قصيدةالشاعر والاعلامي مفرج المخاريم في حفل الغياثات

[معلومات العضو أبو ريم]

يالله ياعالم جميع الخفيّات=ياللي خلقت الأرض تحت السموات
يا خالقٍ الكون في ستة أيام=ونجّيت يونس من بحورٍ غزيرات
نسألك تغفر ذنبنا وتهدانا=ونسألك تقبل صومنا والصلاوات
ويالله تغنينا بمدّك وجودك=مدّك ولا مدّ اليدين الشحيحات
ومن رفقة الرديان يالله اتحمانا=ما من ورى رفقتهم إلا الخسارات
من بعد ذكره زان بدع القوافي=بيوت شعرٍ ما دخلها انتقادات
امن الهجوس اللي تعَشق الجزيلة=اليا بدأ الواجب تجيب الجزيلات
ولا تجيب إلا الجزال النوادر=امن القصيد ولا تجيب الهزيلات
وانا ليا من قلت قلت الحقايق=أقول قول له براهين وإثبات
شاعر وامثل في المواقف قبيلة=قبيلةٍ والها وسط نجد وقفات
أفخر بهم والهضب يفخر بربعي=لاد المنيعي كا الجبال المنيفات
من سلمنا نرد الثّنى والجميلة=على الوفا والطيب نبني العلاقات
واليا عزمنا طيبٍ له عنينا=نسل المراجل والعلوم الجميلات
وجينا نهنّي شاعرٍ له مكانه=في منزلٍ ينصونه أهل المروات
ولولا غلاه وقدركم ما عنينا=ولا لفينا من ديارٍ بعيدات
سابع ليال العيد جعله يعوده=على النشاما بالهنى والمسرات
سلام ياهل المرجله والحمايا=سلام تسليمة وفا يالغياثات
يا ربعنا ياهل الوجيه الطليقه=واهل المكارم فالسنين العسيرات
رجّالكم من رافقه ما يمله=وافي بقوله والفعول الوفيات
حتى الذلول اللي قناها الغييثي=من حبّها له اخلجت عقب ما مات
وبسبابها حصيبان جار الشمالي=حس الهدية حده لنظم الأبيات
انتم غياثات الفخرة الشجاعه=افعالكم تعرف قدام وجديدات
يااهل الثمان اللي زهن الاشده=عنها عديتوا القوم وانتم اغزات
تفقين رفقينٍ حميتوا الركايب=ثمان لجل اعيون بيضٍ عفيفات
وان ثارت الهيجاء وكلٍ تعزوى=تردون حوض الموت فوق الاصيلات
لانطح خيل خيل والحرب غارات=من ضربكم تشبع سباعٍ مجيعات
نعم بكم يا مزبّنين المجنا=منهو زبنكم عاش بآمن وسلامات
افعالكم بانت مع لاد زايد =ضد الشريف اللي غزانا بقوّات
جانا يقود اجموعه اللي جمعها=ومن ضربنا جمعه عقب موته اشتات
والشاهد ابن مطرّف اللي زبنّا=ببيوته اللي سجلّت فالسجلّات
وانتم هل الوضح الخيار الشهيرة=اللي ملكتوها بحد الرهيفات
في الخوف ترعى القفر من دون راعي=بهيباتكم ترعى الديارالعذيات
وانتم حميتوا الدّار من كل طامع=فوق المهار وبالسيوف الصقيلات
فزعاتكم تشفي قلوبٍ عليلة=ومدّاتكم تغني يدينٍ فقيرات
ومنكم وقيانٍ زعيم السرايا=حر وله في مبتدى العمر هدّات
منها ضرب بالرمح شيخٍ مجرب=حتى سبح فالدم والخيل غارات
ويوم التقى الجمعان بانت فعوله=بالسيف فرّق جمع الاعدا بضربات
ضربات سيفٍ روس الاعدا اغذاً له=ذي عادته في عداه زبن الونيات
في يوم حربٍ شاهدَته اسهليّه=قصيرته تنخاه يوم الملاقات
تبيه ينقذ ورعها اللي احذفته=من هول يوم به للبصار زوغات
ثم قام اخو فرجه بصوله وجوله=وانقذه قرمٍ ما يهاب المنيات
دنق وشلّه والهوايا تهلي=ثم فرّح امٍ تتبع الدمع ونات
افعالكم عجْز القلم ما حصرها=هذا قليلٍ من فعولٍ كثيرات
وحنا الدواسر لا اعتلينا السبايا=نارد حياض الموت ورد المحيمات
احدودنا حامينها بالسلايل=روس العدا للحد رسم وعلامات
دواسرٍ نسبق ولاحدٍ سبقنا=بفعل المراجل والسلوم العضيمات
بفعل الكرم يشهد جريس اليماني=جانا فقيرٍ يسهر الليل ما بات
بسبة ديونه والهموم الكثيرة=ولا عوّد الا بالبكار الثمينات
وجانا الهلالي بالجموع الغفيرة=ثم ضافوا اللي ماحسب للخسارات
عامر ولد بدران مكرم اضيوفه=بالبل وزايدها بحيلٍ عديدات
ومانا ومزارعنا لمن جاء سبيلي=عيبٍ علينا بيعها بالريالات
ومن سلمنا عيبٍ نبيع اللحومي=شيماتنا ترفض فعول ذميمات
وحنا ودينا جارنا من جداره=ذي مكرمتنا من يدينا الكريمات
وناصر ذبح ورعه لجل ورع جاره=من خوفته يشمت بنا كل شمّات
والله خلقنا ما نداني النخاوي=اليا نخينا اتطيع كل العصيّات
والشمري يشهد نهار القتالي=ابفعالنا اللي دونتها الروايات
موتره خرب بيوم حربٍ شنيعي=واحتار في وسط الديار الخليّات
واللي معه سبعه من الاد زايد=ربعٍ لهم في قمة المجد رايات
ثم فككوا موتره والحمل فوقه=وتوزعوه ابحملته فالونيتات
للمرجلة نتعب ونسعى وراها=لو انها ورى جميع المجرات
دواسرٍ نرعى بزينات الالوان=نتبع هواها من سنين قديمات
من غير قاصر في جميع القبايل=كل له افعول وعوايد وعادات
واليوم من فضل الولي بأمن وآمان=والجهل زال وزال عصر الخلافات
من بعد حكم اللي حكمها بسيفه=الفيصلي راعي الفعول الجسيمات
عبد العزيز امطوعٍ كل عايل=وسط الجزيرة له فعول وبطولات
وحد شعوب المملكة بالشريعة=يالين خلّا الذيب يرعى معى الشاة
واختامها صلّو عدد بارقٍ لاح=على النبي ازكى سلام وصلاوات

