شايلهـا

ترى من جـاب لك ودّى وهذي عـادة النقـال
يحـاول يقتنص من فمك كلمـه لأجـل ينقلهـا

ومثل ماقال عندك راح عنك وعند غيرك قــال
وزوّد عشــر فوق الكلمه اللـي كنـت قايلهـا

تجنّب مجلسـه لاتجلس إلا مع كريـم خصـال
تحمّـل ميلتـه وإن ملـت ميلتـك يتحمّلهـا

ولا تصبر على الجـار الردي لوهي ثلاث ليـال
تضـرك جيرتـه لو كـان بيبانـك تقفلـهـا

وبيـع الدار بأول سـومةٍ تعرض علـى الـدلال
ورزقـك عنـد ربٍ كاتـب اللقمـه وكافلهـا

وبنتك لاتزوجها الـــردي لو هـو كثيـر المـال
تربيهـا علـى الطـالات وتشـوّه سلايلهـا

وكم من لاش يـرمي خيبة إبنه فوق راس الخال
لو إن الخال من روس الرجال ومـن دلايلهـا

ليا منك عرفـت تميّــز الطيّـب مـن البطـال
وفادتك التجــــارب في الحيـاة وفـي مسايلهـا

وكشفت الفـرق ما بين الصحيح وحيلة المحتـال
وتعلمت الفراسـه في الوجيـه اللـي تقابلهـا

بعد هـذي ترى مالك غنى عن صحبـة العقّـال
يدلونـك بـرايٍ ينقـض الدعـوه ويفتلهـا

يقولون الرجال اللي سوالفهـم حِكـم وأمثـال
ليا من ضاعت الحيلـه يــدل القـوم عاقلهـا

نصيحة واحـدٍ جرّب وشاف من الزمان اهـوال
يقدّم لـك خلاصـة هجـرةٍ جـرّب هوايلها ..

مما راق لي

 

 

 

 

[معلومات العضو شوق خالد]

وقوفك عند راس البير مايسقيك لـو فنجــال
ولاينفعــك شوف الجمـه اللـي منـت طايلهـا


ذَآئِقَة عَذبَة وَ إختيَآرّ مُوَفَق
كُل الَشّكرٌ لكً عًلى الانِتِقَآء وَ لَآهَنتَّ
ياحمد .. كلها اعجبتني لكن
هــ البيت له وقعه على كل حال.

 

 

 

 

[معلومات العضو ابو حسين الدوسري]

لاهنت اخوي ابو حمد اختيار ينم عن رقي ذائقتك
وابيات تبرهن من صاغها شاعر كبير ومبدع
ودي وتقديري

 

 

 

 

[معلومات العضو حمد ابن فهد]

المشاركة الأصلية كتبت بواسطة شوق خالد

وقوفك عند راس البير مايسقيك لـو فنجــال
ولاينفعــك شوف الجمـه اللـي منـت طايلهـا


ذَآئِقَة عَذبَة وَ إختيَآرّ مُوَفَق
كُل الَشّكرٌ لكً عًلى الانِتِقَآء وَ لَآهَنتَّ
ياحمد .. كلها اعجبتني لكن
هــ البيت له وقعه على كل حال.

شكرا لمرروك الذي عطر المكان
ونشر بشذاه أركان موضوعي
فبارك الله فيك

 

 

 

 

[معلومات العضو حمد ابن فهد]

المشاركة الأصلية كتبت بواسطة ابو حسين الدوسري

لاهنت اخوي ابو حمد اختيار ينم عن رقي ذائقتك
وابيات تبرهن من صاغها شاعر كبير ومبدع
ودي وتقديري

كل الشكر لك ولهذا المرور الجميل

الله يعطيكـ العافيه يابوحسين

 

 

 

 

[معلومات العضو بنت الذيب]

قصيده رائعه كلها حكم ونصايح

تسلم يمينك يابوفهد وشكرا على اختيارك الموفق دايما

نترقب الزود من صوبك

 

 

 

 

[معلومات العضو حمد ابن فهد]

المشاركة الأصلية كتبت بواسطة بنت الذيب

قصيده رائعه كلها حكم ونصايح

تسلم يمينك يابوفهد وشكرا على اختيارك الموفق دايما

نترقب الزود من صوبك

مرحبابك وبمرورك بنت الذيب ومشكورة