قصيدة ناصر الفراعنة في الامير عبد العزيز بن فهد

[معلومات العضو مبارك بن شافي النتيفات]

بسم الله الرحمن الرحيم

بعنوان : القصيدة المتدارَكه في الليالي المبارَكه


من أروع وأبدع ماقاله الشاعر ناصر الفراعنه

قصيده بمناسبة زفاف الامير \ عبدالعزيز بن فهد بن عبدالعزيز آل سعود على كريمة الامير فيصل بن مشعل بن عبدالعزيز وهي حفيدة ولي العهد الامير سلطان بن عبدالعزيز ..


القصيده فيها من طرب اللحن والروعه والتصوير الكثير والكثير والغير مستغرب على الشاعر ناصر الفراعنه - كما أشار في البيت التاسع وغيره- وخصوصاً أنها في الامير المحبوب عبدالعزيز بن فهد

تبقى الكحيلـه مالهـا الا كحيـلان = في عزّ ابو تركـي تلاعـب رسنهـا
خيالها لا زعزعـوا حـمّ الاضعـان=واهل الرمك قامـت تبـاري ظعنهـا
من صلب سادة نجد والجدّ سلطـان=ياطيبهـا وياطيـب راسٍ ظمنـهـا
حوريةٍ سيقت علـى طيـر حـوران = مَـدّة ملـوكِ ماتغـالـوا ثمنـهـا
ملوك نجـد حجابنـا روس وامتـان = كـم لحيـةٍ بارودهـم قـد دهنهـا
أهل الرمك ماشعشعوهن على الضان=إلا علـى شقـحٍ بعـيـدٍ عطنـهـا
كن خلجها ساعة تنـاوب ضحيّـان = حجيـج هنـدوسٍ تنـاوب وثنهـا
ماني ولد زبن الدخيل ابـن حربـان =شيخٍ مضى في قيس يامـر وينهـى
إن ما عَسَفْت القاف عسفي لشقـران=واردفـت عشريـنٍ عجيـبٍ لحنهـا
مع خمس تردف خمس طوعٍ بالايمان=عرْبٍ بكـارٍ نومسـت مـن قرنهـا
من شانها نطّيـت فالرجـم مشتـان=لنها مهـي حـيّ الله بيـوت لنهـا
نوب اتغبّب كنّـي الذيـب سرحـان=ونـوب اتقبّـب قبّـةٍ مـن رعنهـا
لعيون ابو تركي علـى راس مابـان=كـم قافيـه أنشزتهـا مـن كفنهـا
دندنـتـهـا دن دنّ دن دنّ دن دان=كنْهـا بيـوت مغنّـي الجـنّ كنْهـا
في عزّ من لا خلق مثلـه ولا كـان=عبدالعزيز اسطـورة آخـر زمنهـا
يامير ياصفوة هل المجـد مـن دان=ياللي سقتـك ملـوك نجـدٍ لبنهـا
يا اعزّ ركنٍ من معـدّ ابـن عدنـان=انت المراجـل منـك منتـه بمنهـا
وقفاتك اعيت شاعر الإنس والجـان=ويش بيقول اليا بغى يقـول عنهـا؟
يامحزمي من بدّ ربعـي والاخـوان=ياعزوتـي مـن شامهـا لا يمنهـا
من المراجـل ماكـنٍ كـل مـا زان=مْكَنـت مـا لا قبلـك احـدٍ مكنهـا
لو الكرم مِثّل على صـورة انسـان=مِثّل على صورَتْك مـا حـاد عنهـا
ابوك قبلك راعـي سنـان وعنـان=اليا انقطع من كـلّ صمعـاً دخنهـا
لا هاجت الهيجا وصـمّ الصفـا لان=تأبّـط السيـف الرهيـف وحضنهـا
ثلاثـة حروبـن يزيغـنّ الاذهــان=حوبـر نوادرهـا وخوبـر بثنـهـا
فهد فهـد لامـنّ نـوّا العـدا شـان=أمّـا دفنهـا دفــن والا طمنـهـا
فهد فهد مروي سنان احمـر الـزان=مْظهر عقيد حسينهـا مـن حسنهـا
فهد فهد لا حملقـت حمـر الاعيـان=كم طيّر مـن عيـون ضـدٍّ وسنهـا
فهد فهد يوم ان الاصحـاب عـدوان=من شرقي البصـره لغربـي عدنهـا
فهد فهـد خلّاهـم اشكـال والـوان=راحوا مراح رزيـزةٍ فـي صحنهـا
بحر الندا سقم العـدا قبلـة العـان=بدر السرى ليث الشرى فـي كننهـا
مروي القنا راعي الثنا عبر الازمـان=شمس الضحى قطب الرحى لا طحنها
مبرد وغى يقعد صغـا كـل خـوّان=فهد فهد فـي سرّهـا وفـي علنهـا
فهد فهـد زيـزوم شغمـوم طعّـان=محيي أمل من طـال منهـا وهنهـا
بنت الحصان اليوم في ذمّة حصـان=حصان عن صولات بقعـا حصنهـا
في الساحل الغربي سمعنـا مسيّـان=زغـرودة أُمٍ طـال منهـا شجنهـا
قامت تجاوبها على خضر الاغصـان=ورقا حمـامٍ غرهـدت فـي وطنهـا
الله يتمـم لـك بخْيـره والاحسـان=ويكفيك من شـرّ النفـوس ودرنهـا
ونشـوف أبنائـك حواليـك شبّـان=وابنـاء ابنائـك حواليـك منـهـا
ونشوفهم مثلـك صناديـد شجعـان=جمع الدراهم والذهـب مـا شحنهـا
في الصبح شجعانٍ وفي الليل رهبان=عرنة جبـالٍ مـن تضايـق زبنهـا
دَعيـت لـك بيـن الإقامـه والآذان=ينجيك من شـرّ العفـون وعفنهـا
اهل الحسد سبعه وخمسـه وإثنـان=عسى تمـوت وسمّهـا فـي بدنهـا
نـاسٍ لقلّـة شانهـا مالهـا شـان=علـى لسـان الانبيـا الله لعنـهـا
هذي نهاية مازعجت مـن الالحـان=في راس عيطا فـي مـلاوي ثكنهـا
خمسيـن قـافٍ ماتهيّـت لشيطـان=الا لشيطانـي رقـص ثـم رطنهـا
هذا وصلى الله عدد ما في الاكـوان=على صاحب الحجره ومن هو قطنها
اعداد ما ينشـي مـن الغـرب ودّان=واعداد مـن مـرّ البـلاد وسكنهـا
اشرف بني عدنان بيـتٍ وقحطـان=مفني فلول الشـرك محيـي سننهـا

