قصائد بالسيارات لشعراء معروفين

[معلومات العضو بن مشخص المسعري]

قصيدة ظريفة بعث بها أحد الشعراء إلى أصدقاءه يتحدث فيها عن نوع من أنواع السيارات
وهي من طراز جيب فكسار الفارهه
وهناك فرق بين الحاضر والماضي حيث أن الشعراء كانوا يتغنون بالخيول ، وينظمون بها الأشعار كما ذكر لنا أكثر من شاعر لعل من أبرزهم عنترة ،وفي بداية هذا القرن وبعداختراع السيارات سمعنا الكثير من الشعراء الذين كتبوا في مديح السيارات وخصوصا ( الجيب، والجمس وغيرها من السيارات ) وكان أحدهم حين يذكر تلك السيارة في قصيدته فإنه يقصد بها سرعة الوصول أومدح صاحب السيارة الذي يركبها لتوصيل رسالة ما ، ولكن قصيدة صاحبنا هنا قد تكون مختلفة نوعا ما ، حيث أنه قد ركز على نوع السيارة ووصفها توصيف غريب جداً
وهي للشاعر المعروف ... مرزوق غازي هجيان السلمي لنستمتع بهذه القصيدة الظريفة.


يا سعيد بن عياد يـا واف الاشبـار
يا كاسب الطـالات برسلـك مشـوار
برسلـك لليابـان وأرسـل مترجـم
لا تعتذر يـا سعيـد مافيـه معـذار
دوك الجـواز وفيـه ختـم السفـارة
ورحلتـك بكـرة لا تحيـر وتحتـار
أركب على اللي تسبق الصوت والريح
فزت كما اللي فز مـن كـف صقـار
وإن جيت لليابان مـن ليلـك ارتـاح
أسكن بفندق مستوى فايـف ستـار
والصبح غادر طوكيـو يـا صديقـي
سير ألف كيلو شرق مع سكة قطـار
وتلقى جزيرة واسمها صعـب نطقـه
هنشو كيوشو جوهـا ماهـو بحـار
دور مصانـع صانعـيـن المـواتـر
ومصنع تويوتا حوله أسوار وأشجـار
قابـل كبـيـر مهندسيـنـه وقـلـه
صمم على حسب الطلب جيب فكسـار
مكينتـه عشـرة سلنـدر وبـخـاخ
والسير ما يسمع لـه أصـوات لادار
سلاسـة بلوفـه وصـوت المكينـه
كنه عبادي يعـزف ألحـان الأوتـار
ثـلاث دفرنسـات سـت كفـراتـه
يفتح طريقه فـي تغاريـز وأحجـار
بيبانـه العشـرة تصـمـم بـدقـه
على التساوي جنبـه يميـن ويسـار
وتوايره يـا سعيـد ضـد البناشـر
ماهـي بخنزيـر يبنشـر بمسـمـار
زجاجـه مصمـم علـى الكمبيوتـر
لا يحجب الرؤية ولا يعكـس أنـوار
تمثـال كبوتـه علـى شكـل حربـه
سيفين والنخلة علـى شبكـه شعـار
صدام قدامـه كمـا القـوس شكلـه
والونش فالصدام عشـرات الأمتـار
وصدامه الخلفـي بوسطـه مجسـات
عند الخطر تشـر بلمبـات الانـذار
توانكـه منهـا اثنـيـن لـوقـوده
واثنين للما عنـد حـزات الأسفـار
وثلاجتـه فـي شنطـتـه ركبـوهـا
تبريدهـا ينقـص ويـزداد بعـيـار
