بسم الله الرحمن الرحيم
هذه القصيده أستلمتها في بريدي للشاعر مسفر الدوسري كتبها رثاء في والده رحمة الله عليه . وعلي
جميع أموات المسلمين .
(يبه شلونك)
يبه شلونك..
ملل هالكون من دونك ..
يبه شلونك ؟؟
وتمضي رحلة الدنيا..
بليا طلة عيونك..؟؟!!
يبه شلونك ؟؟
وشلون المرض وياك ؟؟
بعد ماهدك بدنياك..
عساها تغمض جفونك ؟؟
تبي تدري عن أحبابك ؟؟
عن عيون تغنا بك ؟؟
عن قلوب دفنها الشوق..
وإذا جاها الغفا جابك ؟؟
يبه أمي تخيلك دوم..
تغني لك مع القمرا..
يبه واللي خذاك بيوم..
خذا بنيتك بكرا..
خذا.. وياماخذا..
وياما.. خذا ناس يحبونك
يبه حنا صرنا كبار..
توفقنا وتخرجنا..
يبه ماعاد فيه صغار..
يموج بهالزمن كل شي..
وحنا ماتموجنا..
على ذاك العهد نسري..
نبيع العمر والدنيا..
ولا تخلف بنا ظنونك !
يبه شلونك ؟؟
تبي تدري عن أخباري ؟؟
عن أفكاري وتذكاري ؟؟
أشيلك داخلي جمره ..
وبعيون الحزن عبره..
تغرقني .. وتحرقني..
أشوفك نجمة تجبر..
مراعيها .. يراعيها..
وأشوفك للرجوله اسم..
إذا شد الزمن تقسى..
واحلم من معاني الحلم..
احسك مقبل بكرة..
وعيا لايجي بكرة !!
يبه تذكر زمان مر ؟؟
يبه تذكر مجالسنا ؟
مقلطنا ومجلسنا ؟
وحارتنا ومسجدنا ؟
يبه تذكر هدايا العيد ؟
صلاة العيد؟ وبشت العيد؟
يبه تذكر سوالفنا ؟
لاجل هذا ..
وكل هذا ..
أقول اليوم يايبه ..
ملل هالكون من دونك ؟؟
يبه وينك ؟؟ ..
ولهت لنظره من عينك ..
يبه وينك ؟؟
أشوفه طوّل غيابك !! ..
ومن ودّاك .... ما جابك !!
قالوا ما يدوم الزين !! ..
وأنا عندي أمل للحين ..
و لكني أعرفك وين !!
يبه وينك ؟؟
عسى الداعي يبه بس خير ؟!!
عساك بخير ..
مداين تكرم لعينك ..
بس أرجوك علمني ..
علمني .. يبه وينك ؟؟
سألت أمي عن رجوعك ..
ولكني أعرفك وين !!
و قالت .. ما يدوم الزين !!
وانا .. عندي أمل للحين ..
في رجوعك !! ..
يبه بس تكفى علمني ....
متى رجوعك ؟؟ ..
يبه بس تكفى علمني .
وش احلى من طلوع اثنين ؟؟
طلوع الشمس .. و طلوعك !
يبه وينك ؟؟
سألت أمي .. غيابك طال ؟؟
ولا كنّي اعرفك وين !!
و قالت مثل ما قالت .. حسافه ...
ما يدوم الزين ..!
مع كل هذا صدقني ..
أنا عندي امل للحين !!
سؤالي عنك يالوالد ..
صار كما الموال !
و اشوفه طال ... والله طال ..
حزين .. بلحنه و حروفه !.
يخاف ..
يموت من خوفه ..
و قلب ٍ كان أقوى قلب ..
ضعف .. من قسوة ظروفه ..
يبه ..
أرجوك علمني ..
تشوف اللي أنا اشوفه ؟؟
أنا اشوفك نهار و ليل ..
في وسط المجلس تصلي ..
و تدعي الرب ييسر لي ..
يبه ..
ما عاد بي من حيل ..
وين الحيل ؟؟
و انا اشوفك نهار و ليل ..
مع اني ادري ما ترجع !!
غريبه .. بعدها تدمع ..
عيوني من هموم البين !!
و ادريبه مكانك وين !!
مع َ هذا .. ارد و اسأل !!
يبه .... وينك ؟؟
و لا كني اعرفك وين !!
شبكت العشر في غيابك ...
على راس ٍ كساه الشيب ..