 

 

 

 

[معلومات العضو نسناس الهوى]

الله على نآصر ابدع بلاااااااااا شك..

ويسستاهل الامير فهد..

ابو شافي..

لاهنت وبي

 

 

 

 

[معلومات العضو ابو فهد الشكري]

صح السان شاعرها ولاهان ناقله..........
ولاهنت ياابوشافي على نقل القصيد
الجزله من شخص جزل
تحياتي وتقديري....

 

 

 

 

[معلومات العضو مبارك بن شافي النتيفات]

نسناس الهوى

يعطيك مليون عافية على المرور العذب

تحياتي وتقديري

 

 

 

 

[معلومات العضو محمد مطلق آل بريك]

صح لساااااااانك ولسان الفراعنه ولاهنت على النقل

 

 

 

 

[معلومات العضو سالم الخضراني]

صح الله لسان الشاعر


وتسلم يمين الناقل




تحياتي وتقديري

 

 

 

 

[معلومات العضو مبارك بن شافي النتيفات]

ابوفهد الشكري

شرفت متصفحي بمرورك الكريم

تحياااااااااااااااااااتي

 

 

 

 

[معلومات العضو مبارك بن شافي النتيفات]

لاهنت يابومطلق على المرور العذب

وصح بدنك بالنيابة

تحاااايااااي

 

 

 

 

[معلومات العضو خالد المشاويه]

الله الله صح السان الفراعنه ولاهنت يابوشافي على نقل هذه الرائعه


سلمت يمناك والله يعطيك العافيه

جزيل الشكر والتقدير

 

 

 

 

[معلومات العضو مبارك بن شافي النتيفات]

سالم الخظراني

لاهنت على المرور يالذيب

تحياتي وتقديري

 

 

 

 

[معلومات العضو مبارك بن شافي النتيفات]

لاهنت يابوغازي على المرور الكريم

تحياتي وتقديري