كبينتـه وقـت الشتـاء يـا دفاهـا
لو كان جو المملكـة بـرد وامطـار
وكبينته فالصيف قطعـة مـن الثلـج
لو كان جـو المملكـة حـر وغبـار
باللمـس تكييفـه وباللمـس نـوره
ويشغله مـن بعـد ريمـوت بـزرار
يحـدد مسافاتـه ويكشـف طريقـه
طبلونـه مجهـز بشـاشـات رادار
وجهـاز ماجـلان وجهـاز هـاتـف
ارسالها مـا ينقطـع عبـر الاقمـار
قيره توماتيك وعصـا القيـر فضـه
دفعـه سداسـي للمشاويـر صبـار
اربـع شكامينـه ولادسـت ابنصـه
لو كان له جنحـان قلنـا لكـم طـار
تسعة عشر كرسي وكرسـي زيـادة
وكرسـي لسواقـه مصمـم لطـيـار
مقاعده واحد وعشريـن مـن جلـد
والجلد شغـل يديـن عمـال شطـار
وفصل قطيـره تتبعـه فـي طريقـه
للعفش لو كانـوا يزيـدون الاسعـار
أبيض بياض الثلج يـا سعيـد لونـه
واليا جهز سجل على المصنع اقـرار
اقـرار حتـى مـا يسـوون غيـره
وعطهـم حسابـه يـن وإلا بـدولار
ثم اشحنه في البحر وارجع مع الجـو
يا مرحبا والعفو يا الصاحـب البـار
واليا استلمته مـن جمـارك بـلادي
دقيت سلفـه وأبتـدا عـد الاصفـار
لا فـر ويلـة فالخطـوط السريـعـة
كن التوايـر تحكـي اسـرار للقـار
سيد الصحاري والـدروب العسيـرة
مركـب مريـح وللمهمـات جـبـار
باخذ شهر مقناص وسـط الجزيـرة
نمسي بدار ونصبح الصبح فـي دار
شرق وجنـوب وغـرب وإلا شمـالا
حليب بل وصيـد مـع شبـة النـار
لكـن أنـا مانـي برايـح لحـالـي
باخذ معي من صفوة الناس وأختـار
أبـوي وأنـت وكاسبيـن الجمايـل
شيوخ الغراميل الحشيميـن الاخيـار
شبـاب وثنيـان عنـوان للطـيـب
أهل الكرم والجـود والمجـد والكـار
وإن حل طاريهـم بوسـط المجالـس
كلن يقـول ونعـم وتكـرار ومـرار
وفهد الحطيم اللـي علومـه جزيلـة
صقر تعـلا فـي منيفـات الاوكـار
والشيخ ابو صافي وابو ستـر معنـا
ومعنا رجال تكـرم الضيـف والجـار
منهم سعـد وأيضـا شليـان منهـم
ومنهم جري راع الوفا سـر وجهـار
والشيخ ابو نـادر وعايـض سفيـر
والمهدي اللي ينظم أبيـات الاشعـار
وبطي ولـد سلطـان وحمـود غنـام
أهل الوفا والعـرف وافيـن الاشبـار
واحمد ولد متعب وتركـي عطـا الله
أصحابي اللي ما يبيحـون الاسـرار
والشيخ بن محفوظ والشيـخ فيحـان
والشيخ ابو سلطان لا صار ما صـار
صديقنـا يفـرح ولا هـي غريـبـة
وعدونـا نسقيـه كاسـات الامـرار
والمعذرة مـن كـل مـن لا ذكرتـه
الكـل لـه حشمـة وقيمـة ومقـدار
ولو كنت أباخذ كل ربعي والاصحـاب
لازم مـع الفكسـار ميتيـن فكسـار


