محمد بن حشفل

[معلومات العضو شافي القويسي المخاريم]

ابكتب المعروض واشكي على من=القاضي اللي يعطي الحق منه
ماظني القى منصف ٍ منه ماظن=الا التنازل من غلاهم ما اظنه
با اون ونة من مشاء وان قعد ون=ما عاد يبرد حرته كود ونه
باح العزى مني وبينت ما اكن=بينت انا ما اكنا وانا كان اكنه
امنول ٍاخفي على الانس والجن=واليوم مكشوفٍ لدى انسه وجنه

اكتب وبين خافي العلم لا كن=عد الخطاء اللي صار منك ومنه
وشلون ما حملت حملك بلا من=لو قمت به ما صار للناس منه
طلب هن ورافض ٍ من طلب هن=ما تدري ان اللي طلب هن سنه
ترى السوالف والمعرفه لها فن=لا كن خصمك ليه ما طعت فنه
التاجر اللي يطلب الهيل والبن=لولا الطمع فالمال ما باع بنه

 

 

 

 

[معلومات العضو شافي القويسي المخاريم]

قال من قول المثل ما يكوده= يذخره حتى يجي وقت حلّه
قال قولٍ حاظرين شهوده= كل منهو منصفٍ شاهد لّه
لااد زايد سعد منهم عظوده= سعد منهم فالقاء فزعة لّه
كم حريبٍ جاب جمعٍ يذوده= يحسب ان الحرب سله ودلّه
مثل غالب يوم سيّر جنوده= حاكمٍ الاشراف تمشي بظلّه
طاح في دارٍ تحامت ايسوده= ما دخل بقلوبهم منه ذلّه
شتتوا جمعه وردوا اوروده= تايهٍ وروه دربه ودلّه

 

 

 

 

[معلومات العضو شافي القويسي المخاريم]

الا يا عاذلي يكفيك لومي=وانا دونك تكفيني همومي
انا ما احتاج منك ما تقوله=كلامك وسط عقلي ما يدومي
ولا مثلك عرف ما في ضميري=تكلم وانت تجهلك العلومي
انكانك في كلامك منصح ٍ لي=انا ابغي منك في صفي تقومي
وكانك بس نفاع ٍ بهرجك=فكثر الهرج ما يقظي لزومي
وكانك مقصدك تدري بغيبي=فهذا ابعد عليك امن النجومي
انا لي غايةٍ ماحدٍ عرفها=ماهيب لكل سوام ٍ يسومي
مدام اصل الحياة انها تجارب=فنا مالعرف مانيب محرومي
خذيت امن التجارب لي فوايد=عرفتبها على دربي يمومي
يقول اللي سبقني بالمثايل=يقول ان الغنايم بالعزومي
وانا اشكر نعمة اللي شفت فضله=الاهٍ فوق خلقه ما ينومي
هو اللي جل شانه نلتجيبه=له يصلي وله عبده يصومي
اليامنه نوى يرحم اعباده=تضلل رحمة مثل الغيومي

 

 

 

 

[معلومات العضو شافي القويسي المخاريم]

عقب ماجفانا اللي من الناس مغلينه=لك الحق ياطرفي من النوم تنصاعي
حصل ماحصل واللي حصل منة ياشينه=حقايق مواثيقه معي غش واخداعي
يبي يكسب الدعوى وضاعت براهينه=وجمع اعلوم ٍكلها مالها داعي
ضهر وانكشف لي كل شينه مع زينه=وعقبة دريت انه بخيلٍ وطماعي
لونة صديقٍ صادقٍ طاب من حينه=ولهل النمامه ماتسمع ولا طاعي
بحكم الخطاء صوبي يصدر قوانينه=وانا ماقبلت الحكم في بعض الاوضاعي
اليا صار حكمه ضلم ومخالفٍ دينه=ولاهوب ينصف قاسي القلب ويراعي
فهذا خطاء والضلم مناب راضينه=ويبشر بخصم ٍياخذ الحق ويداعي
والى من وفا المديون للي يبي دينه=يصفى الحساب اللي بة اشكال وانزاعي
حسابٍ توثق بين يمناي ويمينه=ومن شد حقة بالمواثيق ماضاعي
مدامة نسى اللي طاف من ماضي اسنينه=فنا مانسيت انة بعد يبغي اوجاعي
ثلاث اسنوات ومهجتي عندة ارهينه=واراعية كني لة بوسط العرب راعي
تحملت دونة قاسي الوقت مع لينه=ورجيتة مثل مايرجي البذر زراعي
يعم الحيا قلبي وتزهر بساتينه=بقربه والى منة نوى البعد تنلاعي
وكم ليلةٍ القاه واخذ مضامينه=تجيبة احلوم اليل والناس هجاعي
وتستر عيني كل ماشاهدت عينه=لا مد اليمين وسلم بروس الاصباعي
وجلسنا جميع وطاري البعد ناسينه=نقول الفراق اقفى وحل التجماعي
فليا دكبي من لذه ارقادي اذهينه=توقضت ماشفته وفزيت مرتاعي
ولا شفت كون اليل من بيني وبينه=سواده يريب القلب ماكن به ناعي
وانادي بصوتي وين سمح القبل وينه=وتدبح انجوم اليل واصبح وانا واعي

