الشاعر الكبير تركي بن هذّال بن نيف الودعاني في لقاءٍ (حصري) مع الموقع الرسمي لقبيلة الدواسر العريقة .

[معلومات العضو الإداره]

الحمد لله رب العالمين والصلاة والسلام على سيد الأنبياء والمرسلين سيدنا ونبينا محمد ابن عبدالله وعلى آله وصحبه ومن وآلاه ومن اهتدى بهديه واستن بسنته إلى يوم الدين إخواننا أعضاء وزوّار ومرتادي الموقع الرسمي لقبيلة الدواسر يسرنا في هذا اليوم أن نقدم لكم هذا اللقاء الخاص والحصري للموقع الرسمي لقبيلة الدواسر مع أحد شعراء قبيلة الدواسر وأحد شعراء الموقع البارزين والمتميزين والمتابعين للموقع منذ بدايته ومن الذين شجعوه مسيرة الموقع . وقد لاقى شاعرنا من الإشادات الكثير على جميع مشاركاته وهذا دليل أن الشاعر إستطاع أن يلامس متطلبات متذوقي الشعر الحقيقي وهذا هو الشاعر حقاً . شاعر غيبه الاعلام أو تغيب هو عن الإعلام لكنه إستطاع أن يظهر من دون الحاجة إلى هذا الإعلام وذلك بجزالة قصيدة ورصانته . شاعر من اسرة لها باع طويل في الشعر فوالده شاعر وجميع أعمامه شعراء . وعلى الرغم من مشاغله فقد فتح أبواب مجلسه مرحباً بالمنبر الإعلامي لقبيلة الدواسر على شبكة الإنترنت وخصّ هذا الموقع بالحديث عنه وعن تجربته الشعريّة بمختلف أنواعها وطرح الأسئلة للكثير من متابعيه بمعرفتها . حيث إقتسم لقاءنا مع على قسمين أحدهما إستضاف وفد الموقع الرسمي للقبيلة بمنزله العامر ومن ثمّ غادروا إلى مكان إبله وهو الجزء الأخر . إخواني لا نطيل عليكم لقاءنا مع الشاعر المتميز الشاعر الكبير تركي بن هذال بن نيف الودعاني الدوسري الشاعر:تركي بن هذال بن نيف الودعاني الدوسري أجرى اللقاء ، وساهم بطرح الأسئلة : الأستاذ خميّس بن مطر الغييثي المراقب العام بالموقع ، والشاعر محمد بن سالم الخضراني المراقب لـ المنتديات الأدبيّة بالموقع . قام بتنسيق اللقاء: عضو مجلس الاداره الاستاذ: فهد بن هادي الغريري المراقب العام: الاستاذ خميس بن مطر الغييثي المشرف الاعلامي: الاستاذ الحميدي بن محمد الغريري حضر اللقاء : محمد بن عبدالله آل نيف و النقيب سلطان بن ابراهيم آل نيف وسلمان بن خالد آل نيف وجمعٌ من الحضور . من اليمين الأستاذ خميّس بن مطر الغييثي المراقب العام بالموقع وضيف اللقاء الشاعر الكبير تركي بن هذّال بن نيف الودعاني . الشاعر محمد بن سالم الخضراني المراقب لـ المنتديات الأدبية بالموقع ولقطة مع ضيف اللقاء . س) بدايةٍ نرحب بك اجمل ترحيب في منتدى الجميع منتدى الدواسر الرسمي وبودنا تعريفنا بالبطاقة الشخصية؟ ج) بدايةٍ أحب ارحب بموقع الدواسر الرسمي اوأنا والله سعيد بشوفك وأجراء اللقاء وهذا المنتدى ماهو الا صرح يجمع بينا وعسانا نرتقي به للعالمية اما البطاقه الشخصيه الاسم:تركي بن هذال بن نيف الودعاني الدوسري عشت في كنف والدي رحمه الله واكملت تعليمي حتى المرحله الثانوية,,بمحافظة السليل تنقلت بين البدواة والحضارة ..ألتحقت بالسلك العسكري عام 1406هــ بالدفاع المدني وفي عام 1420هــ كلفت بالعمل في أمارة محافظة الخرج بأمر معالي محافظ الخرج سابقا" الامير/ناصر بن خالد السديري حفظه الله وفي عام عام 1427هــ استقلت من العمل وتفرغت لاعمالي الخاصة ..متزوج ولدي اولاد ولله الحمد والمنه س)ابونايف متى اكتشفت موهبة الشعر لديك؟ وهل الشعر لديك موهبة ام وراثة؟ ج)اكتشفتها في سن مبكر من عمري والشعر موهبة ووراثه كوني من بيت شعر س/ابو نايف ذكرت ان الشعر عندك وراثه اهل الوالد شاعر وهل تحضرك ابيات له؟ ج/نعم الوالد واجداد ي واعمامي واخوتي انا الرابع فيهم والوالد كان مقل من الشعر ولايبوح به لأحد واعرف بيت من قصيده. ولولا رجا الله مامشا للعرب حيلان= ولايبذر الزراع حبه يبا سيبه وعمي الشيخ عبدالله بن محمد بن نيف شاعر وراوي ومن شعره قصيده في الملك سعود يوم حكم وزار وادي الدواسر وقالها امامه وهي من نوع العرضه . يامخال مقبلن نحتريله= مافصل برقه وحس الرعود فوق نجد مكمله من طويله= ذاك ابو فهد ملكنا سعود ولقصيده الثانيه في الأمير خالد السديري امير نجران الذي تربطه به علاقه نسب وصداقه واثناء حرب الوديعة قال: يابوفهد جعلك مجار من الشر=ياللي على الحد الجنوبي موالي والله مامثلك امير تمور=يكون جدك في كلام الهلالي اللي مع برك بجيشه تظهر =راع المهار الصفر ذر ب الفعالي والعم الشيخ نايف بن محمد بن نيف شاعر كبير وعمره الآن فوق الميه ومن شعره راكب اللي لامشا مشيه يروجي=مابعدله من حفيزه مطرشيني فوقه اللي لسفل الرمله يبوجي=من عتق للحسي حطه ليلتيني في اسفل ام المرو كملن الهروجي= قد قطعنا من شققها شقتيني وله بديت الطويل وشفتنا الصيد باللبه= قوايد عنوز الريم وارقابها تومي = لقيته ونا لصبحت قمت اتطلبه= رميته وقفة جملة الصيد دهدومي ومن اخواني الشاعر محمد بن هذال بن نيف له في الغزل الشي الكثير ومنها مليت من عقبك من الدار مليت= خليتها لعلها للهجيري لعل صافي شربها ينقلب زيت= ولاعاد يامن بالقصير القصيري وله شدو هل المجمول منا وراحوبه= هل الجادل اللي مانو القلب ينساها ملكني بمجدوله وردفه وبسلوبه= انداري زعلها اودنا نكسب ارضاها وفيهم الكثير من الشعراء س/بمن تأثر تركي بن هذال من الشعراء في بداياته؟ ج/الصراحه تأثرت بشعراء كثر ومنهم على سبيل المثال لا الحصر الشاعر الكبير/محمد الاحمد السديري س/ابونايف متى كانت بدايتك الشعرية بالفعل ؟ وماهي اول قصيدة لك؟ ج/الحقيقه يابومطر انت تبي تحرجني انا بدايتي كانت عام 1403هــ وكان عمري آناذاك 17سنه .واول قصيده هي: مشكاي عبدالله ترى الروح منصاب=روحي قضت ماباقي الا بعضها واسباب مابي حب وضاح الانياب=اللي على ردفة قرونه نقضها حلفت له مانساه مادام لي حاب=باللي اركون الدين خمس فرضها وان كان هو عني هواء خاطري طاب=صديت عنه وبد مالقاء عوضها س/ابونايف لماذا هذا الجفاء بينك وبين الاعلام ؟وهل السبب منك ام منه؟ ج/السؤال توجهه للاعلام نفسه لماذا هو بعيد عني وعن اغلب شعراء القبيله س/ابونايف بودنا انك تعطينا قصيدة الرثاء في ابن عمك نيف بن عبدالله بن نيف يرحمة الله.وبودنا ايظاً انك تعرفنا بنبذه تعريفيه عن هذا الشخص الذي اشتهر بمكارم الأخلاق ج/هذه القصيده قلتها رثاء في أخي / نيف بن عبدالله بن نيف الذي انتقل الى رحمه الله تعالى غفر الله له ولجميع اموات المسلمين واسكنهم فسيح جناته . وكون المرحوم صاحب كرم وشهامه ونخوه ويشهد له على ذلك جميع من عرفوه او تعاملوا معه واحببت ان اذكر بعض من مناقبه الفضيله اللتي يتميز بها ومنها على سبيل المثال : القصه الاولى : المذكور كانت احواله الماديه بسيطه كونه لا يملك إلا مجموعه من الابل و في سنه من السنين رحل من وادي الدواسر الى الشمال بحثآ عن المرعى و أثناء ترحاله مر على فرعة نساح و اقام فيها يوم, و كان بجواره مجموعه من بيوت البدو و إذا بهم ناس من قبيله قحطان وتربطهم بوالده عنوه (نسب) وقاموا بتكريمه كونه النازل عليهم و عند الصباح الباكر شد رحاله و عقل ثلاث من اطيب الإبل احداهن خلفه و ذهب لهم و قال هذه هديه لكم لكونهم ثلاثه اخوان علمآ أن صاحب الخلفه باع ابنتها لاحقآ ب 85 ألف . القصه الثانيه: كان راعي ابله سوداني اذا ذهب الى أهله في إجازه وعاد اكرمه بذبيحه بما حدى بالراعي بعد ان رزق بمولود ان اسماه على عمه (نيف) تيمنآ بإسمه وقد اهدى عليه ناقه من اطيب ابله. وهذه فقط بعض من مواقفه الشهمه اللتي ترفع راس من ينتمي له , وبعد انتقاله الى رحمه الله رثيته بهذه القصيده. جعل السحاب اللي حقوق مخايله = جعله الى جاء الجزع ينثر همايله و يمطر على قبر سكن فيه عزوتي = نيف عسى الفردوس الأعلى نزايله و ينبت على قبره من الشيح و النفل = و سدر غصونه من علاويه مايله مرحوم يا من غيب الموت زوله = عنا رحل واقفا وقفت رحايله يوم الخميس الفجر لفوه بالكفن = على النعش قدام عيني تخايله بكيت انا و ابكيت من كان حولي = و اللي بكى يبكي معي من بكايله بكيت ساس المجد و الطيب و الوفا = و يمنآ على فعل المواجيب طايله نيف فقيد الجار و الضيف و الخوي = و أيضا الضعيف اللي خلي زمايله لاشك أنا مؤمن بالأقدار و القضى = مسلم و داري و كل الأرواح زايله و قبلت راسه بين صابر و محتسب = و شلته مع اللي فوق الأكتاف شايله و حطيتناه بحفره جوف حفره = و عليه من عالي نثيله نهايله و قفيت أنا منه وأنا اعوج و ألتفت = و دموع عيني فوق الأوجان سايله و عرفت نشره فارق اليوم نشرنا = و عوج النصايب دونه اليوم حايله ياموت ما دورت غيره من الاعرب = و خليت منهو وافيات خصايله و خليت من يثني على ساقه الخوي = لا جاء نهار الكون بانت فعايله ام الكناور و برقا الأشراع تعرفه = و أسأل دهم منه و تنبيك وايله و حمد بن منصور بالطيب يذكره = في ساعه و الليل مرخي ذوايله دون الشروره موطن الخوف و الخطر = و في موتره نوى يولع فتايله حلف عليه و حول السقس صوبه = أما يجي و إلا ندور بدايله و حطه بخشم الهوك ثم جاك يسحبه = من جفرة في مقطع العرق هايله هذا و أنا ماقول شي ما حصل = و اللي نقوله مثبتين دلايله و ختام ما اقوله عسى الله يرحمه = لا جاء نكير و منكر له يسايله س/نريد قصيدتك التي تقدمت بها الى مقام صاحب السمو الملكي الأمير سلمان بن عبدالعزيز أمير منطقة الرياض عندما زار محافظة الخرج عام 1427هـ ج/ ابشر بالقصيدة وصاحب السمو الملكي الأمير سلمان بن عبدالعزيز أمير منطقة الرياض لو نكتب معلقات ماتوفيه حقه. واسأل الله ان يمد في عمره وان يجعله عوناً للملك وذخر للوطن.وقد تشرقت بالسلام على سموه في ديوان الأماره واهداءها عليه وقد تلقيت خاطب شكر من سموه شكر على القصيده.