سؤال عن نسب أسرة الوحير في مدينة الخبر؟

[معلومات العضو ناقد بصير]

السلام عليكم ولا هنتم جميعا وآسف على التأخير واليكم :

قصيدة صغير بن وحير المسعري الدوسري

طردت صيد ونا في لاهب الكنه=والقوم راحو عليهن صمل الشيب
جيت الوعد خالين والهجن خلنه=ركبو عليهن وقفو بالمشاريب
تكفون ألاد العميري هيدوهنه=خويكم يا عشاشيق الرعابيب
في خرب انا طايح واجاذب الونه=هذي سوات التغرب مع لجانيب
لو ان ربعي عليهن ما تعدنه=عاداتهم بالوعد ذب المراقيب
العازمي فالح يا سايلن منه=علمه جميل وشرعه يكسب الطيب
وحزام ذاك ابن عمي ما بها منه=هذي سوات الحمايا يا معاطيب
جوني على ضمر والدشن يزهنه=يا والله أومو عليهن بالمشاعيب
مع طلعة الشمس وادي السيح وردنه=ذارن من الضول زينات المراكيب
يا بد ما يقبلن والعلم جابنه=علم ثبات وهرج بالمشاذيب
كم عبلة زامية هجني توطنه=بالقيظ وحدي ولا أدل المواهيب
عديت كل الموارد قربتي شنه=متغانم قبل يبدا راسي الشيب
عزي لبوخالد لامنهن جنه=ما شافني يالنشامى مع هل النيبي
دنق عيونه لحر الدمع صبنه=ثم انصفق عايف لعب اللواعيب
جيته على الفاطر اللي وصفها كنه=لا هيب دنه ولا فيها شواذيب
يفداتس يا فاطري من حطت الخنه=من غير جوز تحطه للصاحيب
يفداتس خمع ربوعه قد شكو منه=له موقف خايب عند المعازيب

 

 

 

 

[معلومات العضو ناقد بصير]

السلام عليكم ورحمة الله وبركاته

أتأسف عن عدم استطاعتي وضع التسجيل الصوتي للقصيدة بالصورة الصحيحة ربما لوجود خلل في جهاز الكمبيوتر.

بقي أن أذكر أن مصدر هذه القصيدة و قصتها هو أحد أحفاد أوحير جد هذه الأسرة المباركة.

 

 

 

 

[معلومات العضو بوراشد الدموخ]

ومليون نعم في ابن وحير وكان مع الدواسر (الجويعد) الذين هم مع العماير من بني خالد وغزا معهم عدة عزوات وتزوجوا بناتة وكانوا يسكنون في منطقه القطيف في عنك وكانوا يدخلون البحر فصادف يوم عيد الفطر وهم مسير ثلاثه ايام في البحر وقام عبد ابن عقل يقال له العميني يلعب العرضة صباح العيد في البحر ورد علية ابن وحير في قصيده وهي
العيد والله عيدنا بالقطيفي ماهوا بعيدك يالعميني مع سيف
الخيل تلعب والعذارى صفيفي بين عنك وعرش النداديف
وبعدها ذهب وعاش في الظهران مع ابن عم الجويعد وهو الشيخ عيسى بن احمد بن سعد الدموخ وله قصائد مدح في الشيخ عيسى

 

 

 

 

[معلومات العضو ناقد بصير]

أخوي فالك طيب يا جعل فالك أطيب
شكرا على هذه المعلومات الطيبة

و ودي أصحح ان اللي قال الأبيات اللي ذكرتها :

العيد والله عيدنا بالقطيفي*** ماهوا بعيدك يالعميني مع سيف
الخيل تلعب والعذارى صفيفي*** بين عنك وعرش النداديف

هو الشاعر فهاد بن أوحير أخو الشاعر صغير بن أوحير وسأحاول أن أضع لكم كامل القصيدة ان شاء الله قريبا.