 

 

 

 

[معلومات العضو شافي القويسي المخاريم]

بداية مابتدابه كل بادي=عليه ابدا بسم رب العبادي
نعظم قدرته ونقول يالله=بلطفك نطلبك ياخير هادي
توفقنا لمرظاتك وعفوفك=وتامرنا على درب الرشادي
ونرجي من عطاك وفيض جودك=تغيث القاع من غر الغوادي
سحابٍ لا نشاء ينهل وبله=يسيّـل مع مناحيه الحشادي
يعم اوطانا كلٍ بداره=بفضل اللي بزود الخير جادي
بعدها ابدي سلامي والتحيه=بريح المسك مع ريح الزبادي
على من شوفهم ذليل كنه=لنا عيدٍ من ايام العيادي
بجهد المنتدى اللي بان نفعه=نهج له منهج ٍ يحسب ريادي
لجمع الشمل واللي قايم ٍ به=رجالٍ في مساعيهم سدادي
وهي جمعا صلة رحم وتعارف=بعد ما صار كل ٍ في بلادي
أسودٍ دارهم وادي الدواسر=عرين ٍ ما طمع به كل عادي
بعضهم فيه واللي عنه راحوا=الى حلوا بدار صار وادي
بكل انحاء الخليج لهم مواطن=بعد ماحدهم مالوقت حادي
تنحوا يوم شحات المعوشه=وكل ٍ صاد خير ٍ واستفادي
ومعهم سمعة المجد القديمه=وكسب الطيب لاغلي المزادي
لاجت الاخبار لاحدٍ من طرفهم=الى انه راقي روس المبادي
دواسر فعلهم بالمدح ياسر=اهل الامجاد خطلان الايادي
رجال ٍ من على التاريخ الاول=تصون الحد وتضد المعادي
على القالات ومصالا الحرايب=رسوا والشره ينصونه عمادي
ياكم خصم ٍ شكا الضدات منهم=كسر ولا تعشته الحنادي
ايلوا باعدها الامثال واجد=مواقف مروية حدب الهنادي
هم الحصن الحصين اللي يزبن=الا يا سعد منهم له سنادي
اهل شيمه واهل كرم وشجاعه=واهل رايه واهل راي ٍ قيادي
واهل نخوه واهل خوه وجيره=مقاطع حق عراف ٍ عوادي
واهل غرس ٍ واهل ملك وحضاره=واهل حردٍ واهل سرد وعتادي
واهل حدٍ وسيع ما يوصف=مسايـيـل تنثر في حمادي
من الوادي الى الخرج وشماله=على ما حدر العارض قصادي
واهل علم واهل سلم وبداوه=واهل مارد واهل قفر ومنادي
هل ابل فالمهامل هم جنبها=من الحد المطرف ما تحادي
ينوسون الخطر في كل ديره=لا زاف العشب بحلول البرادي
ومعهم جارهم عصاه توسم=على عيون الملا يمشي عنادي
على مشهاة نفسه يهملونه=ولا حدٍ ينشده وين انت غادي
غداء سلم ٍ لهم بين القبايل=يوم ان الوضع من قدح الزنادي
نعد اللي سمعنا ونتفاخر=بعلم ٍ صدق ماهوب اعتقادي
بدون قصور في باقي القبايل=من اهل الطيب من حضر وبوادي
اقوله من مقامي خص هذا=بعد جينا ولبينا المنادي
لكم ياهل الكويت ويوم جينا=شعرنا بالفرح والكيف زادي
بدار اهل الوفاء دار الصباحي=لها بالفعل معروفٍ يشادي
بلادٍ ضيفت صقر الجزيره=ومنها اعلن مسيرة للجهادي
هذاك معزي اللي عز داره=بعد ما كان في حال النكادي
قضى مقدار عشر سنين نازح=وهو ما طاب له حلو الرقادي
جزع مما نظر ثم سل سيفه=وقال اليوم انا مالي قعادي
يبي دار شكت من عقب فقده=يراودها وهي باسمه تنادي
ورجع ما عاد طاوع للعذايل=مغل ٍ بايع ٍ روحه مفادي
معه سته من رجال الدواسر=من الستين بحساب العدادي
يحثون السرى من فوق ضمر=مضراةٍ على قطع الريادي
على ساقة صليب الراي ساقوا=عماراً تاليتها للنفادي
من المشرق ضوى باليل الاضلم=ودك الحصن بطيور الهدادي
وظهر فجر السعد ليلة رجوعه=بعد ما رد ملكه واستعادي
وأقام الدين في شبه الجزيرة=وصان حدودها والامن سادي
وسلمها عياله وحفظوها=بحفظ الله بحرص ٍ واجتهادي
خلفهم من سلفهم شيخنا اللي=على الله ثم عليه الاعتمادي
ابو متعب عسى ربي يحفظه=مشيـّد دور الامجاد الجدادي
سعى في صالح الشعب السعودي=وساق الخير في كل امتدادي
وحنا دايم نعلن ولانا=ولا نخلف قديمات المبادي
نحب شيوخنا والدار غالي=هذا والله هو العلم الوكادي
يقوله شاعر مثل ربوعه=بقولٍ ما يجي فيه انتقادي
من الفرجان عطبين الضرايب=هل الردات في يوم الطرادي
وصلى الله على الهادي محمد=شفيع الخلق في يوم المعادي