وهذا الخطاب اعتبره وسام ونيشان افتخر بها ماحييت.. والكم القصيده. مبداي باسم اللي فرض خمس الأركان=منشي هماليل المطر من سحابه منجي سفينة نوح من دون ربان =منزل عجايب قدرته في كتابه ومن بعد ذكره زان بدع المثل زان=والشعر فكينا مزاليج بابه باسم المحافظ والبلد وسم الأعيان= وعن الجموع الحاضره بالنيابه يامرحبا ياسيدي سر وعلان=ترحيب عود لالفوله غيابه واحلى من البارد على كبد عطشان= عقب الضما لاذاق بارد شرابه يامرحبا ترحيبة شانها شان= واللي لفو مع صحبكم مرحبابه الخرج بوجودك زها كل الألوان= لبس الجمال اللي جداد اثيابه وغرد به القمري على خضر الأغصان= وجاوب حمام الورق باطراف غابه لعل يوم زارنا فيه سلمان= يوم تعود بجيته والقابه سلمان مثل اسهيل نجمه الى بان= يخضر عوده كل واد مشابه سلمان هو سلما لاقيل سلمان= امير نجد اللي عزيز جنابه بيته لهل نجد مضوف وديوان=وملجا لهم لاكلح الوقت نابه هداج تيما ينهله كل عطشان= عد يصدر من ورد من شرابه قولو معي من قبل واحساس والسان=الله يحفظه في ذهابه وايابه للحق ومار وللعدل ميزان= وعلى مثورة الفتن يندعابه وان لان جبل اطويق في الحق مالان= ويضرب على الكايد معزم وصلابه وفيك التواضع والتسامح ولحسان= وفي الشعب لك قدر ومعزه وهابه المجد ساسك ياسلايل كحيلان= اللي بنا للمجد صرح ورقابه عبدالعزيز الي بنى للعرب شان= في صفحة التاريخ كل قرابه له سيرة يشهد بها كل من كان= فوق البسيطه مابقا مادرابه ويشهد على ممشاه هيت وابو جفان= ويبرين قبل يمرهاقد وطابه والمصمك الموجود شاهد للاعيان= وتشهد مضارب شلفهم وسط بابه ويشهد بها عجلان مع كم عجلان= راحو عشا لطيورهاوالذيابه غارو عليه الفجر والصبح مابان= وخلي عليه البين يردي غرابه ونادى المنادي وارفع الصوت باذان=عبدالعزيز الحكم رده وجابه وطوع صحاري نجد بالسف شامان = بالدم خضب سلته لنصابه لين استتب الأمن فيها والامان = وكل لهم رشده وعاد لصوابه وداج الجزيره فوق خيل وركبان= وحد شتات كان قوم وعصابه ودانت لبو تركي على سرج واعنان= بالسيف لملح ماحكم بانتخابه من الساحل الغربي الى طريف وعمان= ومن الجنوب اسقام فيها رقابه عساه يسكن جنة الخلد عدنان= ويالله عسى دعواتنا مستجابه واليوم ننعم في عهد طير حوران= حر تعلى ماكره في هضابه عبدالله الي له على المجد عنوان = وعوق الخصيم الي يفتل اشنابه زيزوم مابنزام حماي الأوطان= يلوي ولا تلوى عليه الطلابه قاد السفينه وابحرت بر الآمان= ويالله عسى درب السلامه مشابه ولي العهد طير السعدذاك سلطان= الساس واحد والفعايل تشابه يالحاتمي لامن اجدبن شهب الأزمان= ويالعنتر العبسي نهار الطلابه وعوق الخصيم الى غشا الجو دخان=وريف الضعيف الي هزال ركابه ونايف على اسمه نايف بالوفا بان= مثل الجدي ماضاع منهو سرابه امن المواطن والوطن وسط الأعيان= ويفدي بروحه ذرة من ترابه السيف والبندق جزاءكل خوان=عبر الصحافه قالها في جوابه ويامدعين الدين زور وبهتان=انتم هدام الدين وانتم خرابه ماعاد يبغي له دليل وبرهان= افعالكم في حكم جنح الحرابه تكفير مع تفجير ضلم وعدوان= لاشك ناخذ للمعادي حزابه وغلطان ياواهم بلفكار غلطان=عمر الجبل مازحزحته الذبابه نمشي ولاندرى زعل كاين كان= ومن شذ عنا ماحسبنا حسابه وياسيدي مالك علي دين وايمان=هذى مشاعر شاعر في خطابه وارجو السموحه كان بالقول نقصان= كلا على ميسور ماله زهابه قلته وصلو ماهل ودان = على الرسول المصطفى والصحابه صورة ضوئيّة للخطاب : س/ابونايف هل صدر لك ديوان شعري سواء صوتي او مطبوع؟ وهل لديك النية في اصدار ديوان؟ ج/لا والله لم يصدر لي ديوان وهو في طريقه للاضواء وهو ديوان صوتي قريبا بأذن الله س)ممكن تعطينا قصيدتك اللي منها البيت اللي يقول ذولا السدارى لرتكـز كـل شيطـان=يردون حوض الموت ورد المحيميـن ج/ نعم هذي القصيدةقلتها في الأمير/ ناصر بن خالد الأحمد السديري (ابوطارق) وهو معروف بدون شك من اسره كريمه ولها مكانتها الأجتماعيه والرسميه والذي كان اميرآ لمنطقة نجران وبعد ذلك محافظآ لمحافظة الخرج والأن متفرغآ لأعماله الخاصه وكان تربطني به علاقه جيده وله مواقف معي لن انساها ومن المعروف ان السدارى لهم مواقف مع اخوياهم ومنها0 وكنت اعمل في اداره وحصل بيني وبين مدير الأدارة سو تفاهم وتطور الأمر وعند ذلك تدخل الأمير ناصر في الموضوع وطلب من ذلك المسؤل عدم التعرض لنا . وبعد ذلك صارت علاقتنا فيها نوعآ من المجامله 0 وقلت هذي القصيده والامير ناصر السديري وأسرة السدارا حقها علينا اكبر من القصائد. يالله انا طالبك عفوا وغفران = تغفر ذنوبي يوم نصب الموازين تغفر ذنوبي يوم زوغات الأذهان = في ماقف فيه المخاليق عارين يوم رعا الأحسان يجزى بالأحسان = اعمل وتلقى في كلام الصحيحين ومن بعد ذا ياسامع القول لي زان = بدع