____________________________


قصيدة الجيب الكزس

--------------------------------------------------------------------------------



راكب اللي لاشتغل كن به روح الجنين
مـاورد قبلـه ولاظنتـي يـرد بعـده

يسرق الانظار سرقة شعرةٍ من عجيـن
والزيـاق مذهبـه والركـون مـورده

من بعيد تقول خيمة عروس في بطيـن
ولاقربته من قريب تقـل لـون بـرده

جيب لكزس من موديلات الالفين الثمين
وكلٌـوا عبداللطيـف الجمـيـل وورده

فرش موكيته تقل من شجرة الياقطيـن
والمراتب جلد بافخـم طـراز منجـده

ماحلا مسراه لين الصبح نـوره يبيـن
والقزوزات الثمـان الجحيـم الموقـدة

مشربه بنزين ماهو سمـن ولاسميـن
والبسـاتـم كنـهـا عـمـدٍ مـمـده

الطعوس يقصهامثل قـص الاكسجيـن
والجبال اللي كما طويق وجبـال لهـده

مايلام الى زعل منـه ابـو عبارتيـن
لكزس الالفين خيـر التيوتـا واجـوده

عنده الفكسار لاوقـف لايمكـن يزيـن
ما ينقـص منـه لكـن تقـول يعقـده

كن تكييفه هـواء دار زيـن العابديـن
تونس الخضراء نعيم المصيف ورغـده

فيه لاناظرت ماهـوب ريـب ولايقيـن
نقش اطاراته مثل شكل نقش المـزوده

لاسحبت انواره تقول بيـن الازرقيـن
مايجي ياكود فـي طايـلات الارصـده

في عددهن يتعبـن المكايـن واليديـن
ماعليهن غير صورة معـزي وولـده

ماملكـه درويلـه لابكـاش ولا بديـن
مدة اللي ينبع الطيب من راحـة يـده

ابن زايد من سلالـة رجـالٍ غانميـن
وارثٍ وفاء السمـول وطيبـه ووعـده

علموه اني على موعده مثل السجيـن
والليالـي توهـا والعـمـار مـحـدده

استلم مكنونةٍ مثـل ريـح الياسميـن
مسكها ريحة عراره وشيحـه وجعـده


____________________________


قصيدة الجمس للشاعر ناصر الفراعنة السبيعي

--------------------------------------------------------------------------------



حييّـت يـا جـمـسٍ جدادٍمشـاريـه
عبّارتيـنٍ بميـة ألــفٍ شريـنـاه
أربع ميا وخمسين مـن عنـد أهاليـه
آخر موديـل بعالـم الشـرق عـزّاه
حالف حـرام إنـي لاسوقـه واعدّيـه
يوم إن ولْد أمّـه قصـر مـا تهقـواه
جمسٍ ليـا شفتـه عزالـك تقهويـه
يا ِطيْب طِيْب القهوجي كـان قهـواه
تقـول مـعـزومٍ لحفلة(سـواريـه)
جاك امتشيّك وامتعطّـر ومـا احـلاه
سـوّاه لطـوال الشـوارب مسـوّيـه
ما يركبه يـا كـود حامـي حمايـاه
حرٍّ كفـخ مـن روس عالـي مباديـه
قـرمٍ تلطّّـم وأشقـر الكنـت طفّـاه
يا ليت راعي الجمس يومـه يسمّيـه
على اسم عنتر والا بـو زيـد سمّـاه
حيثه شنب يستاهـل المـدح زاهيـه
ملعون أبو مـن لا قمـز لـه وحيّـاه
من عزته ما ركبو أهـل الدلـع فيـه
ولا سوّقـوه أولاد بـابـا ومـامـاه
ولا ساقه الخكري ولا احمـر عتاريـه
وبنـات المدينـة مـا تعلّـن زوايـاه
الجمـس أحبّـه حـبّ غـالٍ لغاليـه
حـبٍّ عظيـمٍ حـبّ نمـرٍ لوضحـاه
ومن حشمته لا جيت اسافـر اماليـه
ولا خلّص المشـوار جيـت آترضّـاه
يا شيب عيني يوم آجي لـه والاقيـه
مثل الذي وسط الخـلا شـاف لامـاه
خطـرٍ ليـا ناديتـه يقـول: لبّـيـه
ومن دون سايق يشتغـل مـن ورا ذاه
