![]() |
#1 | ||
|
![]() [B] ![]() أخوانــي الكــرام زورا (( منتــدى الــدواســر الرسمي )) نــقدم لكم اللقاء التاريخي مع الامير / راشــد بن رشيــدان آل خضير الهواملـة( رحمه الله تعالى ) عضو الشرف الداعم لموقع قبيلة الدواسر الرسمي وأحد الذين قدموا دعمهم لموقع القبيلة الرسمي http://www.alduwaser.org/vb/showthread.php?t=16527 ولــقد قام بهذا اللقاء الاخوة والزملاء في منتدى ( آل حسن الرسمي ) فلهم الشكـر وايضا ً لا ننسى ان نشكر الاخ والاستاذ / سعد بن سالم بن تركي وأدارتة الكريمة وادراتنا الكريمة على التنسيق لنشر هذا اللقاء واترككم مع اللقاء : والصلاة والسلام على أشرف الأنبياء والمرسلين سيدنا محمد وعلى آله وصحبه الغر الميامين . أيها الأخـوة الكرام أعضاء وزوار الموقع الرسمي لـ قبيلة آل حسن الدواسر السلام عليكم ورحمة الله وبركاتة ،، ما اجمل التاريخ العربي حينما نقلب صفحاته ونجد سطوره المشعه تضيْ لنا مجداً من لدن جهابذة الرجال ،ّ وحب الأنتماء لقبيلتهم الذي ملك نفوسهم وترعرع في خلجاتهم منذ نشأتهم حتى مماتهم رحم الله ميتهم ورفع الله قدر حيهم وابقى ذكرهم. قال الله تعالى في محكم كتابة العزيز : ( قُلْ هَلْ يَسْتَوِي الَّذِينَ يَعْلَمُونَ وَالَّذِينَ لا يَعْلَمُونَ إِنَّمَا يَتَذَكَّرُ أُولُو الْأَلْبَابِ ) إعلم إيها المتخصص بالتاريخ إذا اردت أن تنهل من المعرفة فقد سنحت لك الفرصة الآن أن تتذوق معنى التاريخ الحقيقي ، علماً بإن التاريخ هو سلاح ذو حدين ، إما أن ترويه كما قرأته من لدن أصحابه الثقات وأما أن تحرفه كما يحلو لك سوا بلسانك أو بيدك . ايها الأخوة لقد سعدنا بـ إجراءهذا اللقاء والخاص بحمولة آل خضير الهوامله الدواسر والذي لا شك أنه إطلالة رائعة وفريدة ، الأمر الذي اثلج صدورنا بما حواه من موروث لهذه القبيلة العريقة وقد حوى طرحاً نيراً ومفيداً بتاريخهم المشرف ، حيث عبروا عما يجيش بخواطرنا تجاه القبيلة ، وقد ذكروا بطولات قبيلة الدواسر بما يليق بمكانتها الرفيعة بين القبائل ، ونحمد الله العلي القدير الذي وفقنا على أنجاز هذا العمل الرفيع مع أميـراً ذاع صيته بين قبيلة الدواسر والقبائل الأخرى حيث أن هذا الأمير وُلد عملاقاً وعاش شامخاً ومات علماً . نعم لقاءاً وبكل شموخ هو مع الراحل : الأميــر : راشد بن رشيدان بن خضير آل خضير الهوامله الفرجان ( رحمه الله تعالى ) للتنويـــــــه فقد أجري هذا اللقاء مع الفقيد رحمه الله العام الماضي وقد حرصنا كل الحرص أن يرى هذا اللقاء النور في ذلك الوقت ولكن ما أخرنا هو الحرص على أن ننهل من المعلومات التي يتطلع لها جميع أفراد القبيلة وذلك مما لدى ضيفنا الكبير رحمة الله عليه من معرفة ودراية ، ولـــما حضينا به منه رحمه الله في كل لقاء من حـــرص وكـرم على أن يخصنا بما لديه ، لــذلك فقد كنا أحرص ليظهر هذا اللقاء بما يليق بهذه القامة ، ولكنها مشيئة الله فقد تعرض في الأشهر الثلاثة الأخيرة إلى وعكة صحية جعل الله ما أصابه زيادة له في ميزان حسناته (آمين) . فكنا على أمل أن يعود كما كان بصحته المعهودة لنواصل معه المشوار ، ولكن الله أبى الإ أن يقضي أمراً كان مفعولا وها هو قد إنتقل إلى جوار ربه . (( إنا لله وإنا إليه راجعون )) ولا يسعنا الإ أن نقول رحمك الله رحمة واسعة فمن عرفه أو إلتقى به يشهد له بإنه من أهل الخير والصلاح آمراً بالمعروف وناهياً عن المنكر مقيماً لحدود الله . فلذلك نعزي أنفسنا فقد فقدت قبيلة آل حسن إبناً باراً وأباً لكل فرد من أفرادها وبفقده فقدت بحراً من العطاء وعالماً بالأنساب والتاريخ . ![]() الأمير الراحل راشد بن رشيدان بن خضير آل خضير الهوامله إن الأقلام تقف عاجزه في كيفية أستخراج كلمات ٍ نستبطها من العقل الباطن كي تصل إلى مكانة هذا الأميــر ، لاشك إن الواقع جعلنا ندرك بإننا جميعاً أمام أميراً ينتسب إلى قبيلة عربية عزيزة الجانب . الأمارة والرجالّ والجيوش والسلاح والقوة والمنعه والأقدام والنصر والشجاعة والفروسية والجود والكرم والصحراء والشعر، صفات هي في الأصل خلقه ربانية لمن سوف نسترجع ماضيهم الزاخر وورث ملكي لمن هم على قيد الحياة أطال الله عمارهم . أيها القراء الأحباب من لا يشكر الناس لا يشكره الله وأيماناً من موقعكم بسياسته الإدارية الثابتة التي لن يحيد عنها بمشيئة الله يسرنا جميعاً أن نتقدم بجزيل الشكر والعرفان للباحث العربي السعودي : محمد بن حسين الخليفي الذي قدم إسهامات جليله ومشاركته الفعاله وأبدا الإهتمام بكل صغيرة وكبيرة في حيثيات إخراج هذا اللقاء بشكل اللأئق والمأمول ولـ لله الحمد والمنه على ما توصلنا عليه جميعاً . حيث كان للكاتب والباحث محمد بن حسين الخليفي وقفه جاده في هذا اللقاء من خلال هذه الكلمة الأفتتاحية التالية ويسرنا بكل ترحاب بالغ أن نقدمها للسادة الأعضاء . واليكم هذه الكلمة الطيبة بـ قلم الأستاذ : محمد بن حسين الخليفي [frame="2 70"]بداية كنت قد جمعت بعض المعلومات عن قبيلة الدواسر التي تربطني بهم أخوة قديمة وكانو نعم العشيرة في من كان يعيش بينهم أو في بلدانهم حتى أنه يصبح إنتمائه لهم وهذا ما يجعلهم يختلفون عن كثير من الناس لإن من عاشرهم وجد فيهم كريم الخصال التي يندر أن تتكامل عند غيرهم من حسن الجوار والاخوة والمواساة بالنفس والكرم المنقطع النظير حتى على العسرة وكذلك الشجاعة التي يعرفها عنهم القاصي والداني ويكفي ان يقال دوسري فبها يتبادر الى الذهن انه شجاع سميذع ؛ كأن كلمة دوسري مرادفةً لكلمة شجاع . كما كنت أنوي نشر مادونته بعد ما جمعت من عدة مصادر وكان جل ما دونت عن أهل الوادي وقد دونت عن أهل السليل والأفلاج والخرج , لكن تركيزي على اهل الوادي قل وقابلت عدة رواة وكنت ألتمس من الرواة الموثوق في دينه وعقله وبحق إن من اميز من وجدت من الرواة الأمير راشد بن رشيدان بن خضير وكانت مقابلتي له في مجلس احد الإخوة في الرياض وقد وجدت أن الشيخ لديه من المعرفة الكثير فاخذت منه بعض الشي وقد أخبرني حفظه الله بإن القائمين على منتدى آل حسن الرسمي ممثلاً بالإخوان الكرام :- 1 - سعد بن سالم بن تركي الفرجان الدوسري 2 - حمد بن سالم بن تركي الفرجان الدوسري قد طلبوا منه إعطاءهم ما يعرف عن قبيلة آل حسن وقد أجابهم بكرمه المعهود بالترحيب والإستعداد للإجابة على أي إستفسار ، وقد إستأذنته بأن أحظى لأقوم بإعداد هذا اللقاء فطلب مني أن أخذ الإذن ممن سبقني لذلك فقمت بالإتصال بالأخوان الكرام وطلبت منهم أن يسمحون لي بأن أقوم بهذه المهمة فقد قابلوني بالترحيب وأذنوا لي بذلك ، والحق أقول وجدت منهم دماثة الخلق وكريم النفس وليس بغريب على من أخذ على عاتقه إنشاء موقع لقبيلة آل حسن الكريمة في شبكة الإتصال الدوليه رغبة منهم وهدفهم في هذا تحقيق تواصل ابناء هذه القبيلة وجمع كلمتهم وتعريف الأجيال الحالية والقادمة على ما كان عليه أجدادهم من كريم الخصال وعلو المكانة . وكما قلت آنفاً بإن الإخوان أوكلوا لي هذه المهمة ونظراً لما وجدت لدى ضيف هذا اللقاء من دراية ومعرفة في كثير من الأمور فقد حرصت على أن آتيه وآخذ عنه فقمت بالإتصال بأحد أبناءه الكرام وأخبرني بأنه معزوم على الغداء في مدينة الخرج وقابلته هناك وجلست معه وقت طويل ثم بعد ذلك زرته في بيته العامر في الأفلاج فوجدت ما سمعته عنه وعن أسرته الكريمة من نبل المعشر وكريم النبع ورأيتها جليله فيه وفي أبنائه الكرام وبقيت عنده يوم وليله أنهل منه وبعدها قابلته في مدينة الرياض وأيضا افادني كثيراً ووجدت لديه كم هائل من المعلومات وحرصه ومعرفته لأدق التفاصيل . وكنت قد قمت قبل أن أقوم بمقابلته الأولى والتدوين عنه بالإعداد لذلك شأن من يريد أن يكتب كتابة علمية معتمدة بعض الشيء ، فرجعت لما لدي عن القبيلة وجمعت ما أستطيع جمعه من بعض رجالات القبيلة والذين لهم معرفة بقصص القبائل الاخرى ، ولم أجد الإ معلومات بسيطة وقد وجدت لدى ضيف هذا اللقاء ما يكفي لتوضيح بعض الأمور لا أريد أن أطيل على القراء الكرام لذا دعوني أنتقل بكم إلى الضيف الكريم والمادة التي جمعت . بداية ٍ أود التعريف بالأميـر راشد وما عرفته عنه من معلوماتي السابقة ومن أخذت منهم من الثقات العارفين به . هو الأمير راشد بن رشيدان بن خضير أحد الأمراء الكرام في قبيلة الدواسر ومن أسرة آل خضير الهوامله من آل حسن الدواسر ، وأسرته عرف عنها الفروسية المنقطعة النظير ، حتى أنه يشتهر قصة لصانع لهم أتاه قوم سألوه " من أنت صانعٍ له " فرد بقوله " أنا صانعٍ للي كلهم فرّيس ولا يكثرون" فردوا عليه وقالوا " أنت صانعٍ لآل خضير " فأجابهم " نعم " . وذكرت لي قصة أخرى وسألت عنها عدة رواة وأثبتوها أن جوينان بن سيف الهوامله وهو من الرجال البارزين في القبيلة سأل آباه سيف بن داجي وهو أيضاً من الفضلاء بالقبيلة " هو به حمولة ٍ ماخبر منها اللي ماهو بشجاع " فرد أباه وقال " خبرته فآل خضير" وخرج من هذه الحموله فرسان كثر يضرب بهم المثل . أما من ناحية الكرم فهي فيهم متأصلة من جدهم خضير بن شامان وكيف قام بإعطاء مائة ناقة من الحرشا الإبل المعروفة في وقت يغلب على أهل نجد فيه الفاقة والفقر ، حيث لم يعرف بمثيل لها في العصر التي كانت فيه لشدة حاجة الناس. وتسلسل هذا المشهد في هذه الأسرة بقصص كثير سأتعرض لبعض منها والباقي أتركه في وقته . فمنهم رشيدان بن خضير هو فارس كريم إشتهر بذلك حتى عرف عنه قصص كثير في الكرم منها أنه دخل مرة من المرات لشراء بعض الحاجيات الضرورية فوضع ما لديه من كساء والكساء ( العباءة والجوخة والثوب الذي يسمى القضاض ) وضع ذلك في حاجات الضيوف في ما يكرمهم به وخرج بسمل ثوبه لإنه لم يجد نقود وما كان من أحد رفاقه إلا أن إنتقده لقيامه بذلك فما كان منه الإ أن أجابه بهذه الأبيات : اليوم يرثع خويي في كساويه=والا فانا ظاهر ٍ من السوق عرياني حطيت أنا شريتي هيل ٍ وبرية=كرامة ٍ للمسير يوم ينصاني لا من لفا هاشل في يوم هيفية=ليهي تقدم مع كبش ٍ من الضاني واللي بقى عليقٍ للصويتيه=يوم اني ألحق عليها راعي الواني وكذلك أبنه عبدالله بن رشيدان والذي تعدى كل وصف بالكرم حتى أنه مرة أتى أناس على ماء ومعه خلفه له ذاهب بها لأهله والناس في فقر ذلك الوقت وضاف عليهم فقاموا بما يستطيعون للضيافة وحينما هم بالرحيل وقاموا يعتذرون منه أشد العذر لأنهم لم يولموا له لحاجتهم وليس لديهم شيى وقد راى حالهم فما كان منه إلى بعد أن حمل على ذلوله قام إلى الخلفه وعقرها وابنها وتركها لهم وذهب فمن يفعل هذا الفعل يضيف أهل المحل بحق أنه حين يقال له ( مضيف المعازيب ) يستحق ذلك ، ويذكر بأنه مره نازل على رماح ومعه رعية غنم وكان الناس في حاجه وهو يومياً يحل به الضيوف ويذبح لهم ولم يرحل من رماح بعد نهاية القيض الإ ولم يعد معه شي من حلاله ذبحه جميعه . وأيضاً حصلت عليه مرة مشابهة على التوضحية في سنه لحق الناس فيها حاجة وقام يذبح جميع ما لديه مع أنه كانت لديه رعية غنم في ذلك الوقت ومرة نزل على ماء عليه أقوام مختلفين من قبائل شتى وكان هو في أحد أطراف الماء وعبدالله بن خرصان آل شامر وهو رجل كريم ، وأهل الماء قسمين أحد لدى عبدالله بن رشيدان وأحد لدى بن خرصان وكثر خسارة الأثنين وقالت زوجة بن خرصان له : لحقك الضرر أقل من هذا العمل فقال لها : أنا في ركن هذا الماء وعبدالله على الركن الآخر ولن أكف وهو بهذه الحال من البذل قالت له إن بقيت تجاري هذا الدوسري أفتقرت فهو لن يرحل إلا قد أفنى حلاله وأستدان وأفتقر وقد حدث ما قالت ويقول شاعرا يتمنى أن يضيف عبدالله بن رشيدان : يالله انا طالبك لامن لفينا=عند عبد الله زبون الوانياتي كني بكبشٍ إندسم به إيدينا=من مقاديم الصفاري الاولاتي ![]() مفرق بدايع الهوامله ![]() الأمير عبدالله بن راشد آل خضير وإخوانه الكرام في أستقبال إدارة موقع قبيلة آل حسن الرسمي ![]() من اليمين الأمير عويض بن رشيدان آل خضير والأمير راشد بن رشيدان آل خضير ( رحمه الله تعالى ) والأمير عبدالله بن راشد آل خضير ![]() الأمير عويض بن رشيدان بن خضير الهوامله ![]() الأمير عبدالله بن راشد بن رشيدان بن خضير الهوامله ![]() عضو المنتدى/ سعود بن راشد بن عبدالله بن رشيدان بن خضير الهوامله ![]() مجلس آل خضير الهوامله ![]() مجلس آل خضير الهوامله ![]() الأمير راشد بن رشيدان آل خضير رحمه الله والأخ المؤسس سعد بن سالم بن تركي والأن نضع بين أياديكم هذا اللقاء الثري متمنين لكم طيب القراءه وكثيراً من الفائده في رحاب منتدى قبيلة آل حسن الرسمي . س : - نود أطال الله في عمرك أن تعرفنا بنفسك ؟ الإسم : راشد بن رشيدان بن خضير آل خضير الهوامله العمر: 85 سنة س :- كم عدد أبنائك حفظهم الله ؟ عدد الأبناء: ثمانية أبناء س :- عرفنا أنك أول نشأتك جالست كثير من العلماء نود منك أن تحدثنا عن ذلك ؟ نعم يا طويل العمر توفى أبوي وأنا صغير و ابوي الله يرحمه حريص على الامور الطيبة فخلى اخوي عبدالله رحمة الله عليه يقرأ القرآن في الأفلاج وكان يقرأ على الشيخ سعد بن سعود بن مفلح الجذالين فقمت اروح معه لبعض علماء الأفلاج اللي هم ربع ٍ له والشاهد الله انهم يحبونه يوم إنهم يعرفون قوة دينه وكرمه وشجاعته . وكان من أكثر من يروح له وانا ذاك الحين معه الشيخ مرضي بن عبدالله بن حبشان الله يرحمه في ليلى ومرضي رحمة الله عليه من الرجال اللي خاتمين العلوم الطيبة قليل فالرجال اللي انا شفت مثله علم وعبادة وتورع وكرم ماله شكل بيته جعله فالجنه ما يصك بابه وهذي عادة عند آل حسن وبيته مايخلى من الضيفان وأهل الحاجة وديوانيته طول يومها والقهوة فيها تصب والسفرة ممدودة غداء وعشاء ، وهو الله يرحمه ما دخل الوظايف من تورعه مداخيله من البيع والشراء، وإلى أحد ٍ خذا منه شي وإلا تسلف منه متى ما أوفاه يوفيه وإن عجز سمح عنه، وقتـه كله في لوازم الناس والله إنك تّفكر فيه وشلون ما فتقر لكن صحيح الشجاع منجى والكريم معان . وكنت أتردد عليه واستفيد منه وهو الله يرحمه يحب عبدالله بن رشيدان ميرهو وياه ربع جعلهم في الجنه . س :- ودنا تذكر لنا طال عمرك موقف حصل بين الأميرعبدالله بن رشيدان والشيخ مرضي بن عبدالله ؟ به سنة ٍ من السنين فيها خيفة إنكفّت الناس من الحج ولا خذا الشيخ مرضي الإ عبدالله بن رشيدان محول ٍ عليه على ظهر ذيك الذلول اللي تسوى ومعه ذيك البندق ناويٍي ٍ يحج ولا لقى اللي يحج ذاك الزمان ، فقال له أنت يالشيخ مرضي : " يا عبد الله الناس ذا السنة في خيفة وانت بتحج لحالك خلها السنة الجاية " قال عبد الله : " أنا معزم على الحج السنة ذي ذلولي طيبة وبندقي معي وبيستر الله إن شاء الله " يوم راح عبد الله للسوق فيقوم أنت يالشيخ مرضي ويدخل الذلول الحوش وياخذ البندق ويحفظها عنده ويوم عود عبد الله فنشد مرضي عن الذلول قال مرضي : " يا عبد الله أنا إحتجت وبعت الذلول والبندق" فقال له عبد الله : " فدوة ٍ لك وش أبرك من اللي يسد لزومك" ويوم أصبح فراح وتدين وشراء له ذلول وبندق وجا الشيخ مرضي يبي يوادعه و يوم شاف الذلول معه والبندق وهو اللي يفتح له باب الحوش وإلى ذلول عبدالله عندها حزمة قت ويظهر له بندقه ويوم شاف عبدالله سواته وحرصه على إنه يمنعه إنه يحج في ذاك الخطر فيستخير من الحج ويقوم الشيخ مرضي ويرد الذلول والبندق اللي شراها عبدالله فهذه من السوالف اللي تدل على محبتهم وتقديرهم لبعضهم . س :- نود منك أن تحدثنا عن قبيلة الدواسر مناطقهم وحدود ديرهم و عدد فروعها وتقسيمها ؟ يا طويل العمرالشي يجاب من أوله وأنا بعلمك عن الدواسر وبناخذ السالفة قصص ، الدواسر ياطويل العمر من أكبر القبايل في نجد لو ماقلت لك عدد مير إن ديرتهم من أكبر الدير وهم القبيلة اللي جميع البلدان اللي فحدودهم لهم وحدود ديرتهم من علوا عرق سبيع واحدر به ، وفيه قوز الشريف عقب الوقعة المخبورة ، ومن حدرا مهامل الرمله ومن جنوب الثلم ذا اللي دون المندفن ، مدفن العارض في الرملة وأشمل به ألين تشرف على الصمان وجو مبعر ومثل ماقلت لك القرايا اللي في حدودهم لهم في مجملها يوم شاعرهم يقول : لابتي تكسب المدن بحد سيوفها=يوم كسب البدو حشوانٍ هميل حتى إن به عادة ٍ عندهم في كسب البلد والنخيل مثل لاحد ٍ كسب له أبل جا يسوقها والإ دّرع في رقبة المطية اللي هو ماخذها حبل والإ مثله فهم له سلم ركزة الرمح عند الجابية لأخذت النخل . فمنهم عربان تفرقوا في قراياً واجد وكل قرية جا فيها عرب ٍ منهم تعينهم شعفة سنام أهلها . أما نسب الدواسر فالدواسر مثل ما تخبر من خلاصة العرب من قحطان وعدنان مثل اكثر قبايل نجد ، فاللي من قحطان هم خلاصة عيال ملك قحطان والعرب في وقته عمر بن عامر اللي تفرقت قبايله عقب السد وعلمه معروف . واللي من عدنان هم التغالبة وخبرهم معروف من مارثة عدنان منهم ، وجميلة من مارثة وايل من الذروة العليا في عدنان . وأجيلك في قبايل الدواسر وفخوذها وأبد لك بآل زايد ولا هو من شان شي او إني منهم فلا شك من شان إنهم أكثر الدواسراليوم والا فالدواسر فعلهم كله واحد ومشتركين كلهم فالافعال الطيبة . زايد جاب ولدين هذا اللي نعرف صهيب وسالم . ( فصهيب ) جاب خمسة عيال حسن وذريته آل حسن وجري جاب مسعر وذريته المساعرة ، و بريك وذريته آل بريك ، وغياث ذريته الغييثات ، وموسى جاب الحراجين ، والحراجين يعدون اليوم من آل حسن خصوص من دون باقي الدواسر بالفزعة والمحبة والشنح وهم بعد وآل عمار من دون باقي آل حسن وبعد من دون الفرجان ، وجاب عيسى ومارثة عيسى الشرافا ، والشرافا اليوم والغييثات من دون باقي الدواسر . وآجيلك في عيال سالم ( فسالم ) جاب اربعة عيال بدران ارث البدارين ، وودعان جاب الوداعين ، ورجب وجاب الرجبان ، ومنيع وجاب المخاريم ، هذولا عيال زايد . أما التغالبة فهم خمسة نحايا وهم المصارير والحقبان والعمور والخييلات والمشاوية، هذي نحايا التغالبة . أما جميلة فهم الكبرى وهم يعدون من الفرجان بالمودة والفزعة والشنح من دون باقي الدواسر والغررة هم والهوامله من دون باقي الدواسر فزعتهم وهدتهم وشنحهم واحد أما النتيفات فهم ويا عيال جري المساعرة وآل بريك من دون باقي الدواسر . س:- نود منك طال عمرك أن تحدثنا عن قبيلة آل حسن عدد فروعها وتقسيمها ومناطقهم وحدود ديرهم؟ أعود بك على آل حسن فحسن جاب ولدين جاب فرج وجاب شكر أما شكر فأرث الشكرة بنحاياهم المعروفة ، أما فرج جاء عليه ولدين عمار وفرج ، عمار هو الكبير وترجع له نحايا آل عمار وفرج جاء في سنة موتة أبوه وسموه على أبوه فرج ومارثته الفرجان هذي تقاسيم آل حسن . أما عن حدود آل حسن فهي من أكبر الحدود فمن جنوب يحدونهم بني عمهم ( الوداعين ) وأشمل على المقرن والبياض والعارض وحضيب الجبل على الدهناء من حدرا فما كان فيه عبلة من الدهنا فهي من حدودهم وسند إلى نجد فوق العارض ويحادهم فيه بعض بني عمي مثل ( آل بريك والمصارير والنتيفات والمساعرة ) ، وأشمل على السهباء وعلى مطارح الدهناء ومن حدرا على ذا العرمة وأشمل إلى رميلين ، العد اللي شمال سعد وجنوب رملان ذا اللي جنوب خريم وترى بني عمهم ( الغييثات ) يبارونهم في بعض الحدود . س4:- قلت طال عمرك إن رميلين لآل حسن وسعد دونها هجرة لآل شامر والغيثات في رميلين ، هل من أيضاح أكثر؟ عافاك الله رميلين فهو ( لآل حسن وللخرفان خصوص من آل عمار ) ، ورميلين اللي دون رملان ورملان عد للأعزة من( سبيع ) وفيه قليب أو قليبين ( للغياثات ) ومثل ما قلت لك حد الدواسر رميلين من شمال وهو علوا من الدهناء ، وأما سعد فهو ( لآل حسن وللشكرة خصوص ولبن حفيظ ) ، وآل شامر يوم جاو ينزلونه إبن حفيظ خابر وسامح وآل حسن ماهم بيعدون آل شامر ٍ أجناب ومن قديم وحنا وياهم ما نتواخذ ووقت المواخذ السلوم الطيبة بينا ماشية يقول شاعر الشكره : يادار وين ملينين المصاريع=هذي منازلهم عفتها الرياحي هل سربة فيها رموعٍ مداريع=لا قادها عقب العذير الصياحي يروون مثل موردات المنازيع=لا جات تجذبها سواني رماحي وإلهم على ريضان سعدٍ مراييع=إلى أغزلت بالصيف بيض الفقاحي س :- على طاري السلوم الطيبة ودنا طال عمرك تعد لنا سلوم آل حسن ؟ بعد لك بعض من سلوم آل حسن وهي سلوم للدواسر عموم والسلوم وحده ، وهم إنه لا جاء على قصيرهم بعض التداريف اللي ما هي بمنهم ساقوا له من حلالهم ويهملونه في ديرهم لاقاصرهم ويقولون له شد وإنزل وين ما بغيت في ديار الدواسر ولا يعترضه أحد في حين إن كثير من سلوم الجيرة عند كثير من العربان دام القصير حذاه بالمنزل وضوه تشوف ضوه يديه وإلى تغبت وخذ ماعاد يديه ولهم وسم العصا ( الخوي ياسمون عصاه ويقولون رح وين مابغيت ) . ومن أفعالهم اللي إشتهروا بها المثلوثة ومثلوثة الدواسرغير مثلوثة سبيع من شان قد نشدني عنها بعض سبيع ، مثلوثة سبيع ثلاثة أفراق فوق بعضها من الأنعام وهذا يوم الفقر والحاجة وهم والله من فوق ذا الطيب ، أما مثلوثة الدواسر فضيفهم يضيفونه ثلاث كرايم عندهم ما يخلونه ما يرخصون له يستعزم لأحد الإ عقبها . س:- بعض الناس يقول إن قيبلة الدواسر ما يزبنون نبي منك رد وافي على هالكلام؟ الزبن يا طويل العمر عند الدواسر ( الأجنبي يزبنونة ولا أحد يزبن على الحاكم من القبايل إلا هم ) أما بينهم بين فالدوسري إلى جاء منه شي على الدوسري الآخر فإنه لا يزبن ولا يزبن من شان الدواسر مايخلون حقهم بأي حالة حتى إن بعض هل الوادي عيب عندهم الزبن والجلوة . ولا ياقف دون دخيل بيته في وجه الحاكم إلا الدوسري . ومن السوالف اللي تثبت ذا الكلام سنة من السنين غدى فهد الدامر جلية لبن سعود ويوم جاء عقب المقيض ودرى إن ابن سعود أرسل قيمانه عليه ولا به أحدٍ مزبنه من ابن سعود وهو يبي يزبن على أحد إلين يظهر من حدود ابن سعود فلا طرى عليه إلا الدواسر ولا خذوا الفرجان وهم نازلين في الحقاوة ذا اللي بين البياض وهريسان عقب ماشدوا من الماء في الصفري ، إلين ذا الدامر جايهم ومعه مشعة من ربعه وينزلون معهم قالوا : مير يا مرحبا والله ما يلحقكم إلا مايلحق عمارنا ويكرمونهم ويشتون معهم ويربعون معهم ويصيفون معهم ويوم جاء القيظ وتمايزوا العربان للمياه وينزلون مع الخضران على المقرن ويعترضون دونهم صبيان الخضران وضاق ابن سعود عليهم وأرسل عليهم قوم في الصفري وجاتهم المناديب إنكم تسلمون الدامر قالوا : الدامر ماهوب لا حقه إلا ما يلحق عمارنا ويوم قربت السرية منهم لينه معترضها اثنين من الخضران رايحين يتعينون للسرية ( بخيتان بن فيحان وفهيد بن فيحان ) فيصادفونها ويحنبون فيها وهم معتلينها مع الريع ويثرون فيها تأثير قوي ولين ذي فزعة الخضران واصلة وتقوم السرية وتنجر من عندها ويركب عقبها الأمير معجب العجالين للملك عبدالعزيز ويطلبه عليهم قال : والله لا هم بشاقين في الطاعة لكن رجال نزل وسط بيوتهم وسلمهم يجبرهم على منعه وطلبه عليهم ولين الملك عبدالعزيز مكاسره الطيب وعفا عنهم . وقد قال نغيمش الشولاني في سابق الوقت: الشولاني هاض قافٍ ملوى بالعساير=كود ٍ على اللي يلحنونه يالله من المنشى نو ٍ قنوفه غزاير=لا قامت تلاعج مزونه يسقي لنا المقرن لحد الزباير=حيث أن أهلنا ينزلونه مدهال ابو جمة وسحم الغثاير=هو و اللي محناة ٍ قرونه لاد زايد قبلة المظهور وأهل العشاير=لا وزاهم مجرم ٍ يمنعونه لا من وزاهم مجرم ٍ ودموع عينه نثاير=ما عاد ينشد من شطونه ابو جمة : الوعول . وسحم الغثاير : سلمك الله الضبا. محناة قرونه : الوضيحي . س :- هل تعرضت الأفلاج لحروب وسيطر عليها أحد بالقوة ودنا تذكر لنا طال عمرك هل حصل ودخلت الأفلاج تحت أي نظام بالإجبار ؟ ما خبرت أن أهل الأفلاج دخل عليهم أحد في ديرتهم وطاوعوا له بالقوة . إلا إنها دخلت فالدولة السعودية الاولة رغبة ومحبة في الدعوة ، حولوا آل حسن على الدرعية ذاك الحين وبايعوا إبن سعود على الدين والطاعة ، ويوم ضعفت الدولة الاولة غزاهم الترك وكسروهم عند ليلي ويوم جا الأمام فيصل بن تركي بايعوه وقاموا معه ويجي تالي الوقت ويولي الإمام فيصل ولده عبدالله الأمور وكان آل حسن وغيرهم من الدواسر هل الخرج والوادي يوادون لخوه سعود بن فيصل يوم إن ابوه الإمام فيصل أمره عليهم ، وكن الإمام عبدالله جا في نفسه عليهم وغدى وده با لمدرفة عليهم ومشت عليهم الدولة ثلاث أمرار :- الاوله :- أرسل عليهم الإمام قومين على أميرين وسببها ( الخضران ) حصل منهم بعض الشي أزعل الإمام وتجمعون الخضران فالشطبة وتولموا للحرب والمحاصر وتجي سرايا ابن سعود مع الشعيب اللي يسند عليهم ويوم وصلوهم ويجي بينهم وقعة وانكفت السرايا من عندها ما دخلت الشطبه عدوهم الخضران عنها . أما الثانية :- فهي على الأفلاج وعمودها على ( آل عمار ) فالسيح ولا أدري وش أسبابها إلا ان قيمان الإمام فيصل جات بأهل نجد حضرها وبواديها ونزلوا عند الافلاج وقامت تسارح والجموع وتراوح واقاموا إحذا الشهرين إلى الثلاثة وجا لآل عمار وربعهم ( الفرجان ) فعل ٍ قوي فذيك الحرب وهي عليهم مجملها ويجي ( للشكرة ) على الأمير فرحان بن حفيظ فعل ٍ يعد فيها يوم قامت الإبل تأكل الصعاد وقامت مرة ٍ من الشكرة وفكت عقل إبلها وقالوا لها عيالها " يا يمه لا تفكين عقل الإبل ياخذها القوم " فقالت " قد موتها بعيد عنا والإ اخذ القوم لها ابرك لنا من موتها عندنا " فيقومون أهل الإبل ويفكون عقل البل ويركب عندها خمسة خيالة من الشكرة وهم : فراج الغربي ، وقيان بن ريعان ، وحسين الجرو ، ومحمد بن حسين بن ذيخان ، وعمه بداح . وكدت خيل السرايا على الإبل ويعترض دونها هل الخمس ويفكونها ويفعلون فعل ٍ هو أول الكسيرة على قوم الإمام . وجا قصيد ٍ واجد ومنها قصيدة للأمير فرحان بن حفيظ :- يالله يالمطلوب ياخير مزهوم=يا مخرجٍ نفس الفتى من وحلها اللي مهيضني حنين أم قعصوم=بين القرايا نوخت في سهلها طويلة النسنوس ماهيب زرموم=ويوم الهداد معربينٍ فحلها نوختها يوم إلتقى البيع والسوم=عند آل عمار ٍ يثور نفلها نوختها يوم إلتقى كل شغموم =عند الغروس الداجيات وأهلها الله على اللي بدل الصلب بالقوم=هو ما درى انها خجلة ٍ من خجلها لا هو بمن قل ولا هو بكضوم=ولا مثله أحدٍ يوم دبر فعلها فوالله لولا الدين راعيه مرحوم =ما عاد يرجع من بلادٍ نزلها ياراكب اللي يمه الكور مزموم=مثل السفينه علقوا في دقلها يلفي لإبن حثلين زبن كل مضيوم=زبن الحدور اللي هفت في نقلها أما حمى لديار ذباحة الكوم=ولا شهر وأقفى وعندي بدلها يذكر منافعنا لهم دايم الدوم= بسيوف هندٍ تعجب اللي نقلها حنا لهم درعٍ لبوسٍ من القوم=وترى العلوم الطيبة انا اهلها أما المرة الثالثة عقب ما توفى الإمام فيصل وحكم الإمام عبدالله مشى بجيشه على أهل ليلى ويريد الله انه يدخل شماليها ويهدم بيوت وينجر العرب جنوب لقراياهم قرايا الأفلاج الجنوبية ويعودون ويجي حرب قوي . وعقب ذي أختلفوا عيال الإمام فيصل الإمام عبدالله والإمام سعود ويحول الإمام سعود على الأفلاج فقاموا معه العجالين وبايعوه على الدين والطاعة ويبايعه آل حسن وأهل الافلاج . ويوم درى الإمام عبدالله أن العجالين وأهل الأفلاج بايعوا أخوه سعود ، أرسل جيوشه للخرج ذال على الخرج منهم ويقوم الإمام سعود ويمشي بآل حسن وحول بهم على الخرج وجا بينهم وبين جيش الإمام عبدالله وقعات قوية فيريد الله النصر للإمام سعود ويتولى الخرج ويمشي بهم عقبها إلين تولى الرياض وعمدة قيمانه آل حسن . وعقب الإمام سعود تولى الإمام عبدالله مرة ثانية وغدى العلم عند آل رشيد حيث إنهم رجاجيله ، فعقب مامات الإمام عبدالله أرسل أبن رشيد للأفلاج منصوب له بعضهم طاوعه وبعضهم نتى عليه ، منهم الهوامله عيوا يعطونه الزكاة حتى بعض هل الوادي عيا يطاوع له يوم إبن رشيد يقول :- أما على الخرمة على أشراف وبقوم=وإلا على إبن قويد يم اللدامي س :- على طاري إبن رشيد ودنا تذكر لنا أهم الأحداث اللي حدثت في الأفلاج وذلك في الفترة بين الدولة السعودية الثانية والثالثة ؟ و الأمير معجب بن تركي العجالين والأمير حزام ما تلقى لهم مثيل في أمراء الدير مناخة كل واحد ٍ منهم كنها مناخة حاكم دايم وهي مليانه من العربان أصحاب وأجناب وكل واحد ٍ منهم قدام قصره حوش للركايب من جا دخل ركوبته وعندها من يتكفل بها والغداء والعشاء عندهم جعلهم في جنات النعيم ماشي ما ينشدون من كثر أو قل العرب اللي تجيهم . نعوّد على سالفتنا ، الملك عبدالعزيز رحمة الله عليه يوم درى إبن رشيد بإنه تولى الرياض فيجي ومعه قيمان مالها حد ويقوم الملك عبد العزيز ويظهر للدلم يبي يجمع القيمان ويرسل مناديبه يستفزع بالعربان اللي حوله ومنهم آل حسن والظاهر انهم إحذا برك ويجون محولين على إبن حفيظ وعمدتهم الشكرة واللي معهم من آل حسن ويدخلون الدلم في ليل وإبن رشيد محاصرها ولا جا الملك عبد العزيز ذاك الوقت أحد ٍ غيرهم إلا عقب ما إنتهت الحرب.يوم أصبحوا ويظهر الجمع والإ إبن رشيد يشوف خيل آل حسن قال :- "وش ذا الخيل , وش ذا الخيل" قال بعض قيمانه اللي يعرفونها :- " هذي خيل الدواسر " قال :- " وش جا الدواسر مني " والدواسر يحبون ذا الشجرة والدين اللي هي قايمةٍ به وغير ذا هم خوال عبدالعزيز . ويمشي الجمع على الجمع وتكد خيل آل حسن وتسوي سواة فالطوابير ذاك اليوم ويقلعون خيل إبن رشيد ويدفعها أنت ياسند بن محمد على رأع المدفع ويذبحه ولا ما مع إبن رشيد مايعرف للمدفع الإ ذا اللي ذبحه سند . ويوم جاء الليل ويسري إبن رشيد عقب ما لحقه الضرر من آل حسن ذاك اليوم . ومثل ماقلت لك الهوامله عصوا عليه وعيوا يعطونه الطاعة . فجا إبن رشيد يبيهم وهم شمالي السهباء وإلين آل حسن شادين وإنفهق منهم عويض بن خضير وابوي رحمة الله عليهم وغاروا عليهم وإفتكوا إبلهم في سالفة بعلمك بها . وعقبها شدوا الهوامله مجنبين ويقيضون على قرية الفاو جايها صيف ويوم جاء الصفري شدوا يبون ديرتهم . إبن رشيد أرسل له سرايا عليها واحد يقاله فريح ، ويقومون وينزلون حدراً من ليلى في الفرشة يتحرون للهوامله دارين إنهم بيجون . يوم أقبل الهوامله على الأفلاج فينطلق منهم رجالين من آل حنوان الهوامله وينصون الديرة ماعندهم خبر يوم جا مثنات الليل فيحولون على قصر الأمير معجب بن تركي العجالين وهو الله يرحمه بيته ما يصك لا ليل ولا نهار ، وينوخون عليه حيث إنهم خوال للعجالين و ينطحهم العبد ويقلطهم وإلى قولة معجب " من الخطار " قالوا " الهوامله " فقال " عسى مادرابكم أحد هذي قيمان بن رشيد يتحرون لكم نازلين في الفرشة " و جلسوا معه وخذا علومهم وعاطاهم علومه وقال : " شوفوا جماعتكم اللي وراكم أنتوا بتحدرون على يبرين والإ بتشوفون لكم رأي آخر" ويركبون ركايبهم ويتعرضون ليلهم ويوم وصلوا جماعتهم وهم اللي يعلمونهم بالعلم كله ، ويتمالون قالوا " والله ما نحدر من ديرتنا من قيمان إبن رشيد بنصبحهم وبيعنا الله عليهم" ويوم أصبحوا ونزلوا أهلهم فيجون محولين ناحرين الأفلاج بالسلة يوم أقبلوا عليها ويضويهم الليل ويروحون ربع ٍ منهم للأمير معجب بن تركي العجالين يبون يخبرونه بنيتهم وياخذون رأيه . ولا خذا الإ وهم ينوخون عنده ويوم ظهر عليهم قال : " من ذولاه " قالوا " الهوامله" قال حيكم على ظني نويتو بهم " قالوا نوينابهم" ويقوم ويظهر لهم العدة مولمها لهم كنه داري بهم وهم اللي ياخذون علومه ويعودون على ربعهم ، يوم إنطار الصبح وإلين هم مصبحينهم وتجي وقعة وياخذونهم ولا سلم لهم شي . أما فريح فطق وأيه ذبح عقبها واللي ذبحوه الشكرة ولا أدري وش تفصيلها . يقول ابوي فيها :- سند فريحٍ في كبده ملايل= حالفٍ يا وطنا ما يعوده في ذرانا رسخ غرس المسايل =محتمينه وننحا في حدوده يوم جينا على اللقوا غلايل= ما حسبنا على كثرت جنوده حولوا به مروّية السلايل=لا بتي سعد من ربعي عضوده [B][align=center][size=4][font=Simplified Arabic]س :- طال عمرك في كم تلحق الأمير خضير بن شامان ؟ الحق الأمير خضير بن شامان في سابع جد . س :- حدثنا في البداية عن حياة الأمير الفارس الشاعر خضير بن شامان , في أي عهد تقريباً و نبيك تتكلم عن شبابه وعن والده ؟ كان آل حسن في الأطوى أسفل الوادي وادي الدواسر جنوب شرق السليل وكانت الأطوى قرايا لآل حسن قبل ينزعون للأفلاج وبقايا قصورهم فيها إلى ذا الحين ولد خضير رحمة الله عليه وعفا عنه في الأطوى وظهر فيها ، وابوه من كبار آل حسن وهو الأمير شامان بن مبارك بن هويمل ومع ذا كان فارس مشهور معروف وجت حرب ذبح فيها شامان ، و قال شاعر القوم اللي ذبحوه :- إنا ذبحنا شامان بن هويمل=اللي لتالي خيلهم يحماه اللي يسبل فالدبايل على القنا=منه الرمك والجيش ريحناه الأطوى عقاب الكون تلعي بصوتها= وآشيخٍ على الصكات هي تلقاه وإقتضوا آل حسن وخذوا ثارهم من غريمهم حيث يقول أحد شعار آل حسن :- ذبحنا ذباح شامان بن هويمل=وجهه على المعبال تربناه كله لعينا من يرحّب بالنضا=وعلى السرب يا كنه هضبة ٍ محداه وظهر خضير بين آل حسن مشهورعنه الشجاعة المتعدية حتى انه عقب ماجات عنده الحرشاء البل المشهوره وخبرك أن آل حسن والدواسر كلهم يختلفون عن كثير من القبايل حيث إنهم أهل بداوة قليل شكلها من كثرة الحلال اللي معهم والخيل وأهل حضارة مالها مثيل نخيل مايطير طيرها وزروع وديرهم من أطيب الدير حيثٍ ماها قريب حتى إن أكثرها أنهار وسواقي تطلق من العيون . وعقب ماجات عنده الحرشاء مثل ماقلنا فكلما جا وقت المقياض وصارت الخد اللي حول ديرهم نباتها ردي ، انزلوا آل حسن في ديرهم عند أهاليهم في القصور ،فيقوم على أبله وعبده و ينزلبها في المكان اللي ترعى فيه وهو جنبها لحاله وهذا من محبته لربعه حتى إنه مايبي يشق عليهم . وقالوا له ربعه آل حسن : يا خضير " لا تنزل ذا المنازل المخطرة لحالك وتوخذ الحرشاء " قال : " ابدا وادعوبي الله ما دامني على ظهر إحصاني فنا مستعين بالله على القوم كثروا ولا قلوا" وهذا دليل على قوة شجاعته كيف معه ذا الإبل ولا بعد وخذت وغير عليه إمرار كثيرة لحاله يبون ياخذونه وياخذهم. وكان الله يرحمه من الكرمان المشهورين وكان راعي رأي ومحبوب عند آل حسن حتى أنه يوم أنتقل آل حسن من الوادي إلى الأفلاج قال كبارهم : محد منا ينزل إلا عقب ما يختار خضير المنزل اللي يبيه واختار صدا له ولجماعته الهوامله ونزلوها ، حتى إن آثاره هداج القصر والساقي باقية إلى ذلحين وكرمه معروف مشتهر وواجد افعاله في الكرم منها ضوه يومه يسمرها طول ليله ويخلي عبده عليها من شان الهاشل ، ويقول في أحد قصايده :- ننزل من القمرى إلى وادي الركا=بضيان ما تغبا على مستنيرها دايم عليها للخطاطير كرمة=وتشعل إلين الصبح يطوي سعيرها س :- الحرشاء كما عرف عنها يملكها الأمير خضير بن شامان كيف تملكها أو كيف جات الحرشاء عنده ؟ الحرشاء قالوا فيها الناس وكثروا وهي إبل مثل ما هو معروف شكلها شوي وقاموا يتعجبون منها حتى إن بعضهم على مجال الهزل من تعجبه يقول انها إبل الجن وخضيرغزاهم وجابها اما هي يا طويل العمر والسلامة يوم آل حسن في الأطوى ولا بعد اسكنوا الأفلاج لا جاء الصفري عقب القيض وبرد الوقت يظهر خضير للمقناص من ديرتهم هو وبعض جماعته اللي يحبون الصيد وتم لهم كم سنة يلقون عشوش طيور في حضيب الجبل العارض جنوب ديرتهم الأطوى والعشوش مبنية بوبر إبل لونه أسود غريب شكله وقال بنتنى ( نتظر ) ذا الطيور ونشوف وين هي تجيب الوبر منه وأرقب عليها واليها عقبان وذا وقت الصفري وعودوا للأطوى ، أقام خضير فيها أيام فقام وخذا فرسه وذلوله وعزم على انه ياصل ذا الإبل ولا علم أحد مشى متوكل ٍ على ربه صوب الجهة اللي شاف فيها العقبان جاية منها وكان ممشاه مذب ومحوال مع ذا الرمال ويوم تبين الإ ذيك البل السود اللي مالية ٍ الجو تعجب من شكلها وألوانها وكبرها وإلى اللي عندها رجال قهرة يحكون في نشاطه فإنتبه للرجال يوم شافه ولكد كل منهم على الاخر و يجي بينهم طراد ويعين الله خضير ويذبح الرجال وياخذ الإبل والعبد وجابها لربعه وديرته . وكانت هذه الإبل مشهوره في الجزيرة العربية واسمها الحرشاء . س:- الحرشاء كما عرف عنها يملكها الأمير خضير بن شامان من أطيب إبل الجزيرة العربية ، تذكر ما هو الشي الذي ميزها عن غيرها من الإبل؟ مثل ما قلت لك أوصافها وزود على ذا إطبوعها وابذكر لك قصة تدل على طيبها ، إنه في يوم ورد خضير بن شامان على العد المسمى العين ما معه إلا عبده واسقى إبله وكان فحل البل حريش معقول ومحطوط عليه روي يوم التفت على غيوب الشمس الإ القوم سادين عليه الريع والعد ماله الإ درب واحد مع ذا الريع ولين عبده يقول : يا عم نذب الجبل على رجلينا ونسلم بروسنا ، ذولا قوم واجد ولا لك فيهم لحام والبل ملحوق على ردها قال : اسمع اركب ذلولك وأنا بكد على القوم ولا تجاولت أنا وياهم فتحت لك فرجة في القوم فصح للبل واقفني إلين تظهر ويوم لكد فرسه عليهم إلينهم يقولون لا تروح منها مطية طمعين فيها يوم ماشافوا عندها الإ خيال واحد فتجاول هو وإياهم واظهر ابله وجا عند تاليها واحتماها وخذا منهم قلايع ولين الليل مضوي عليهم وعرضها الليل ولا أمسى الإ في ديرة بعيد ولين عبده يقول : ياعم أنا نسيت حريش معقول عليه الروي على الماء ياعم والله ماظنيت إنا بنسلم العذر ياعم ومشوا وقال العبد : ياعم لايجي في خاطرك علي هذه القلايع مع ابلنا من القوم قال خضير : ماهمني القلايع ولاهيب عوض في حريش بس ويش بنهد في الحرشاء والإ انه يشوف على شعاف الإبل الطفل من نضح الماء يوم برق إلا ذا حريش مع الابل في وسطها بعقاله على قوايمه الثلاث طول ليله وهذه من أخبار الحرشاء وطيبها . ![]() إبل الحرشاء ![]() إبل الحرشاء ![]() إبل الحرشاء ![]() إبل الحرشاء س :- الحرشاء إبل مسمية ومعروفة كما عرف عنها يملكها الأمير خضير بن شامان وقام بتوزيعها على آل حسن وشرط عليهم أن يتعزون بها في اليوم الكبير، ودنا تعطينا قصة توزيعها ؟ أما عن قصة توزيعه إبله الحرشاء على قبيلة آل حسن ، جات سنه من السنين على آل حسن غدت بحلالهم وبقى مع خضير ميه وخمسين ناقه من الحرشاء ويوم شاف الضرر اللي لحق بني عمه نوى يقسم إبله ونشد واحد من عياله قال : يايبه عطهم خمسين ويبقى لنا ميه فقال خضير الإ بنعطيهم ميه والخمسين الباقية لنا ، وقسم الميه عليهم من الحرشاء اللي كل وحدة ٍ منها غناة ما تعد بثمن في ذاك الوقت . يوم جا بيوزعها قال ياجماعة ماأبي منكم الإ إذا جاء اليوم الكبير تعتزون بها و مقصده جمعاهم في الأمور الكبار ، ومن ذلك الحين إلى يومنا هذا صارت عزوة لآل حسن وهي (خيال الحرشا وأنا إبن حسن) لعموم قبيلة آل حسن . ويقول الشاعر محمد بن محسن بن حشفل الخضران :- جاذبه مع طيب ساسه رعى الحرشاء خضير=شيخ قوم ٍ بـينهم صار لـه قصة وفى عقب مامحل وقتهم قام بالفعل الشهير=قسم إبله لآل حسن ٍ ومعروفه ضفى لين صارت عزوة اللي إلى صاح النذير=فالقفى يثنون لا من حصل وقفة قفى إبلهم ترتع مع الصيد فالحد الخطير=هم جنبها صوب عشب الوسامي لازفى فوق خيل ٍ دربوها على نطح المغير=وللمغازي كم شكت هجنهم جور وحفى ويقول الشاعر محمد بن مسفر بن قحيفان الخضران:- واللي عطاه أغنى من الناس فقران=يالله عسا الجنة تجي منزل ٍ له الله يعزك يا خضير إبن شامان=شيخ ٍ فنا فعل الثنى باقي ٍ له اللي عطانا البل عطاً ماله أثمان=شرطه علينا نعتزي عزوة ٍ له ومن كان في حسن ٍ إلى وقتنا الآن=يوصى به المولود من والد ٍ له خيالةٍ الحرشا إلى ثار دخان=لا حال مــن دون المـجاهـيـم سـلــه نسهج صفوف القـــوم مــنـا بــــذلان=لا من دخل بعض الرجاجيل ذله وتفرح بنا لاضيع الخلج حيران=لا ضيع الخلفة ولدها ندله سود ٍ وسيمتها شمطري وكيزان=يا كبر حظ اللي تجي ثروة ٍ له ويقول الشاعر مسعود بن سعد بن مسعود المقابلة :- ونعطـي عطايـاً مـاوراهـا مـنّـه=عطية سويقـي عطـى المولـود وخضير بن شامان راعى الحرشى=معطـي عطايـاً مالـهـن حــدود اللي عطى فـي يومـه اميـة ناقـه=يـوم الرجـال يكـودهـا المـفـرود عزوة حسـن مـن يومهـا لايومنـا=مانلحـق جـزال الفعـول جـحـود ويقول الشاعر طويرش بن بداح الشكرة :- كن أذانيها الحراب ذلوق هنا=أو كوافير ٍ تفلّق من حبابه قيل أبو ذي ويش هو قالوا جملنا=يسأل المشتاق طمع ٍ في ضرابه قالوا أهل الصنف ذا وينه مجنا=قال راعيه حريش خضير جابه كسب جداني زمان ٍ يوم حنا=بالجهل ذولا وذولا في نهابه [B][align=center][size=4][font=Simplified Arabic]س :- هل هناك معارك شارك فيها الأمير خضير بن شامان ؟ و سمعنا له أبيات معروفة يتداولها الناس نأمل منك ذكر ما تحفظ من قصيده ؟ الأكوان اللي حضرها الأمير خضير بن شامان واجد ولكن تخبر مابه كتابة ذاك الوقت ، ولا يحفظ الإ السوالف إللى فيها قصيد واللي مالها قصيد يغدي . من الأكوان التي حصلت بين قبيلة الدواسر وقبيلة سبيع وقعةٍ في ( الحزم ) في علاوي نجد و كان خضير بن شامان من كبار اللي الحاضرين في ذيك الوقعة حيث إقاموا في الحزم تسعين ليلة فقال هذه القصيدة : الصبي الزايدي هاض رسله=بأبياتٍ يمليها على من ينيرها يطلب وليه ينقض العسر بالرخا=ويسقي مداهيل الصخيف وضيرها ويسقي لنا وادي ترى نبته الغضى= دارٍ بها البدوان دايم تميرها لامن مزون الوسم لاحت بروقها=قامت مع الهجعة تلاعج فطيرها يازينها بأول نباته اليا إنتشر= بذرعانها السمحات تطرق غديرها من عقب ذا نطلب من الله ليلة=مزنٍ تنكس جوها من غثيرها تسقي العويرض ثم تطمن على السهل= مرب الوضيحي والعرابي خشيرها وتسقي مداهيل لابةٍ إحسنية=ربعٍ ما داس أنواع الردى في مشيرها ربعٍ إعزاز الجار لاجاه عاني=والأجواد ما يشكي الدغا يل قصيرها ياراكب من عندنا عيد هية=ماواق رقاي الحفا في سميرها وما ركبها الراعي على أطراف هجمة =ماهوب كل يومٍ يطرَد نشيرها وما دارها الجمال بين العدايل=وما هوب الأصبح كل يوم يديرها كبيرة مغز الفخذ في يوم عيره =وسيع مبطنها كثيرٍ هبيرها تجعل مسير العشر يومٍ بليلة =يالله من سو المشفح يجيرها تنصى مصا نيم الدروع آل زايد=رعايت الأخطار تهمل جويرها لا نزَّلو قطانة الماء وشيدوا=بيوت حرب والصبايا تديرها ثم هجَّرو بين الدواوين سبّق= وساع المناحر عاد صفرٍ كثيرها رحايل فرسان الحروب آل زايد= خج المعادي كل يوم مغيرها معلقات الكون قبٍ شواحص=عن ربخها يطير حشاها نثيرها مرٍ على أهل الضلع تهرف بغلمه=ومرٍ على أهل الشرق يرعب كريرها يـمدونـا بــالـكـثـر وحـنا نـمـدهـم=نــمـرٍ تــقـطـع كـــل يـــوم عــصــيــرهــا وأنا مع أولهم على سرج عندل=خطرٍ من يديها إن تفضخ نظيرها أمنع بها ذودي ونمنع غرايس=سردٍ مقاريها على جال بيرها حيطانها رمحٍ وسيفٍ مجرب= ومن خوصها عن لفح الأنجم حضيرها وإن جاونا قوم تعوّد بغلها=تشمت مقادمها وتشمت مشيرها كله لعيون الإبل شمخ الذرى=ولعيون خلايا صونت من فطيرها أنزلتها في الحزم تسعين ليلة=وغل المعـــــادي لاجـيٍ في ضميرها وأنا بجنب ذودي مع الفاو مجنب= لا طار عن دق اللقايا نجيرها يا سمبها حل الصفاري مهدد= أبو دقها وأخو نوايد عشيرها خشيرةٍ للدق والجل والمها = وخشيرةٍ للوضيحي والوضيحي خشيرها ننزل من القمرى إلى مفرع الركا= بضيان ما تغبا على مستنيرها دايم عليها للخطاطير كرمة= وتشعل إلين الصبح يطوي سعيرها وضعنا رجوح السير من يمة العدى=و نـصبر على الوجلى إلى جا نذيرها وكم قد خذينا من ورى القوم هجمة=سرنا نعزل في نوايد عشيرها ومرة ٍ جاه واحد يذكر له إبل واجد فقام الله يعفى عنه وثور بالمغزى وقال القصيدة وارسل سبر قدامه ويقول : يا نيف قم وأركب على كور عوصا=حمراً من العيرات سحم متونها إركب عليها الليل والصبح عفها = وإحفظ وصاتي عن سوامح شطونها وإحفظ وعدك اليا بقى خمس وأربع = في هضبةٍ حمراً جنوب معنونها وعطنا خبر بوشٍ غطا مطلع الشمس = جعلك مجار من الليال وهونها وحنا نجيلك فيه من فوق ضمر = ونقود زعقاتٍ عراضٍ متونها شقرٍ وصفرٍ كلبوهن شواحص = اليا رجفت قامت تطارخ ردونها بيومٍ إنهادي وسطه الشلف والقنا= فيه النشاما كالحاتٍ سنونها وأنا على صفراً تصدر على الفزع= حقٍ بتالي اليوم إن يذكرونها ويقول في قصيدة آخرى قالها بعد مغزا لآل حسن وهم معودين فوردوا تقورا وهو من العدود اللي في الجنوب ويوم جاها لقى بنات يرون على جاله ففرح يوم درى ان بني عمه واردين قدامه على تقورا فيقول:- يسقى تقورا مسحكٍ زاف نوه=ربابه في عرض السحاب يحور حيثه وردها جدنا بالوقت الاول =محانيب سدر وكانفاته قور جيناه نشعى المال كـب مـن العدى =عشرين يوم وليلهن عبور وكن كبود الخيل من واهج الضما= قدور من لفح الشبوب تفور وكن رقاب الخلف يوم شرعت=جراعٍ شراع بسيف بحور وجيت الصبايا يرتون فوق جاله= حيزا عفافا ناحلات خصور حلايل فرسان الحروب آل زايد= لهم في وادي الطيبين قصور مسحك : هو المزن والسحاب . جراع :هو ( غرنوق الماء أو البط ) . محانيب سدر : غصون السدر متدلية من كبر الشجر. كانفاته : يعني متحاولاته. ومثل ما ذكرت لك الأمير خضير بن شامان كان الله يرحمه متولع بالمقانص، ويوم زل القيظ وجا وقت البراد و حل المقانيص فقال يتمثل:- زان الخلا للقانصين وبتتو =مزادٍ ودنو للمزاد جمال نرفع له الهجن المناجيب في الضما=حتى تجي قعسٍ بزود مكال وكن تخيفقها مع كفة الغضا= ربابٍ من المنشى حداه خيال وكن إصطفاقة غوجنا في عرضها= سيفٍ صقيل في يمين عيال ونضوي على بيتٍ به الكن القرى=دايم عليها لخطل الأيدي مظال ننجح لهم من قرح الصيد سحّف=لربعٍ تنومس بطيب أفعال والإفللضيفان نتندى بكرمة=من عقّر الفطر وردم أجهال لا نسنس الغربي مع الصبح والعشي=هضنا وتواعدنا مطيح إهلال وركبنا على حيلٍ مناياها السرى=راحن مراديم وجنك نحال وغرنا على بدوٍ تزعزع للبلا=ولحقو مغاليل وحل قتال في هذه القصيدة اللي بذكرها كانوا آل حسن نازلين الأكدان وهي عروق شرق الأطوى و شمال القونسه ويوم جاوا بيوردون إبلهم للجويفا وهي مشربٍ غربٍ منهم ركب خضير بن شامان فرسه وجا يباري الإبل جنب وكان قدامه بعض جماعته يسمون القليط حيث إنهم ياصلون قبل الجنب يسهلون للعرب الميراد المراد إن خضير عنده ناقة من إبله خلفة عارضت الابل اللي وردت وهي توها والد خلت نماها ووردت ومن عجل ممشاها قامت تبرى للقليط فتاصل قبل الإبل ويصبون القليط لها فشربت و يوم رويت فحنت و تذكرت نماها فجات تبي تعود للأكدان فردها خضير برمحه فطرت الرمح بيدها وهي على ممشاها فقام خضير يبرا لها جنب فقال القصيدة ذي :- شبهتنا الحرشا تباري قليطنا=طموحٍ تمايل ثوبها عن متونها خلت ولدها يم الاكدان ونتحت=تبغى الجويفا قبل وردٍ يجونها تشرب برقبةٍ كن الطور حنيها=وعيون حمرٍ طايراتٍ جفونها تدره بيدٍ كنها حفيةٍ بها=مياحها من صوبها يامنونها عرضتها عود القنا ثم طرته=بذرعانها اللي سامكاتٍ متونها تميت أباريها على كورعندل=من ذلةٍ ركب الخلا ياخذونها لاعرج المصدار منها درهمت=تشدي لربدى لاصفى الجو دونها س :- يذكر إن إبن عريعر (حاميٍ بيض النعام ) له حما لإبله يمنع غيره من دخوله وإشتهر عنه أنه قال " حماي لا يدخله الأ كعوت يدخل وين مايبي ويرثع فيه وين ما يبي" ودنا لو تعطينا إيضاحٍ لذلك وما هي أسباب وجود كعوت عند إبن عريعر ؟ سببها الهوامله كانوا في ديرهم والعرب من أول اللي يروي للماء النسوان يروحن ويجيبن الماء على روسهن وإلى به وحدة ٍ من الهوامله من آل خضير ومن ربعنا اللي مع مطير المعروفين بالهوامل رايحة ٍ للماء تروي ويوم ملت قدرها وجت تبي خويتها تشيل قدرها عليها وإلى ولدٍ ما فيه خير يوم رفع شالها، والإ به رجاجيل يشوفونها وإلى قولتهم " شالك يا مرة " ردت عليهم وقالت " إن كان لي رجاجيل ٍ فيستروني". ويجي العلم أهلها وهم اللي يقومون على ذا اللي سوى ذا السواة ويذبحونه وإلين ربعه قايمين وإلى الهوامله قايمين ويجي ذبحة قوية ويوم إنتهت الوقعة إلى الزود عند الهوامله ثلاثين رجال ، فتمالوا الرجاجيل وشافوا إن الزود عندهم ما عاد يرفاه رافي ، فغدى رايهم إنهم ينزعون إلين يشوفون الأمور ويش تصير . عمدة العرب على كعوت حدروا يم الديرة الحدرية وجاوا عند إبن عريع وعرب ٍمنهم سندوا ونزلوا مع مطير ومنزلهم فالرفاع ،وبه فريق من الهوامله راحوا مع الدعاجين وهم رجال يعدون . وكعوت مثل ما قلت لك حول على إبن عريعر وجا معه وجا لكعوت أفعال ومواقف مع إبن عريعر ، منها جا وقعة قوية في علاوي الصمان بينه ولا أدري هو إبن سعود أو غيره . وأفتعل كعوت مثل عادته فعل قوي هم على الله ثم عليه ذاك اليوم وقام إبن عريعر وقال قوله اللي قال ، وصارت إبل كعوت ترعى وين ما بغى راعيها ، وتموا مع إبن عريعر سنين واجد . س :- طال عمرك ذكرت الهوامل وعلى ذكرك أياهم وردنا بالمنتدى أسئلة بهذا الخصوص نود منك إيضاح أكثر عنهم ؟ مثل ما قلت لك سبب مراحهم المرة والهوشة اللي حصلت ويقول واحد منهم : حنا هواملة ٍ خضير جدنا =هواملة من عد الرجال وكيد راحت بنا من دار ابونا وجدنا=لعلها بنار ٍ تشب وقيد نزلوا مع مطير وغدوا هل المنازل العليا مع مطير . س:- نود منك طال عمرك تذكر لنا موقف لهم مع قبيلة مطير عزيزة الجانب ؟ عينوا مطير في الهوامل الشجاعة والكرم المتعدي وافعالهم مع مطير ماتعد منها إنه غزوا العبيات من مطير على الكويت وخذوا إبل لاهل الكويت ومعم ثلاثة من الهوامل ويوم أقفوا على الابل فتلحقهم سيارات عليها طقوم وضيقت بهم ويقوم ويرد عند تاليهم ( سبعة) أربعة من العبيات مطير وثلاثة من الهوامل ويحمون التالي ويقفون على الابل يوم شاعر العبيات يقول في عرض قصيدته : يوم أزحمونا وألحقونا القصيات=سقنا لهم( سبعة)عيال جلايب جلايب لا هم مبيعة ولا شرات=إرخاص العمار إليا هبا كل هايب منهم ثلاثة من عيال السيالات=اللي مضريهم على الهوش شايب وعيال السيلات هم الهوامل. س :- طال عمرك ما هي قصة قول " إنزلي حنا العرب " ؟ نعم هذي يا طويل العمر سنة من السنين جوك آل حسن مربعين شمال والإ العرب جاي عليهم خيفة وشادين ويتجمعون لصولة وكبير آل حسن ذاك اليوم حريميص بن خضير الهوامله ، قال لمرته : إنزلي قالت : يا حريميص وين العرب قال : حنا العرب إنزلي وشبي الضو ويوم نزلوا المظهور ويشبون الضوإلى الضيان تشب متحاولتهم من يمين ويسار. س :- وش سالفة (( الحرش جفيل من الله خلقها )) ؟ نعم جاء عرب من آل ناجعة من العجمان على هادي بن مدرمكة جاء بينهم وبين ربعهم بعض الشي جاوا ونزلوا وزبنوا على حريميص بن خضير الهوامله والإ هادي جاي مسير على مجلس حريميص وإبل حريميص في المراح يوم شاف وجيها قام يدوه يحسبنها جفيل قال حريميص يا هادي إقلط ما عليك منها هذه الحرشاء جفيل من يوم الله خلقها . س:- صلح قبيلة آل حسن عند من ؟. ودنا نعرف وش معنى الصلح وكيف تتم طريقته ؟ ولو هناك أي حادثة حدث فيها صلح تذكرها لنا ؟ كما عرف عند آل حسن إن صلحهم عند ثلاث حمايل وهم آل قينان وآل سعدون وآل خضير . الصلح ياطويل العمر يعطي القبيلة المقابلة على إنه ما يغار عليهم ولا يؤخذ من حلالهم شي وإن وخذ منهم شي يرد والحمايل الثلاث صلحها يلزم آل حسن . هنا قريب على وقت الأمير عويض بن طايف بن خضير (راع المدا) قام واحد ٍ من آل بدرة من الهوامله إسمه رشدان وقال لعويض : أنا بنصا الديرة يعني ديرة العجمان وآل مرة قال عويض : لا جيتهم أصلح وخذ منهم الصلح يوم جاهم رشدان وقال : حنا نبي الصلح لا تاخذون لنا هامل ولا مرعية ولا ناخذ منكم هامل ولا مرعية . قالوا : قبلنا على مدة كذا وكذا قال : تم ويوم عود وخذوا لهم مدة جاهم العلم إن قريع بن محمد بن عواد الصخابرة قام وخذا إبل أبو ركيبة فثار عليهم رشدان وقال : حنا بينا صلح واصلحت عليهم فقال قريع : مالك صلح علينا فقال : أنا مصلحٍ بصلح عويض بن طايف قاموا وجلسوا عند شبنان آل رشدان المصارير واحدٍ من مقاطع الحق عند رجال الدواسر وبينوا له الأمر كله. وقال : ثبتوا إن الصلح صلح عويض وأثبتوها الرجاجيل وقال شبنان : اللي أصلح بصلح عويض يتم صلحه والأبل اللي أخذت من أبو ركيبة ترد فقام قريع بن محمد بن عواد ورد الإبل على أبو ركيبة تقديراً لربعه وحفظ ٍ لصلحهم . ونا هل الست المهار القرح = وابن الرفيدا رده المقرود س :- بيت ذكره الشاعر مسعود بن سعد المقابلة وذلك من قصيدة له ، ومن خلال السؤال عن هذا البيت تبين لنا إن أربعة منهم من آل خضير ودنا تذكر لنا الوقعة وهل هناك قصيدة قيلت في هذه الوقعة ؟ هذي سلمك الله حصل إنه في سنة من السنين وآل حسن نازلين في الربيع نوا العجمان بالمغزا وكان معهم اثنين من الدواسر اقصرا لهم منهم الشقاوي الشرافي الشاعر وهو رجال فيه خير وواحد آخر يقاله الهريش ، وقال العجمان بينهم بنغزي على الدواسر وتساروا العلم وقالوا إكنوه لا ياصل الشقاوي تراه لو درى بينذر ربعه ولا بيوصي لهم وإنا نبي نبغتهم وإلإ للهريش ذلول أصيل وطلبها منه قصيره العجمي واستحا الهريش من رد العجمي اللي له جمايل عليه ويوم ركبوا الغزيه قام العجمي وودع الهريش وقال : " حنا غازين الدواسر والكسب بأمر الله حاصل " ويوم أصبح الهريش وسير على الشقاوي علمه بالعلم كله فضاق عليه وتكلم عليه وقال توك تعلمني عن نية العجمان غازين بني عمي على غرة فتعذر له إنه ما درى عن نيتهم إلا يوم جاو بيمشون ، المراد بعض آل حسن نازلين على طرف وإبلهم مطرفة ويوم جت غزية العجمان وإلإ عدد خيلها ستين من غير الجيش والإ ذي الابل مطرفة ولا عندها إلا رعيان فتقفوها فيلحقهم الطلب ولينهم ستة خيالة وهم : الأمير كعوت بن خضير الهوامله ، وعويض بن خضير الهوامله ، و جعمل بن خضير الهوامله ، وواحد من عيال كعوت بن خضير ومعهم اثنين من ربعهم ، ويوم لحقهم ويظهرونهم من البل ويجي هوش قوي بين قلع ومنع وأقفت غزية العجمان قد همهم السلامة برؤسهم ويوم ضيقوا بهم فقال ابن رفادة : " ما عاد ذا بهوش رجاجيل قد ذا سوق ركايب " فردها عليهم ويوم شافه كعوت فيحذفها عليه ويضربه بذاك المشلشل وقال " كله لعينا حمّ الذرا " ولينه ذابحه ونصر الله ذا الخيالة على ذا الغزية ويوم عودت الغزية على أهلهم فيعلمون الشقاوي باللي حصل عليهم وسوايا كعوت فقال الشقاوي هذه القصيدة . . سوو سويا كعوت في المفازيع =روحه ورى حم الذرى ما يحنه خيالة الحرشا حدوهم مع الريع =حدوى الجلب للسوق لا نحرنه لحقن هل الستين ستٍ مداريع= حسنية ٍ حوض الإبلى يا ردنه وأرخو لها العجمان حبل المصاريع =غصب ٍعلى العجمان ما فيه منه راحت بهم قحص السبايا مطاويع=من ضرب قوم يطلقون الأعنه وابن الرفيدا بينهم فالمراييع=والست من الستين تنقزنه وحق الهريش من الجزور الكرايع=والكرش والمصران من فوق فنه ويقول الشاعر مسعود بن سعد بن مسعود المقابلة : وإنا هل الست المهار القرح = يوم الرفيدا رده المقرود ![]() ] الأمير راشد بن رشيدان آل خضير رحمه الله تعالى ![]() الأمير راشد بن رشيدان آل خضير رحمه الله والأمير عويض بن رشيدان آل خضير والأخ المؤسس سعد بن سالم بن تركي ![]() الأمير عبدالله بن راشد آل خضير ![]() مجلس آل خضير العامر يفوح قصص وقصائد تاريخيه ![]() سعود بن راشد بن خضير يجاذب الضيوف أطراف الحديث ![]() من اليمين الأستاذ سلطان بن دخيل الله الشكرة والأخ سعد بن سالم بن تركي والأمير راشد بن رشيدان آل خضير رحمه الله والشيخ عبدالعزيز بن محمد العجالين ![]() فهد بن راشد بن رشيدان -- محمد بن راشد بن رشيدان -- نايف بن عويض بن رشيدان -- سعود بن راشد بن عبدالله آل خضير الهوامله ![]() فهد بن راشد بن رشيدان بن خضير الهوامله يشارك الضيوف الحديث ![]() سعود بن راشد بن خضير يجاذب الضيوف أطراف الحديث ![]() من اليمين الأستاذ سلطان بن دخيل الله الشكرة والأخ سعد بن سالم بن تركي والأمير راشد بن رشيدان بن خضير ( رحمه الله ) والشيخ عبدالعزيز بن محمد العجالين ![]() أمراء آل خضير الهوامله يتوسطان إدارة موقع قبيلة آل حسن الرسمي ![]() من اليسار -- سعد بن عبدالله بن راشد -- سعود بن راشد بن رشيدان -- سعد بن راشد بن رشيدان -- عبدالله بن فيصل بن راشد آل خضير الهوامله [B][align=center][size=4][font=Simplified Arabic]س :- نود منك طال عمرك ذكر بعض قصص الفريس اللي أنجبتهم قبيلة آل حسن وتفاخرت بهم ؟ فريس آل حسن فهم واجد لكن بعد لك منهم عويض بن طايف بن خضير الهوامله وشجاعته يمثلبها حتى إن به مثل يقول " شايفة في الماء عويض" وسببها إن به ربع من آل مرة واردين على غدير ويوم فك واحد منهم الفرس تشرب والإ به داب في الماء وكل ما جات الفرس بتشرب اختبط الداب عفضت الفرس وجفلت قال واحد منهم : يا فلان إيش قوم فرسك كنها شايفة في الماء عويض وصارت ذي الكلمة مثل عند العرب ومن الفريس جعمل بن خضير الهوامله ( راعي الطويلة ) وسوالفه واجد ومشهورة من ضمنها إنه قد حول في سنة 13 ركب لحاله وقد غاروا عليه قوم واجد وهو عند إبله لحاله وافتكها منهم وهو على فرسه وانكسر القوم فلحقهم قالوا: ويش عاد تبي إبلك وراك وتلاوى هو وياهم وذبح منهم اللي ذبح قال : يا قوم والله ما تروحون إالإ بوحدة من ثلاث وأنا معي الطويلة ( بندق له ) وشفتوا فعلي ومعي أربعين فشقة بعددكم ولانيب معود منكم إلا قد تناميتكم بها وإلا رديتكم سالمين برؤوسكم ومنعهم وحول بهم على الركب لحاله. وأيضاً الأ كعوت بن خضير الحاله الفارس المشهور اللي ذبح ابن رفيدة تنقزه من ستين خيال وقد حول ثمانية ركبان في سنة لحاله . وأذكر لك من الفريس الأمير محمد بن فرج بن حفيظ الشكرة وأفعاله واجد منها يوم غاروا قيمان على عقيدين فهد الدامر على العجمان وعامر الضويلع على آل مرة عليه وهو عند إبله لحاله وافتكها وهو لحاله وعلى ذكر محمد بن فرج بن حفيظ ابذكر لك ولده سند مثل ما قلت لك ما يركب ظهر البندق مثله حتى إنه في أول ظهرته رايح ٍ قناص والإ ذيك الخيل اللي كادة ٍ على إبل واحد من الشكرة ماعندها الإ راعي وهو اللي يعترضهم فيمدها عليهم ويثور والإ ثلاث ٍ من الخيل تتطاحس من مخباط واحد . يسولف علي واحد ٍ من آل عرجا أبوه واحد ٍ من القوم اللي غاروا على الإبل ذاك اليوم فيقول إن أبوي يقول" يوم ثور علينا وطاح ثلاثة أفراس نحسب إن الحزم اللي عنده مليان بواردية وفيها كسيرتنا " ويقول فيها أبوه محمد بن حفيظ : إسمه سند على عمه اني مسميه=وإسمه سند ومسند كل عايل مخباط سندٍ يوم ربي مقديه=عقر ثلاث ٍ مكرمات أصايل ما قومه الا عوده اللي مضريه= يمناً مضريها بكسب النفايل ويومه يقول على عمه اني مسميه وهو سند بن فرج بن حفيظ وهو عز الله من الفريس اللي يعدون وبواردي جاله فعل قوي يوم البره مع الامام سعود بن فيصل ، وحتى إنه جت حرب ٍ بين آل حسن والعجمان يقول واحد ٍ من فريس العجمان : إن سبلوا لي حبة إم سعود=والله لا أكفيهم سند والله لحده حدة المفرود=لعيون مركوز النهد رد عليه سند رحمة الله عليه: إن سبلوا لي أم عويس=كفيتنا هم خيل يام ............................=لعيون مردوع الوشام ولا يحضرني ذا الحين أسماهم كلهم لكن عديت لك اللي أذكره ذا الحين . س: ودنا طال عمرك إذا تحفظ لنا شي من قصيد الأمير محمد بن فرج بن حفيظ ؟ قصيد محمد بن فرج جزل منها يوم جات وقعة بين قحطان والمساعرة أسبابها نزلوا قحطان على الجفير فالدحي من دون ما يعلقون عاني . وقام أنت يابن قويد وشد بالمساعرة من دون ما يستحمي بأحد ٍ من قبايله ونزل عليهم ونصرهم الله على قل عددهم وكثرة قبلاهم وذبح شيخ قحطان ذاك اليوم إبن عبود . وأرسل إبن قويد قصيدة لآل حسن ولبن حفيظ يخبرهم باللي جرى ويقول: ياركب ٍ من فوق ست ٍ تعنا=من حموها تكسر عصي المواسير تلفي لنا إبن حفيظ زبن المجنا=حامي عقاب قطيهن بالقناطير يا ليت مظهوره يباري ضعنا=يوم إلتقينا بين عذال ومشير فرد عليه محمد بن حفيظ :- يا مرحبا بركاب ربع ٍ لفنا=عداد هباس مع زعب ومطير ليت الحمايا يوم راحت لفتنا=بين العدام وبين عوج الدواوير والله إن يجيكم يارفاقة ضعنا=وخيل ٍ تنازى بالعيال المناعير حريبنا لاشافنا جظ منا=مثل الخريش اللي بلاها من الطير ما قومه الا فالملاقا طعنا=إليا إعتلينا معسكرات المسامير ويا نافدا اللي يوم غبنا كفنا=سربة صخاف الشول عند المعاشير س:- من العقداء المشهورين في آل حسن هم آل جعفر من آل عمار ، ودنا لو تعطينا وقعة حصلت عليهم طال عمرك ؟ آل عمار لباسة الجوخ الحمر باسهم قوي وخصيمهم شقي والرابح اللي هم محزم ٍ له أما آل جعفر فهم معروفين بالشجاعة والصمالة والعقادة وقعاتهم واجد ولا يحضرني الإ فعلهم اللي ما يفعله الإ القليل يوم جاوا آل بشر ( ال عذبه وال فهيده ) غازين والإ الفرجان من آل حسن نازلين في البياض وهريسان نازلين على أربعة عدود غاروا أنتم يا آل مرة على ذيك الإبل وقوموا عليها وتقفوها والإ اللي يوالونه آل جعفر من آل عمار فيركبون سبعة على سبع من الخيل فيلحقونهم ويضيقون بهم ويردون البل والإ الفزاع لاحقتهم أربع فزاع من أربع عدود الإ أول من لحق شثين بن نايف أمير الخضران شجاع مايرد ويدفع الفرس عليهم ويجي بينه وبينهم يوم ويذبح والإ الفزاع صاكتن عليهم ويجي ذبح قوي عقب ماشافوا الفرجان إن شثين ذبح فلا راح من القوم أحد بين قتلا وبين صوباء و منعاء والفرجان ما ذبح منهم إلا شثين ذاك اليوم . س :- سمعنا أن أحد فرسان آل حسن قد قام بتغطية عيون فرسه عندما أبت الفرس الإقدام به على الجيش المغير عليهم ؟ هذا يا طويل العمر كعوت بن حريميص بن خضير الهوامله (أبو رجل) وهو شجاع ما يرد لكن بعض الشجاعة تقمي راعيها جاء غزو ما هم بشوي وغاروا على إبل لآل حسن مدري منهي له ولحقها هو وخيال معه ويوم أقبلوا على القوم الإ القوم واجد قال الخيال اللي معه : " يا كعوت ذولا قوم مالنا فيهم إلحام خلنا نتنى الفزعة " فرد عليه كعوت وقال : " نقعد نعاينهم ونتنى الفزعة والإ جتنا قلنا قعدنا نتناكم إقعد إتنهم أنت ، والإ أنا بحول على القوم على ما جتبه " ويلكد فرسه عليهم ويلكد خويه معه وتقوم الخيل تصفح من كثر القوم اللي قدامها وقوى الرمي فقال خويه : " يا كعوت حتى الخيل عيت تا طاهم " قال كعوت " أما أنا فلا نيب مجنب القوم " ويقوم ويغمم فرسه بعمته ويلكد فرسه ويدفعها عليهم ومده الله على اللي مدها منهم ويذبحه ويعقرون فرسه وعقب ما عقرت فرسه يجي بينه وبينهم مرامى ويذبح هذا وهو وحدة ٍ من رجليه مقطوعة في مغزى سابق على العجمان غايرين آل حسن على العجمان وقطعت رجله في المغزى وربط فيها خشبه . س:- إشتهرت قبيلة الدواسر بالكرم كغيرها من القبائل الكريمة لكن نود منك طال عمرك أن تفيدنا عن شخصيات إشتهرت بهذه الخصلة النبيلة؟ الدواسر خطلان الأيدي وصفاتهم الطيبة مالها حد و الصفات والسلوم الطيبة ودك إن الناس تحافظ عليها كيف عاد أهلها . اذكر لك من الكرمان الأمير هذال بن وقيان الشكره أمير الأحمر وأنا ماني قايل إنه أكرم كرمان الدواسر مير بقول من أكرم العرب وهو ظاهر من حمولة كلهم كرمان الله ربنا وربهم ، حتى ربعهم هل الأحمر مشهورين بالكرم وما يستغرب على هذال بن وقيان ذي العادة الطيبة . واللي معروف أن ضوء آل وقيان اختلفوا الرواه أحد قال ثلاثمائة سنه و ضوء ديوانيتهم وارثه ما شخط فيها بمشخاط. واحد قال إنه تولى عليها ثلاثة رجاجيل كل ما مات واحد جاء ولده خلافه فتولى عليها ثلاثة رجاجيل وهي وارثه هذي هي ضوء ال وقيان . وهذال ماهو بغريب عليه كرمه وذا فعل حمولته وأفعاله وأجد مير ابذكر لك منها انه جعله في جنات النعيم موقف له نخل وقف وهو حي فللضيفان وعقب ما مات فللضعفان حق منها عسا الله يتقبلها منه . ومرة ٍ جاوا قحطان ونزلوا علوا من العارض في حدود الدواسر والدواسر كلهم معودين وكل نازل في ديرته ونخله ويوم نزلوا قحطان عرب واجد ولا علقوا العاني فيجي العلم لآل حسن في الأفلاج قالوا بعض العربان : خلونا إلين يزل القيض ونصول عليهم قالوا : لا والله ما يقيضون فيها وهم ما علقوا العاني مير بنمشي عليهم ، ويقومون و يركبون آل حسن بادية وحاضره حتى أن بعضهم حاذف الغروب عن سانيته وغازي ٍ عليها فجاوا بيمشون فيسندون مع الهدار وقالوا : مناب مسندين مع الأحمر الأحمر فيه هذال و القحاطين ربع له ما ودنا ناطاه بيجي في خاطره ويسندون مع الهدار وهذال بن وقيان عنده الخبر ويرسله رجال عنده لقحطان ينذرهم . يوم جاهم النذير وقال : هذولا آل حسن جاوكم كلهم وآل حسن فخذ منهم تنطح لها قبيله وشلون عاد فخوذهم مجتمعة ويقومون قحطان ويشدون ويخلون المرحان ويتعرضون القيض . أما آل حسن يوم قربوا منهم فا أمرحوا ويوم انطار الصبح فتغير الخيل ويمشي الجمع والإ جذايا العرب هاجين والإ ذي خران العمد . فقال قايلهم ما أنذر بنا الإ هذال وضاقوا وقالوا حنا بنغثه بنحول عليه كلنا ورجال منكم ياقوم اليوم بيجنبه تراه معقب . وهم اللي يحولون عقب ما ارتفعت الشمس وجاء الضحى الأول لينهم ضاهرين على الديرة كل ما حول خبره من الجيش حولوا على هذال و الإ هذال ناطحهم يرحب ويقلط الرجاجيل في الديوانيه ويفرش بطن الحوي والمصابيح . ويجونه ربعه قالوا يالأمير فرق الرجاجيل علينا خل كل رجال يضِّيف خبره منهم هذولا عربان مالهم حد قال الرجال اللي يبي يفزع يفزع لنا براسه أما غيره فعداه القصور. وإلى غنمه سارحه ويلحقها رجال من اللي عنده يامر عبده ويرد الغنم ويظهر التمر من الجصاص والقهاوي تصب وتمتلي الديوانية والحوي والمصابيح ويفرش عند النخل وتمتلي من العربان . والغنمان تذبح والغديات تسوى يوم جا بيقلط الغداء فيحط عبيد على باب المحل اللي تقلط فيه الصحون وقال كل ما حط ذبيحة لا يقلط عليها الا عشرة رجاجيل لا تخلون احد يقلط اكثر من عشرة قال يوم جاء العصر و الإ صياح العبيد وين اللي ما تغداء يتغداء إلى ذي الذبايح اللي ما عينت من يقلط عليها ومن عود من آل حسن على ذلوله ولافرسه الإ القت مقوز عندها وخرجه فيه عذقين وتراى فعله ذا رحمة الله عليه يوم الناس في شح وقل . س :- معروف قيمة الخيل عند قبيلة الدواسر، نود أن تعطينا قصيدة في ذلك ؟ الخيل لها شأن عند الدواسر وأهل نجد والدواسر عندهم مرابط طيبة ومقيمه وواجد منهم اللي قصد في الخيل منهم خضير بن شامان وابوي وآل حفيظ لمحمد بن فرج قصايد ما لها شكل في الخيل وبه قصيده بقولها لك لراشد بن قابيه وهو فارس ما يسند رحمة الله عليه ويعد من أطيب الرجاجيل فهو من السبور اللي أرسلهم حريميص بن خضير يوم ذبحة ناصر بن جمعه هو ويا خفر الهوامله فحولوا على العرب يردون الخبر منهم وجات ذبحة ناصر بن جمعه في السالفة المخبوره أما قصيدته ففرسه جاء عليها بعض التداريف يقول : عـــديت في رجم يقنتب عصيره = واهــل دمعي والجماعة يحــــلون على جــواد ٍ لي تكـم المغــيرة = لا حـولـوا فرسانه اللي يعنــــون الحارك أشعى مثل رسم الحفــيره = بيـن الاخـوان اللي لغرسٍ يغــرسون وحوافـر ٍ مثل الزبر مســـتديره = والرأس صندوق له الحضـر يشـرون ياما عثا في وردهـا مـن عقيره=ونروي عليها في اللقا كل مسنـون ونثني عليها عند راعـي العثيـره=ونعدي اللي من الطماميـع يبغـون طاحت من اللي يسحتون الذخـيرة= أهـل الديون اللي علينا يثــارون حنا لهم من يوم بقعـاء صغيـرة =وصغارنا لصغـارهم لين يفنـون فإن كان خفر بشر القوم بالخور= فإن شب نار الحرب فإنا إزمامه س:- شطر بيت قاله الشاعر سعد بن صبيح العجمي ، ودنا طال عمرك تعطينا ما هو منا سبة البيت هذا ؟ سببها أن حريميص بن خضير غزا بالفرجان آل حسن على الديرة الحدرية وكسبوا لهم إبل وذبحوا في مغزاهم ذاك الشيح ناصر بن جمعه واللي ذبحه الفارس خفر الهوامله وقال سعد إبن صبيّح هذه القصيدة : ياراكب اللي فوقه الني مزبور=ومربع ٍ ني الشّحم في سنامه يسرح من الثقبة لا فتّق النور=عقب أربع ٍ الأفلاج بلّغ سلامه سلّم على الفرجان بالصوت مشهور=اللي حمو غرس الفضا مع جهامه هل سربة ٍ لا دبرت كنها عور=وإن أقبلت لا كن فيها عزامه بسيوف هند ٍ شالها كل مصطور=كم واحدٍ قصن فصايل عظامه هم أطيب اللي شيّد البيت وقصور=بمثلوثةٍ زادوا على أهل الكرامه فنكان خفر بشّر القوم بالخور=فإن شب نار الحرب فإنا زمامه يحرم عليه إن قد دوَّه لمقهور=في الحقو الأوسط لاتكبر خزامه فعقب مغزى حريميص بن خضير الهوامله بالفرجان على العجمان وذبحتهم لناصر بن جمعة حيث جا فيها قصيدة الشاعر سعد ابن صبيح فقام الشيخ مانع بن جمعة وهو شيخ وشجاع وراسه طيب فقلدها الشلايل من شان أخوه ناصر وذبحته وجمع من العجمان وآل مرة وصال بهم على آل حسن والإ هم نازلين في البياض في الصلعة وجاهم أبو عيينه اللي خبرهم بممشى القوم عليهم و الإ إبلهم ترد وتصدر على الثليماء في الخرج والبيوت في الصلعة ويوم جاء وقت ميراد الإبل وردُّوها على الخرج وذلّوا عليها من القوم إنهم يصدفونها ويركب حريميص بن خضير الهوامله واللي معه من آل حسن جنب مع الإبل ولا بقى في البيوت إلا كبير السن والإ جاهل أو بعض الفريس اللي عددهم قليل و بين أهلهم سالين فيوم أقبل العجمان وآل مرة وجات سبور ابن جمعة وخبروه إن الإبل وردت على الخرج فكنا العلم على قيمانه لنه ظن حريميص وكبار العرب مثل عادتهم ما وردوا وهو يبيهم وقومه أكثرهم يبي الطمع فدرجوا الجمع على البيوت وذبحوا اللي عينوه والإ كبار ال حسن مع الإبل ويوم جاوا مصدرين و الإ الوقعة قد حصلت قدامهم وقام حريميص وحلف بالله إنه ما عاد يثور ذلوله غازي الإ على العجمان وآل مرة وبر في حلفه وقال يآل حسن لاحد يعطيهم الصلح لأني باطا في وجهة من شان ما عاد نيب غازي الإ عليهم وكان طمع الناس وأرزاقهم في ذاك الوقت من غارات بعضهم على بعض إلين آمنهم الله بعبد العزيز عليه رحمة الله وهذي من النعم اللي أنعم الله بها على أهل الجزيرة بجمعهم على شرع الله وحكمه. س:- عقب كون الصلعة وش حصل بعدها ، هل صار شي بعد كون الصلعة ؟ عقب كون الصلعة حصل كون حطيبة حيث جمع حريميص بن خضير الهوامله جمع ٍ قوي من آل حسن وصالبهم على عربان من يام عقب الصلعة وهم نازلين حدرا من الدهناء كثرتهم من آل مرة ومعهم فرقان من العجمان وحول عليهم وجت وقعة مهيلة من كثر حطب الرجاجيل فيها والسلاح وبدا المقاطع بين آل حسن والعجمان وآل مرة ورفع المنع بينهم إلين جت وقعة النهيدين وعودا على سلومهم الأولة في الصلح والمنع وفيها قصيدتين مانيب حافظها وحدة منهن للشاعر هادي أبو سويحة الهوامله فسمي ذاك اليوم بيوم حطيبة من كثر حطب الرجاجيل . عقب حطيبة جا كون شفية حيث جمع الأمير حريميص بن خضير الهوامله جمع ٍ قوي من آل حسن وصال بهم على العجمان وهم نازلين على شفية ولين إبلهم محولة عليهم والإ هم يتصادفون هم والإبل وياخذون طرش وحلال واجد ولكن الذبح مهوب مثل حطيبة ، وهذه من أتلى صولاتهم في مقاطعهم وألا فالمغازي واجد من القبيلين . س:- (( وأنا احمد الله يوم ربي عزنا )) .. شطر من قصيدة نود منك تعطينا من قائل هذه القصيدة وما مناسبتها ؟ اللي قال القصيدة هو خضير بن سعيد بن خضير ومناسبتها طال عمرك إنه سنة من السنين وآل حسن في ديرهم وقت القيض في الأفلاج وإبلهم ترد عليهم وتصدر حدر منهم ولا معها جنب يوم العرب في القيض قليل منهم اللي يغزي ويوم جاء تالي القيض وأول الصفري والإ به خيال سحابة حدرا منهم فراح رجالين من الهوامله قنوص ويوم جاوا النهيدين اللي حدر الأفلاج ويعينون هجلتها مليانه ويعودون ويسرون لها الهوامله وساعة ورودا إبلهم و توها تشرب ، أمير الهوامله ذاك الوقت حريميص بن خضير إلى قولت بعضهم " يا حريميص العرب جو على ثركم ذا الدبش جاء محدر ". أثرهم خالفهم جمعٍ قوي من آل مرة والعجمان حذاء أربعمائة أو خمسمائة على عقداء من أكبر عقداهم ذاك اليوم آل مرة على عامر الضويلع والعجمان على فهد الدامر وقعوا على إبل أهل الأفلاج وأخذوها الإ إبل محمد بن حفيظ ذاك اليوم كان عندها لحاله وفكها مامعه أحد قال اللي قال : " يا حريميص ذي إبل ماخوذة معها خيل مركب ماهي بجنب" ويقوم الهوامله ويعترضونهم ، والإ مع الهوامله من آل حسن الأمير راشد بن نايف الخضران واثنين من الخضران وواحد من الشكرة وواحد من الصخابرة وواحد من اآل عمار والهوامله قرايب الستين رجال ويوم أقبلوا عليهم والإ القيمان واجد ويوقمون وينطحونهم دون البل و يجي عويض بن طايف هو ويا راشد بن نايف ومن أول الفزعة وقال عويض : " يا راشد إمسك الرسن أنا بحول أرميهم أبي أنثر الدم فيهم" فلا تم كلامه الإ راشد بن نايف طامر ومثور عليهم ومعلقهم الصواب ، ويتخالطون وياهم ويجي ذبحاً قوي ويعينهم الله عليهم وذاك الحين بينهم المقاطع ماشي مابه منع ويذبح عامر الضويلع عقيدهم ويضرب فهد الدامر ويمنعه عبيدان بن هين الهوامله ويذبح خمس وثلاثين لحيه من غير الصوباء والمنعاء والقلايع . ويجي لنقاء إبن هويمل الهوامله ذاك اليوم فعل مهيل وهو من الفرّيس اللي يعدّون ، ولا ذبح من آل حسن إلا جلمود بن خضير الهوامله و اللي ذبحه واحد من العجمان يقاله ابن درجان لازم ٍ له متقاة ويتمنع فقام عليه جلمود وتم قبله عليه فقال له العجمي : " إمنعني ولاّ بثور فيك ، قال لا أمنعك ولا يمنعك الله " ويوم وصله ويثور عليه أنت يا ابن درجان إلينه ذابحه والى ذا طينان بن محمد الهوامله يواليه ويضرب ابن درجان إلينه ذابحه واشتف يوم أن الأولين أهل سلوم هذا جلمود مقبل على الرجال وهو ماد البندق عليه ويقول : " إمنعني ولاّ بثور فيك " يبيه يمنعه يومه عارف أن بينهم مقاطع مابه منع ولا يبي يعطيه وجه مهوب تام فيه له . أما عبيدان فمنع الدامر وقاموا عليه الهوامله وقالوا ميده : " أنت منعت وما بيننا وبينهم الإ مقاطع ولا لك منع ولا منعت الإ رجال مصوب " قال : " أنا منعته ولاحد بجايه " وعبيدان من الرجال اللي إن قال طال وقاموا عليه يبون يلزمونه ويذبحون الدامر قال : " يا هوامله والله لو تجودوني يا من ذبح الدامر إن أذبحه " وهم خابرين أنه ياصل الحروة قال عويض : " على هونكم لحد يجي عبيدان " وعلموا حريميص قال حريميص : " يا هوامله رجال منعه عبيدان ما عاد حد ٍ بجايه " وبدا عقبها المنع بين آل حسن والعجمان وال مرة وعودوا لعادتهم القديمة وأول من لحق من الفزعة اللي على ثر الإبل ابن قينان آل عمار جاي لاحق على فرسه ( سودة ) لحاله ويوم وصل إلى الوقعة قد انتهت ويوم شاف إنها انتهت فهو اللي يقوم على زرج رمحه ويقطعها ويطيح من ظهر فرسه مغشيٍ عليه من الضيقة يوم ما لحق الوقعة وهو معروف بشجاعته وعدمه . يقول خضير بن سعيد بن خضير في قصيدة ٍ له: عند العشى شرفتنا في نايف=ويعارض النسناس مني قافي واذود ذي من زين ذي=من كثر ما كنيت بين الجافي واذودها ذود الصدير اليا نتحت=لا صدَّرت من عقلةٍ زلافي ونقدتها في خاطري نقد الذهب=نقد المشاخص في يد الصرافي واذل من خطو سبعٍ يحكي بها=ويقول قاف مادرى بالقافي واللي مهيضني جموعٍ قربت=تدري بمناياها بكل أسنافي تجمعوا آل مره فوق عوص النضا=من فوق حيل يوجفن أوجافي ومعهم من العجمان قوم مثلهم=تبارزوا في سر علمٍ خافي تبارزوا يبغون قطعت صخنا=يبغون خز البكرة المشعافي وأنا احمد الله يوم ربي عزنا=عز الورق من ليلة هكافي قمنا نعد لهم بروس رماحنا=مثل العسيف الدارب المعسافي نقا على الصفرا الصهاة يلوفهم=بمزرج في حربته الاتلافي بعنا عليهم بيعة ينحكابها=الين خليت خلفاتها عطافي خل الضويلع طايحٍ في دربنا=واقفى خويه هاربٍ قد عافي فهد الدامر طايحٍ في وردنا=من ضرب كل مجرب عرّافي كله لعينا كل صبيٍ قد غدا=ليته بعينه حاضرٍ يشتافي والا لعينا كل ملحاً زينه=في سدنا نرعى بها الأطرافي والا لعينا كل بيضا فرعت=وجبينها يشدي قمر الانصافي س :- يذكر أن الأمير حريميص بن خضير غازي ويلحقه مستفزع من آل حسن ويخلي المغزى ويلحق الإبل الماخوذة ويردها نبي تعطينا تفصيل عنها؟ هذا حصل يوم غزا حريميص بن خضير الهوامله عليه قوم من الهوامله آل حسن وأهلم نازلين على الأطوى ، وجاء مغزاهم شمال يوم قدهم في بو حداد وهم سارين في الليل يبون عد وسيع يرتوون منه وجاهم الفجر وهم في أسفل بو حداد وصلوا فيه وتموا قبلهم ووردوا الماء والإ به إبل ماخذوة لواحد من شيوخ آل حسن ، ولا عندها فزعة واللي ماخذينها قوم من آل مرة ويجي على ثرها علي بن ناصر الصخابرة يبي لعله يكدش منهم شي والإ ذا ثرها يتوطى ثر القوم في مصلاهم الفجر عقب ما عرف ثر حريميص فيجي على ثر القوم ولا خذوا الإ ذاك الرجال على ذلولة مغير على ثرهم وراكز غترته ، قال اللي شافه : " يا عم حريميص هنا واحد جانا مستفزع " ويوم جاهم وهو اللي يعلم حريميص بالعلم كله، قال حريميص : " يا قوم هي مغزانا لو يحولون على هلهم وإن الله ردها بنرده ا" ويفزعون ويوم اعترضوا ثرها شافوا إن الليل قربهم وذلوا إنه يضيع ثرها عليهم فقال حريميص : " يا عويض - ميد عويض بن طايف يا طينان - ميد طينان بن محمد إركبوا على ذا السابقين وأحموا عليهن إلين يغبيكم الليل وإلى غباكم الليل فتعينوا أطول عرق في الدهناء يوالينا وشبوا فيه الضو وإنا بنجيكم عنده " ويجون على ثرهم ويوم جاء مثنات الليل إلينهم جايين الربع اللي شابين الضو، قالوا : " القوم أيهم ذولا ممرحين في حرج وبزة " ويصبحونهم ويذبحون اللي ذبحوا ويكسبون إثنى عشر ذلول وردوا البل . س:- نود منك طال عمرك تعطينا سالفة اللي يقول : " بينط غزال الصيف ما انطار الصبح " ؟ هذي سالفتها يا طويل العمر والسلامةالبل فوق من يبرين والعرب يوم جاء القيض راحوا يم الأفلاج لأن العرب يامنون من الغزو في القيض ويغزي عويضة الضلعان آل جابر ومعه قيمان من آل مرة واجد وصاد الخبر إن الإبل أهلها ماهم بعندها ويغير على البل وياخذونها ويقفون عليها مجنبين ويجي يوم ويوردونها الحسي وومنوا وقصد شاعرهم يحسب إنهم سلموا يقول: يا ما تشقلبنا لها بالمغـازي=لي التقينا حن وهي فوق يبرين حنا خذينا اللي عليها الكازي=اللي كثير وسومها بالعرانيـن نسوانهم ما بين حبل وبازي=عقب المغابط يركبن الحراذين جاء الخبر آل حسن ويفزعون على حريميص بن خضير الهوامله من الأفلاج وآل مرة على الحسي واردين ويحولون واحد ماخذينه من رعيان البل اللي معها والإ عويضه حالق راسه ذاك اليوم ويوم قربوا آل حسن ذاك الليل ، قالوا : " لاحد يهجدهم من شان ما يسلم منهم أحد ، بنصبحهم عند الصبح" وإلى ذا خلاج العضباء ناقة للآل بطران من آل عمار وهي روكن بين الأخوان مضيعة ٍ ولدها تحن ، قال واحد منهم " خلوني أدل العضباء ولدها " قالوا : " الى أصبحت فدلها ولدها " قال : " بينط غزال الصيف ما أنطار الصبح " قالوا : " ترا أول من بيطعن عندها الصبح فهي له " ويوم إنطار الصبح فيصبحونهم ويقوم أنت يا عامر ويطعن عندها قال : "خيال العضباء عامر" والإ أخوه طاعن مثله قال : "خيال العضباء عند الله ثم عند آل حسن يقسمونها بينا " وإلى الدلي تطيح عند اللي يميح ودرى إنهم مصبحين وقام يصيح " يا لاد حسن ترا عويضه أدرم " ويذبحون ذاك اليوم ستين رجال غير الصوباء ويظهرون الرجال اللي في القليب وهو اللي عرف عويضة ويدورون عويضة بين القتلى ويعدون اللي محسن راسه منهم من القتلى الإ هم خمسة عشر رجال واللي ذبح عويضة سمعت فيه روايتين واللي توالى علي من الرواة من مبطي إنه سمران بن نشمي الفوارين الهوامله ويوم ذبحه قام يصوت من بعيد " يا عم علم الأمير حريميص إني ذبحتلي رجال أدرم في أسفل الشعيب " وفتخته عنده ونصيبة عويضة على الحسي إلى ذا الحين وعليها وسمه. ويقول الشاعر مضحي بن خديم بن غصن الخضران : يا ركب حرٍ به الشط نازي=يجضر اليا من سمح حس المغنين لا من لحقنا فوق حيل تقازي=نرمي الظفايف عند الاجهال عارين نروي غلب ريشٍ النعام الجوازي=وإليا إحتزمنا بالفرنجي فرزنين نطعن لعينا اللي عليها الكازي=هزعا وكنها تجذب الرجل من طين ونطعن لعينا اللي زهاها الغرازي=فنس الخشوم موسمات العرانين وإن كانهم يطرون حبلٍ وبازي=نسوانهم ما شرهبن للمغنيين يبكن وزادن البكاء بإكتزازي=ولبسن ثياب الحد عقب السباهين وحنا لهم جرحٍ على الكبد حازي=ماهم بمن ذبحة عويضة بناسين لا لفيتو معجب ٍ ذرب اليمين =عيد أهل هجن ٍ مناكيف وهزال س :- بيت من قصيدة للشاعرهادي أبو سواحة الهوامله ودنا طال عمرك تعطينا القصيدة والمناسبة اللي قيلت فيها ؟ جاء فريق من آل حسن من الهوامله ما هم بواجد على سحمي بن مسلم الهوامله وهم مقيضين مع آل مرة على الزرنوقة وإلينهم في ذاك المجلس قال المصطفى وإبل الهوامله واردة ومعرضة عليهم " كل ما جتني إبل الهوامله إلى فيها من وسم كل نحية ولا بعد شفت في إبلكم - ميد ال مرة - من وسيمتهم شيء " قال سحمي : " ما خليت الإ أنها ما غار قومٍ على أهلها إلإ ما عوّد خيارهم " وترادوا بالكلام قال سحمي : " إن كان ودك فجرب مفّارك عليهم حتى تدري ليه ماتوخذ إبلهم " قال المصطفى : " والله إن أغير عليكم في قربة بخيل آل بشر وأنت ما معك إلا أربعة خيالة " قال سحمي " " ترى منزلنا دايم مطرف " شدوا الهوامله عقب المقيض وارتفعوا يم ديار الدواسر ويوم جاوا في فرشة مكيحيل فينزلون ويبنون البيوت وقام المصطفى ووعد بالمغزى واجتمع عليه قوم من آل مرة ومن معهم من آل عرجاء قال ابن جلعود وهو معهم وهو من العجمان يام : " يا عيال أبي لا تمدونهم بزّهيد تراهم كلابٍ فتينة لا تقّالون عددهم" والإ معهم واحد من الهوامله قصير ولا عاد خلوه يروح ذالين إنه ينذر بهم فعقب ما بعدوا أنذر بهم ويعينون ثر ذلوله قالوا : " أنذر بنا وكاد " يقولي محمد بن يحيى الفهيدة وهو معهم توه صغير ومن الرجال الطيبين يقول : " فصدينا واقفينا شمال منهم نبي تـزل حروتنا ويامنون ,يقول ,والإ القومان مستاخذين من الهوامله ، وبعضهم يقول لبعض : " نعنبوكم ذولا الهوامله ما تعرفونهم ما يوخذون ويقول اللي يعرفهم لو شفتوا فعلهم ما يفعله أحد ". الهوامله جاهم النذير ويوم اخذوا لهم أيام وومنوا وارتعت إبلهم يم وجه النفوذ من علوا والإ القوم غايرين عليها وإلى الابل ما عندها إلا راشد بن نافع الهوامله لحاله وقم على بندقه ويعترض بين القوم والإبل لحاله ويترامى هو وياهم ويذبح ، والإ فراج بن وقيان عند إبله والقوم محولين عليه ويصد بها في ذاك الشعب ويجي دونها ويحتميها، وسمعوا اللي في البيوت الرمي ويفزعون ويلحق سحمي بن مسلم وناجي بن فنيس يوم أقبلوا عليهم الإ الخيل معترضة دونهم خمسة وثلاثين فرس والمركي وراها والإبل ورا المركي تساق فيتطاردون هم وياهم والإ أهل الفرسين التالية تلحق وإلى الهجن لاحقة والهوامله ما هم بواجد ذاك اليوم وتخلي الخيل بجنب إلين وازنو بالبل وهم اللي يصلونها عليهم وخيل آل مرة تطاردها ذا الخيل الأربع ويلحق محمد بن وقيان بن نصار وسعد بن غدفان الغييثات ويصلون خيلهم وتعقر ويطاردونهم الهوامله ويقوم سمحي ويلزها على المصطفى ويطلبه يظهر له ، يوم ظهر له الإ والله إن رجليهم متماسة على الخيل ولاحد منهم صوب الآخر ويحدها عليهم سحمي ويضربونه على رجله ويصوبونه وتعقر فرس ناجي بن فنيس ، ويضرب ناجي إبن فنيس الهوامله هو وقيان بن دحبوب الهوامله المصطفى وإلى الثنتين فيه والإ هو مذبوح ويصوب فيصل ابن نقادان ويطاردونهم وراحت الخيل ذاك اليوم بين عقاير وقلايع إلين حوّلوهم من الدهنا قالوا بعض القوم : " يا هوامله وش عاد تبون أهلنا قدهم أقرب من أهلكم" قالوا : " باقي ناقة معكم مع أول الجيش اللي مقفي" ويلحقونها ويردونها عليهم قالوا : "هذي جرباكم جعلكم ما تخرفونها" . يقول ابن جعلود العجمان : تجمعوا يامٍ على قحص الأمهار=لفريّقٍ ما ياكلون الشويّة يا يام ما عند الدواسر لكم عار=يا كون حربٍ ما تطفى ضويه المصطفى خلي تعشاه الأطيار=خلي عشى للذيب بالتوضحية كله لعينا هجمةٍ حسك الأوبار=اللي مضرَّاتٍ للفكك بكل هية يقول هادي أبو سويحة قصيدة طويلة أرسلها للأمير معجب بن تركي العجالين يبشره بالنصر : راكبٍ من فوق سلكات القرين=يرمحن روس السفايف والحبال سرحوهن من جبا جودة شريق=يرمحن روس السفايف والحبال لا لفيتو معجبٍ ذرب اليمين=عيد أهل هجنٍ مناكيف هزال بشره بالعز حنا لاعلين=ونتوطا حفنا وطي النعال آل مرة صلب قومٍ صاملين=خاتمينٍ رايهم في كل حال عازلينٍ الكمي من المغير=يوم قربوا رجالٍ من رجال قربوا خيل تقطب بالسروج=وقربو جيشٍ تسقى بالحيال زعزعوها عقب ماكانت رتوع=هرّب عقب الصوايح والجفال لحقوا الفرجان جاذبهم صياح=بأول السربة مداغيش العيال لين طاح المصطفى كونه شنيع=ردته الأربع من الخيل الطوال عودت خلفاتها خلج سريع=قومها الدم الأزرق يوم سال دم رياجيل ودم جيشٍ وخيل=والفشق من بينا مثل الشعال شيخنا اللي فاللقا شبره طويل=سحمي اللي جعل عمره مايزال يوم سمعوا فاللقا طاري حنيف=أرتخت روس السبايا بالحبال حن هل الحرشا مرويت السنين=وردوها علةٍ عقب النهال وإبن نصارٍ دفع راس الحصان=يوم جاله من مراكيضه زوال لحقو الفرجان حسكات الوبر = مرخصين الروح عند أذوادها بيت من قصيدة للشيخ الشاعر فرحان ابن نادر ، ودنا طال عمرك تعطينا القصيدة ومناسبتها؟ سنة من السنين فرقان من الفرجان من آل حسن نازلين عند فرشة الأطوى وجاوا غزو من قحطان على عقداء من أكبر عقداهم سعيد بن منيرة آل فاضل وشعوان آل خميسة ومعهم ركب من العرجاء على ابن معيطين وهو اللي جاذب القوم والى ذي الإبل في الفرشة ويغيرون عليها ويقفون على الذيدان ويلحق الطلب ويعترضون القوم من دونها ويحذفون الخيل عليهم وتعقر سبعة أفراس للصخابرة والى الطلب لاحقين أول الابل ويردونها ويجي ذبح قوي حتى إن بعض المنعاء من آل خميسة يقولون : "والله إنكم أخلفتونا حتى إنا عادتنا نرمي متبطحين وإن هوشكم أخلفنا حتى ما عاد جلسنا نرمي" ويذبحون العقيد سعيد بن منيرة واللي ذبحه وقيان بن طحنون الهوامله ويذبحون ابن معيطين العرجاني وذباحة سعد بن داجي الهوامله وأما شعوان آل خميسة فعند شايع بن عبدالله الهوامله وهو اللي منع عليه خمسة عشر رجال أما ابن قثيمة والحميداني فذباحهم مسلم بن هويمل الهوامله وجاء ذبح واجد في القوم لا شك إني ذكرت لك أسماء العقداء اللي عليهم العلم . وتقول شاعرة من قحطان : ليته قعد غير شعوان وعبدالله=وسعيدٍ اللي يعـوج الروح للتالـي تكفون يا هل الركايب ما حدٍ شله=حتى نقلط له الترحيب ودلالي يبكيه نجرٍ ومحماسٍ مع دلــــه=ويبكيه ضيفٍ ضوى قد مزهبه خالي وتبكيه وجنى من العيرات منتلة=والإ عجوزٍ عقيمٍ مالها والي يقول فرحان إبن نادر متنومس بفعل ربعه: نحمد الله يوم باج النا السفر=عقب سهر العين زان رقادها جردةٍ حدابها سو القدر=تلعن اللي من جنوب قادها لاد سعدٍ هوشهم هوش العبر=عند الركايب يوم جا مسنادها لحقو الفرجان حسكات الوبر=مرخصين الروح عند أذوادها جاوك آل سعدٍ محولين من القهر=الجردة اللي ما نعرف إعدادها هم طاح شعوان على كبده كدر=عاف كسب الأبل وهو قد فادها الجحادر خفهم ضرب الكفر=من طمر ما عاد ركب شدادها نحمد الله لابتي خزن الظفر= سربة الفرجان قل عدادها [B][align=center][size=4][font=Simplified Arabic]س :- هناك بيت للشاعرهادي أبو سواحة يقول : تلقا مواقع ضربنا في روسهم = منها عظام لحيهم طياح ودنا إنك تعطينا مناسبة القصيدة ؟ هذي سالفتها إنه سنة من السنين حول فريق من الهوامله من آل حسن الديرة الحدرية ونزلوا في المحادير على حريميص بن خضير الهوامله والإ ذولا المناصير جايين غزية على الضبيعي هو أميرهم ذاك اليوم وهو من أمراء المناصير ويهجدونهم في الليل والإ مع الهوامله راشد بن حويل الصخابرة ( فرثان ) هو وعياله ويذبحون رميزان بن راشد وهو راقد والإ العرب قايمين على القوم من مراقدهم والقوم معقلين ركايبهم ومحولين ويذبحون في القوم ذبح قوي واللي إنهزم من القوم ضيع الركايب المعقلة ويوم أصبحوا ويقصونهم ويلقونهم مجتمعين في هضبة يوم أقبلوا عليهم قال واحد من المناصير لأميرهم الضبيعي : " ترى هل الغرب أهل وجيه اطلب المنع منهم" قال : " صوتك عند عايشة أطول من صوتي - عايشة ميد مرته - ماني طالب المنع مير افتكوا عماركم " فيذبون عليهم الهضبة ويحلقونهم فيها منهم أميرهم ضربه أبو زوير الهوامله اسمه حسن ولين لحيه طايح يوم أبو سويحة يقول : غاروا علينا مع هرافة القـمر=يبغون خفتنا بكثر الصياح ساعة توقفنا فحلنـا دونهــا=والسـد من عقالنا منبـاح الآد منصور أهل خضر النمش=جنابياً فيها الذهب وضاح ونعم بهم في الليل عند ركابهم=يوم اللقاء بمزلقات إرماح تلقا مواقع ضربنا في روسهم=منها عظام لحييهم طيـاح س:- يذكر إن الهوامله أهل مطاليب ٍ بعيدة ، وقد حصل إنهم لحقوا الأتراك وردوا إبلهم منهم ، وودنا طال عمرك إنك تفيدنا ما هو اللي حصل بالتفصيل ؟ هذي سالفتها إن الهوامله أتلى الربيع نازلين ٍ فالعرمة وكنه جاي ٍ منهم شيٍ على الترك فالحساء قبلها . ولا خذا أهل ذيدان مطرفة منهم الإ ذيك السرية ما يعرف وش تركها من أهل ديرتها ، ويقشعونها ويقفون عليها ، ويروح المستصيح للعرب ولا جاهم المستفزع الإ الإبل رايحة لها وقت ، ويركبون ويفزعون على ثرها على خيل وجيش ويوم شافوا إن الخيل تردت إعزومها فيخلونها ويتمونها قبلهم على الجيش . وإلين حولوها على الحسا قدامهم مقبلين عليها قال بعضهم لبعض : " وين حنا رايحين " فقال اللي قال : " بنلحقها إلين ناصل الديرة إن لحقناها لحقناها وإن لقيناها دخلت تلفتنا للي نعينه للترك وقشعناه " ويوم وصلوا الوجاج الإ الإبل قاطعته وإلى الترك فاتحين الدروازة اللي يسمونها الجفر وهي اللي يدخلون فيها الحلال . والإ ذا العسكر صافين عليها بطرابيشهم وإلى الإبل جافلةٍ من المدخال وإلى به واحد من العسكر يقود الرحول والإبل خلافه تراوج . قالو : إذبحوا اللي يقود البعير وأطمر يالمشبب وإضربه لينه ذابحه فقالوا : " بيعة بيعة يا لاد هويمل يا هل الإبل بيعة بيعة ". وهم اللي يدقونها على الترك ويتواقعون عند الباب وقعة عند الله خبرها، ويردون الإبل واللي وسطها من جيش الترك ولفايقهم اللي معهم، (( وهذي من المطاليب البعيدة )) . ومن القصص اللي تدل على إن الهوامله أهل ثبات وصمالة غزوا سنة من السنين وكانوا لهم على عرب واخذوهم وأقفوا بالأبل ويوم جا ثاني ليل وومنوا وهقوا إن ماهو بلاحقهم الطلب ويوم جا العصر حولوا يزينون عشاهم وقهوتهم وقاموا على الخلفات اللي معهم وحلبوها وإغتبقوا منها ومعهم جاعد جلد فيحفرون له فالخد ويخلون الجلد من ظاهر ويصبون باقي اللبن فيه ، ولا خذوا الإ سبرهم يقول : " يالربع الطلب لحقكم " ويطمرون على جيشهم يشيلون عليه ويقوم أنت يا راعي الجاعد وينصى جاعده ويلتفت عليه أنت يا عبيد بن الهميج الهوامله أبو شباب شجاع ٍ ما يحسّب للعدد قل ولا كثر فنشده وقال : " ويش بتسوي" فرد عليه : " بأنثر اللبن " قال : " خله خله أبشربه" وهو اللي يكرّع فيه ,يقولون "شوف عينّا بكلاه يوم قامت تعادل من الري ، ويوم شربه فياخذ الجاعد ويمده على راعيه والإ ذا المغيرة مقبلةٍ عليهم ولا تغّير بشي ويقوم عند أتلى الإبل يدفلج ويردع القوم ويجي تالي نهارٍ يعدّ ويعينهم الله ويقفون على الابل . س :- هو به كسب كسبوه آل حسن مسمي مثل إبل مسمية ، ودنا تذكر لنا طال عمرك شي من هذا ؟ نعم آل حسن موفقين بكسب الثمين مرةٍ ثور كعوت بن خضير الهوامله بالهوامله آل حسن وهم في الديرة الحدرية نازلين باهلهم ويحول على عربان من مطير في جو لبن ويغيرعليهم ويجي يوم قوي وياخذون البويضاء إبل معروفة ويقفون عليها وتاليها باقي إلى ذلحين مع الحمولة اللي يقال لها الشيبان من الهوامله وهي معهم وانقلبت مجاهيم. وفي يوم ٍ آخر بعد لك من الكسب مرة غزى حريميص بن خضير الهوامله بآل حسن من الأفلاج يبي عربان شمال يم جويات الهمل ويوم جو جويات الهمل فلا عينوا فيها أحد فتعدوا شماليهم فيوقعون على فرقان من مطير ويغيرون عليهم ويأخذونهم ويوم خذاهم والإ ذي حومه البل المسمية ويقفي عليها . س :- وش اللي حصل يوم النقير والنقيرة ؟ هذا سلمك الله يوم ثور بالمغزى حريميص بن خضير الهوامله بآل حسن من الأفلاج وأشمل ويوقع على عربان في النقير والنقيرة ويصبحهم وياخذهم أخذة قوية ويقفون آل حسن على طرش ماحد يسوق مع أحد يوم شاعرهم يقول : هجنا رعت النقير والنقيرة = عقب ما هي في الحقاوة ربعني س:- وش سالفة المره اللي مع الدواسر يوم وخذت إبلها فتمنّت الهوامله إنهم حولها يردونها ؟ هذي سالفتها إن به عرب من سبيع مع الدواسر يقالهم آل زرير غير عليهم ووخذت إبلهم ولحقها فزعة ما الله عانها على ردها وعودوا الفزعة على العرب والإ البل لمرةٍ من آل زرير وقالت مما في خاطرها وضيقة وعاد الله بالهوامله يردونها قال بعض اللي عندها : وينك وين الهوامله ما حولك هوامله والإ به غزوا من الهوامله على حنيف بن الحميدي بن بخيتان الهوامله معشين ويوم جاء مثنات الليل الإ البل والقوم واطينهم وحس بولجة الابل واحد منهم يقاله علي بن حمد وراح يتعين والإ هنا إبل سارية وهنا قوم ماخذينها وعود على ربعه وعلمهم فركبوا واعترضوهم وجاء وقعت بينهم وردوا البل ويوم ردوها الإ ذي إبل الزريرية يعرفونها . س:- وش سالفة جليميدة وش صار في ذاك اليوم ؟ هذي سالفتها إن آل حسن نازلين مقيضين على نخيلهم في الأفلاج وبه ذيدان تصدر حدرا منهم ووقع عليها قوم من آل مرة على عقيدين منهم ابن جلاب المسمي اقفوا عليها وجاء المستصيح للعرب في الأفلاج وفزعوا على ثرها ويوم خذوا والإ القوم يوم انقسموا قسمين ابن جلاب وربعة حدروا بإبل محمد بن هاجس والإ ذا ثر ناقته جليميدة مع البل ذا اللي حدرت والفزعة أكثرهم إبله أشملت مع ذا القوم اللي أشملوا وراحوا على ثرها ويقوم محمد بن هاجس وقضب خطم جيش الهوامله أربع ما هن بواجد آل شبريم ومعهم جاليين من الهوامله يقوم يزهمهم يا لآد هويمل يا هل جليميدة ويقومون ويكتون على ثرها ولحقوها حول يبرين ويجي بينهم وبين القوم وقيعة ويردون البل . تنصى بني عمي هل المدح والثنا = لا جيتهم خبر بشواهر علومها بيت قصيدة قالها الشاعرهادي أبو سويحة ، ما هي القصيدة وماهي مناسبتها طال عمرك ؟ جاء فهد الدامر غازي معه قيمان من العجمان وآل عرجاء ويوم جاوا على يبرين ولينهم يصادفون عبلان الحمالين محدرن يبي الحساء ويقضبونه معهم قضيب قالوا: دلنا على حد ٍ من العربان وجنبنا الهوامله وقاموا يكثرون النشدة عن الهوامله ويقولون : " ما لحد عليهم حظ ما بعد أحد خذا إبلهم" فقال : " الهوامله أجنبوا " وينصيهم الهوامله ويحولبهم على فريق ما هم بواجد على عويض بن طايف بن خضير الهوامله نازلين بوزان أبو حميض والإ ذي الإبل ويغيرون عليها ولا به احد ٍ حاضر عندها إلا فهد بن زبيري الهوامله عند إبله ويفتكها لحاله ولينهم يشوفون وسوم الهوامله على الابل ، وقبل ذا كله صبح ذاك اليوم الرجاجيل يتقهوون في مجلس عويض بن طايف يتمارون في خيلهم وسبقها، وقام عويض ولتب واحد فيهم في شجاعته وهو ما هو بصحيح فقام ذا اللي قاله عويض ذا الكلام ضايق ، وقال " يا الله إن كان إنك قلتها وأنت ظالمني ، فإن الله يوريك اليوم وجيه القوم اللي ما ينشاف طرفها " ويوم راح قال عويض للمجلس اللي عنده "يا هوامله قربوا خيلكم تراني ظلمته، وتراني قلت إنه ما هو بشجاع ، وأنا خابره شجاع ويمكن إن الله يستجيب دعوته ". ولا خذوا الإ الصياح جاي من صوب الإبل ويتناوشون خليهم ويلحقون القوم ويوم لحقوهم الإ القوم ما ينشاف طرفهم ويحذفون خليهم على القوم يوم إلتفت عويض على داجي والثنين كادين على القوم إلينه يشوف داجي مشرع سيفه اللي يسمى مفيليث على منكبه وهو شجاع سلطة لكنه شايب كبير سن وشوفه ما عاد هوب جيد وذل عليه لا هو بشايف ولا هو بمصفح بيضرب مثنات القوم ، قال " يا داجي إرد ميرادي وصدر مصداري" ثلاث مرات يرددها عليه، ولا رد عليه قال عويض " يا الله الخيرة يا والله اللي ذبح داجي" وهم أول الفزعة ويضربون مثنات القوم ويذبح داجي ويلاويهم عويض إلين أركا الخيل على الجيش وتلحقهم الخيل خيل الهوامله ويسوون في الخيل الهوايل بين قلايع وعقاير ما سلم من خيل القوم الإ فرس فهد الدامر ويلز عويض على فرس فهد الدامر يبي يعقرها قال "يا فهد شطر الفرس" قال " أشطرها تراب " قاله عويض " تكرم" يقول فهد " والله إني عليها بالحسايف " ويوم جاء فهد الدامر أبوه محمد ويعلمه بفعل عويض ويتهول من فعله قال " كيف إن ذا ولد طايف بن خضير، والله إنه ماقد هبلني فعل أحد غيره في الأكاوين مثل فعله وعيونه تيك الحمر" ويردون جيش واجد والمنعاء وهم عددهم ما يتعد العشرين بين خيال وراعي ذلول وصوب هادي أبو سويحة جاء صوابه في بطنه وهو شاعرهم ذاك اليوم وهو من السربة الخيالة ذاك اليوم . يقول هادي أبوسويحه : يا راكب من عندنا عيدهيه=ركابها بمشعاب الرحايل يشومها تنصى بني عمي هل المدح و الثنى=لا جيتهم خبر بشواهر علومها قل لهم ترى الدامر غزانا بجردة=حامي كمي الخيل قوى عزومها ترى مصب الكون على الهوامله=وجا صايح الإبل باديٍ في رجومها ركبنا عشرين تمام بخيلنا=والجيش والزلبات نرخي عزومها ركضنا عليهم ركضةٍ ينحكابها=مركاضنا اللي مثل مركاض رومـــها أميرنا ذيب السرايا عويض= منقض على كبد المعادي سقومها لهوى على جمع السبايا تفرقت=وأقفت تنازى ماتجنب حزومها تباشري بالفك يا حمَّ الذرى= وأحيه من نارٍ كلتنا سمومها قامت تلافت يوم سمعت صوتنا=بوجيهها اللي بيناتٍ وسومها وردتها في الموت تاخذ قسمها=يوم المنايا موجبات سهومها لو إن فزعتنا عليهم تلاحقت=نبري من الكبد المغله همومها دمنا ودمهم حايرٍ في مكانّا= ولا جلاه إلا رايحٍ من غيومها ساعة لحقناهم فحالو دونها=دهم الريافل نطّحونا خشومها ردينا نصيفة جيشهم مع ابلنا= والباقية عيّو عليها قرومها س:- حبيت أذكرك أنت قلت لنا طال عمرك ، إنك بتعلمنا بسالفة إبن رشيد يوم غارعلى الهوامله بالدهناء ، نبيك الله يحييك تعطينا سالفتها؟ هذه عقب ما زل وقت الربيع عودوا آل حسن لديرتهم وقال عويض بن طايف لجماعته ودي أتوخر إلى آخر الربيع وشاروا عليه آل حسن وقالوا أنت بين مخابط الرماح منزلك لحالك بيعرضك للخطر، فقال بيستر الله إن شاء الله ويوم عشوا آل حسن دار الهرج بينهم قالوا " يا سين على إبل عويض ورشيدان بتوخذ " قال حريميص بن خضير الهوامله " الإ ياسين على الربع وإلا إبلهم ما هي بماخوذة وهم حيين " . أقام عويض ورشيدان جنب مع إبلهم ، ورشيدان ولد ٍ توه على ظهرته ، وبعد ما خذوا لهم وقت عزم عويض بن طايف وأبوي على المعواد لديرتهم وإلى ابن رشيد غازي على الهوامله من آل حسن وآل مرة من شان إنهم ظاهر ولايته ولينه يشوف سواد البل قدامه شمال من الغارب الشمالي فقال هذه طوارف إبل الهوامله فغاروا عليها فإتنبه عويض بن طايف للقوم وهم مغيرين عليهم من بعيد فقال "يا رشيدان خلنا ناخذ عبدنا وفرسنا ونخلي البل يلتهي بها القوم هذي سرايا مالنا فيها نطحة"، فقال أبوي "يا خال هو قد وخذت إبل الهوامله" قال "ما خبرته" فقال " وتوخذ اليوم وأنا وياك حضورها قد موتنا أشوالنا" ، قال للعبد "إركب على الرحول وقد لبل وصح لها" "وأنت يا رشيدان حول على رجليك عند تالي البل ببندقك وأنا لامني نطحت هل الخيل ترى بأرفعها عن البل وتقفي الخيل مني وإن أسندت معطيك وجهي ترى بيردون أهل الخيل علي وفرسي رديه وأذل إنهم يلحقوني فأرفعهم عني بالرمي حتى إني أدخل في البل تأخذ فرسي نسم وأرد عليهم ثانية" ويوم قربت الخيل وهي قدها نحاير ومتفرقة من بعد الغارة فكل ما قربت من البل رد عليهم عويض وطرح منهم اللي الله يقدره عليه منهم وتفرق أهل الخيل ولا أسند وعود يبي يلحق البل ردوا عليه هل الخيل أعطبهم ابوي بالرمى في الخيل وأهلها وكلما لحقه خيال رماه فاردعوا القوم من البل فاقفى عويض بن طايف وأبوي على إبلهم وهم متجهين يم ديرتهم مانعينن إبلهم ومحتمينها وجيش ابن رشيد متعقبهم على ثرهم وإلى ابن رشيد يعاينهم من بعيد وقال "وش بلاكم ماخذتوا الابل" قالوا "عيا عليها راعيها" قال "راعي هالفرس الزريقاء الردية" قالوا "الله الله"، قال " والله لوحدر ذا الرجال فرسٍ طيبة كان ما يخلي منكم أحد" ويحول قوم ابن رشيد على قبيلة ال مرة ويغير عليهم وتوخذ إبل آل مرة إلا إبل عبدالرحمن ابن نقادان صك على إبله وعيا عليها ، فقال أبوي الله يرحمه: غاروا علينا مركين=يبغون زرفات الرقاب كنهم حرارٍ مقبلين=والإ ظليلات الهضاب يوم إنثنينا صاملين= ما همنا كثر الحساب قفوا من الإبل منتحين=من ضربنا كثر الصواب لو الجماعة حاضرين=ما راح من رد الجواب س:- ودنا طال عمرك تفيدنا عن المقولة" الشاهد الله إن ذي قريعك شلفا عويض"؟ هذه سالفتها في سنة من السنين جاوا غزوٍ غايرين على آل حسن ومعهم فارس مشهور يقاله شنوف من سبيع فيوم أخذوا البل وأقفوا والإ مع البل ناقة - عدو زينة - فجا عند الرجاجيل إختلاف عليها كلٍ يقول "هذه عديلتي" فقال عقيدهم على هونكم يا رجاجيل هذه عديلة اللي بينطح عويض ذا الحين لا لحقونا تراه أول من بيلحقكم ويقوم شنوف وهو فارس معهم ويدرعها غترته، وقال على ما تشهدون أنا اللي بمنعكم من عويض ولا خذوا الإ عويض لاحقهم أول من لحق من الفزعة اللي ردوا البل والى قوله " جنبوا جنبوا" فقالوا "هذا عويض ياشنوف" وإلى الخيل متفرقة منه وإلى شنوف ناطحه فا ضربه عويض إلى الشلفا مرتكزة فيه لينه مقفي لاحق القوم والشلفا تخاطر فيه ولينهم مقفين رادين اللي ردوا وخذوا اللي خذوا وإلى شنوف متلوي على فرسه ورايحن مع القوم وهو على سابق ويوم أبعدوا وقدهم منتحين من الدهناء وقفوا يعصرون صوباهم ويجرون الشلفا منه ويعصرونها وكل ما عصروها غدا للدم كرير وعفضت الفرس وإلى عندهم واحد من القوم قال أشهد والشاهد الله إن ذي قريعك شلفا عويض . س :- (( ياسين يارجلٍ شظتها الجباير)) شطر من قصيدة لوالدكم رحمه الله ماهي مناسبة هذه القصيدة ؟ هذه سلمك الله فريق في تالي الربيع ما هم بواجد من الهوامله آل حسن منكسين يبون ديرهم واعترضهم واحدٍ من مطير وشافهم وعود على جماعته وقال هنا فريق ما هم بواجد ، ويسربون عليهم بخيل يومهم قريب من أهلهم . الهوامله يوم أصبحوا فشدوا ويوم وقعت الغزية على مرحانهم إلى العرب شادين وإلى هم يشوفون تاليهم فيغيرون عليهم ويوم لحقوهم ولا الهوامله توهم نازلين وهم خمسة خيالة على عويض بن طايف بن خضير الهوامله وهم يركبون عليهم منهم أبوي وطينان بن محمد الهوامله وجتهم خيل الغزية قدها نحاير من بعد الغارة وتقلع الخيل ذاك اليوم كلها وكسرعويض بن طايف ذاك اليوم يقول أبوي يقول : ركبنا عليهن يوم جا العبد ناير=والكل منا سابقه ما مهلها ما قد خبر فينا ذليلٍ يخاير= شهب الرصاص منطحينه قذلها ذا واجب الزلبات عند العشاير=يا نافد اللي حملوها عذلها يا سين يا رجلٍ شظتها الجباير=ياليت رجلي بالجباير بدلها يا سين يا حامي المهار الثباير=زبن الثبور اليا تردت باهلها لا غورت الأصوات والعج ثاير=جواد خالي دايمٍ ذا عملها جواد من يثني لراعي العثاير=مخلي ظهور الخيل رمحه شكلها وعانهم الله مع قل عددهم والقوم واجد ويقول واحد من مطير: ماغير الدواسر خمسة= وإنا أربعين إعناني ويش عذرنا من حصة= لا من لفا الغزواني س:- راع المدا إشتهر بالشجاعة ، ودنا تذكر لنا موقفٍ حصل له قليل من يثبت لو كان في مكانه ؟ عويض بن طايف الله يعفا عنه مواقفه واجد سنة من السنين ثلاثة بيوت ما فيها الإ ثلاث رجاجيل من الهوامله آل حسن نازلين الحسينية يوم قد إبلهم على الماء إلى ذولاك القوم من آل مرة طاقين الغارة عليهم وإلى مابه إلا ثلاث رجاجيل عويض بن طايف بن خضير الهوامله وعبيد بن خضير الهوامله ومحمد بن خضير الهوامله ويعدونهم من البل ومن الماء ويوم تقالّوهم وهم اللي ينوخون وإلى الربع يعتزون وقاضبين المحاجي فقالوا "منا بخابرين الهوامله يقضبون المحاجي" فقال عويض "لا تقومون يبونكم تقومون" وهم اللي يفرون عليهم ويوم تموا عليهم فيضربون محمد لينهم ذابحينه ويضربون عبيد لينهم مصوبينه ويلاويهم عويض ويعريهم من البل والماء ويقومون يسايلونه وقال والله ما تذوقون لها برد ماء وأنا على جالها ويعرضهم المضماه لحاله وهذه من سوالف عويض وسوالفه واجد . س:- (( خبر اللي حاضر هجلـة سرابة)) هذا شطر من قصيدة وش مناسبتها؟ عربان من آل حسن نازلين على الريحان عند الخرج ويجي راشد بن نديله ومعه غزية قوية من آل مرة ومعهم ركب من آل حبيش العجمان ويغيرون على ذيدان مطرفه ويجي طراد مهوب أقصى وقفوا على البل ولحقهم عنبر المقابلة وهو رجال مشكل وخيال وقام يلاويهم وإلى الليل ضاويهم والعرب والفزعة ما بعد جات ويقوم أنت يا عنبر ويلز فرسه عليهم يبي يعرف وين وجهتهم قال : " يا بن نديلة أمن أنا بجيك ، أبي أجيك من قريب" قال : " أنت آمن" قال : " أمنّي أنا وفرسي" قال " أنت وفرسك" ويحذف عليهم الفرس قال : " يا راشد أبي أعلمك بالابل العيافي اللي بترد بالسلوم فإلى من جاء الصبح وقسمت البل ما تحطها في سهم ربعك" قال : " القوم من يوم ثوروا وهم في ذمتي كلهم لا تعلمني بشيء " -أثر عنبر يبي يخدعه - قال : " هجل بعلمك بإبل ٍ على دربك وأعقل علي" قال : " الهوامله إني خابرهم ومجنبهم" قال : " فريق ما هم بواجد" قال : " إني خابرهم ومجنبهم ولا بعد وخذت إبل الهوامله" قال : " أجل عطوني ماءً أشرب" قال : " أما الماء بنعطيك ماء ، عطوه ماء يشرب ويوم عطوه الماء وشرب" (( وعنبر يبي يعرف الماء وينه منه)) ويركب فرسه ويعود، والإالعرب ناطحينه والفزعة والإبل متعرضةٍ الليل ولا يدرون وين بتشرب منه قال عنبر : " يا قوم أنا لحقتهم وتكلمت مع ابن نديله وشربت من ماهم أبي أعرف ويش ما هم وماهم من سرابه وتراهم بيعودون عليها " . ويجتمعون الفزعة ويركبون قال السنافي من الصخابرة : " خلوني أبي أستفزع بالهوامله الفريق اللي عند صمغان " قالوا : " توكل على الله " ركب وفزع ولاخذ الهوامله مع الفجر قايم منهم رجاجيل بيصومون عليهم قضاء ألا والرجال مقبل عليهم يرزف قالوا : "هذا مستفزع" ويوم نوخ قال : "يالآد هويمل يا هل البل ، البل وخذت من عند الريحان في الخرج وهي شاربة من سرابة وبتعود عليها " وإلى مابه إلا سبعة رجاجيل وهم اللي يركبون ويفزعون ويوم أقبلوا على سرابه وإلى القوم محولين على الماء قال السنافي و السنافي مشكل و رجال طيب " يا هوامله على هونكم الفزعة خلوها تلحق" قالوا : " أمس جاينا ترزف وذلحين تقول الفزعة بتلحق ، لو انها بتلحق ماجات الإبل عندنا هناه" المراد حوّلوا عليهم ويجي بينهم مرامى وهم ذولا السبعة ولاخذوا الا الرجاجيل يعتزون "خيال الحرشاء وأنا إبن هويمل" الى قولة واحد من آل مرة " ما نتم بالهوامله، الهوامله خابرين طرادهم معيلة الطراد ما هم بيقضّبون المحاجي" ويوم سمعوا ذا الكلمة وهم اللي يتطامرون قال السنافي أو واحد منهم : " تراه يلعب عليكم يبيكم تقومون من المحاجي" قالوا : " هذا سلم لنا والله ما نخليه " قالوا : " بيعة ، بيعة" ويتطامرون من محاجيهم ولا خذوا شوي الإ وهم مظهرينهم من الإبل والإ راشد بن نديله توه جايٍ مع هالركايب توخر بعض ربعه قعدوا يجزرون لهم ناقة منكسرة معهم ويقوم ينوخ ذلوله وهل الركايب اللي معه وإلينه يسمع عزاويهم وهو اللي يتعزوى بعزوته والله ما درى ويشهي وإلى قولته "الله يقطعش يا الخلبة العفنة لا كان أجنب والله ما تـنتخلصين من حلقي" فيمدونها عليه فيضربونه لينه طايح وإلى صوابه مكين حتى يحسبون إنه مات وفكه الله ويشيلونه ربعه اللي معه قد قومه منكسرين ويوم خلصوا وردوا البل وإلى الفزعة جايتهم ولا ذبح منهم إلا فهد بن فراج الهوامله وهو رجال يسوى ويقول شاعرهم : خبر اللي حاضر هجلـة سرابة = ما تنينا اللي على الساقة بياتي سبعة ولقوم (خمسين) أو (سبعين) قطابة= والفشـق من بيننا متخالفاتـي ويوم جا سنة من السنين عقبها وإلى به ربعٍ من الهوامله طروش ويحولون على راشد بن نديلة ويقوم راشد مثل عادته ويكرم ضيفانه ويفعل لهم الشحم وقالهم يضحك : " يا هوامله ودكم إنكم ذابحيني ذاك اليوم لو ذبحتوني كان مالقيتوا لكم معزبٍ الليلة" فقالوا : " والله ياراشد أما ذيك الساعة فودنا إنا ذابحينك وأما عقبها، فلا والله مثلك يشح به ونبيك سالم لهشال الخلا" . وهم صادقين راشد وافي جامعٍ العلوم الطيبة الله يرحمه دين وكرم وشجاعة . وعلى طاري شجاعته فراشد الله يعفى عنه ما يوني ركبه على نجد فجا له مغارة ٍ على الشيابين وعلى الغزيز خصوص وخذا له إبل ولحقوا أهل الإبل وجا بينهم طراد ٍ قوي ويقوم راشد ويحول عند تاليهم ويضرب إلينهم كاسرين رجله. ويحولون عليه ربعه ويشيلونه، وإلى أهلهم بعيد ٍ صوب الجوافير حدرا قالوا ربعه : " بنشوف لك حدا ذا الدّير نحطك فيها إلين تجبر رجلك" قال : " هجل تعدّوا تعدّوا يم الإفلاج نحروا بي حزام بن خزام العجالين" يومه عارف ٍ من هو حزام والا مر له بقراياً واجد ماقال حطوني عندهم فقال له ابيات منها: يا رجل ياللي شكت من مضرب العود=تشكي العنا من صليبات الجباير ويارجل ياللي ما مشت درب منقود=ولا وقفت في ما قفٍ للقصاير رجل تحول وتالي الجيش عرجود=ولا هي تمصلح وأقبس الحرب ثاير وينصون به حزام ويرحب بهم ويكرمهم وقال لخويا راشد : " وداعة الله راشد عندنا بين أهله وانا أحرص عليه منكم" ويستلحق المجبرين ويزنون الجباير له ويجبرونه . ويقوم ويحط مجلسه بالديوانية وتصير جلساتهم دايم ٍ عنده وكل يوم ٍ على كرامة مدة أربعين يوم ، إلين جابر كسره وعود صوب أهله ويسمي أكبر عياله حزام على حزام بن خزام تقديراً له ومحبة . س:- إشتهر الأمير محمد بن عواد بالدهاء ، تذكر لنا أحدى غزواته ؟ غزى الأمير محمد بن عواد بالفرجان مره على عرب ٍ من آل مرة على حرض ويجيهم النذير إن محمد غازيهم وإلين على أم أثلة عرب قويين منهم ، ويوم جا هل أم أثلة المستفزع من ربعهم اللي على حرض فيركبون فزاعة ولا خلوا إلا رعيان الإ عند العرب على الماء . ويوم خذا محمد بن عواد في طريقه قال : " ياقوم أنا ما ادري ويش يورا لي إنا بنجنب حرض وبنحوّل على أم أثلة " وهو من أذهن الرجاجيل ظن إن العرب جاهم النذير . فقال ميد ربعه : " من يدلنا على أم أثلة " فقال فلان ضيعت إسمه من الهوامله أما إسمه فواز واالإ إبن فواز . فقال الهويملي : " بدلكم لكن على شرط جميع ما لفلان ذي وسيمته ، واحد من آل مرة بينه وبينه قصرة ورفقة ، ماتاخذونها ". فقالوا : " وهي لك" . ويحولون على أم أثلة ويرسل محمد الهويملي وواحد معه، يديرون العرب. ويجون الثنين محولين ويتقربون العرب ويجونهم يحبون وسمعوا بعض نسوانهم يقولن : " إن حروة ربعهم الليلة على حرض". فيعودون على محمد ويعلمونه. ويوم أصبحوا فيصبحونهم ويقشعون حلالٍ ماله حد ، ويقوم الهويملي وياقف دون بيت رفيقه المري وإبله ولا دور ذيك الساعة الكسب ، وذاك اليوم وافقوا وردة الإبل على الماء من طيب حظهم . فقال واحد ٍ من أهل البيت اللي يحماه إبن فواز : " ما عينت خير ولا كسبت خير , رح وتعين القوز ذاك قبيل إنك تعّين وراه شي". وينصى الحزم ويعين خمسة عشر لقحة ويقفي عليها ولا جا عنها طراد أهلها غيب . س:- بيت يقول : سلم على الفرجان لارحت ياسيف= سلّم على الفرجان بدوٍ وحضرا نبي منك طال عمرك تعطينا مناسبة البيت ، وفي من قيلت ؟ هذي قيلت في الأمير سعود بن عواد وهو من ندّر آل حسن . غزى سعود بن عواد الصخابرة مرة بالفرجان والإ قدامه ذيك الإبل شادة ومظهورها وسطها . والإ المظهور بعارين وعليها بيت ٍ وجشان واجد ، ويغيرون على الإبل وما عندها الإ رجال واحد على فرسه يوم شاف إن ماله نطحة فاقفى وراه . فقام انت ياسعود بن عواد ويلز على المره وهي على ظهر ظلتها ونشدها " من ذا مظهوره" قالت : " ذا مظهور إبن هويمل بن نقادان" فقال سعود ميد ربعه : " ياقوم المظهور والبعارين لا أحد ٍ يتعرض منها شي" ويقوم ويعزل جميع البعارين والمظهور ولز على راعية المظهور وقال ميدها : " علميه يلحقني وأعقل عليه " ويقفون بالابل . فقال الشاعر هادي ابو سواحة : سلِّم على الفرجان لا رحت يا سيف=سلم على الفرجان بدوٍ وحضراَ سلِّم على اللي بالقسا تكرم الضيف=متنفلٍ فوق القبايل بشبراَ أهل القصور اللي ذراها من الحيف=يفرح بها الهشال في ليل غدراَ يا نافدا اللي عند ذيدانهم هيف=وفعولهم بالحفّْ ما هي بتبراَ كم شيخ قومٍ جاه منهم تداريف=تصبح عجوزه عقب الالباس غبراَ كم صنفوا فوقه الخيل تصنيف=خلي عشا للطير والذيب الاقراَ يا ما طرحنا فوق عوج المحاريف=ما عاد يحفر له على الخد قبراَ هجنٍ تعادى بالوسامي وبالصيف=وطعامها بالقيظ قتٍ وتمراَ مرٍ على نجدٍ ومرٍ على السيف=و سعود ابن عواد مقدّي كل نمراَ س:- من الوقعات اللي حصلت وقعة القانس ودنا تعطينا تفصيل فيها طال عمرك ؟ جت جرة قوية من عبيدة وأميرهم ناصر بن الأشرف ودهم على ورقان بن هضبان وآل دمنان على ابن بطينها غازين ويوم جاوا القانس ولين ذولا عربان من الهوامله نازلين على صاهود بن نقاء ويوم جاوا القوم لين ذي البل قدامهم ويغيرون عليها ويوم غاروا ولينهم يشوفون وسيمة الهوامله قال ابن بطينها : ياقوم ان طعتوني جنبوها هذولا الهوامله ماقد وخذ لهم ابل بيلحقونكم وبتشوفون طراد مابعد اعتلمتوه قال ابن هضبان امير دهم : اللي انت تقوله حنا نعرفه عنهم ويادهم دامها ابل الهوامله اتركوها ماتشوفون البل شيب ماتغيرت وسومها وينجذبون ( دهم وآل دمنان ) قال ابن الاشرف أمير عبيدة : يوم خذينا البل وحنا جمعة قوية فنخليها مناب مخلينها ويجون يسوقونها ويلحقونهم انت ياحمدان بن خضير الهوامله وحسين بن جلعود ويترامون هم وياهم ولين العرب يسمعون الرمي ويلحقون الفزعة الهوامله واثنين من الشكرة وهذولا اول الفزعة اللي هم جنب عند البل ولاهيب الذيدان اللي غير عليها وباقي العرب يوم لحقوا لين البل مردودة والوقعة قد خلصت ومع الفزعة الاولة سويد بن ضاوي الخضران وحقه الشحم يوم لحقوهم فيطمر واحد معه و مهوب منهم يرمي ويقول : سووا سواتي يالعيال قالوا : الفزعة هاذي سواتنا ويطقونها عليهم غارة وهذي عادتهم الهوامله معيلة الطراد ولينهم ظاربينهم ويامرهم الله ويذبحون 15 رجال في وردتهم منهم شيخ عبيدة ناصر بن الاشرف ويمنعون المنعاء ويقول سيف بن داجي الهوامله وهو من الفريس أبياتٍ مسندها على أبوي رحمة الله عليهم جميع يبشره بالنصر و بأنهم ردوا إبلهم. يا راكب ٍ من عندنا فوق ظبيان=يشدي لهيق حايز من بـلادي اليا ركبـت إنحر جماعـة رشـيـدان=ثم خبـره باللي يســر الفـــوادي أبشر اليا جيته بحيل من الضان=في بيت قرم ما حسب للنفادي يوم وصلت ذا الابيات والخبر أبوي الله يرحمه فقال ذا القصيدة متنومس بفعل ربعه: - البارحة من لذة النـوم قليـان=من وقعـة تذكر ولا جاء وكـاي علم لفى وأصبحـت انا منـه مشـتـان=هـذا قصــر منه وهـذاك زادي سيف يعملـني بمافي القلم كان=وأصبحت أغني في طويل المبـادي علم يصيبنا وحن كان شيبان=فعـل تعالـم بـه جمـع الـــبوادي يقول قد جونا عبيدة وورقان=جونا على الحكام جمع يذادي يبغون خلفات تثنى لحيران= والأمهاوية الجمل بالهدادي من دونها ننطح شباكل شيطان= ونقلط على حوض المنايا عمادي في وردنا خمسة عشر كل من حان= وطاح ابن الأشرف فنحور العوادي ومن نار منهم علقت فيه الأكوان=على وطنهم ما لفوا بالعدادي ذا شرع قومي من على وقت بدران= نخلف هقاوي ناقلين الهنادي نطاحه للشر لو كان جذعان= كنهم حرار في ليالي الهدادي ليعون قطعان رعـت نبت لكـــدان=في سدنا ترعى نبات الحمادي ذيدانهم ما قرعاها بالسكان= ما قرعت بين الجبل والإبلادي في سد كل مجرب في اللقاء بان= يدجراليا من سمع حس المنادي ومن عقب ذا يا راكب بنت ظبيان= تشدي لعفري من الزول حادي تسرح من الحقو مع وقت الآذان= والعصر عند أهل المجاري تقادي سلم على ربعي شباب وشيبان= خياله الحرشا نهار الطرادي عزوتهم الحرشا اليا ثار دخان= عقالهم معاد تعطى القوادي يا ليتني معهم على كل ما كان =على القدى وإلا على غير قادي من قام يدري زاده الله بخذلان=ماهو بمن سهم المنايا بغادي س :- الوقر هو مناخ قوي بين آل حسن ويام وعمدتهم آل مرة والعجمان يوم محمد بن ضاوي الخضران يقول :- يا ليت عينك مع هل الوقر تارى=يوم الهداوي بينهم كـل مقـراه بودنا معرفة أسباب هذا المناخ ؟ هو مناخ قوي بين آل حسن ويام وعمدتهم آل مرة والعجمان يوم محمد بن ضاوي يقول : يا ليت عينك مع هل الوقر تارى=يوم الهداوي بينهم كل مقراه وسببها أن بينهم أمور سابقة على الحراقين الهواشله و على ابن جعيري فاستحموا بآل حسن وجاو آل حسن على الوقر ونزلوا من أشهر رؤوساهم ذاك اليوم جعمل بن خضير الهوامله وجو آل مرة والعجمان ونزلوا بوزانهم ودرجت الجموع وتسارحت وتراوحت وفتعلوا رجال من آل حسن فعل تنومسوا به ويجي للأمير جعمل بن خضير الهوامله فعل قليل شكله حتى إن به إثنين من القوم عيال عم يوم درِّج الجمع فيقول واحد منهم للثاني : " نعنبيك لا شفت الرجال واقف لحاله ، ومرتكي للجمع اللي يواليه فجنبه تراه جعمل - ومعه ( الطويلة ) فرد عليه وقال : " لا توصيني اللي في قلبك في قلبي" وانكسروا العجمان وآل مرة كسيرة قوية ويقول الشاعر / محمد بن ضاوي بن منديل الخضران وولده مرسول من الفريس اللي حضروا الوقر وجاله فيها فعل ٍ قوي حيث عقرت فرسه ذاك النهار. يوم نوخو مثل الحرج بوزانا=منا ومنهم قربت الاجالي ثم شيدَ الفرجان بيوتٍ بيِّنه=بيوتٍ على الحرب الضرير تصالي يـا نعـم يـا بن جعيـري يــوم التـقـو=من فوق قـــبـاً حـأيـلٍ مشـوالـــي يا سربةٍ دقة بنا من قبلة=مثل القطا يبغي شروب زلالي وجــعـمـل بــن خضـيرٍ لـه مـا قف=مثل الأسد رزنٍ ولا ينحالي اليا درع في شهرة ٍ مصيونة=يسوقهم كنه دفيع متالي معه الطويلة شاب ٍ ومشبب=وأشعل قروم القوم منها إشعالي نبهت مرسول ٍ بصوت ٍ شاهر=إبني عداه اللوم من الحوالي ينافد اللي كثروا لي مدحه=ما هوب قنا خايب ٍ هسالي عقرت جواده يوم ماصدد بها=وذا شرع من هو للذخير يوالي والآد شكر الياجات هيه=نزاعةٍ منا بعض الأحمالي يا جعل من مشى بالنقيلي بينا=سم الحنش في مرقده سلسالي نبغي لا رد البرى من حفنا=واليا انا فعين العدو إجلالي وأقول ذا وألا فلا لي سابق=ويا ليتني يوم التقوا خيالي فلزم علي إن تعد فعايلي= ولو كان أن فالرجال زلالي س :- طيب ياطويل العمر عقب مناوخ الوقر وكسرة آل مره والعجمان بفعل آل حسن وش اللي ترتب عقبه ؟ عقب مناوخ الوقر لين العجمان وآل مرة يطلبون آل حسن رجاجيل ٍ واجد فجمَّعوا جمعة ٍ مهيلة يجي عددهم ثمان مية ويصولون على آل حسن و إلى آل حسن نازلين على الحنيِّة ومن كبارهم ذاك اليوم عويض بن خضير وجعمل بن خضير و إلى الإبل عندهم واردة ويوم اقبلوا عليهم العجمان وال مرة فجاو بوزانهم ونوخوا ويقومون يعرضون متكاثرين عددهم وقوتهم وإلى آل حسن مظهرين جمعهم قدامهم وارسلوا لآل حسن يومهم يشوفون القل فيهم عطونا من الإبل ونعّود و إلى واحد من القيمان ما هو بمشبب رايح ٍ للماء يبي يشرب فعين له واحد من آل حسن على الماء فقال : أسقني فقال: رح وراك قال : اسقني والإ ذبحتك ويمدها عليه وإلى الأمير جعمل بن خضير يشوفه وهو اللي يعتزي " خيالا الحرشاء وانا ابن حسن" ويمدها عليه ويضربه لينه ذابحه ولا قولته للي على الماء " اخذ جوخته " فِجا الخبر للأمير عويض بن خضير فقال : " عليهم يآل حسن " ويقومون ويدرجون الجمع عليهم ويجي ذبحة قوية ذاك اليوم ويذبحون شيخانهم ذاك اليوم اللي حضرو ا ، ويقول ( الهذية ) : أنـا هاضني من يمـة الشرق جردة=ثمانمية ٍ لاكثر الله حسابها جو على قطبى البيوت ونوخوا=يبغون ذيدان طوال ارقابها غارو على ترثة صهيب بن زايد =احسنيةٍ وأفعالهم ينحكابها عيا عليها عويض هو وجعمل=خيالة الحرشا نهار العزابها يفدَّونهم فدّ الفهد شرّد المها=لين قالوا خلفات الفضا مالنا بها خسايــــرنا منهم ثلا ثين حافـــر=وخسايرهم الشيخان نهفي إرقابها وخذينا منهم ثمانين نضوة= عمانياتٍ يجدد زهابها وخذينا من دهم الفرنجي سلايل =سخاف المجاري مذهباتٍ رقابها قولو لذيب الوقر لا قل كيله=يطرش على ذيب الحنية إعيابها يا راكب وجنا منى السير والسرى=وقمً رباعٍ ما بعد شق نابها تلفي بنا في عثعث الدحي لا به=هل سربةٍ من جا إحذاها درابها تلفي بنا فيحان زيزوم سربة=حامي العشاير لين كلٍ يهابها إن بان لك من يمه الخيل فرجه=صوب الرديني والرديني إحجابها حنا إحمى الوادي بسيف ٍ وبندق =فرنجيةٍ معاد يبرى صوابها لي لابة ٍ زبن المجني لا وزى=أهل كرمةٍ كم جايعٍ يهقابها نواسة الحربي على كل ضامر=لا قامت العبلة تلالا سرابها عيد لهشال الخلا لا لفوهم=لا جو من الفرجة حفاياً ركابها قصيرهم يهمل بليا نقيلة=من الخرج إلى خرب رعى في جنابها س :- ياطويل العمر حصل بين العجمان وابن عريعر بعض المناوش في مناخ يسمى الرضيمة ، ما هو دور قبيلة الدواسر في هذا المناخ ؟ سالفتها إنه جاء بين العجمان وابن عريعر بعض المناوش وقاموا العجمان واستحموا ببعض يام وجاوهم وإستحموا بالدواسر واستحموا بمطير على الدويش وإستحموا بالسهول ،ابن عريعر نازل على الرضيمة ومعه عربان واجد من بني خالد وعنزة وسبيع وغيرهم . حصل وقتها مناوخ قوي ويوم وصلوا الدواسر وهم أتلى من جاء محددين إجمالهم اللي عليها المزين وسايقين عدة مزينات من ضمنهم مزين آل حسن عليه بنت مروان بن خضير . يقول الخفيف العجمي : وجينا بخطلان الأيدين آل زايد = قومٍ تراثع فالأحدة ركابها حداد الجمل هي من سلوم الدواسر في الحروب . وعقب ما شركوا الدواسر ذاك اليوم والحرب متغير ميزانها على ابن عريعر وقيمانه ثم جات الكسيرة عليهم قويه واخذوا ذاك اليوم الكسب من الحلال والحله ولا هو بصحيح إن الريشة وخذت ذاك اليوم او ما يقوله بعض الناس إن ابن قويد طلبها ذالك اليوم ألا إنه خذاها ابن قويد في كون( وارة). س :- مناخ العريق ذكرت انه من أكبر الأكوان اللي صارت ، كيف وما هو سببها ؟ العريــق من أكبر الأكوان اللي صارت وسببها ذبحة ولد الأمير وقيان بن نصار ذبحوه العرينات من سبيع إعترضوه وهو رايحٍ مسير مع أخوه من أمه من الأعزة من سبيع . واللي خلاهم يذبحونه انهم يطلبون الغييثات دم واللي ضّيق وقيان أن ولده رايح مع أخوه يوم إعترضوه وقال : " والله ان أسوق الضعن على الضعن " قال ووفا- شد ونزل إحذا خريم وسبيع نازلين على عريق خريم . ويجي العلم سبيع بإن إبن نصار نازل إحذاهم يبيهم ويقومون ويقلدونها الشلايل يستحمون وجاوهم سبيع ومعهم السهول . وقم يا وقيان ويقلدها الشلايل لآل حسن مخصوصة – يوم إنهم اللي حذاه وإلا الدواسر قليل إنهم إجتمعوا في حرب ، الحدريين اللي حدراً من العارض يناوخون القبايل الي عندهم وحدهم ولا يستحمون بالأعلين اللي فوق العارض ، واللي فوق العارض يصادمون اللي من صوبهم من القبايل ولا يستخمون بالحدريين . ويوم جا العلم آل حسن جاوا صايلين صوب الغييثات وساقوا الضعن . تخبر ممشاهم ماهو بسوى لكن عمدة العرب وكثرتهم ممشاهم ممشا المظاهير. المراد وقيان جا بينه وبينهم طراد خيل ومحاذف رمي في اليوم الاول ، يوم جا النهار الثاني الى بأول الفزعة ياصل ســاعة أقبل أول دبش آل حسن على الغدران اللي تحول على المنقع وأول مظاهيرهم مابعد نزل إلى بسبيع تشوفهم ويقول بعضهم :- " خلونا إنسوق عليهم الجمع لا تقعدون إلين يتكاملون". وتحول جموع ومزين وخيل سبيع ويناوشون الحاضرين ذيك الساعة من آل حسن اللي على ذلول واللي على فرس وينطحونهم . وجموع آل حسن وكثرتهم ما بعد وصلوا وإلين إبن حفيظ توه يبني بيته ولا بعد رفعوه ويرفعونه عجلين . وإلا الوجيه متلاقية و إرتكوا الدواسر ذيك الساعة على إنهم متفرقين من القل وتشوش سبيع ويكثر الذبح فالدواسر ولين البيرق مع محمد بن خضير الهوامله اللي يقاله بحيران والعرب متفرقين عنه ويضرب مثنات سبيع ويزهم ويجي عنده ضرب وإتقاي ويتحاولونه سبيع ويضربونه الينه ذابحينه ويتم على البيرق حسن بن خضير الهوامله ويضرب الينه طايح ومصوب ويحول عليه ابوي ويشيله ويظهره من مثناتهم يقول ابوي يوم شطرته عنهم فلا عاد قدرت اشيله ولين جمعهم واصلني ولانيب تاركه وقد همي ذيك الساعة اني اخذ في عمري وفيه ولين ذا سند بن حفيظ قدام بيته والبيت توه مبني ولا بعد روق يزهم يالآدحسن يالآد شكر يالآد علي مخصوصة ويجي قدام بيته ويثني ويسوي سواة قليل من يسويها واتمايل عليه واحط الصويب في متقى واجي عنده ويجي عندنا ربع ماهم بواجد بذكر لك منهم الضياف من الشكرة سوى الهوايل واعانا الله واركينا جموعهم عندها والين انا هازعينهم من المحل عقب يوم طويل وإلى بالمظاهير مقبلة عمدة مظاهير الفرجان ومظاهير آل عمار والحراجين مابعد جا قبل ذيك الساعة منهم احد. وإلين الله عاينا عليهم ونقفي بهم إلين طببناهم بيوتهم وتجي الكسيرة فيهم وناخذهم وأول من وصل لبيت الحرب هو ناجي بن فنيس الهوامله ويقوم على البيت وياخذ ما كان فيه من دلال ومعاميل "؛ وأنا خابرها عندهم إلى وقت قريب. س :- طال عمرك هل من كلمة لـ أبنائك منسوبي الموقع الرسمي لقبيلة آل حسن الدواسر ؟ نحمد الله سبحانه وتعالى الذي أنعم علينا بنعمة الأمن والأمان في ظل شريعتنا الأسلاميه السمحه كما أحمده سبحانه أن هيأ لأهل هذه الارض الطيبة رجلاً جعل الله نصب عينيه فحقق الله له ما تمنى تحت لواء التوحيد وكلمته حيث أصبحت هذه الكلمة هي الكفيلة بتوحيد هذه الدولة الفتيه بعدما كانت في شتات وتنازعات قبليه ، وصراعات لم يكن فيها غالب ولا مغلوب بل فوضى عارمة و زعزة ليس لها ضابط ولا رادع وكل من عاش هذه الحقبة الزمنية ناله منها من خيرها وشرها الى أن أوجد الله الموحد الملك عبدالعزيز بن عبدالرحمن آل سعود رحمه الله فقام بما قام به جعلها الله في ميزان حسناته حيث توحدت هذه القبائل العظيمة والمتناحرة وسبحان الله تختلف القلوب دائماً إلا إذا كان الجامع كلمة (لا إله إلا الله محمداً رسول الله) كلمة جمع الله بها قلوب الأوس والخزرج وهي قبيلتين عظيمتين على يد رسولنا الكريم. فها هو المشهد يتكرر ويتم لنا المجد بعد ما أصبحنا جميع القبائل بنعمة من الله إخوانا وقد كنا على شفا حفرة من النار فأنقذنا رب العزة والجلال منها وذلك بإنتمائنا إلى ديــن الإسلام وهذه والله القوة الحقيقية والعزة والمفخرة. فحن في نعم كثيرة وصاحب النعمة دائماً محسود؛ نسأل الله أن يثبتنا على هذا الدين الحنيف وان يميتنا عليه وأن يحفظ ولاة أمورنا القائمين بشرع الله وأن يرزقهم البطانه الصالحة والناصحة اللهم من أراد لهذه البلاد أو بلاد المسلمين سوءاً أن يجعل تدبيره تدميره ياقوي ياعزيز. أوصي نفسي وإخواني وأبنائي وكل من ينتسب إلى حسن بتقوى الله في السر والعلن والتمسك بسنة رسولنا صلى الله عليه وسلم وأن يكون الدين هو الأساس وليس ما عليه الاباء والأجداد فجميع عادات أبائنا وأجدادنا الحميدة التي أقرها الدين الواجب علينا أن نتمسك بها وأن نحرص على نقلها للأجيال التي تحل محلنا وأما العادات التي تخالف ما جاء به ديننا فعلينا تركها لأن طاعة الله أولى. وعلينا أن ندرك جميعاً أن الحاضر هو أساس مبتغانا جميعاً وعليه فأنصح نفسي وأنصح إخواني وأبنائي ان نكون أناساً صالحين متحابين نقدم كل ما نسطيعه في تحقيق التواصل والتسابق للمعالي وتبادل الكلمه الطيبه والاعمال التي تقربنا إلى الله تعالى. فالماضي لم يبقى منه الإ الروايات وماذكرته في هذا اللقاء هنا ليس للتفاخر لا والله ولكن لرغبتي في توثيق التاريخ كما هو من غير زيادة وذلك من ما أخذته من الرجال الثقات وما شهدته في حياتي الماضية ويجب علينا أن نكون رافضين بكل ما اوتينا من قوه كل من تسول له نفسه الأقدام على زرع الفتن القبلية. فقبل الختام أود أن أقول من سقط له سهم أو إسم في هذا اللقاء أرجوا منه أن يسامحني وهذا هو حد علمي فإن كان ما ذكرته صواب فهذا توفيق من الله وإن حصل أي تقصير فإنني بشر أصيب وأخطي فالعصمة هي فقط للأنبياء عليهم السلام. أشكر الأخوه منسوبي موقع قبيلة آل حسن الدواسر على الأهتمام بـ المؤروث التاريخي لقبيلتهم وتدوينه للأجيال الحاليه والقادمه ، وتنمية العقل بكل ما يفيدهم في حياتهم ، كما أوصيكم بالتحري والتدقيق في كل ما ينشر وأخذ المشورة من أصحاب الرأي الصائب فقبيلة آل حسن الدواسر تزخر بالكثير من الرجال الثقات الذين يهمهم صالح القبيله . وزيارتكم لنا اليوم تعطي دلاله وأضحه بإن القبيله لديها من الشباب المتحمس لخدمة قبيلتهم في أي مجال ، وعملكم هذا إن شاءالله أنه في ميزان حسناتكم وصدق نواياكم سوف يسهل عليكم الكثير في متابعة وتدوين كل ما يتعلق بالقبيله فنحن معكم قلباً وقالباً في هذا الأمر الطيب معنوياً ومادياً والله أسأل أن يحفظنا وأياكم لكل ما يحب ويرضى أنه سميع ٍ مجيب. . هذا أيها الأخوة الكرام قدم شرف الأمير /
راشد بن رشيدان بن خضير الهوامله الفرجان ( رحمه الله تعالى ) موقع قبيلة آل حسن الرسمي بخطاب شكر وتعزيز على ما يقوم به من نشاطات إعلاميه نالت على رضى الجميع ، ويسرنا أن نضعه بين أياديكم . اليكم هذا الخطاب النير ![]() وبعد ذلك التقطت الصور التذكارية في مجلس آل خضير الهوامله الكرام : ![]() الأمير الراحل وأبناءه من اليمين --عبــدالله -- فيصـل-- فهـد-- وحفيده وعضو منتدانا سعود ![]() الأمير/ عويض بن رشيدان بن خضير الهوامله (حفظه الله) يقف خلفه من اليسار أبناءه --راشد--نايف --محمد بن راشد بن رشيان ![]() أبناء آل خضير الهوامله ![]() أحد أطفال آل خضير الهوامله ![]() أمراء وأبناء آل خضير الهوامله وإدارة الموقع وفي نهاية هذا اللقاء التاريخي نتقدم بالدعاء والرجا إلى المولى سبحانه وتعالى أن يتغمد فقيد قبيلة الدواسر الأمير الراحل / راشد بن رشيدان بن خضير الهوامله الفرجان بواسع رحمته وأن يجعل مثواه رياض ٍ من رياض الجنه وأن يسكنه في الفروس الأعلى مع الشهداء والصديقين اللهم أقبل دعائنا يارب العالمين . كما نشكر أمراء وأبناء آل خضير الهوامله على كرم الضيافه وحسن الأستقبال واهتمامهم الرائع بـ إدارة الموقع وتجاوبهم الطيب في كل ما يخدم قبيلة الدواسر . واخيراً وليس أخراً يسر موقع آل حسن الدواسر أن يضع دومٍ لـ كافة الأعضـاء والزوار كل ماهو يخدم صالح القبيله من خلال هذا المنبر الاعلامي ومتابعة أخبارها على كافة الاصعده ونعدكم بالمزيد من اللقاءات والتغطيات والفعاليات بإذن الله تعالى . والله ولي التوفيق ،، الحقوق محفوظه لدى : الموقع الرسمي لقبيـلة آل حسـن الدواسـر www.aalhasan.com (( المتحدث الأعلامي الأول على شبكة الأنترنت ))
|
||
|
![]() |
![]() |
#2 | ||
|
![]() بيض الله وجهك يابو زيد على تزويدنا باللقاء
|
||
|
![]() |
![]() |
#3 | ||||
|
![]() الله يغفر له ويسكنه فسيح جناته..
|
||||
|
![]() |
![]() |
#4 | ||
|
![]() اشكرك على هذا النقل الرائع
|
||
|
![]() |
![]() |
#5 | ||
|
![]() نشكر الأخوان في ادارة منتدى آل حسن الرسمي وعلى رأسها الأستاذ سعد بن سالم بن تركي على هذا اللقاء التاريخي الرائع والممتع مع الأمير راشد بن رشيدان الهوامله نسأل الله له الرحمه والمغفره ، ونشكرهم على اتاحة عرضه في موقع قبيلة الدواسر الرسمي ضمن التعاون المطلوب بين ابناء القبيلة .كما اشكر اخونا مشرف الاقسام التاريخيه الأخ بوزيد الغييثي على نقله وايراده هنا .
|
||
|
![]() |
![]() |
#6 | ||||||
|
![]() بيض الله وجهك يابو زيد ووجيه الاخوة في ادارة منتدى ال حسن على هذا اللقاء التاريخي الزاخر ورحم الله فقيد قبيلة الدواسر الامير / راشد بن رشيدان ال خضير الهواملة الفرجان واسكنه فسيح جناته وبارك الله فيمن خلف
|
||||||
|
![]() |
![]() |
#7 | ||
|
![]() بيض الله وجهك يابو زيد على تزويدنا باللقاء التاريخي الزاخر
|
||
|
![]() |
![]() |
#8 | |||
|
![]() اقتباس:
اررررررررررررررحب يا بو هادي ووجهك ابيض وبيض الله وجه الاستاذ / سعد بن سالم بن تركي على تجاوبة الغير مستغرب وايضا على هذا اللقاء الطيب أخوك / ابو زيد
|
|||
|
![]() |
![]() |
#9 | ||||
|
![]()
|
||||
|
![]() |
![]() |
#10 | |||
|
![]() اقتباس:
ارررررررررررررررررحب تراحيب الحيا
(( حكيم الموقع )) ومن قال لاهــان والله يجزاك خير على هذه المرور الطيب والله يرحم الامير / راشد بن رشيدان الهوامله وشرفني مروركـ الطيــب يا وجة الطيب
|
|||
|
![]() |
![]() |
#11 | ||||
|
![]() يعطيك العافية ربي يابو زيد على الابداع دوما بالذات نقلكم عن الامير راشد بن رشيدان الهوامله الله يسكنه فسيح جناته فقيده على الدواسر كلها الله يرحمه امين
|
||||
|
![]() |
![]() |
#12 | |||
|
![]()
|
|||
|
![]() |
![]() |
#14 | ||
|
![]() لقاء ممتع رحم الله الامير راشد الهوامله واسكنه فسيح جناته
|
||
|
![]() |
![]() |
#15 | ||
|
![]() الله يغفر له ويسكنه فسيح جناته..
|
||
|
![]() |
![]() |
الذين يشاهدون محتوى الموضوع الآن : 62 ( الأعضاء 0 والزوار 62) | |
|
|
إعلانات نصية |
منتديات صحيفة وادي الدواسر الالكترونية | |||
![]() |
![]() |
||