قصيدة الشاعر عبدالله مناحي العصيمي في الشيخ جمحان بن عرار

[معلومات العضو راشد المسعري]

السلام عليكم ورحمة الله وبركاته:
اسعد الله أوقاتكم بالخير و المسرات
هذه قصيدة قالها الشاعر " عضو الموقع " / عبدالله العصيمي في الشيخ جمحان بن عرار بن صلاّّل قبل أسبوع في مناسبة في وادي الدواسر :-





الشعر لا جا لازمه ماذخرناه
نارد على عده ونشرب زلاله

نارد حيام ونروي الكبد من ماه
ونروي مسامع من يحب الجزاله

كلن يجيب الدلو ويحرد رشاه
ويركب الناعور وسط المحاله

احد شرابه عذب من فعل يمناه
واحد يبا يشرب وتقصر حباله

وعند المنصه كل رجل ومبداه
من دون قاصر في رجال الشكاله

الطيب الطيب نجي له وننصاه
مقدار والمعذار ماني بانا له

ما ابي عزيمه عند مثله وشرواه
اجي قدر واشاركه فاحتفاله

جمحان جمحان المراجل تنصاه
تنشر له البيضا على كل طاله

صبي تم اللي على الطيب ممشاه
وابشر بعزك والعضايم سهاله

ينصاه من حده زمانه وعناه
كنه لا جاه مشاركه في حلاله

ماحاشته يمناه ماراح مخباه
يشهد له المنسف وتشهد دلاله

للعز يابيت على الجود مبناه
وللعز يامن شيده وارتكا له

مشرع بابه ويضحك محياه
طلق الحجاج اللي كريمه سباله

من دون حسكات الوبر عزمه افناه
يرخص لها وقته وحاله وماله

يبعد معشاها وتبعد معشاه
سود تنومس من فداها بحاله

اللي يهوم المجد ماتقصر خطاه
يدوس عسرات الامور ببساله

ما خاب ابوه اللي على ابوه سماه
عطاه الاسم وناجبه للشكاله

من نسل عود فاح صيته وطرياه
الطيب موروثه وسلعه عياله

عسا جنان الخلد داره ومثواه
ما مات ذكره جنه الخلد فاله

الجود والناموس والفعل والجاه
ورثه وورث مدونين الاصاله

يوم ان كلن عاش من ضرب شلفاه
خذو سنام المجد في كل حاله

اخوان حمسا في نهار المثاراه
كم عايل كانو سبايب زواله

من روس قوم لا اعتزو فالملاقاه
تاخذ وتعطي من شموخ وعداله

الاد مسعر سقم من حظه افناه
ضلع يذري من تذرا بجاله

وان ثورالميدان والعج غطاه
من هازهم بالفعل عزي لحاله

اما غدًا للذيب واللي تعشاه
والا صويب جاه الاخر وشاله

ومهديه للي كبر فعله اطغاه
ومنوخه للي هدر من هباله

ومتيه سود البكار المعفاه
والجار وامن في طرفهم و داله

الدوسري تشهد على فعله عداه
والمجد لوهو من ورا الجدي طاله

والمجد ضلع عسر هامه وعداه
والطيب كايد والنشاما تناله

يشهد له الوادي وتشهد قراياه
ويشهد له العارض وشامخ جباله

اللي يمد الطيب بالطيب يجزاه
واللي يمد الصاع ياخذ كياله

وسم العصا يمن دخيله ويحماه
وعلى المطيه مثل ختم الوكاله

مالطمت دون المشارب معداه
تارد على عد الخطر ماتساله

المجد فالتاريخ يتعب ولا احصاه
والشاعر الحاضر ذكر ماطرا له

يقدم ابيات من الشعر مهداه
ويمدها قدر وجميل وجماله

يصوغها صوغ الذهب ويتحلاه
ويصبها صب الحديد وعداله

وانا عتيبي على الصدق منشاه
اجي واشارك صاحبي فاحتفاله

مبروك يامحمد تهاني مثناه
نفرح لمثلك يالخوي ونعنا له

خطوا الولد يطيب من طيب مجناه
واللي سواتك كاس الامجاد ناله

اشهر سما ياللي كريمه سجاياه
والقاع خله للرخم والحثاله

وختام ما قلناه واللي ذكرناه
صلو على محمد وصحبه واله

 

 

 

 

[معلومات العضو عبدالرحمن بن فلاح آل بريك]

يستاهل المدح أبو تركي .

وصح الله لسان الشاعر الكبير عبدالله العصيمي .

ولا هنت أبو محسن على النقل المميز .

 

 

 

 

[معلومات العضو الكاتم]

كفووو بالمادح والممدوووح
كثر الله من امثالك ياجمحان
السمعه طيبه والساس طيب

 

 

 

 

[معلومات العضو مبارك بن شافي النتيفات]

صح لسانك ولسانه

ويستاهل كاسب الامداح الشيخ جمحان

لاهنت ع النقل يالامير

 

 

 

 

[معلومات العضو راشد المسعري]

المشاركة الأصلية كتبت بواسطة عبدالرحمن بن فلاح آل بريك

يستاهل المدح أبو تركي .

وصح الله لسان الشاعر الكبير عبدالله العصيمي .

ولا هنت أبو محسن على النقل المميز .

ارحب يابو فلاح
تستاهل الطيب يالغالي
وشكرا لمرورك العطر ،،،