هـو ميّـتٍ فيّـه وانـا ميّـتٍ فيـه
ولو هو حديد أحـب شوفـه وطريـاه
لا قمت المّس فـوق بديـه واداريـه
بـلا شعـورٍ قـمـت ادوّر شفـايـاه
ليته هنوف لأجل اضمّـه واحضويـه
غروٍ تضوع المسـك صافـي ثنايـاه
حالف يمين انـي لاابيعـه ولا أهْفيـه
لوربّحونـي بألـف ألــفٍ مــدلاّه
يوم ابيعه الجبان يبيع صاحبْه بجْنيـه
والله مـا دامهـا أمّ الطـلـي شــاه
حتى وأنا في المسجد الفرض اصلّيْـه
أدعي لجمسي يا عسى الخلـد مثـواه
وان كان عنّـي راح مانـي بناسيـه
كود البـدو حـب المقاطيـن تنسـاه
وتحـرم علـي نـوره حـرامٍ مقفّيـه
وتحرم علي البيض مـن كـل منحـاه
يا وين أبلقى لـي حريـص ٍ أوصّيـه
لا غبت عن جمسي يـزوره ويرعـاه
فـي ذمّتـي بغالـي الـروح لاافديـه
ولأملّكـه عمـر المعنّـى ومخـبـاه
ومن جلدي البالـي لاوقّـي سماريـه
ومن هو سعى للجمس ما خاب مسعاه
يا لايمي في الجمس غـادي وسفّيـه
بـلاك مـا شفتـه ولا شفـت حليـاه
لي جمس مابه جمس مثلـه يباهيـه
ولا في جموس الشرق تلقى سجايـاه
من شـاف فوقيّـه وطالـع بحدريـه
والله ان يمـوت بساعتـه داه بـرداه
رمز الفخامـه والاناقـه مـع التيـه
الحسـن والابـداع والعقـل والجـاه
ذي اس از انترناشيونال عنـد قانيـه
مـا يكسـح اللـي للمهمـات يقنـاه
مخروط والمخـروط صعـبٍ تحدّيـه
ويصعب على متن البسيطـه مجـاراه
ومكينتـه علـى أربعيـن وحوالـيـه
وعموده على العشرين حنـا خرطنـاه
لاقـام بنزينـه تشخـتـر سِواقـيـه
الكلبليـتـر أزمــع أمـــره وودّاه
وعلـى المكينـه والبساتـم يـودّيـه
وحمر التوانـك جمّهـا مـا ذخرنـاه
يـا دوب تحتـرّ البساتـم وتـوذيـه
طشّ الرديتـر غترتـه وألحقـه مـاه
كـن لـون بنزينـه بصفّايـةٍ فـيـه
أحمر شفايف عضّـه الزيـن بشْفـاه
وكن لون زيته يوم تكشـف معاريـه
ذهب جواهرجي علـى الكـف راعـاه
وقـزوز بالشكمـان رجليـه وايديـه
بمكينـة(ٍ بالخـام الاسـود) مغطّـاه
ونـوع الكرونـه رقـم 7 بطـاريْـه
ورقــم 3 احتيـاطـي حفـظـنـاه
وتروسهـا حجـم 4 يــا مقـدّيْـه
مثل القـلاده فـوق صـدر الخونـداه
مثل المسـدّس يبرمـه مـن يعبّيـه
ابو محالـه لا وطـا التـرس ماطـاه
يفتـرّ سيـر المروحـه مـن تواليـه
وسيرٍ بـراس الدينمـو قـام يشعـاه
المروحـه هفّـت وضفّـت سوافيـه
ذعـذاع غربـيٍّ تقـافـت عشـأيـاه
وسرنـدلٍ حمـر البسـاتـم تلالـيـه
وعمود تيمن غرهـدن فـي حجأيـاه
صـمّـام بوجـيّـه بـنـارٍ يغـذّيـه
وتولّـدت شرارتـه وأكمـل اغــذاه
واليـا لـذع فيـه البليتيـن نـاريـه
كنّـه شـرَر لحّـام فـي بـابٍ اوزاه
ومفتول دفرنسه عـن القـاع حاميـه
عـن صكّـة القيعـان يدفـع منايـاه
الجمس كنّـه متّهـم جـاء محاميـه
دفرنـس والقاضـي غـرازٍ بصحـراه
وكبـر المطبّـه مـا يغيّـر هقاويـه
ومساعداتـه عـن يمينـه ويـسـراه
والاذرعـه عـن ميلـةٍ بـه تواسيـه
كنْها عضود مْلاكـمٍ شـرب غرشـاه
وان شال حمـلٍ مـا يكثّـر شكاويـه
يا وش يهمّه والسسـت كلهـا افـداه
كن رفرفيـن حـول حوضـه مداويـه
شيهانتـيـنٍ دوّمــنْ بالخضـيـراه
وكن لـون كبّوتـه ولمعـة عراويـه
خدود (أصاله) بأحمـر اللـون تطـلاه