المثايل في رجال عزيزين وعوص القوافي طاوعتني بالأرسان = غصب اطوعها على المنهج الزين طاعن وراعن وذعنن لمري اذعان = و قالن تفضل ماتبي صار هالحين واخترت من زين القوافي على شان = يطرب لها من سمعها بالدواوين ونظمتها من در لؤلؤ ومرجان = وعطرتها بالكاد عود ورياحين وذكرت بعض افعال ذربين الأيمان = شيوخ الرجال موردين الحديدين ربع لهم في قمة المجد عنوان = بافعالهم واقوالهم دوم وافين ذولا السدارى لرتكز كل شيطان = يردون حوض الموت ورد المحيمين ربع الى من ثار عج ودخان = تاخذ وتعطي في نهاراللقاء الشين فكاكة المضهود ذباحة الضان = لطامة العايل إحماة المخلين بالحرب شجعان وبالعسر كرمان = خطلان الأيدي من قديم وذالحين يوم الجهل والخوف والحوف فرسان = وادعاة سلم وعلم وانصار للدين ميزانهم يرجح على كل ميزان = بالطيب والنخوه رجح بالموازين وخويهم يرقاء على راس مابان = يحرم عليه الضيم مادام حيين في راس عاصا منزله وين ماكان = سلم لهم سنوه والناس دارين واخص ابوطارق ذرى الضيف والعان = شيخ ولد شيخ اسلالة سلاطين من صلب خالد نسل عامر وبدران = شيوخ على صكات الأيام راسين شيوخ لنا فخر لنا فعلهم بان = مع سيرة التاريخ ذكر وعناوين ذكرت روس اقلام للقول برهان = ولاخير في قول ولاله براهين قلته وانا من روس ربع لهام شان = من صلب نيف والقبيله وداعين يشهد لنا التاريخ من عبر الأزمان = عوق الخصيم وباللقاء ننزع الدين وارجو السموحه كان بالقول نقصان = الكامل الله والبشر خلق مخطين قلته وصلوا عد مايرفع آذآن = على الرسول المصطفى ناشر الدين س/ابونايف ياليت نسمع اخر قصائدك وماهي مناسبتها؟ ج/اخر القصائد هي عند عودة سيدي الامير سلطان بن عبدالعزيز من رحلته العلاجيه معافا" سالما" لارض الوطن تباشري يادار بقدوم سلطان = وزفي له الفرحة تباشير وورود وتوشحي بعقود لولو ومرجان = بقدوم ابو خالد ذرى كل مضهود يوم اعلن الديوان اسعد خبر كان= عودة ولي العهد والعلم ماكود تباشروبه كل حضر وبدوان = من الشمال طريف حتى جبل دود وشوفه معافا بين خطلان الايمان= آل السعود مطوعة كل نمرود بدد هموم الشعب كله والاحزان = وعادت لياليهم مسرات وسعود شعباً لشوفك يابيض الوجه شفقان = عقب البطا شفق على شوفك تعود وحبك جرى بالدم مع كل شريان = بقلوب شعباً في محبتك محسود سلطان سلطان السعد طير حوران = اسمه وفعله شامخ كنه الطود سلطان سلطان على كل سلطان = ذروة سنام المجد والعز والجود سلطان سلطان المكارم والاحسان = مدات كفه بالعطى ماله حدود عاشت عليه بيوت وشعوب واوطان = من فيض جوده جادت الناس وتجود بحر الندى سقم العدا مروي الزان = درع الوطن وحماه من دونه يذود سيف يشيل الروس من فوق الامتان = ويعتق رقاب فوقها السيف مجرود وسلمان ماننسى راعي الطيب سلمان = عساه يبقى دايم الدوم موجود أمير نجد اللي له المجد عنوان = وعوق الخصيم إن جاء البرا منه مردود بيته لاهل نجد مضوف وديوان = وملجا لهم لامن غدت بيضها سود مضرب مثل بين الاخوة والاخوان = فعله على الاشهاد والعالم شهود بذل حياته عند فهد وسلطان = ومن غير صحتهم فلاهوب منشود من مات منهم جعله بظل وجنان = والحي منهم جعله بزود في زود ذولا هل العوجا عما كل شيطان = سيف لردع الظلم والجور مسنود تكسيهم البيضاء شباب وشيبان = مالاح براق وماهبت النود وصلوا على المختار من نسل عدنان= اعداد مايطلع على الارض من عود س/ابونايف قبيلة الدواسر لها حق على شعراءها والمعروف عندك يابونايف حمية لقبيلتك وحبك لها وقصائدك التي كتبتها في الدواسر كثر نريد واحده منها. ج/ قبيلة الدواسر لها حق على الكبير والصغير ومهما كتب الشاعر قصائد في قبيلته لن يوفها حقه تجها. والقصيده التي سوف اوردها كتبتها في الملتقى الرابع لقبيلة الدواسر في محافظة الخرج. يالله يالمطلوب ياغفار= انت الأله الواحد القهار يارافع سبع وباسط مثلها =يامولج الليل بالنهار انت الذي تجري الهبايب بامرك=ومن السحاب تنزل الأمطار اطلب رضاك وطاعتك والجنه=وانا دخيلك من عذاب النار من بعد ذكره زان لي مطلوبي= ونهجت نهج الشعروالشعار سلام مني من ضمير صافي=للحفل واهل الحفل والحضار وترحيبة نقولها لضيوفنا=اللي عنو لديارنا زوار ويسوقعا ريح الخزامى والنفل=والذ واحلى من حليب ابكار والبن الأشقر والشحم يقفاها=حق علينا نكرم الخطار قلته وهذى من فعايل ربعي=اهل الشجاعه والكرم والكار دواسر خطلان الأيدي حنا=لازودو اهل القرى لسعار رجالنا لو راس ماله قوته=كفه لظيفه بالكرم مدرار دواسر زايد وتغلب جمعنا= احرار نحيا او نموت احرار دواسر مثل الجبال الشامخه= وعمر الجبل ماهزه الأعصار دواسر وسط الجزيره نعرف=مثل العلم لاصار فوقه نار دواسر نعرف ويدرى فعلنا =اكبار قدر والفعول اكبار دواسر نزمي ويزمي جمعنا= لارد من صوب الحفيف اخبار