قصيدة للشاعر / سليمان بن شريم رحمه الله ينصح فيها إبنه ,

[معلومات العضو عبدالرحمن الشرافي]

السلام عليكم ورحمة الله وبركاته,,,,



هذه قصيدة للشاعر / سليمان بن شريم رحمه الله ينصح فيها إبنه ,


يقول فيها:



يا مل عينٍ في محاجـــــــيرها شوك

*********والقلب به عن لذة الــــــــنوم تكـــاك

لا دك في قلبي من الهم داكـــــــوك

*********جاوبت طربات الحمايم على الـــراك

عزي لحالك يا عزيز وأنا ابـــــــــــــوك

.*********كان الزمان اللي توطــــاني توطـــاك

إفهم وصاتي يا عزيز وأنا ابـــــــــــوك

.*********دامك صغير وغاية العــــــلم يقــــراك

تراه ما ينــفعك خالك ولا أخــــــــــوك

*********لا صار ما تقضي لزومك بيمــــــــــناك

وربعك ليا بان الخلل فيك عافــــــــوك

******** أقرب قريب ٍ لك من الناس يشــــناك

إن كثر مالك صدقواّ لك وطاعــــــــوك

******** وإن قل ما بيديك شانت حلايـــــــاك

لو تطلب الما عندهم كان ما أسقوك

******** إبعد مزارك عن وطنهم ومـــــــــرباك

وإن طاب حظك صدقوّا لك وحــــــبوك

********وإن بار كلن ما يبي غير فرقـــــــــاك

وإلا إعترض لك من صروف الـنيا صوك

*********كلن تبرا منك ماهــــــوب ويـــــــــاك

هراجة المجلس إلى جـــــــيت وروك

******** منازل ٍ تطرب نظيرك بدنــــــــــــــياك

وإللا قضى منك اللوازم وخلــــــــــوك

******** تفرقوا وأنت إحتمل كل ما جــــــــاك

كنك سراج البيت للنور شـــــــــــبوّك

********.وإلى إنقضى اللازم حدا الربع طفاك

وألا كما ليمونة الحمض مصــــــــوك

******** وإلا قضى منها الطعم فرغــــــــوا ذاك

واللي يجي من رفقته ريب وشكوك

******** إحذر عنه لياك تصدف بمـــــــــسراك

وإلا جفوك أهل الوطن وإســـتخفوك

******** قلّع غريسك منه وإهدم ركايـــــــــــاك

تراك لو تنجع على الربع صــــــعلوك

*******أحسن من اللي نلتجي به وياطـــــاك

عطهم وضيفهم إلا منهم جـــــــــوك

********وإغلق ضميرك لا تعلم بقصــــــــــــياك

إن طبت ما حبوّك وإن عبت زالــــوك

******** تمضي حياتك ناقل ٍ داك بريــــــــــــاك

وإلى نفوك إمن الوظيفه وعافــــــوك

******** خفتّ موازينك وكلن تهــــــــــــــــقواك

وإصحى لخلان الرخا لو تغـــــــــالوك

********إعرف ترى أطيبهم إلى إحتجت يجفاك

كنك خوي مقيط دهووك وأغــــــووك

********* وحقك عطاك رشاك وأقفى وخـــــلاك

وإحذر عن العلة ترى الحق مـــدروك

*********مثل العمل يدركك ما منه فكـــــــــــاك

وإن كان عدوانك على الضيق حدوك

********فإخصم طلابتهم بعجفاك وقـــــــــداك

وإن كانهم لمشرّف الحق ماشــــوك

********* ناظر مطاليع الفرج قبل مـــــــــــــبداك

وإن طاوعوا شيطان الأنفس وهانوك

******** فإصبر على البلوى ودفنك رزايــــــــاك

زرهم تراك إلـــــــيا تونــــيت زاروك

*********إن ما بديت لصاحب السو يبـــــــداك

ما دامهم ما طاوعــــوا لك وعرفوك

********إضرب على الكايد إلى عمست رياك

لو هذبوك إمن المصاوب وضــــدوك

********ما يذبحونك قبل تدني مــــــــــناياك

وإحلم على الجاهل ترى الحلم مبروك

*********وقم للضعيف اللي من الظيم ينخاك

وإدمح خطاجيران بــيتك إلى أوذوك

********ترى القصير وحرمة الجار بحــــــماك

عطهم لوازم حقهم لو تناســــــوك

******** في كل ما يصلح لدينك ودنــــــــياك

وقم للضيوف اللي لفوا لك وضافوك

********أغلى كرامتهم حجاجك وبشــــــراك

وإعرف ترا مالك للأضياف مشــروك

******** لولاه يطلب حاجته منك ما جــــــاك

وقم للرجال إن رايعوا لك وحبــــوك

*********وإحشم خويك وأكرمـه عند ملـــفاك

وإلى إعتبرت بسيرة الناس كفــوك

********ما كثر من شي أتعبك ثم عـــــــناّك

ولولا تبات بهمّ دنياك مظـــــــــنوك

********* ما طاب لك ما دام لك وإفتــــهم ذاك

لو يطلبون إخفايك الناس ما أخفوك

*********الرجل مثل النجم في كل الأفــــلاك

وصلاة ربي عدّ الأوراق والشـــــوك

*********أو ناض براق ٍ وما هل ســــــــــــفاك

على الذي ما فيه ريب ٍ ولا شكوك

********* امحمد ٍ ما دك بالقــــلب دكـــــــاك




,سلامتكم ,,,,




((وأسمحولي طولت عليكم ))







تحياتي,,,





** الشرافي **

 

 

 

 

[معلومات العضو ابن هديهد]

الشرافي

الله يرحم الشاعر ويسكنه الجنه

ألف شكر على لختيار الطيب

وعساء عمرك طويل وننتظر جديدك

 

 

 

 

[معلومات العضو سعد المقابله]

الله يعطيك العافيه

وقصيده طيبه تحمل نصائح وخبرة مجرب

للهذه الدنيا

لاهنت

 

 

 

 

[معلومات العضو عبدالرحمن الشرافي]

لاهنتوا على المرور ,,,,





وبيض الله وجيهكم,,,




تحياتي ,,,






** الشرافي **

 

 

 

 

[معلومات العضو مترك المسعري]

تسلم يمينك يالشرافي على الكتابة




و عز الله إنه نصيحةٍ من قلب و الله يرحم الشاعر ...........

 

 

 

 

[معلومات العضو عبدالرحمن الشرافي]

لاهنت يا خيال العبيه على المرور,,,,




وبيض الله وجهك,,



تحياتي ,,,



** الشرافي **