وكنّه (كلوديـا شيفـرٍ) فـي تمْدريـه
تعرض لنـا آخـر موديـلات الازيـاه
وكن زول بدْيه يـوم يغريـك صافيـه
(مارلين منـرو) وسـط فلـمٍ لفتنـاه
وكن الكفر لا جيت بالوصـف ابدّيـه
حبْ خالٍ ب (سندي كروفـرد) شفنـاه
ولا له شبيـهٍ فـي نعومـة تمثنيـة
الا (نعومـي كامبـل) لْمـن تمثنـاه
وكن نقشة جنوط الكفر فـي محانيـه
سجّـاد شيـرازيّـةٍ فــي مـصـلاّه
وصقلة قزازه يـوم أردّ النظـر فيـه
من وجنة (كلـودا الشمالـي) حلايـاه
ولون المرايـه مـن يراعيـه يلهيـه
من خلقته كن أطـرق العـود يجـلاه
ولو هي بهـا للعيـن فتنـه وتمويـه
بها تشوف اخريـم الابـره ومنشـاه
أصفى مـن اللولـو بمحّـار شاطيـه
مـعْ واحـدٍ فـي مبـرم السلـك دلاّه
وبغمزة (سميره بنت توفيـق) أحلّيـه
لا أعطـى الاشـاره والمواتـر تقفّـاه
كنْ مقـدم الصـدّام لا قمـت اراعيـه
صدرٍ على (نجوى كرم) يـوم تنخـاه
وصدّام خلفـي مـاش شـيٍّ يحاكيـه
يمكن خذا من جسـم (ليلـى) مقفّـاه
مطربـلٍ مثـل الصوامـع عوالـيـه
والا غبيـطٍ قـرّح الخـيـل تـتـلاه
والا وليفـي واشقـر القـرن كاسيـه
مـن فـوق كرسـيٍّ تربّـع وواسـاه
والله فـلا يلحـق موديلـه سفافـيـه
البهبهانـي مـن حفيـزه خطفـنـاه
مفضّله عـن نـوع لكـزس وكوبيـه
وحاشمْه عن من في حفيـزه وجدنـاه
ولـه تنـدةٍ بيضـا تعلّـت متاكـيـه
كنْهـا كنيسـة راهـبٍ يطـلـب الله
وكن الجميحيّات مـن فـوق أعاليـه
شمعٍ ببيت القدس ولّـع مـن أعـلاه
والا كما رجـمٍ زمـى فـي صحاريـه
علـى تليعـة مرقبـه شبّـوا ارطـاه
كن أيمن اصطبّـه والايسـر موازيـه
عساكـرٍ كــلٍّ بيمـنـاه مشـكـاه
وعيون من قـدّام توْضـي مساريـه
كواكـبٍ يشبـح لهـا واحـدٍ تــاه
لا شعشعـن والليـل مِـرخٍ علابيـه
مثـل الزمـرّد شرّعـنّـه صبـايـاه
والا مرايـة حاكـمٍ عـنـد عـذْريـه
قدّامهـا مصبـاح تعكـس شظـايـاه
جمسٍ شهر بين الامـم اسـم راعيـه
تباشروا في البيـت الابيـض خُبَـاراه
يـوم اكتمـل نموذجـه عنـد واليـه
وتكامـل الهيكـل بكـامـل مـزايـاه
وكــلٍّ هـتـف للـثـانـي ok ok
ثم صمّموا سبعيـن مليـون شـرواه
صنعة خباث الروس (جورج ,وخوزيه)
وازرت عقول الشرق الاقصـى تحـدّاه
وان قال احد هو ليه شرقـك منحّيـه
الشرق الاوسط كيـف حقّـه تناسـاه
بأقـول ذولا مـا عليهـم مشـاريـه
مثل البهـم مكفـول رزقـه ومرعـاه
هذا خلاصة علـم مـن فكّـروا فيـه
وتسعين عـامٍ ليـن زجّـوا مطايـاه
صنعة مريكاني مهـو (نـاه ناهيـه)
بيموت أبو فلفل مـا سّـوى سوايـاه
ولو فيه احدْ يقـدر بصنعـه يجاريـه
إن كان (كنق , وهنق) جابوا له اشباه
من عـذره الامريكـي اللـي مسوّيـه
متحكـمٍ فـي العالـم اقصـاه وادنـاه
جمـسٍ يقـرّب مبعـدات المنـاويـه
دام الفتى مـا حضّبـوا سـرّ دنيـاه
سحبـة غريـقٍ مـدّ للقـارب ايديـه
سحبـة سويّتشـه راس مفتـاح أذّاه
واليا أشتغل كنّـه يذكّـرك يـا هيـه
مسحوب مشعـان الهتيمـي ومَغْنـاه
وكنْ ريحته لا دسْـت بنصـه تحمْيـه
عطرٍ فرنسـي مـن برافـان مجنـاه
وكنْ حسّ ماطـوره ورنّـة بواجيـه
يِسْمِـعْـك دلعـونـه ولالا مــلالاه