دواسر فوق الثرايامجدنا=مجد تليد واضح الفنار دواسر يشهد لنا تاريخنا= عصر النبي وقريش والأنصار دواسر انصار صفوة خلقه=على دعاة الشرك والكفار دواسر يسموالبلد باسمانا=وادي الدواسر درة المحار دار لنا ماهيب لحد غيرنا=حامينها يوم الجهل بالنار بمشوك يفرى الثنادي والنحر=ومزرج ومهند بتار دواسر والغرس حنا سوره= السيف سوره ماعليه اسوار دواسر نقعد صغى من جانا= يبغى الطمع في حالية لثمار والله لو يطبق سماهالرضه= ماراح منه لو يبي هكتار دواسر ياويل من بنحورنا = لامن لحقنا فوق قب امهار تعاطفت جل العشاير وارزمت=لحوارها والي بدون احوار حنا هل البل من قدبم وتالي =سند الغوارب هزع الفقار سود مثل وصف الجريد ارقابها=سود بها راع النظر يحتار سود يزين الوصف في وصافها= ارقاق زين والعمار الكبار نرعابها لازاف عشب الوسمي= ونسج نجد في ضحى النهار ومصيافها بالصيف شرع الوادي=تنعم بضله من لهيب الحار ومصفارها لاجاة ربع خالي = مع المها في نايف الزبار وياما نحنا دونها من سربه=وياما عليها نرخص العمار وياما نزلنا في الخطر نرعاها=ومن دونها كم يتمو قصار بين القبايل نفتخر بسلومنا= عندالجلاوي والخوي والجار قصيرنا ناسم عصاه ونهمله= ويصبح غريب الدار راعي دار حاله وماله فيه يمسي وامن =لاخايف حنشل ولاسبار ويرعابها من حدها لاحدها=حتى يعود الديرته مختار من الشمال اخريص لبرق شرقه=يم الجنوب احدودنا قرار ويحدنا من شرق ربع خالي= فيه الوضيحي كان له تذكار وحدودنا من غرب حدالمستجد=ذي دارنا ياحي ذيك الدار دار حمينا بضرب ارماحنا=يوم المغازي والجهل والثار ولامن زبنا جالي ومجلى=ينسى ويسلم من عنا لسفار ويشهد على ماقوله ابن مطرف= يوم الشريف وجيشه الجرار جانا وحالو لابتي من دونه=وقوز الشريف اكبر دليل صار واليوم في لسلام نحمد ربي = امن وامان وطاعة واستار من فضل ربي ثم فضل معزي=عبدالعزيزالفارس المغوار وحد شتات المملكه وارساها =حتى اصبحت مترامية لقطار وزال البدع والشرك منها وفيها =طبق شريعة سيد الأبرار واليوم ننعم في عهد عبدالله=حر وساسه ماكر الحرار قلته ونا من لابة معروفه= لامن عميل من عميله بار ودعاني كسب العلوم الغانمه= لجدودنا وانا على المسار ونوصي بها من بعدنا لحفادنا=وتبقى لنا طول الزمان اشعار اهل الثمان اللي دليل اشهودها=ذبحت والدناصر رضا للجار وانا ودينا جارنا من جداره=منا كرم ولا الغريم اجدار سوالف ذكرت منها موجز=وهذى من الثمان باختصار ولاقول في حق القبايل قاصر=كلاعلى حقه وله وقار كلا يعدي من حياضه سيفه =ولولا الفخر ماكان لفتخار تمت وصلى الله على هادينا= اعداد من فوق البسيطه سار س/ ابونايف بودنا انك تذكر لنا ولوا الشيء اليسر عن جدك الشيخ / مبارك بن رافع بن مانع بن دليم الودعاني خصوصآ عن هية الفرشه ؟ ج/ابشر . حصلت تلك المعركه قبل قيام الدوله السعوديه الأولى ومن المعروف ان الجزيره العربيه في ذلك الوقت كانت ميدان كاسب ومكسوب لكثرة الغزوات بين القبائل وكذلك الحنشل 0كانت السليل في ذلك الوقت منطقه صغيره تكثر فيها بيوت الطين و مزارع النخيل وكانت تسقى على المعاويد والسليل يحدها من الغرب وادي قرون الذي يصب في الفرشه جنوب السليل والفرشه (روضه) وتكثر فيها الأعشاب والنباتات في وقت الربيع وتعتبر منتزه لأهل السليل 0 وذات مره في الربيع طلعو اهل السليل بحلا لهم واهلهم في الروضه وكان من المعروف ان يوجد على القوم رقيبه (خفاره حاليآ) خوفآ من القوم والحنشل وفي ليله من الليالي كان بردها شديد خرج الشيخ اخر الليل ليتاكد عن الحلال وتفقده وإذا بالقوم يحوفون الحلال فصاح الصايح واشتبكو مع القوم بالسلاح والرماح وسمع الشيخ عزوة ابنه (نيف)وسط القوم ودارة المعركه وقتل الشيخ مبارك عقيد القوم (يدعى محمد) وانهزمو القوم وقال هذه القصيده : قال ابن رافع بات عينه مريضه = عداها من النوم المعافا حريبها وحلها الى من قربها الليل جاها = صبور على هذا عسا الله يثيبها وتبكيك ياعيني مبارا ركايب = ولكن ناموسها 000 باغديبها فبيتناهم عقب ما بيتونا = بمخير ماهوب يسلم صويبها ضربت الشجاع محمد ليه طايح = على عضده اليمنى وجنبه طنيبها وهذا طريح وذاك ينقل صوابه = واللي زبن له شجرة يتقيبها وسمعت عزوة نيف ابو مبارك = وهي عادته ضو البلى مايهيبها كله لعانا غايب ماحضرتنا = فعلآ على الأعداء ينومس قريبها يوم الردي في السوق انا اخو فلانه = ولاجا نهار الهوش مايعتزيبها عسى حرمته تلبس عليه سواد الحلأ = مع ذا عقيم ما بزت منه صيبها وجعل الحيا يسقي لنا فيضة الغضاء= فيها جثاياهم عشايا لذيبها ارجو المعذرة لعدم ترابط القصيده لأن بعض بيوتها لم يحضرني . (( يتبع بالمتصفح التالي تتمةً من لقاء الموقع الرسمي لقبيلة الدواسر العريقة بـ الشاعر الكبير تركي بن هذّال بن نيف الودعاني ))

