اتعبني الحلم ... لاتفوتكم قصيدة جنان

[معلومات العضو سعود الهواملة]

أتعبني الحلم لين الواقع أنكرني
كنِّي مسكت الفرج بيدي وهدِّيته
مافيه داعي على فرقاك تجبرني
حتى الجفا منك ولَّعني وحبِّيته
الجرح عدَّى زمانه لاتذكِّرني
هذاك وقتٍِِ تعذَّرته وجافيته
لوشفت دمع القصايد كان تعذرني
تصوَّر إن الشعر يضحك وبكِّيته
ماغيَّروني ياكود الله يغيِّرني
كم واحدٍ عنك يبعدني وردِّيته
وفيت وأدري وفايه مايصغِّرني
صوَّبت يم الهدف لكنِّني أخطيته
من طاف سبق الغلا والشوق طيَّرني
شف ما على الأرض واحد ماتعدِّيته
خذني على صدرك الدافي وسيِّرني
بعض الولع ياخذ الرجال من بيته
أبنشغل في عيونك لاتدوِّرني
ودي بشي أشوفه مابعد جيته
خلِّيت قلبي معك والله يصبِّرني
مبطي وأنا أقول قلبي وين خلِّيته
نسيت أعلِّمك جاء طيفك يسهِّرني
بس أنت ماشفتني وشلون ضمِّيته
إشتقت لك مابغيتك عاد تشكرني
تغيب والشوق ماعمري تباطيته
ماخذ على خاطري والبعد قاهرني
مدري شـ سوِّي وأنا كل شي سوِّيته
العام يوم الوعد تسبق وتنطرني
مستغرب إشـلون هالموعد تناسيته
وين أنت رايح ولاكنَّك معبٍّرني
ماكنِّي اللي على العالم تمنِّيته
لاصار هذي علومك راح تخسرني
ماعمر أحدٍ راح من كيفه وردِّيته
عند الكرامة أبيعك وأنت خابرني
الله وكيلك ترى كل شي مرِّيته
كانه هجر بالسلامه روح وإهجرني
أخوي لاصد عنِّي ماتـرجِّيـتـه...

 

 

 

 

[معلومات العضو شمس الحقيقه]

صح الله السانك ياسعود

ابدعت في نقلها الله لا يهينك

 

 

 

 

[معلومات العضو سعود الهواملة]

مشكور على المرور اخوي صهيب لك مني اجمل تحية

 

 

 

 

[معلومات العضو ناصر الخبر]

خلِّيت قلبي معك والله يصبِّرني
مبطي وأنا أقول قلبي وين خلِّيته



لاهنت اخوي سسعودي روعه بارك الله فيك

 

 

 

 

[معلومات العضو راشد محمد المقابله]

الله يعطيك العافيه ياسعود على النقل الجميل

 

 

 

 

[معلومات العضو سعود الهواملة]

مشكورين على المرور العطر

 

 

 

 

[معلومات العضو رماد]

.
.
•
سلم النآقل .. والمنقول ..

فعلآاً ..
مُتصفح .. رآق

 

 

 

 

[معلومات العضو الهاج ـري]

أتعبني الحلم لين الواقع أنكرني
كنِّي مسكت الفرج بيدي وهدِّيته
مافيه داعي على فرقاك تجبرني
حتى الجفا منك ولَّعني وحبِّيته


صح الله السانك والسان شاعرها


تسلم يمناك على طرح

 

 

 

 

[معلومات العضو برنسيسه الريــــاض]

صح الله لساانك ولساان شاعرها

لاهنت ع النقل