الشاعر مفرج المخاريم الدوسري

 

 

 

 

[معلومات العضو راشد المسعري]

لاهنت يابو ريم

وصح لسان ابو ناصر على هذه القصيدة الوافيه

ومفرج من ابرز شعراء القبيله وأغزرهم

ويستاهل الشاعر مشيع الغييثات العنوة له

ويستاهلون لاد بن غياث ماقيل فيهم من مدح وهم اهلاً له

تقبل ودي وتقديري ،،،،

 

 

 

 

[معلومات العضو محمد بن حمد الشكرة]

صح الله لسان الشاعر/مفرج بن ناصر بن جنبان المخاريم على القصيدة الجزلة ويستاهلون الغييثات الطيب والعلوم الغانمة وهم كفون لها بدون قصور في القبايل ولاهنت ياابو ريم على النقل وعساك على القوة تقديري,,,,

 

 

 

 

[معلومات العضو دـأيـم إهـذريبــگ]

صح لسـآن الشـآعر / مفرج بن نـآصر المخـآريـم

ويسـتآهلون قبيلة الغييثـآت

مشكـور يالغـآلي

 

 

 

 

[معلومات العضو عبدالله الحافر الغييثي]

صح لسان ابوناصر على هذه القصيده الرائعه ولاهنت يابوريم ولاعليكم زود يالربع وابوفهيد يستاهل
لك ودي وفائق تقديري

 

 

 

 

[معلومات العضو خالد المشاويه]

الله لايهينك يابوريم وصح الله لسان ابوناصر

من شعراء القبيلة البارزين والمبدعين

ويستاهلون الغييثات كل خير

 

 

 

 

[معلومات العضو ناصر بن فهد]

صح لسان ابوناصر وبيض الله وجه على القصيده

 

 

 

 

[معلومات العضو شافي بن راشد النتيفات]

لاهنت يابوريم على النقل وصح لسان مفرج بن ناصر المخاريم
ويستاهلون بني الغياثات ماقيل فيهم
ويقول شاعرهم

حنا الغياثات لامن ثار دخاني = دفقين رفقين ما تخطي ظرايبنا

 

 

 

 

[معلومات العضو الجراح]

لاهنت يابو ريم على النقل المميز وصح لسان الشاعر الجزل : مفرج بن ناصر المخاريم ويستاهل مشيع بن فهيد العنوة والغياثات وافين وافين