صوت وصدى

[معلومات العضو ماجد بن رويه]

احبتي احببت ان تشاركوني جزالة و روعة ومتعة هاتين القصيديتين لشاعرين من خيرة شعار القبيله

النفس احاسبها وادوّر سماتها=وعلمتها حتى رضت في حياتها
علمتها تسمح وتاخذ حقوقها=وتدي حقوق اللي يدوّر غناتها
نفس ٍ وصول العز غاية مرامها=وحب القناعة دايم ٍ من صفاتها
والرزق عند اللي خلقنا برزقنا=ربٍ تناجيه العباد بصلاتها
مكوّن الدنيا بحكمه وقدرته=دنياً تهول اللي بها بحركاتها
الخير هو الشر فيها يتناوباً=ما تنظمن سياتها واحسناتها
كم جاهل ٍ فيها تناسا غيوبها=من خالف اولها لقاء مقبلاتها
ما يـقـّن الا واحدٍ في حياته=جرب مرارتها وجرب حلاتها
قلته وانا نفسي بوقتي تعلمت=علمتها حتى رضت في حياتها
اعزها واصونها من هل الردى=واهل الوفاء هم شفها وامنياتها
امثال منهو منهجه منهج الكرم=يكسب فعول الطيب في موجباتها
رجل ٍ على اسمه فالمواجيب ينلقى=مراجله فالناس عندي ثباتها
مراجله ماهيب توها صنيعه=تشهد تواليها على ماضياتها
ياللي نويت تجيه هاذي رسالتي=عطها صبي الجود واحفظ وصاتها
بذرت فيها قول من يوفي الوعد=وارجي مع الايام يثمر نباتها
خصيت راعى الصنف واسندتها له=ربه يحللها ويفهم لغاتها
انشد وانا قلبي تخالف روابعه=روابع ٍ ما بين خذها وهاتها
من عشقةٍ هاويتها قبل اشوفها=هاويتها واليوام انا في شفاتها
وديت لاماها لحيث ان ابوها=عند النشاما ما يشح بخواتها
لاجيت باوصف محاسن جمالها=على مزايا الحسن تضفي عباتها
اطرب لجيتها على العز والنقاء=ولاحدٍ بطول الهجر سوى سواتها
تقطعت الارماس من دون ذكرها=واحترت فيها ويش سبب شتاتها
فان كان طول البعد ماخلف نويها=لو طولت ماقول زلت طراتها
انا الى ذلحين ما يست منها=مافات فايتها وانا اخشى فواتها

الشاعر / محمد بن حشفل الخضراني

طار الكرى من العين حزة سباتها = ولا قول هشم او معذيتها قذاقتها
لا والله الا أدوى عليها عذابها = هواجس ياما اسهرتها لا جاتها
لا جات منتحية من الصعب تلفت = ولا دبرت يكثر علي التفاتها
ولا كل نشوه تعتريني تهيضها = الا القصيد اللي يهيض عبراتها
لاجاتني ما ارتاح لين أ ختلي بها = في معزل من الناس ومهاتراتها
تقول مظلومه وتظلم من أهتوت = وبسهر عيونك لين تثبت براتها
وابيات مثلك يابن حشفل جنونها = وتعشق مجارتك على مبهماتها
مثايل جزله وعندي مثيلها = ونصفت من بيني وبينك عصاتها
وكم شاعر خلفك جذت به قريحته = ما لحق نصف النصف من مفرداتها
والحمد الله ويوم جودة قريحتي = تعرف طريقة نحتها في حصاتها
وبدعت قاف هاض من الصدر ثم لجا = مجلى الشياهين بروابي سراتها
عشقتك يامحمد تحالي عشيقتي = ان كان ماهي ذاتها شبه ذاتها
وأكيد ماهي ذاتها شبه ذاتها = نسخة وطبق الاصل في ماركاتها
كم واحد شفه وشفي سواسيه = وانا اشهد انك جيت بمواصفاتها
وديت لاماها لحيث ان ابوها=عند النشاما ما يشح بخواتها
الله على ذالعشق ما أحر لوعته = تضغط صدور اقسي العرب بحسراتها
رح صوب عشقتك وبوافيك عندها = لن عشقتي هي عمة أبناء حماتها
كم حرم منها بواردي غزى لها = وروس الرجال اهل القاوي غزاتها
وإن حبت الرجال يسحر ودادها = وان عافت الرجال ضره شماتها
في عشقها قدر وحشمه وقيمه = اذا الرجل ما قصر بواجابتها
كفوا يابن حشفل تحطك عشيقها = شور السعد ما ضيعتها مراتها
والظاهر ان سلمى شكت لك غرامها = والظاهر ان ما هاضك إلا إغناتها
يوم اللتجت بالله ما يلتوي بها = الا الذي تستاهله من هواتها
لن اختها ترملت ثم تزوجت = ومع زوجها الثاني كثير سكاتها
وما ينجرح من حزنها في عيونها = ياكون من قد شاف ضحكة شافتها
وقبل الختام اطلب من الله خالقي = اللي سفينة نوح قدر نجاتها
يرزق نفوس اهل الجزاله مرامها = والعفو فيما بعد سكرة مماتها

