أبو راجس الخضاري

[معلومات العضو شافي القويسي المخاريم]

بسم الله الرحمن الرحيم








ديوان الشاعر عبدالله بن راجس الخضاري (تأبط خيراً)

 

 

 

 

[معلومات العضو شافي القويسي المخاريم]

يااهل الغزل بالله لا تحرقونه=الملح لا كثّر على الزّاد ماطيق
كلٍّ دهن راسه وكحّل عيونه=وقام يتغزّل في بنات المخاليق
بالله يا اهل العولمة لا تجونه=خلّوه يدله في قلوب المطاليق
حنّا عرب والعرض واجب نصونه=يعني يراق الدمّ والعرض ما ريق
الجار نرفى خلته ما نخونه=وتنكف ركايبنا عن العدّ لا ذيق
الله يقطع شكلها من نمونة=قومٍ تفزّ لغرّة الجار وتويق
واشوف (بعض) الجيلٍ خابتْ ظنونه=ما بينهم ونويعم الخدّ تفريق
وش يفرق الجنسين غير الخشونة=من عهد ابونا آدم ومن عصر الاغريق
باعوا قيمهم في حراج (المرونة)=باسم التمدّن وانفتاح المغاليق
وش ينفع الرّجال شكله ولونه=لا صار ما يفتك في حزّة الضيق
(عنتر) سواده فارقٍ في سنونه=والفعل شوّق زاهيات العشاريق
يا بنت شومي واقصري الشبح دونه=للريم هقواتٍ تبذّ التفافيق
شومي لشيخٍ ما تزعزع ركونه=لو زعزعت رضوى وابانات وطويق
في ذمتي ما تطعمين المهونة=مثله فلا يمكن يخون المواثيق
تعوّدت شلّ الثقيلة متونه=ورثٍ من اقصى جدّ ماهو بتلفيق
وان كان عن دارك تعدّت مزونه=فالجوهرة تبقى بجوف الصناديق
ولاّ ترمّالك على كرت شونه=اخير لك من شوف بعض العشاشيق

 

 

 

 

[معلومات العضو شافي القويسي المخاريم]

انا اشهد انّ الفقر راعي جميلة=يكسر جناح (ن) ما لجبره صلاحي
كم من فقير(ن) راس ماله شليله=لو اغتنى ضيّق وسيع البراحي
يشيل حمل(ن) عجْـز غيره يشيله=وصدره وزى به كل سم (ن) ذحاحي
يحقر خلق الله وكفّه محيلة=وش لون لو ريّش وجا له جناحي
الله يقطع جورته واللهي له=والله لا يسّيه بايّة نواحي
الطبع يغلب والتطبّع مخيلة=ما غرّنا برق(ن) على الافق لاحي
والذيخ لا منـْه التوى راس ذيله=ما ينعدل ما دام صوته نباحي
الزود نقص(ن) والتواضع فضيلة=وما ينقل الزّومة بعيد المشاحي
لا خير في مال(ن) يعوّد فشيلة=ولا خير في كفّ(ن) بليّا مناحي
المال في الدنيا مجرّد وسيله=والذِّكر ما يمحاه في الناس ماحي
وهرج الملا مثل السيوف الصقيلة=هنيّ من هو من غثاه استراحي
الله لا يغني النفوس الثقيلة=والله لا يملا الكفوف الشحاحي
انا اشهد ان الكبر راس الرذيلة=وانا اشهد ان الخلق باب الفلاحي
وانا اشهد ان الفقر راعي جميلة=يكسر جناح (ن) ما لجبره صلاحي

 

 

 

 

[معلومات العضو شافي القويسي المخاريم]