 

 

 

 

[معلومات العضو شافي القويسي المخاريم]

خلوني اعبر عن اللي جرالي=واللي جرالي في حياتي تهاويل
جربتنا جور الدهر واليالي=وجربتنا الغربه وعسر المحاصيل
وجربتنا خوة كثير الرجالي=واخذيت منهم كاملات التفاصيل
وشربت كدر ومن قراح ٍزلالي=واخذيت درسي من حياة البهاذيل
وكم ذقت من مر ٍوكم ذقت حالي=ودنياك هاذي درسها صعب بالحيل
وجلست احسب وش بقى وش غدالي=اسنين راحت مع سنين ٍمقابيل
ولاشك عمرك يافتى للزوالي=اغنم زمانك عاد عندك بعد حيل
واحرص على طاعة عزيز الجلالي=اللي خلق جيل ومفني بعد جيل
وللوالدين حقوق كبر الجبالي=والضيف والعاني وبعض الرجاجيل
والجار لا ترضى عليه الخمالي=والصبر محمود العواقب عن الميل
وكل على كيفه وهذا مقالي=وقبلي رجاجيل ٍوقالوا تماثيل
وعرفي يكفيني وهو راس مالي=ولااقول انا العاقل وغيري مهابيل
وماني مسمعها حد ٍكون غالي=نقده حكيم ولايدور مداخيل
مثل ابن محسن حيثه اللي طرالي=يدرك معانيها عسى تعجبه حيل
تمت وصلوا عد منشي الخيالي=على نبي له على الخلق تفضيل
نقيت هرجي حيثه الي بقالي=هرج عن الزلات منقي بتفصيل