الشاعر / عبدالله بن مرضي الودعاني

 

 

 

 

[معلومات العضو فالح بن فهاد]

بن رويه جعل ربي يجزاك الخير على هذى النقل الجميل والابداع في الاختار الافضل لك مني اغلى تحيه والشكر الدائم

 

 

 

 

[معلومات العضو فرحان فهد ال فرحان]

ماجد هلا بك يالله حيه والله ياماجد انا دخلت يوم شفت اسمك حبيت اسلم عليك مبطي منك والله يحفظك وتطربنا بجديدك المميز عندي

 

 

 

 

[معلومات العضو مسفر المصارير]

حيه و حي ما جاب

وين الناس يا ماجد

يا مرحبا حييت يا طيب الساس = نسل الرجال معربين المجاني
يا مرحباً أعداد ما هب نسناس = براع الوفاء و الجود ذرب اليماني

تقبل تحياتي

أخوك : مسفر المصارير

 

 

 

 

[معلومات العضو سالم بن صمهود]

ماجدابن رويه
حيه وحي ماجاب دايما الجزل يجيب الجزل

 

 

 

 

[معلومات العضو الزين]

تسلـــــــــــم يمينك علي النقل

قلته وانا نفسي بوقتـي تعلمـت=علمتها حتى رضت فـي حياتهـا
اعزها واصونها من هـل الـردي=واهل الوفاء هم شفها وامنياتهـا
امثال منهو منهجه منهج الكـرم=يكسب فعول الطيب في موجباتها

الزيـــــــــــــتن

 

 

 

 

[معلومات العضو محمد بن محسن بن حشفل]

الاخ العزيز ماجد بن رويه سلمه الله لقد اطلعت على ما دونت الله يبيض وجهك على طرح هذه المجاراة الرائعه للشاعر القدير عبدالله بن مرضي الجماعين الله يصح لسانه على الكلام الطيب الغير مستغرب عليه وفي الحقيقه هذه اعتبرها ثمرة من ثمار هذا المنتدى الراقي الذي عرفنا عليكم وعلى الطيبين شرواكم ، امل ان تبلغ الشاعر المبدع عبدالله بن مرضي شكري وتقديري هذا ودمتم سالمين

 

 

 

 

[معلومات العضو ماجد بن رويه]

الاخوان الكرام

الامبراطور

فرحان بن فهد

مسفر المصارير

الزين



لاهنتوا على ذا الحظور المشرف


عاطر التحايا لمقالكم ومقامكم

 

 

 

 

[معلومات العضو ماجد بن رويه]

المشاركة الأصلية كتبت بواسطة محمد بن محسن بن حشفل

الاخ العزيز ماجد بن رويه سلمه الله لقد اطلعت على ما دونت الله يبيض وجهك على طرح هذه المجاراة الرائعه للشاعر القدير عبدالله بن مرضي الجماعين الله يصح لسانه على الكلام الطيب الغير مستغرب عليه وفي الحقيقه هذه اعتبرها ثمرة من ثمار هذا المنتدى الراقي الذي عرفنا عليكم وعلى الطيبين شرواكم ، امل ان تبلغ الشاعر المبدع عبدالله بن مرضي شكري وتقديري هذا ودمتم سالمين

ووجهك ابيض يابن حشفل


سلامك وصل للاخ عبدالله ويبلغك كثير السلام

تقبل تحياتي

 

 

 

 

[معلومات العضو هادي الخضراني]

الاخ ماجد شكرا على هذا النقل تقبل فائق تقديري