بين عقل وبين نفس وبين روح = ضيّع الرّبـّان مرسى الباخرة
إن لبسنا الزهد عرّانا الطموح= نبغي الدّنيا ونبغي الاخرة
الله اكبر ( أيها النفس الجموح ) = للّقا الاكبر وش انتي ذاخرة
يا مشيّدة العماير والصّروح = يا مسحّبة البشوت الفاخرة
( كلّ بطاح ٍ له يوم ٌ بطوح ) = والوعد بين العظام الّناخرة
القبور اللي فنتْ من عصر نوح = والقبور اللي باهلها زاخرة
والرّسوم اللي على البيدا تلوح= والنّصوب الشّامخات الساخرة
ما وعينا الدّرس مع كثر الشّروح = دهورتنا : ( الاااخرة مستاااخرة )

 

 

 

 

[معلومات العضو شافي القويسي المخاريم]

ألاحي حمام الورق فوق الشجر لا ناح=والى من عوى ذيب الخلا صحت له عاوي
واخيل السحاب اللي تزبر وبرقه لاح=ويجذب خيالي في السما نجمها الهاوي
امدّ النظر واقدح سنا فكري اللمّاح=واشوف الرّحاه تدور والحلّ ما ياوي
انا اشوف دنيانا كما حالة المسباح=يسبّح بها العابد ويلعب بها الغاوي
واشوف اليدين القاصرة تقطف التفاح=ويمسي عزيز النفس في عزّته طاوي
لك الله يا قلبٍ ليا قلت يدله صاح=عجز ما لقى له في شقا همّه مداوي
تخالف عليه هموم بقعا ولا يرتاح=والى اقبل ظلام الليل يدوي به الداوي
وانا ما ذبحني يا هل العرف دون سلاح=سوى كلمةٍ عوجا تلفّظ بها واوي
يحلف اليمين ويدّعي انّه يبي الاصلاح=وعند المقابل يرخي الراس ويلاوي
اعرف الهروج الجدّ واميّز المزّاح=وافرّق ما بين الجاونيّــــة من الجاوي
واذا كان باب المجد ما له معه مفتاح=فيقعي على عتبة هل المرجلة ثاوي
بغينا المكاسب والسلامة لنا الارباح=جميلة وبارضٍ سوّ قل لي : كم تساوي ؟

 

 

 

 

[معلومات العضو شافي القويسي المخاريم]

علموا الدّنْمرك من هو رسول العالمين=علموها كيف تبت يدا الجاني وتَبّ
علموها ياهل الحق وش معنى اليقين=وغضبة المليار مسلم لِيا منّه غضَبْ
في محبة سيد الخلق ما نغلي الثمين=اكرم اهل الكون لا شكّ واطهرهم نسَب
الحليم الطاهر البر سِـيد المرسلين= بيّن المولى له الفضل في كل الكُتب
قبل ماحنّت له قلوبنا بَاصْدق حنين= حنّ لآقدامهْ وكفّيه محراب الخشَب
الغلا له قد تربّع على عرش الكِنين= والوَلا له راسي(ن) من ورى الضلع الحَدَب
نبتر الكفّ اللعينة ونِجْتثّ اللعين= ندمَغ الحية على الرّاس ماهوب الذّنب
إيه تخسى شِلّة الكفر والحقد الدفين=نفتدي عرضه بالارواح لا حلّ الطلَب
قاطعوهم واذبحوا الكفر من حبل الوتين=واسحبوا قنصل بلدنا ونادوا المُنتدَب
لين تركع كـُبْـنهوقـِن ركوع الخاضعين=والصليب يجيك يزحف على متن الرّكب
لعنبو كبد(ن) تداهن عقب سبّة الامين= تشرق الدنيا بدينه وتغرُب لا غرَب
حرّك المليار مسلم لسان الحاسدين=حاولوا هزّ العقيدة وحَملتْ في الكَرَب
انفجر بركان حبه وهزّ النّايمين=واصطفق موج المحبين من عُجـْم وعرب
رددي يا امّـة محمد نشيد الفاتحين=واقرأي الانفال واطوِي دواوين الطّرب
لا متى وانّا على الكفر واهـْله ساكتين=من بغى الطولات يصبر على حَرّ اللهب
هيه يا روما لنا فيك وعدٍ من سنين=والله الوالي لتحقيق وعدٍ مـُرتقب
ابتدا الشعب السعودي وقاد المسلمين=لا بغا الله ينصر الدين حرّك له سِبب
تحت راية كاسب المجد والقرم الرّزين=ابو متعب مَـزْبن الدّرك فكّاك النّشـب
تحت راية سيدي كُـلّبونا جاهزين= لو يخوض البحر خضنا غزيرات المغب
اشهد انّه حاكم(ن) من سلالة حاكمين=واشهد انّه في ذرى المجد والقمة وِثَب
يحفظ الله مملكتنا ويِخزي الحاقدين=والنبي قد عزّه اللي على الغالب غَـلب