ذرب الكلام الى حصل له مجالي=يصير زين ٍفي هروج التعاليل
في مجلس ٍفيه الجلوس استوالي=خص ٍمع جمعة ربوع ٍمشاكيل
لاسيق به من كيف صفر الدلالي=فنجال بن ٍخاثر وسطه الهيل
ابدى بمردودي لمنهو بدالي=قول ٍيشوق اهل المعرفه الى قيل
وناصر علومه بالوفاء ساقهالي=وانا لها متني صبور ٍعلى الشيل
عزى الله اني طبت واستر بالي=من يوم حللت لمعانيه تحليل
افرح بطولات الرفيق الموالي=جعله من اللي يكسبون التنافيل
يابو محمد ياعديم العيالي=ما للردى صوبك طريق ومواصيل
معنز ٍمجناك بابو ٍوخالي=متوسط ٍبين الرجال الحلاحيل
جربت ثم جبت النصايح جزالي=سمان ماحصلت فيها مهازيل
لاكن شد احبالها لاتمالي=وانا بعد عندي لها زود تكميل
نسيت وحده والسوالف طوالي=باذكرك تجمل بها القول تجميل
رفقة جليس السو شين القبالي=دور لها مع طيب الناس تبديل
بعها لسايمها بنصف الريالي=بيجيك من يشري خدوش ودعابيل
ومن الطمان اطلع على كل عالي=ترى مقر العز عسر المناويل
على ضعيف الراي صعب محالي=وعلى صليب الراي دربه تساهيل
من لا ورد مسقاه ورد النهالي=ماشرب من جم القراح الشهاليل

 

 

 

 

[معلومات العضو شافي القويسي المخاريم]

عسى الله يبيض وجه من يفعل المعروف=يحب الجميل ومنهج الطيب يشقابه
مثل مسفر اللي بان فعله على المكشوف=وقف في لزومي موقف ماتـتـقابه
أي والله وقف في لازمي والعيون تشوف=مقام ٍ بحينه ما توخر ولا ابطابة
يوم اني نخيته عند منهوعليه ضروف=فزع له بجاهه يوم ربى فتح بابه
حمية رفيق ٍ قال انا اللي بها مكلوف=تغروالها مزبان منهو تعزوابة
هذه فزعة إهل الطيب ولا الضعوف ضعوف=ردي العرب لا منه نفع ولا ثابة
ايلولا الوفاء ما صار للطيبين شفوف=بكسب الجميل وصار للطيب طلابة

 

 

 

 

[معلومات العضو شافي القويسي المخاريم]

ما يوجع الرجال ويحس باله=ويبحث خفا نفسه ويندم بما صار
يكون لامنه فعل له جماله=في عاقب يمين ٍ من الناس بوار
جا يشتكي لي من غرابيل حاله=متشتتٍ فكره بدعواه محتار
ووقفت له ميقاف طيب وشكاله=عن لازمه ما قمت ادور للاعذار
وردته الماء لين طالت حباله=وتيسرت دنياه من عقب الاعسار
ويوم اغتنى رداه ساقه بداله=نسى الجميل وقابل الطيب بنكار
فان قيل منهو قلت مالي وماله=خله عساها تنقطع منه الاذكار
غلطه وطافت واعتبرها جهاله=من يصنع المعروف في طافي النار
لكن انا حبيت اوجه رساله=لكل رجل طيبٍ عندي انذار
من كان يشقى بالجميل ومجاله=لا يبذره يكون فالناس الاخيار

 

 

 

 

[معلومات العضو محمد بن سالم الخضراني]

عمل مميز وتشكر عليه وبيض لله وجهك



على الجهد الكبير الذي قمت به

 

 

 

 

[معلومات العضو عســافةالخيل]

مشكور شافي بيض الله وجهك

تحيتي

 

 

 

 

[معلومات العضو ابومبخوت الدوسري]

صح لسان الشاعر وبيض الله وجهك على طرح القصائد ولاهنت تحيـــــاتي وتقديــــري

 

 

 

 

[معلومات العضو دغش محمد الصخابرة]

صح لسان الشاعر وبيض الله وجهك على طرح القصائد ولاهنت

تحيـــــاتي وتقديــــري

 

 

 

 

[معلومات العضو عبدالله الفاران]

صح لسان الشاعر وبيض الله وجهك على طرح القصائد ولاهنت

تحيـــــاتي وتقديــــري

 

 

 

 

[معلومات العضو هادي الخضراني]

الاخ شافي القويسي جهد مميز تستحق الشكر عليه بيض الله وجهك

 

 

 

 

[معلومات العضو هادي الخضراني]

مشكور الله يبيض وجهك