مراسله بين الشاعر فهد بن قحيفان والشاعر هادي الحبابي

[معلومات العضو سالم الخضراني]

بسم الله الرحمن الرحيم

نقدم لكم رديه ، مراسله بين شاعرين كبار والشاعر الاول/ فهد بن مسفر بن قحيفان الخضراني الدوسري
حيث ارسل قصيده الى زميله الشاعر الكبير / هادي بن مهدي بن هطيل الحبابي القحطاني حيث انه له مواقف طيبه ويستاهل الشاعر هادي ما قيل فيه ولايستغرب الثناء من شاعرنا الكبير فهد بن قحيفان الخضراني

اترككم معا الابداع والتميز :

ياهل الونيت اللي بعيدن معشاه = ياللي على قطع المسافات ناوين
فوق الجديد اللي كمل في مزاياه = يفرق على غيره بميز وتضمين
حافه خبير البيت الابيض وسواه = واخذ التفوق باعتراف القوانين
المنتوي يشتاق له ويتمناه =لقطع الفيافي لاغدا الراي رايين
اخذو كتابي وانتبه لا تناساه = معك بالامانه لا تنساه ياميين
عنوانه اللي تفعل الطيب يمناه = اللي بطيبه يفخرون الموالين
كأنه حصل لك يا نديبي مغاواه = انشد من اهل هطيل في داية العين
تلقى السعد يا صاح و العز تلقاه = عند الحباب اهل الوفا اول وذلحين
اهل الكرم والجود في معناه = قوم على كسب النواميس ضارين
من جيت منهم ما رضا انك تعداه = الا انكم جيتو من البعد ناصين
عده على مسعود والعلم ينصاه = وعيال ابوه اللي على العز ناشين
من جاك منهم لسعد في محياه = وزودٍ على الترحيب والجانب الزين
فنجالٍ اشقر ما الرجال بتباطاه = والطيب يبدا من الضيف ويمين
ومفطحاتٍ في المجالس مجفاه =ولاخير في قولس بليا براهين
سلم عليهم والتحيه مثناه = اعداد من حجو لمكه ملبين
وعاين حفيت ولو تطاولت مرقاه = لاهنت خلك في لزومي اسبوعين
ونشر لهم بيضا على ادناه واقصاه = حتى وتظهر للمخاليق وتبين
واكتب عليه الحر من الطيب مجناه =ولطاب ساس البيت جا كل شيٍ زين
والمدح يشرى بثمن ما تغالاه =ناسن على شانه تسوق الملايين
ولانيب مداحا يبي له مكافاه = لا والذي نزل تبارك وياسين
لاكن رعا المعروف وشلون ابجزاه= يا بايعين في المراجل وشارين
والخاتمه في اول كلامي وفي اتلاه =صلو على الهادي اللي منج الدين

ويقول الشاعر هادي بن مهدي بن هطيل الحبابي

يا مرحبا يا عز خطٍ قريناه = خط العزيز ابن الرجال العزيزين
يا مرحبا واعداد ما انشت رفاياه = غر المزون اللي سقت الارض عامين
واعداد من زار الحرم يطلب رضاه = اللي خلق الانسان من داخل الطين
وعد الثرى واللي يضمه وياطاه = وما نسنس الغربي بروس البساتين
وعد النجوم اللي معا الليل تعشاه =وماكون الخلايق من وين ولا وين
جانا وحنا في الطريق انتلقاه = ولاضيع المرسول خط العناوين
من شاعر لاعد قوله حسبناه = عنده على عسف القوافي مضامين
ياطيب منهاجه وياطيب معناه = ما ضيع المعروف زبن المخلين
ركز لنا البيضا بضلع بديناه = بعالي حفيت اللي جنوب من العين
بيضا لقفناها وعلم فهمناه = وحن في لزوم اهل الوفاء مستعدين
وين انت ياللي في اللوازم دعيناه = ما ياصل الهقوات كون الشليين
اركب على اللي يوم تنظر زواياه = يجذب غرام القلب بين الضلاعين
كن السراب يسوج في اقصاه وادناه = ما يركبه كون الرجال الثريين
زين التواصيف العجيبه وصفناه = تصميم همسين العيون الشياطين
من طوكيو عبر الوكاله طلبناه = اللون والتصميم زين على زين
فكــسـارما يحتاج نذكر حلاياه = حطم رقوم اربع معا اربع وخمسين
حس المكينه لا اشتغل ما سمعناه == نسناس بردٍ في نباتٍ على طين
مابدلو زيت المكينه ولا ماه = اخر مديل جا بعد وارد الفين
من دار زايد راعي الوجه والجاه = عزوة هل التوحيد في العسر واللين
خله يروح واحفظ الخط واقراه =امانه تحفظ كلام الموصين
الى بدار ابو فيصل مسيره وملفاه = اللي تسلطن في بلاد السلاطين
اصبر على الممشا ودرب الملاواه = لاتقصره دون الميه والثمانين
مر الحسا وخريص والخرج تاطاه= وتمر بالحوطه من يسار ويمين
والافلاج وبلاد البديع يتمثناه = ولا توقف كون مقضا وبنزين
خلك معا دربك من سال ماتاه= الوصف واضح والمناطق عناوين
خل الفياض يسار والضلع يمناه = وجهك جنوب يا غرام المزايين
لاجيت فالمقرن حذراء تعداه = ذي ديره الخضران نزاعه الدين
من جيت منهم فالسعد في نواياه = شجعان وافين الخصايل كريمين
نصه فهد مسفر قحيفان تلقاه = يفرح الى جيتوا ولا انتو عجلين
تلقى الذمر طلي سمين تعشاه= وغداك مثله سلم خطلان اليدين
عطه الكتاب وباقي العلم يبراه =وسلم عليه اعداد فرض المصلين
وعلى بني عمه سناده وشرواه = اشيوخهم وكبارهم والصغيرين
اكرم ولد العين لطويق ورقاه = ضلع قسم نجد المناعير نصين
والبيض ركزها لهم في نحاياه = واكتب عليها لاد زايد مبدين
قبيلة يوم القبايل مناحاه = تاسم عصا الجاني وضد المعادين
وصلو عدد من حج بيته ويخشاه = على رسول الله سيد الثقلين

 

 

 

 

[معلومات العضو بدرآني]

صحت الالسن والقلوب / وافيين وعلمهم غانم /

 

 

 

 

[معلومات العضو حمد ابن فهد]

بيض الله وجهك ياسالم على النقل الرائع

 

 

 

 

[معلومات العضو شافي بن راشد النتيفات]

بيض الله وجهك ياسالم على النقل الرائع وصحت السنت الشعراء المبدعين

 

 

 

 

[معلومات العضو مبارك بن شافي النتيفات]

بيض الله وجهك ياسالم على النقل الرائع

 

 

 

 

[معلومات العضو سالم الخضراني]

اسعدني مرووركم الجميل بجمال اسمائكم والله يعطيكم العافيه

تقبلو تحياتي وتقديري