 

 

 

 

[معلومات العضو شافي القويسي المخاريم]

عيون الموالي والمعادي تعاينّا=عسى الله من هرج التشمّات يمّنّا
إلى الله نشكو كل كرب (ن) يصيبنا=وهو في نهار المدلهمّات مزبنّا
بلينا بسمّ (ن) دس في صورة الدّسم=وجانا البلا والشر من حيث مامنّا
تفانى الحلال وحلّ في الحال كارثة=قبل ما نرزّ اشبوكها في مزاينّا
مجاهيم سود (ن) كنها الليل لا دجى=وكم شيخ قوم (ن) ذِبْح فيها ولا ثنّى
رعينا بها وقت الجهل حيث ما تبي=وفي شفّها تِطوَى الاضاعين واتْبنّا
عديمات وصف (ن) زينها كل ما اصبحت=ترازم قبل ما يرفع الصوت مذّنّا
ويا زينهن لا سمعنِ الصوت واقبلْن=وحنّا نرّحب من غلاهن ليا جنّا
وتسمع فحلها في جنَبها يحوفها=كما صوت رعّاد (ن) من الرّجف ما ونّا
حمينا حماها بالسيوف وبالقنا=تلين جلاميد الصخور وما لنّا
ملكنا الثرى يوما وذلت لملكنا=ملوكٌ وسدنا الكون دهرا وما هُنّا
سلوا الدهر والتأريخ عن آل زايدٍ=وعن تغلبٍ صنوين في المجد مذ كنّا
دواسر في الهيجاء أسدٌ غطارفٌ=تدور رحى الموت الزؤام إذا بنّا
حمينا ذمار الجار حتى لو انّهُ=بغته المنايا شرّعاً لم يبِن عنّا
وسمنا عصاه وراح في ذّمة العصا=ولو شانت نفوس الموالين ما شنّا
تموت الخلايق والحقايق تورّخت=ونقش الصفا ما هو كما نقشة الحنّا
لنا المجد والتاريخ والعز والفخر=رقينا على هام المفاخر ودوّنّا :
دواسرُ قد حزنا على الفضلِ كلِّه=ولم يبقَ إلا أن يكُ المصطفى منّا

 

 

 

 

[معلومات العضو شافي القويسي المخاريم]

عز الرياض وعز وادي حنيفة = عز الامارة والأمور العظايم
عدل الحكم سلمان بالعز ريفه = خمسين عام (ن) كل ابوها غنايم
تبصر بعدله عين حيّ (ن) كفيفة = المجد له والطيب والعزّ دايم
سلمان نجد ونجد باسمه منيفة = وسلمان مثل طويق وطويق قايم
نجد العذيّة في جنابه مريفة = تنعم بظلّه عن هبوب السّمايم
بحر(ن) تسوق النّود مدّه لسيفه = وموجه يغطّي نايفات العدايم
في سطوته حدّ السّيوف الرّهيفة = وفي هيبته هيبة ملوك وحكايم
شيوخ نجد(ن) كلّهم في مضيفه = وفي مجلسه تلقى كبار العمايم
نفسه لدمعات اليتامى صخيفة = وستر العذارى مضفيات اللثايم
ابن الذي رجّع حقوقه بسيفه = قدّ الرّجال يجيك حجم العزايم
خذا الرّياض وما رضاها نصيفة = نادى المنادي له بليّا قسايم
ثم التفت واليا الجزيرة مخيفة = والشرك عِلّق له بمكة تمايم
وحّد علمها واحتواها رفيفه = لين استوت عدل(ن) بليّا ظلايم
سلمان حرّ(ن) ما لقينا وصيفه = عليه من صقر الجزيرة علايم
خمسين عام ونجد باسمه منيفه = لين اعتلت فوق النّجوم النّعايم