 

 

 

 

[معلومات العضو الإداره]

س/مارأئي شاعرنا في (بعض) مواقع الدواسر اللتي تسعى لزرع الفتنه بين ابناء الدواسر بأثارة بعض المواضيع اللتي تحيي النعرات الجاهليه؟ ج/انا ضد هذه المنتديات والواجب عليهم جمع الدواسر وليس التفريق بينهم ويجب عليهم مراقبة الله عز وجل فهم الليوم على الارض وغدا تحت الارض ولايبقى سوى العمل الصالح ..واسأل الله عز وجل ان يهديهم ويهدي الجميع س/شاعر يتمنى تركي بن نيف انه يمتلك موهبة الشعرية. منهو ؟ ج/والله كثر يابومطر ولكن يبقى الامير محمد الاحمد السديري وبن جدلان وفيه عمالقه شعر واجد س : ممكن تعطينا قصيدتك اللي منها البيت اللي يقول ناصر ولد خالد سفير المهمات=له ماقف وقت الشدايد يشافي وياليت تكلمنا عن مناسبتها ؟ ج/هذه قصيده في معالي الامير /ناصر بن خالد السديري محافظ محافظة الخرج سابقا بعد مواقفه المشرفه معي وابوطارق يستاهل معلقات هات القلم والبوك واكتب لنا ابيات= واكتب على القرطاس زين القوافي واكتب سلامي عد نجم المجرات = واعداد من احرم ولبى وطافي واعداد ماخط القلم بالسجلات = واعداد ماتذري هبوب السوافي مني لبو طارق على الطرس مهدات= مثل الشهد والذ لاصار صافي حر تعلى ماكره بالمنيفات= الفعل وافي فيه والشكل وافي ناصر ولد خالد سفير المهمات = له ماقف وكت الشدايد يشافي نطاح شيال الحمول الثقيلات= نقال حمل اللي عزومه اضعافي وله فزعة تروي ضمى الكبد لاجات= وله عادة لاقال بالقول يافي المجد ساسه والكرم فيه عادات= والطيب ورثه من عصور مقافي يامير يامير الوفى والشهامات= يامير شفنا في الزمان اختلافي اثر الحسد موجود وبليس مامات = بقلوب ناس تدعي بالتصافي ناس تسن انيابها سن بسكات= تضحك وهي تظمر لنا الشر خافي والله لولا الله ثم انت ماجات = كل العلوم الطيبه يالسنافي وقفت مثل اطويق بوجه المثيرات= دوني واضن الرمز يامير كافي واقبل سلامي والشكر والتحيات= وارجو السموحه سيدي شاب قافي س/ابونايف من هو صقر سالم وماهي القصيده اللتي قلتها فيها ومامناسبتها؟ ج/من المعروف عند العرب في الجاهليه وفي السلام مكانت الخوي عندهم والقصيده قلتها في زميل وأخ عزيز جمعتنا خوة العمل لمدة ثمان سنوات تقريبآ وانا اعتبرها ثمانية ايام الزميل هو الأستاذ ( صقربن سالم الخنافر قحطان ) رئيس لجنة التعديات المشتركه في امارة محافظة الخرج ونعم الخوي ونعم الزميل ونعم الرجل لما يتصفبه من الأدب والمعرفه والكرم والحكمه وبشاشة الوجه . والقصيده تقول: سلام ياساس الوفـاء والشكالـه=سـلام منـي عـد وبـل الرفيـه واعـداد ماحـول ابنـك حوالـه=والذ من شهد النحل فـي الخليـه مني لبو سالـم كتبـت الرسالـه=رسالـة مبنغـى وراهـا جزيـه صقر على اسمه والمسمى غدالـه=طلعـه بعيـد ولا يصيـد الرديـه نعـم ببوسالـم إلآ جـاء مجالـه=ونعم الخوي لامن نشد من خويـه طلق الحجاج وعون منهو شكالـه=وعوق الخصيم إلياء انتو من نويه له مجلس لاجاء المسيـر لقالـه=بريـة والعـود لـزرق سـويـه والظيف والمحتاج له في حلالـه=قسم لهم من عند جـزل العطيـه امعـرب مابيـن جـده وخـالـه=اهل الكرم والجود واهـل الحميـه خنافـر يـوم الجهـل والجهالـه=تارد حياض الموت ورد الضميـه وياما خذو من زاهيـات الشمالـه=واقفو عليهـا محتميـن الونيـه وكم من عقيد جاو سبـة زوالـه=برماحهم من فوق بنـت العبيـه لاجا نهار فيـه صـوت وظلالـه=والي سلم حطـو بكبـده لضيـه واليوم في الأسلام حكـم وعدالـه=شيوخ لهم عند العـرب مقدريـه فمادام ماقلنـاه يحكـي خصالـه=مدحه ومـن مثلـه لـزوم عليـه وبجـاه رب البيـت جـل جلالـه=صلو على المختار سيـد البريـه س ابونايف ما هي افضل قصيده اعجبتك من الشعراء ? ج/ القصايد الجزله كثيره ومنها قصيدة الشاعر حمد المسردي لآنها تحاكي واقعنا اليوم. وهو يقول فيها : المال كم ساس طمان وعلاه= والفقر كم حطم روابع اسنافي من كثر ماله سارو الناس برضاه=لوكان ناقص قالو الناس وافي ومن قل مابيده ترى الناس تشناه=لوكان يسقيهم عسل قند صافي س -ابونايف ماهوا افضل بيت شعر اعجبك من الشعراء ؟ ج- كثيره ومنها بيت للشاعر الأمير محمد السديري لعل قصر مايجيله ظلالي= ينهد من عالي مبانيه لساس وابيات الشاعر راشد الخلاوي عمر الفتى في ماقف العز ساعه= ولاالف عام يصبح الذل صاحبه وابيات الشاعر سعد بن جدلان وادنا بالطيب مير الزمن جحاد طيب= يوم تنصح مع الناس كنك اتغشها س/ ابونايف هناك مطلع قصيده لك لها مناسبه لوتذكرها لنا.