و من وداك ... ما جابك ..
و لا ادري وش يخبي الغيب !! ..
و جرح ٍ عذ ّب احبابك
يبه .. عيّا يخف و يطيب !!
يبه.. كل جرح في الدنيا ..
مصيره بالدوا يلتم !
و لكن البلا من جرح ..
نزف فرقاك ... بليّا دم !!
و هذا الفرق في جرحي ..
عجز يلقا الدوا دكتور ..
انا جرحي غريب الطور !!!
ينزف ... بس بليّا دم ..
و زاد الهم فوق الهم ..
و دام انك يبه غايب ..
جروح الغيبه ما تلتم ..
بس عندي أمل للحين !! ..
و لا كنّي اعرفك وين !!
يبه .. ذكراك تفرحني ..
في نفس الوقت تجرحني !!
لا من جبت في طاريك ..
دموعي غصب تفضحني ..
يبه .. تذكر ليالي الصيف ؟؟
عرس الحي .. و رقص السيف ؟؟
و كرم قلبك معَ هالناس ..
كل ٍ كان في بيتك ضيف ..
ألا يا حيف .... الا يا حيف ..
زمن قاسي .. زمن قاسي ...
اخذ مني بلا رحمه ..
اخذ مني اعز ناسي !!
و خلاّ لي سهر هالليل ..
في عيني ضيف .. ألا يا حيف !!
يبه وينك ؟؟
تعال و شوف ..
كبرنا مثل ما تمنيت ..
درسنا كل ما حبيت ..
نصلي مثل ما وصيت ..
و ندعيلك في كل ظروف ..
يبه وينك ؟؟
تعال و شوف ..
صحيح الدنيا ما ترحم ..
تجرعنا التعب انواع ..
و لكن الأمل ما ضاع ..
و انا عندي امل للحين !! ..
و لا كني اعرفك وين !!
يبه تذكر شطانتنا ؟؟
انا و اخواني و اخواتي ..
معانا عيال حارتنا ..
نلعب في زوايا البيت ..؟
يبه ... والله انا حنيت ..
لذاك الوقت في وجودك ...
الا يا ريت ... الا يا ريت ...
ترجع .. يا يبه حنيت ..
حسافه الدنيا ما ترحم ...
خذت منا سعادتنا ..
خذتك بعيد ... و خلتنا !!!
يبه امي تذّكرنا ..
بأيامك قبل ما تروح ...
تناديها.. يا روح الروح ..
تغازلها و تنظر لك .. مثل طفله ...
ملامحها عشق مفضوح ...
في ذاك الوقت .. كنا صغار ...
معَ هذا ... كنا نغار ..
عليها .. او بعد منها ... كنا نغار !!
نحبك يا يبه ... ارجع ..
مثل شمس الفجر .. اطلع
حزينه الشمس في غيابك ..
و نفس الحزن في احبابك ..
واخاف الشمس من حزني ..
تغيب و ما بعد تطلع !! ..
يبه ارجع !! ... اذا لي خاطر ف قلبك ..
تعال و زورنا بس يوم ..
مع انه ما يكفينا ..
نشوفك يوم .. نبي حضنك يدفينا ..
و نشوفك دوم ..
لكن قلّت الحيله ..
و يمكن م البطا ضاعت ..
و قلنا يوم !!
يبه سامحني بترخّص ..
قبل ينشف حبر الأقلام ..
كلامي بعده ما خلّص ..
و لكن موعد الأحلام .. حان ..
ولازم اوفي له..
بعد ما ضاعت الحيله ..
اشوفك والوعد باكر !!
اذا فكّر يجي باكر ..!!
و برجع اسألك وينك !!
بس لازم تجاوبني ..
ترى عندي امل للحين !! ..
و لكني اعرفك وين ..!!
يبه شلونك ؟
ملل هالكون من دونك
يبه شلونك ؟
وتمضي رحلة الدنيا ..
بليا طلة عيونك
لاجل هذا ..
وكل هذا ..
اقول اليوم يبه وينك؟؟؟
ملل هالكون من دونك!!
ملل هالكون من دونك !!!!
هذا النص الذي هو أحد أجمل نصوص الشاعر مسفر الدوسري ..
وهي قصيدة كتبها رثاء بوالده رحمة الله عليه ..
رحم الله امواتنا وجميع اموات المسلمين .
20-01-2007, 09:32 PM
يبه شلوونك .
العرض العادي