 

 

 

 

[معلومات العضو شافي القويسي المخاريم]

يفزّ قلبي كلما شفتنا جيب = ويضج لا من شفت زولن يحاليه
لا والله الّا مات راعي المواجيب = نسل الحرار اللي طيابٍ مجانيه
في ذمتي مافيه طاري عذاريب = كنّ الإله منزّهه عنه تنزيه
اليا حكى .. تَمـْر النخيل المهاديب = احلى من الشهد المصفّى حكاويه
واليا عطى .. غيث الكبود المجاديب= تكاشف بروق الصخا في يمانيه
النادر اللي في السما له مراقيب = كم زول خربٍ حوّله مع علابيه
تفّاق جزلات المعاني الذواهيب = تعوّدت بدع الفرايد قوافيه
اليا بغى الندّر تجي له مهاذيب = جلمود صخرٍ وانحدر من علاويه
فهد فهد سِعد النّضا والمناديب= عِدّ القروم اللي تخالف سوانيه
فهد ولد ماجد ولد كاسب الطيب= طلق الحجاج اللي جزالٍ هقاويه
مراجله ما تنحصى بالحواسيب= حاز المراجل كلّها في مخابيه
من لاد ناهش لا عوى الذيب للذيب= سقم الحريب اللي عجز من يداويه
اقولها ودموع عيني سواكيب= والقلب فيه من اللواهيب ما فيه
طالبك ياللي ما تكوده مطاليب= يالمعطي اللي كلنا في حسانيه
من يسأل الرحمن ما يمكن يخيب= الواحد اللي ما بعد خاب راجيه
يالله عسى قبره جنانٍ واطاييب= واغفر له ذنوبه وزلات ماضيه
دارت بنا الدنيا سواة الدواليب= وابن ادمٍ فيها على سكة التيه
ميت بكى ميت والاقدار تسبيب= والقلب يبغى له وصاية وتنبيه
بابطي وقلبي فيه علة وتصويب= ما لوم قلبي لا بكى فقد غاليه
يفزّ قلبي كلّما شفتنا جيب= ويضجّ لا من شفت زولن يحاليه

 

 

 

 

[معلومات العضو شافي القويسي المخاريم]

ألا يالله سألتـك ياعظيـم المقـدرة والـذاتْ=وتعلم كل شيّ(ن) لم يكن لـو كـان والكايِـنْ
ألا يالله تجلى عن ضميري واهـج الحسـراتْ=ألا ياشيب راسي والعيـون تشـوف وتعايـنْ
أشوف الجيل خلف الجيل تكثر فيهم الخمـلات=بعد ماكان صلب(ن) في العقيدة صار متلايـنْ
ألا ياكيف يا احفاد المثنـى ياهـل النّعـرات=نعيّد عيـد مـن سمّـوه بالبابـا ( فلنتايـن )
ألا ياحيف جيل المصطفى يشري له الـوردات=ألا عزّ الله ان الوقت عقب اللي حصل شايـن
نموت ولا تعيّدنـا بعيـد الحـب والنغمـات=عسى من عيّد بعيده تكوده شَلّـة ( الفايـن )
أحب الجادل اللي ماتحب السـوق والدّوجـات=ولا تغضي بطرف العين للسّربـوت والخايـن
عسى يفدى مواطيها بنات الحب والموضـات=بنات الجنز والسفرات والتجديف في ( الرّاين )
زهمت القاف يا قاف المعاني جاوب العبـرات=وقال القاف : ما ظنّي تعدى نمبر ( النايـن )

