أيامنا والليالي كم نعاتبها

[معلومات العضو عبدالله الحافر الغييثي]

أيامنا والليالي كم نعاتبها =شبنا وشابت وعفنا بعض الأحوالي
تاعد مواعيد والجاهل مكذبها =واللي عرف حدها من همها سالي
إن أقبلت يوم ما تصفى مشاربها =تقفي وتقبل وما دامت على حالي
في كل يوم تورينا عجايبها =واليوم الأول تراه احسن من التالي
أيام في غلبها وايام نغلبها =وايام فيها سوا والدهر ميالي
جربت الأيام مثلي من يجربها =تجريب عاقل وذاق المر والحالي
نضحك مع الناس والدنيا نلاعبها =نمشي مع الفي طوع حيث ما مالي
كم من علومٍ وكم آداب نكسبها =والشعر مازون مثقالٍ بمثقالي
اعرف حروف الهجاء بالرمز واكتبها =عاقل ومجنون حاوى كل الأشكالي
لكن حظي ردي والروح متعبها =ما فادني حسن تاديبي مع أمثالي
إن جيت ابي حاجةٍ عزت مطالبها =العفو ما واحدٍ في الناس يا والي
قومٍ الى جيتهم رفت شواربها =بالضحك واقلوبها فيها الردا كالي
وقومٍ الى جيتها صكت حواجبها =وابد ت لي البغض في مقفاي واقبالي
ما كني إلا حال مغضبها =والكل في عشرته ماكر ودجالي
يا حيف تخفي أموراً كنت حاسبها =واللي على بالهم كله على بالي
الجار جافي وكم قومٍ محاربها =والأهل وأصحابنا والدون والعالي
والروح ويش عذرها في ترك واجبها =راح الحسب والنسب في جمع الأموالي
نفسي تبى العز والحاجات تغصبها =ترمي بها بين أجاويد وانذالي
المال يحي رجالاً لا حياة ابها =كالسيل يحي الهشيم الدمدم البالي
عفت المنازل وروحي يوم اجنبها =منها غنيمه وعنها البعد أولا لي
لا خير في ديرةٍ يشقى العزيز ابها =يمشي مع الناس في همٍ وإذلالي
دارٍ بها الخوف دومٍ ما يغايبها =والجوع فيها ومعها بعض الاحوالي
جوعى سراحينها شبعى ثعالبها =الكلب والهر يقدم كل ريبالي
عز الفتى راس ماله من مكاسبها =يا مرتضي الهون لا عزٍّ ولا مالي
دللت بالروح لين ارخصت جانبها =وانا عتيبي عريب الجد والخالي
قومٍ تدوس الافاعي مع عقاربها =ولها عزايم تهد الشامخ العالي
خل المنازل وقل للبين يندبها =يبكي عليها بدمع العين هطالي
لا تعمر الدار والقالات تخربها =بيع الردي بالخساره واشتر الغالي
ما ضاقت الأرض وانسدت مذاهبها =فيها السعه والمراجل والتفتالِ
دارٍ بدار وجيرانٍ نقاربها =وارضٍ بأرض وأطلالٍ بأطلالي
والناس اجانيب لين إنك تصاحبها =تكون منهم كما قالوا بالأمثالي
الارض لله نمشي في مناكبها =والله قدر لنا أرزاق وآجالي
حث المطايا وشرِّقها وغرِّبها=واقطع بها كل فجٍّ دارسٍ خالي
واطعن انحور الفيافي في ترايبها = وابعد عن الهم تمسي خالي البالي
من كل عمليةٍ تقطع براكبها = فدافد البيد درهامٍ وزرفالي
تبعدك عن دار قومٍ ودار تقربها =واختر لنفسك للمنزال منزالي
لو متّ في ديرةٍ قفراً جوانبها = فيها لوطى السباع الغبس مدهالي
اخير من ديرةٍ يجفاك صاحبها = كم ذا الجفا والتجافي والتعلالي
دوس المخاطر ولا تخشى عواقبها = الموت واحد وبعد العز يجلالي
ان المنايا إذا مدت مخالبها = تدركك لو كنت في جو السما العالي
ما قرت الاسد في عالي مراقبها = تسعى على الرزق ما حنت للاشبالي
والشمس في برجها والغيم يحجبها = تقفي وتقبل لها في العرش مجدالِ
رب السماوات يا محصي كواكبها = يا مجري السفن في لجات الأهوالي
ضاقت بنا الأرض واشتبت شبايبها = والغيث محبوس يا معبود يا والي
يا الله من مزنةٍ هبت هبايبها = رعادها بات له في البحر زلزالي
ريح العوالي من المنشا تجاذبها = جذب الدلى من جباء مطوية الجالي
تسقي دياراً شديد الوقت حاربها = ما عاد فيها لبعض الناس منزالي
يا جاهل اسمع تماثيلاً مرتبها = فيها معاني جميع القيل والقالي
مثل المحابيب زادت في قوالبها = في صرفها زايده عن قرش واريالي
يا ربي توبه وروحي لا تعذبها = يوم القيامه إذا ما ضاقت اعمالي
وازكى صلاةٍ على المختار نوهبها = شفيعنا يوم حشرٍ فيه الأهوالي

بديوي الوقداني

 

 

 

 

[معلومات العضو ابومبخوت الدوسري]

صح لسان الشاعر/ الوقداني وبيض الله وجهك يابومطر على امتاعنا بهذا النص الجميل اللي ينم عن ذائقتك في الشعر بارك الله فيك تقبل ارقااااا التحاااااايااااااااااا

 

 

 

 

[معلومات العضو ابو زيد الغييثي]

من اجمل ابيات الشاعر / بديوي الوقداني العتيبي

صدها بلغ الافاق

لاهنت يا ابو مطر على ايراد هذه الابيات الشهيره جدا ً

 

 

 

 

[معلومات العضو نايف الخييلي]

صح لسانك

طرح قوي وإختيار مميز يابو مطر

والله يرحم بديوي الوقداني

 

 

 

 

[معلومات العضو ناصر الخبر]

أيـام فـي غلبهـا وايـام نغلبـهـا
وايـام فيهـا سـوا والدهـر ميالـي



صح للسسسانك ياخميسس وصح للسسسان الوقداني بارك الله فيك يالقرم

 

 

 

 

[معلومات العضو عبدالله الحافر الغييثي]

هلابكـــــــ اخواني الاعزاء وشاكــــــر لكم طيب مروركـــــــ م ودائـــــما ابحث على مايرقى ذوقكــــــ م الرفـــــيــــــــ ع

 

 

 

 

[معلومات العضو الزين]

لاهنت وبيض الله وجهك على النقل الطيب ياخوى

 

 

 

 

[معلومات العضو محمد بن سالم الخضراني]

اخوي خميس بيض لله وجهك

على الاختيار الجميل والطيب لهذا القصيده

التي تعتبر حكمه وموعضه من اولها الى اخرها

 

 

 

 

[معلومات العضو عبدالله الحافر الغييثي]

ارحبوا ابوسالم الزين ياهلابكم وشاكر لكم طيب المرور خالص التقدير