الأيام تجري والعمر مثل ألأيام ** أعمـارنا محسوبـةٍ بالدقيقه

[معلومات العضو صالح الجعيدي]

السلام عليكم ورحمة الله وبركاته ،،
إليكم قصيده مليئة بالحكم للشاعر / محمد أبن حيفور آل جابر المري

الأيام تجري والعمر مثل ألأيام =أعمـارنا محسوبـةٍ بالدقيقه
نجري ورى هم المعيشه ولاحلام =وننسى الحقوق اللي علينا وثيقه
ننسى حقوق الله كفال الأيتام =ربٍ يضيع اللي يضيع طريقه
ربٍ خلقنا نطفةٍ قبل الاجسام =من نطفةٍ ثم علقةٍ ثم عليقه
ويكسيه لحمٍ حافظه جلد وعظام =وعروق عجلٍ دمها في دفيقه
والله مانقدر وفا حقه التام =سبحان حماي البيوت العتيقه
ارجع يا مسلم لاتوهقك الاوهام =لاتغرك الدنيا بزينة بريقه
ألاقداريابن آدم ترا رمحها سام =كم واحدٍ خذه القدر من فريقه
وين الرجال اللي لهم فعل واعلام =وين الرسل وين الملوك العريقه
راحو من الدنيا بمترين من خام =امتار خامٍ ربطت بالسليقه
خلك على العليا صبورٍ وعزام =روم المعالي وأعتـنقها عنيقه
رافق رجالٍ لابدا لازمٍ هام =يقضون حاجات الزمان الشهيقه
ناسٍ لهم في ساحة المجد مرسام =اللازم الكايد تحل أتعليقه
دون الخوي تاقف مواقيف الاكرام =هل فزعةٍ تشفي الكبود الغليقه
لاتحط نفسك بين لايم ولوام =والفاسد المفسد تجنب طريقه
مريض قلب وفيه غيضٍ وكتام =ونفسه على درب المنافق شفيقه
احذر تغرك ضحكته والتبسام =وده يحذفك لو قدر في حريقه
مامن ورا رفقته كون التندام =وراع المثل قال المرو من رفيقه
من طاح من رفقة هل السو ماقام =اليا درا أنك طحت عجل طقيقه
واحذر تسمَع هرج واشي ونمام =مامن ورا النمام كون الحميقه
الاسلام يابن آدم له أوصول واحكام =لازم تطبق بالأصول الأنيقه
حافظ على الأحسان واركان الأسلام =واحرص على الأيمان وامش بطريقه
حنا بوقتٍ صايرٍ له تلطام =صار الأخو ماعاد ينفع شقيقه
والله وصانا على وصل الارحام =ماقال هملهم وضم العشيقه
حقٍ عليك مواصلتهم والاسهام =ومشاركتهم كل فرحه وضيقه
تراك ما تبقى نشيطٍ وجزام =الأعمار تسرقها الليالي سريقه
ترجع الى ضعفٍ وعجز وتحطام =وتقول وين اهل الكبود الرقيقه
الشوف يقصر والجفن به تهدام =والجسم يتعب ماتساعده سيقه
والسمع يثقل والظهركله آلام =اليد تنافض والعصا ما تطيقه
عمر الفرح والعز والمال مادام =لابد ماياتيه وقتٍ يعيقه
نسهر على التلفاز ونتابع انغام =ننسى الفرايض وانتسمع موسيقه
ونتابع افلامٍ بها عادل أمام =وحسين فهمي والبنات الرشيقه
ونوقت الساعه على حزة الزام =خوفٍ من التآخير لوهي دقيقه
ويرفع آذان الصبح ويقوم الامام=وحنا نيامٍ في حلامٍ عميقه
صلو وحنا من ردا الحظ نيام =ومن قام منا ما يصحي رفيقه
لو ياصل المخلوق منا مية عام =ياتيه لحظه غرغراتٍ أبريقه
ماخلده ماله وجاهه والأوسام =يرحل عن الدنيا وجمعا صديقه
ويلف ويكفن له بشاش وحرام=ويحط في قبرٍ ألحوده غميقه
ويجيه من ينشده وش حط قدام=ويكشف ملفه عند رب الخليقه
في ساعةٍ ياقف بها كل آلانام =ما ينطق الا من دعي لتحقيقه
ويشوف سجلٍ ما خطت فيه ألأقلام =في ساعةٍ ماهي تغيب الحقيقه

وسلامتكم ،، عسى أن تنال رضاكم. مع خالص التحية و الاحترام.

 

 

 

 

[معلومات العضو أبو سعود الودعاني]

لاهنت وبيضالله وجهك

على نقل هذه القصيده الرائعه

والتي تحمل في كل حرف حكمه

وصح الله لسان الشاعر ابن حيفور

تقبل خالص ودي

 

 

 

 

[معلومات العضو ولد ودعان]

لاعنت طال عمرك على القصديه

وصح السانك والسان قايلها

تسلم يمناك

تحياتي اخوك

ولد ودعان