 

 

 

 

[معلومات العضو شافي القويسي المخاريم]

يا بنت ياللي تنظمين المساحيب = خلي مساحيبك على طرق بخوت
حذراك ثم حذراك من نهشة الذيب= حتّيش لو زِخرف على متنه بشوت
يقول احبك وانتي اغلى المطاليب = وانتي عذاب القلب يا مبسم التوت
يزخرف المنطوق باحلى الاساليب= ويصوغ لك قافن كما سحر هاروت
ويقول شمس الحب لا يمكن اتغيب= ولا ينتهي حب المخاليق بالموت
في كلّ يومن له عشاشيق واصحيب= ويجر صوته كل ما سمع له صوت
باكر يخون الحب ويكشّر النّيب= وياطى على كلّ المواثيق بالبوت
حب النّقا ما هوب نبتة سراديب= حب النقا تعمر به قلوب وبيوت
حب النقا يبنى على منهج الطيب= وشْمٍ على صمّ المعاليق منحوت
بنت الشيوخ تشوم عن سكة العيب= لا صار حبل امّ الخلاقين مفلوت
يا عزوة المنعور عطب المضاريب= اسمك يماري به ولا عنه مسكوت
إياك ثم إياك عكف المخاليب= لا يِقطَف الرمان بيْدين سربوت
ما في الهوى يابنت الاجواد تجريب=ما تنفع الدمعة ليا فوّت الفوت

 

 

 

 

[معلومات العضو شافي القويسي المخاريم]

بلادٍ غدت للناس عبرة بطرفة عين= على تايلند وسيرلانكا وسومَطْرهْ
بموجٍ كما الطوفان فوق البنا طوفين= وهو في خزاين من برا سطوته ( قَطرهْ )
تزلزل له اليابان واهتز سور الصين= وضج البشر وانتفضت لهوله الفِطرهْ
جزر عامره صارت بعد ما دِمَرها طين= يجي للبنا ويطمّ عاليه ويخَطرهْ
تشوف الجثث صرعى على ساحله وتبين= مواري الدمار وبُؤرة القاع منشَطرهْ
يقولون ( سونامي ) وانا قول سوّ الدين= ذنوب البشر والكفر والشرك والبَطرهْ
الى من غضب رب البشر فالسلامة وين ؟!=وهو يعلم المكنون والسرّ والخَطره
عسى ربنا يغفر لنا ذنبنا ويعين= إلهٍ نولّي في قضا سؤلنا شَطرهْ

 

 

 

 

[معلومات العضو شافي القويسي المخاريم]

قالوا (هوى ) قلت: الهوى وش هو؟؟ وابي علمٍ ثبات=قالوا( محبة)قلتنا: والحبّ مرساه القلوب؟!
قالوا : نعم حب النّقا يبقى ولو راعيه مات = صمّ الصّفا وهو الصّفا لو ذاق لذّاته يذوب
عنتر وهو عنتر تعّلق بالبنيّ المترفات = من شانهنْ لبْس الدّروع وخاض غبّات الحروب
ليلى وقيس بن الملوّح في عصورٍ ماضيات = قيس انهبل في حبّها يومنّها بنت لعوب
بالله ما تقرا دواوين الغزل في المكتبات= مثلك يبو راجس مثقّف وانت شاعر وامحسوب
قلت المحبة الاوّله ولّت وعصر الحبّ فات = حبّ النّقا ولّى ولم يبقى سوى الحبّ الكذوب
أيّة محبّه يابطاقات ( السّوا ) ؟؟ والترّهات = حبٍّ بهيميّ المقاصد لا محبّ ولا امحبوب
حبٍّ بداياته ( مسينجر) او تولّد عبر ( شات) = حتما(ن) بداياته نهاية واسألوا راعي ( القروب )
بالله قلّ لي لو سألتك وش يشدّك في الفتاة= لا صرت ساعي في زواج وقيل خاطب وامخطوب؟؟
شفّك طويلات الغِطا واهل العبايا الضّافيات= شفّك قصيرات الخِطا والسّالمات من العيوب
جواهرٍ في بيوتهنْ ما دوّجنْ في النّاطحات = ما عرّضنْ بالبنطلون وخالفنْ صلْف الهبوب
ما كحّلنّ عيونهنْ لاهل العيون الجايعات= ولا حزّمنّ خصورهنْ والكفّ بالنّقش امخضوب
الحبّ تالي الوقت ما ظنّي على ذكره طراة = شمسٍ بدت في الاوّلين وهايفت يمّ الغروب
ثوبٍ لبسه اهل الرّدى واهل النّفوس الخاملات= احسن لنا نغسل يدينا من تعاطيه ونتوب