تابع لنفس القصيدة

--------------------------------------------------------------------------------



وصوته إلى منّه مشى يـا ممشّيـه
عـزفٍ كلاسيكـي بكـازا سمعنـاه
ونغمة صلنصيره ليا قمـت توحيـه
تقسيـم عـودٍ والمـروّس تقـفّـاه
وكنّه لمنّه قحّـص أجـراس تنبيـه
عن قصف جّوي سور بغداد مرمـاه
واليا احترك وانته على القار مْوطيه
يدْخلك في الجو الرومانسي بممشـاه
لا كنْ صياحه يـوم بثنيـن تعطيـه
عذراً حشرها واحـدٍ شيـن علبـاه
وان طبّ صبخا وانت عنها تِهَاديْـه
موال سعـدون ابـن جابـر أويـلاه
وان كان تعتع ألعـن آبـو مجانيـه
تقل يحكي عن شعـر قيـسٍ بليـلاه
واليا دعس صاروخ وان خفّ يشديه
شيٍّ على الميـراج هفّـت زوايـاه
يظهر غميق الزيت من جوف واديـه
اليـا نتلتـه والتـوانـك معـبّـاه
وكنّ الحصا تحته ليا صـاح جنّيْـه
صغار البرد لا شلّعـت مـن رفايـاه
والا هشيـمٍ دقـل سيلـه يدربـيـه
مع فرعة الوادي لفـى بـه ودربـاه
جمسٍ مشى من كان قافيـه يعميـه
غبـاره يضيّـع دليـلـك ويـبـلاه
ولولا البريك وفرملـه مـا يخلّيـه
مع مسترقّين السمع جاه مـا جـاه
لا علّق البـوري وصاحـه يهدّيـه
ما فيه موتر ما سجـد لـه ولبّـاه
يهجل هجيل اللي عـراض مقاريـه
ساقه شجيعٍ في النحـر دزّ شلفـاه
واليا مشى مع راس طعسٍ يباريـه
مشية (ضحوكٍ) طبّت السوق تبغـاه
والا كمـا رقّاصـةٍ فـي كبـاريـه
طبّل لهـا الطبّـال عشـرٍ مجـزّاه
وفتـح لهـا مليارديـرٍ مخابـيـه
وقامت تخشّع عن يمينـه ويسـراه
وان مال مع دربٍ طعـوسٍ فيافيـه
تقل امبراطورٍ علـى جـال مركـاه
ومن سرعه الرادار ما عـاد يمديـه
يشوفه ولا جنّـي سليمـان امـداه
وان كان مرْ جاء في الردارات تشويه
وهــم لله مــا شـافــوه لله لله
هم ما دروا ان الجمس صعبه مراميه
ويصعب على الرادار كشفة خفايـاه
صحيح من لا يعْرف الصقر يشويـه
والجمس صقـر وكـرّم الله ملحّـاه
أرقـام طبلونـه خديعـه وتمويـه
من شآن ما يِمنَع ويخسـر وكـالاه
والا ترى العـدّاد يـا جاهـلٍ فيـه
ألفيـن كيلـو بالدقيقـه حسبـنـاه
يـا لعنبـوا جـدّه وجَـدٍّ مثنّـيـه
اليـا ركبتـه والتـوانـك معـبّـاه
متوجّـهٍ ماهـوب يحتـاج توجيـه
بيني وبينـه كلمـة السّـر ويـلاه
ويسوق عني ويوصل القلب أمانيـه
وكفّي ترى لَيْ الدركسون مـا جـاه
وكل المواتر له عبيـدٍ وهـو بيـه
هـذا ولـد عنـزٍ وهـذا ولـدشـاه
مصنـوع لاولاد البشـوات ترفيـه
وكم واحدٍ شـاف الملامـه تنصّـاه
جمس آتغزّل به ولا مـن مشاريـه
كـلٍّ علـى ماحـب قلـب وهـاواه
ومن ذي وصوفه لو أقوصد وأغنّيـه
والله فلا ألحق له نصيفـة مجـازاه
واعداد ما يذري من الشـرق ذاريـه
صلوا على من زعزع الشرك وانهاه