الي تقول فيها تمنيت وادري مابعد فادت المنوه = على شان قلب هزه الشوق واجتاحه ج/ ابشر المناسبه كنت في المكتب يوم من الأيام واذا بالخوي يحضر لي مجموعه من المعاملات من مكتب سمو الأمير وبعد تصفحي لها وجدت معامله مرفوعه من الهيئه لسمو الأمير وفيها انه تم القبض على فلان مع فلانه في خلوه غير شرعيه وكلمت خلوه فكرت فيها كثير وقلت هذه القصيده : تمنيت وادري مابعد فادت المنوه = على شان قلب هزه الشوق واجتاحه بعد شوف خلي ساعتين على خلوه = الى جات في جمعاه والنفس مرتاحه الى زل نصف الليل والناس في غفوه = وهب النسيم وريحة العطر فواحه هلأ هلأ لقبل علي يحسب الخطوه = وانا في انتظاره جالس فوق طراحه وإلى سلمت بالخير ثم شالت الغطوه = ملاك البشر والحور معطينه اوشاحه ابعطيه واخذ من سواليفه الحلوه= وبشكي عليه اهموم قلبي ومالاحه س/ابونايف نحن نطمع في كرمك ونريد منك قصيده غزليه؟ قلب يالي لايشاور ولايقبل شوير = وان عذلته او نهيته حلال القوم زاد وصرتنا وياه مثل المسرح والنذير = او مثل قول المثل كل يوم في جهاد وصابر وقول يالله عسى في الأمر خير = وعارف الصبر لو طال تاليه النفاد في هوا اللي صار لي في حياتي لي خشير = مخشره والشاهد الله عليه والعباد مالك قلبي وعقلي وخلاني اسير = للعيون اللي وساع وداخلها سواد عين حر فوق وكره تنهض للمطير = شاف جول بان له واتقا وسط الحماد ويا شبيه اللي من الصيد حقق مستذير= ذيره صوت القوانيص في الخبه وحاد واستذار وذير الصيد مع وقت العصير = واختلف رمايها ما ضغط راس الزناد عود موز ناعم منبته جال الغدير= يستميل مع الهوى كل ما هب البراد مايصير اللي تسويه لا لا مايصير = شوف حال الي قضأ الحال منه مستفاد كون عبرات اونات والباقي زفير = ورأس كوعه لا ضوى الليل حطه له وساد في هواكم من غلاكم يجذبه سلك الحرير = وفي رضاكم لو زعل كل ناسه ويش عاد س/ماهي كلمة شاعرنا لموقع الدواسر الرسمي؟ ج/كلمتي في هالابيات: سلام من قلب" صدوق المشاعر=ياموقع بين المواقع تميز موقع بني عمي رجال الدواسر=حبه شغل بقلوبنا كل حيز سطر افعول اجدادنا والمفاخر=بأسم القبيله دون ميل وتحيز والله يبيض وجيهكم وماقصرتوا والشهادة لله انكم ماقصرتوا في خدمة بني عمك بشتى المجالات واستمروا على هالنهج والله يوفقكم.. هذه بعض الأبيات التي قالها ضيف اللقاء ولم يكملها بحكم إنها تعتبر من الخواطر مكسب الرجال ثنتين دامه في الحياة=طاعة الله والنعم كل ماجا له مجال والله انها راس ماله وعزه والغناه=والبقى لله والحي تاليه الزوال وصحبة الطيب من الناس ماتبغى وصاة=والردي ما احسب وجوده وماله راس مال ********** (الطيب من هل الطيب مابه غرابه)=بس الغرابة يوم عنه يصدون الطيب قصرا ما احد صك بابه=مفتوح للي يجون واللي يروحون احد رقى في قمته واعتنى به=واحد قصر منه ودونه يعودون ******* (ياوجودي كل ماهب نسناس الهبوب)=وجد من حده زمانه على ذل السؤال وياوجودي كل ماجات حزات الغروب=وجد من جلي وخلا عياله والحلال من هموم الخوف والبعد جاء وجهه شحوب=وان تذكر قام يصفق يمينه بالشمال لقطات تذكاريّة للحضور بمنزل الشاعر الكبير تركي بن هذّال بن نيف الودعاني أثناء إجارء اللقاء وبختامه : يظهر من اليمين : محمد بن عبدالله آل نيف و الشاعر تركي بن هذّال بن نيف ضيف اللقاء و النقيب سلطان بن ابراهيم آل نيف وسلمان بن خالد آل نيف . لقطة جماعيّة للحضور . لقطات تذكاريّة بالجزء الثاني من إجراء اللقاء والذي إستضاف وفد الموقع الشاعر الكبير تركي بن هذّال بن نيّف الودعاني عند إبله : وفي ختام هذا اللقاء الشيَق ، نتقدم بخالص الشكر والتقدير للشاعر تركي بن هذال بن نيف الودعاني على سعة صدره وكرم الضيافه وحسن الاستقبال ، والى ان نلقاكم في لقاءات اخرى ان شاء الله لكم التحيات والتقدير منا . (صوت قبيلة الدواسر) منتدى قبيلة الدواسر الرسمي www.alduwasser.org/vb

 

 

 

 

[معلومات العضو فهد الغريري]

بسم طاقم موقع الدواسر الرسمي اشكر الشاعر الفاضل تركي بن هذال بن نيف الودعاني . على استضافتنا لنا وعلى سعة صدره رغم مشاغلة على اجراء هذا اللقاء القيم المفيد ونسأل الله لنا وله التوفيق والسداد

 

 

 

 

[معلومات العضو ابو زيد الغييثي]