 

 

 

 

[معلومات العضو شافي القويسي المخاريم]

انا احمد الله مسلم(ن) وسعودي= ومعرّب(ن) من ساس ابوي وجدّي
ماهي مشاكل لا مدحت جدودي= المشكلة لو قلت ما احد(ن) قدّي
طولة ولد عمّي وزوده زودي=وارفى خماله كان هو متردّي
والعزّ والناموس تبغى شهودي=ما هي سواليف(ن) تجي واتعدّي
ان ما استوت من فوق متن الجودي=وامست مع جدي الشّمال اتقدّي
ولاّ كما نفد(ن) تلوفه نودي=الصبح يشمخ والضحى ينهدّي
الله يظلّل شجرة آل سعودي= الشجرة اللي ظلّها ممتدّي
لا عادك الله يالليالي السّودي= يوم الجهل واسلوبه المتعدّي
اليوم في عيشة رخا وامهودي=في ظلّ سيف(ن) ما برد له حدّي
يا نفحة الدّين الكريمه عودي= ويا لفحة الجهل الكريهه هدّي
بعض العرب تفكيرههم محدودي= في باله انّه بالعرب متغدّي
زين السوالف والجميع اقعودي= ويا شينها وان عوّدت للجِدّي
ان الفتى من قال : فعل اعضودي= ليس الفتى من قال : سوّى جَدّي
والكامل الله ربنا المعبودي= ولاّ الخلايق بين جزر ومدّي
ادعي الولي في خلوتي واسجودي= ما اشكي على غير المهيمن سدّي
يالله دخيلك لا سكنت لحودي= ما غيرك احد من العذاب ايعدّي
سنّة محمد والكتاب احدودي= وما خالف النهج القويم يردّي
عهد مضى في مبرمات اعهودي= ما غير ربّي والنبيّ انبدّي
وان ميّلتْ دنياي عن مقصودي= ما مال عن سرج العقيدة شدّي

 

 

 

 

[معلومات العضو شافي القويسي المخاريم]

صب لي شاهي وزوّد في ال ( sugar) =كُب من هو فوق خلق الله يزوم
ما درى المسكين وش معنى ال ( bigger ) =غرته كُبر العلابي والزهوم
ما يرج الحوض كون اردى البقَر=والمهايط للسلاتيح الرخوم
ان لقا ( المسكين ) هايط واحتقر=وان لقا ( السكّين ) جاوب في الهدوم
ان بغى العليا تقاصر وانعقر=ما خطت رجله على درب القروم
الغراب اليا لقا الجيفه نقر=نافشٍ ريشه وفي غيّه يهوم
قال انا( king ) البسيطة واستقر=ما درى انّ الحرّعن صيده يشوم
ذرةٍ من كبر مرجعها سقر=وعند رب الكون تصطفّ الخصوم
قالها من هو تلعوَز وافتقر=وارتجف في ضامره قلبٍ كتوم
ما جمع ( بَحْلس ) وحوّش ( بازِقَر )=وكل ما هفّ ( الدّريبي ) من سهوم
مالها في قلب ( ابو راجس ) مقر=لا وربي ما اقْعدت حتى تقوم
القناعة راس مالي لا وقر=كنزها في القلب زالنّ الهموم