من روائع الشاعر محمد بن محسن بن حشفل

[معلومات العضو هادي الخضراني]

رائعه جديده للشاعر محمد بن محسن بن حشفل اهداء لمنتدى الدواسر واعظائه

حان القصيد وزان لي محيانه=واخترت من جزل الكلام سمانه
قول ٍ عليه اتعب واجود ساسه=في منهجه في مقصده واوزانه
ابغي على اهل العرف لا عديـته=قالوا عسى ربي يصح لسانه
حيث الرجال الهم حقوق تلزم=واجب وانا يلزم علي بيـانه
وانكان ماعجبـهم ونال رظاهم=انا اعتبر بالفعل ماله خانه
ومن فضل ربي بالوفا لي عمله=مع كل رجال ٍ رفيع ٍ شانه
اعتبره اخواً لي واشوفه مثلي=يعد قدري في مقام اخوانه
اشفق على الطيب وافز لذكره=لو كان انا مانيب من عربانه
لا عاد كل معقد ٍ ما يفرح=من حر ما يونس عقد حجانه
اللي لاسمع بمدح كل مجرب=امن الحسد والغيظ جن جنانه
ما وده ان احد ٍ يجي له طاله=وهو بعمره ما يشاف احسانه
الله يكافـيـبه ويـبـعد داره=ويعوذنا منه ومن شيطانه
واللي بعد كنه نصوح ٍ صافي=و تحس فيه امن النفاق اخيانه
لاهوب عدو تحتمي من شره=ولا صديق ٍ تحتري صفطانه
تلقاه لامنه بداله حاجه=حطك رفيق وجاك تقضي شانه
واليا قضى الازم وقفى عنك=تصير كنك من ضمن عدوانه
ماقصد حد ٍ لاشك شي ٍ واقع=لو يختفي علمه يبـين اعلانه
والشعر لاعدوا جميع اغراضه=كل ٍ يعبر به بحسب امكانه
وثنـتـين انا جالي مرام فيها=واللي سواها قافل ٍ بـيـبانه
الاوله منها مجال الحكمه=يشوقـني نهجه واحب الحانه
اما اتكلم عن تجارب عارف=ولا براي ٍ مثبت ٍ برهانه
والثانـيه رد الثنا يلزمني=فعل الوفا ما يتجـب نسيانه
لا قام لي بالطيب خطوى نادر=ثم شال مني الحمل فوق امتانه
شهرت باسمه لين اخلد فعله=ورهنت نفسي للجميل رهانه
مانيـب من يجحد جميل الصاحب=الصمـت عنه يعتبر نكرانه
ولانيـب من يمدح حد ٍ له مقصد=من شاف قام يمجده له حانه
ماودك ينصى ولا يذكربه=الا ابلج ٍ بالجود ربي عانه
ومدح ٍ يجي من دون عرف سابق=ضعف ٍ لمنهو قدمه وايهانه
ما عز الا الرجل عزه نفسه=عن موقف ٍ ينشاف به حقرانه
لا خير باللي ما ينزه عرضه=واللي لربه ماجتـهد بايمانه
واللي بحزة واجبه ما يلقى=واللي قصر عن ما بنوا جدانه
واللي تـشنى في رفيقه خاسر=مهما كسب ما ينحصى خسرانه
من حط طراد الردى له عاده=مع بني عمه نقص ميزانه
ولا تـشين الا بـشـين الرفقه=واسبابها اللي نيـته خربانه
دايم لا جات المشكله تلقاها=من عالم ٍ تفكيرها تعبانه
اما ردي ولاتجي من جاهل=درب الملامه ما حسب حسبانه
ولامنها لحقت بشين الخطر=يظهر ابليس ويكثرون اعوانه
فان برز دور العوارف فيها=صاروا بها كل العرب بلشانه
هذا ماعرفه من تجارب عمري=واللي قدر فكري على زيانه
ان زان للسامع فهو لي غايه=يامكبره عندي وغلي اثمانه
وانكان شان اقول شي ٍ وارد=يمكن يكون اخطيت في محيانه
ماكل مخلوق ٍ دليل ٍ رايه=ويصيـب رميه لا ركز نيـشانه
وصلوا معي على الشفيع الهادي=عداد ما انشى وانـتـثر ودانه

 

 

 

 

[معلومات العضو مبارك بن شافي النتيفات]

صح لسانك ولسانه وسلمت يمينك على النقل

 

 

 

 

[معلومات العضو هادي الخضراني]

الاخ مبارك بن شافي النتيفات مشكور على المرور

 

 

 

 

[معلومات العضو فارس الدبالين]

صح لسان الشاعر الكبير / محمد بن حشفل الخضراني

ولاهنت ياهادي على موافاتنا بقصايد هذا الشاعر الجزل


تقديري واحترامي .

 

 

 

 

[معلومات العضو سالم الخضراني]

لسان الشاعر الكبير / محمد بن حشفل الخضراني

ولاهنت ياهادي على موافاتنا بقصايد هذا الشاعر الجزل


تقديري واحترامي .

 

 

 

 

[معلومات العضو شافي بن راشد النتيفات]

بيض الله وجهك على النقل وصح الله لسان ابومحسن

 

 

 

 

[معلومات العضو هادي الخضراني]

فارس الدبالين بيض الله وجهك

 

 

 

 

[معلومات العضو هادي الخضراني]

سالم الخضراني سباق للعلم الطيب بيض الله وجهك

 

 

 

 

[معلومات العضو خالد المشاويه]

محمد بن حشفل

شاعر كبير وله مكانه


لاهنت ياهادي والله يعطيك العافيه

 

 

 

 

[معلومات العضو هادي الخضراني]

شافي بن راشد النتيفات الله يعطيك العافيه

 

 

 

 

[معلومات العضو فلاح بن عايد]

صح لسانك ولسانه وسلمت يمينك على النقل

*

*

*

*

 

 

 

 

[معلومات العضو هادي الخضراني]

الاخ خالد المشاويه الله يعطيك العافيه

 

 

 

 

[معلومات العضو هادي الخضراني]

فلاح بن عايد مشكور الله يعطيك عافيه

 

 

 

 

[معلومات العضو سالم بن صمهود]

صح الله لسان الشاعر ولاهان الناقل

 

 

 

 

[معلومات العضو هادي الخضراني]

سالم بن صمهود مشكور بيض الله وجهك