____________________________

قصيدة الشبح للشاعر ... عيد سمير الحربي

--------------------------------------------------------------------------------



راكـب اللـي دقتـه كنهـا دق الذهـب
فوق طبطابة رخام احسن قصور الملـوك
كأنه الذيب يحبي ليا اقبل وليا اقفى حدب
والرفارف حافة ا شماغ بسـام محبـوك
مايلـوق الا ذات المـواكـب والجـنـب
يفهق الفكـس ار والبهبهانـي والبيـوك
تقل ليا ناظرت وجهـه تناظـر بالسكـب
وان سرى عقب العشا تقل في رحله مكوك
السريع بنوره يـروح مرجـان وشعـب
والمسـارت الثلاثـه علـى دق السلـوك
للقزوز يقـول تبـت اديـن ابـو لهـب
والقزوز تقولـه لعنبـو مـن صـدروك
كمبيوتر شاشته مثـل كـاس المنتخـب
ومشراتـه وقفـن عقـب ماهـن بـروك
حجم ستميـه يسابـق سريعـات النـدب
لونه يذكرك فـي قطعـة الليـل الحلـوك
وارد الجفـال مركـب سلاطيـن العـرب
عندي اغلى من رصيد الفتيحي بالبنـوك
من طرازات الشبح حي ابـو ذاك الشنـب
ماتمـده لالخـوك مـن ابـوك ولالبـوك
من شمالـي القصيـم يتنهـض بالطلـب
لين عنه جبال اجا تنفهق مثـل الحنـوك

منقووووووول

 

 

 

 

[معلومات العضو أبونواف الدوسري]

لاهنت يا بن مشخص

وسلمت يمينك

وصح الله لسان الشعراء

 

 

 

 

[معلومات العضو بوحمد الحمد]

صح السسسسسان شاعرها

ولاهنت على القصيده

دمت بكل خير

لك سلامي

 

 

 

 

[معلومات العضو اخو بتلا]

بن مشخص المسعري
لاهنت على نقلك على القصايد
وصح لسان قايلها

 

 

 

 

[معلومات العضو مبارك الخييلي]

	بن مشخص صح ألسانك وألسان قائلي هذه البيوت الجميله تقبل جزيل الشكر والتقدير