ارررررررررررررررررررررررررررررحب ترااااحيب المطر

الادارة نتقدم لكم بالشكر الجزيل

على هذا اللقاء المتميز

مع الشاعر الكبير و المميز

تركي بن هذال بن نيف

استمتعنا بقرأة هذا اللقاء و ارتوينا

من شعر هذا الشاعر المخضرم

ونحن انتظار صدور ديوانه الصوتي

والشكر موصول للمراقبين خميّس و محمد بن سالم

على هذا اللقاء الرااائع

لا خلا و لاعدم

أخوكم / ابو زيد

 

 

 

 

[معلومات العضو راشد المسعري]

ماشاء الله تبارك الله

سيرة عطرة ولقاء مميز مع شاعر مميز وكبير بشعره وأخلاقه

أشكر الإخوان اللذين أجروا هذا اللقاء وعملوا على إخراجه بهذا الشكل المميز ولا غرابة على نجاح هذا اللقاء فالشاعر ابو هذال من أبرز الشعراء في قبيلتنا العزيزة وكذلك من بيت شعر معروف ونسأل الله أن يوفقه ويوفق الجميع لما فيه الخير .
وللجميع ودي وتقديري ،،،،

 

 

 

 

[معلومات العضو شافي بن راشد النتيفات]

ارحب ياتركي وانت شاعر من شعراء القبيلة اللي نفتخر فيهم ومثل ماقلت الاعلام يبعد نفسه من شعراء القبيلة ويشهد الله انك شاعر جزل ومن رجال وافين والنعم في صبيان ودعان اهل الثمان كما لايفوتني ان اشكر من قام بهذا اللقاء اخونا النشيط المحبوب للجميع خميس بن مطر الغييثي والشاعر والعضو المميز محمد بن سالم الخضراني واشكر القائمين على موقع قبيلة الدواسر عموم والله يوفقهم ومن تقدم الى تقدم

 

 

 

 

[معلومات العضو أبـ ريماس ـو]

والله اني احبك في الله يابو نايف
لقاء شيق ولافيه كلام
و جزل وساسك جزل
استمتعت بالقراءه
واشكرك اخواني خميس و محمد
على اجراء هذا اللقا المتميز
ولاهانو الاداره على الطرح الوافي

 

 

 

 

[معلومات العضو الـصـتـيـمـة]

شاعر جزل ونشكركم على تعريفنا به وتسليط الضو عليه

 

 

 

 

[معلومات العضو محمد بن سالم الخضراني]

ارحب يابو هذال ترحيب البدو بالمطر

الحقيقه انني استمتعت بلقائك لانك من الشعراء المميزين

تقبل فائق تقديري

اخوك محمد بن سالم

 

 

 

 

[معلومات العضو ناصر بن فهد]

سلام من قلب" صدوق المشاعر=يـامــوقــع بــيـــن الــمــواقــع تــمــيــز
موقـع بنـي عمـي رجــال الـدواسـر=حـــبــــه شـــغــــل بـقـلـوبــنــا حــــيــــز
سـطـر افـعـول اجـدادنـا والمـفـاخـر=بـأسـم القبيـلـه دون مـيـل وتحـيـز

ارررررررررررررحب اررررررررررررررررحب يا ابو هذالُ
وصح لسسسسسانك وبيض الله وجهك لاتاحة اللقاء معكُ ,رغمُ مشاغلكُ
ونشكركُ بصدق المشـآعرُ يا ابو هذالُ ,, وصرآحه استمتعنـآُ بقرآءةُ قصيدكُ يا ذيبانً
وكلآمكُ الطيُبُ لانكُ رآعيُ الطيبُ ,,,
وكمـآ لا يفوتنيُ أن اشكرُ من قـآمُ هذا الجهدُ وهم:
1- فهد بن هادي الغريريُ
2- محمد بن سالم الخضرآنيُ
3- خميس بن مطر الغييثيً
4- الحيميدي الغريري.
بيض الله وجهيكم على التنسيق والتصويرُ واللقاء الرآئعُ ولآهنتمُ يا المدآغيش..

وتقبلوآ تحياتي

 

 

 

 

[معلومات العضو غازي المسعري]

ماشاء الله تبارك الله

سيرة عطرة ولقاء مميز مع شاعر مميز وكبير بشعره وأخلاقه

أشكر الإخوان اللذين أجروا هذا اللقاء وعملوا على إخراجه بهذا الشكل المميز ولا غرابة على نجاح هذا اللقاء فالشاعر ابو هذال من أبرز الشعراء في قبيلتنا العزيزة وكذلك من بيت شعر معروف ونسأل الله أن يوفقه ويوفق الجميع لما فيه الخير .
وللجميع ودي وتقديري

 

 

 

 

[معلومات العضو ابوهديل]

لقاء شيق واتنمنى المزيد وعمل لقاءات مع شعراء القبيلة

وكنت اتمنى وارجو افادتنا ممن عنده خبر في

اثناء القاء ذكر الشاعر في بداية القاء ان عمه مدح احد السدارى وقال في احد الابيات ان الممدوح حدر مع برك اتمنى ممن يعرف عن هذه القصه ايرادها لنا كاملة وله اجمل التحايا

 

 

 

 

[معلومات العضو معزي]

لقاء متميز وشاعر متميز ومنتدى متميز

اشكر الاداره على تعرفنا بالشاعر تركي الودعاني

 

 

 

 

[معلومات العضو محمد.الودعاني]

ماشاء الله تبارك الله

سيرة عطرة ولقاء مميز مع شاعر مميز وكبير بشعره وأخلاقه

أشكر الإخوان اللذين أجروا هذا اللقاء وعملوا على إخراجه بهذا الشكل المميز ولا غرابة على نجاح هذا اللقاء فالشاعر ابو هذال من أبرز الشعراء في قبيلتنا العزيزة وكذلك من بيت شعر معروف ونسأل الله أن يوفقه ويوفق الجميع لما فيه الخير .
وللجميع ودي وتقديري

 

 

 

 

[معلومات العضو ابومبخوت الدوسري]

اشكر الاداره الكريمه على هذا اللقاء الجميل مع

الشاعر / الكبير تركي بن هذّال بن نيف الودعاني

وصح لسانه شاعر جزل ووافي الله يعطيه العافيه .


بيض الله وجه لك من قام على هذا اللقاء الطيب


تقبلوا تحياتي وتقديري