 

 

 

 

[معلومات العضو بوراشد الدموخ]

يامرحبا مليون اخوي ناقد واريد قصيدة اخرى يوم صابه مرض الجدري وهو في البحر وقصيده مدح الشيخ عيسى بن احمد بن سعد الدموخ ولا تهون

 

 

 

 

[معلومات العضو ناقد بصير]

اخوي بو راشد الدموخ او نعم فيك او في اجدادك.

بالنسبة لطلبك قصيدة الشاعر فهاد بن اوحير المسعري الدوسري في أخوه صغير يوم أصيب صغير بمرض الجدري سنة الجدري وكان كل واحد منهم في سفينة داخلين الغوص. وأصيب صغير بالجدري وخافوا ربعه في السفينة لا يعديهم فأنزلوه في البحرين وكانت هناك سفن مطابقة فأخذ واحد من ربع صغير يصوت بأعلى صوته باسم فهاد بن اوحير وكان من المصادفة وجود فهاد في احد السفن المطابقة فاستجاب للنداء وشاف اخوه الشقيق وأحب انسان له في هالدنيا مجدور وبين الحياة والموت. فطلب من النوخذه وربعه في السفينة اللي كان فيها صغير ياخذونهم الى عنك في القطيف عند اهلهم حتى يعالج اخوه. ولكنهم رفضوا خوفا من العدوى. ثم ذهب الى النوخذه وربعه في السفينة اللي كان فيها فهاد وطلب منهم نفس الطلب ولكن رفضوا ايضا خوفا من العدوى. وحاول مع السفن الأخرى فرفضوا. فقال هذه القصيدة في نوخذة سفينته وربعه اللي معه فأثرت فيهم القصيدة فاستجابوا ووضعوهم في زاوية من السفينة لا يقربهما أحد وفهاد يمرض أخيه حتى وصلوا الى القطيف وبعد عدة أيام أصيب فهاد بالجدري وأخذت والدتهما العمرية رحمهم الله جميعا تمرضهما معا حتى شفاهما الله.

واليكم جزء من قصيدة فهاد بن اوحير في أخيه صغير :

البارحة ما ذقت نوم وسهران=من علة بين الضماير خفيه
هليت دمع العين واحفيت الاوجان=والدمع من عيني تزاعج دليه
أخوي مسهرني بكثر التونان=ويقالب الجنبين مثل الشوية
جبت الشراب وقال مانيب عطشان=أيست انا وابليس كثر عليه
عزيل منهو في البلادين مهتان=في ديرة الاجناب ما له دنيه
بزهم فهيد او بزهم القرم سلمان=عيد الركاب اللي ترقّع حذيه
وازهم بني هاجر ويام وقحطان=الكل منهم ما يخلي خويه

المصدر: أحد أبناء فهاد بن اوحير.

 

 

 

 

[معلومات العضو المحايد المستقل]

اسرة الوحير المساعرة الكريمة والف نعم بهذه الاسرة وشكرا لكل من افادنا عنهم ونور الاخوة الاعضاء بقصيدهم وتاريخهم ولاشك انهم كان لهم دور والبركة في الاحفاد وربنا يوفقكم جميعا وشكرا

 

 

 

 

[معلومات العضو بوراشد الدموخ]

الله لا يهينك على القصيدة والقرم سلمان هو سلمان الجويعد ويطلق علية عند بني خالد سلمان الدواسر وصح لسانك وبيض الله وجهك

 

 

 

 

[معلومات العضو محمد المسعري]

السلام عليكم ورحمة الله وبركاته اخي ناقد بصير شكرا على ايراد ذكر هذه الاسره العريقه من بني عمنا وهم غنيين عن التعريف وللعلم هم من آل قويد . رحمه الله من مات منهم ومتعنا بحياة الباقين وستضل هذه الاسر الكريمه تخررج من اجيالها من الرجال الذين يسيرون مسار آباءهم واجدادهم العطره مما يسر الخاطر وينومس الرجال اللي مثلكم وشرواكم

 

 

 

 

[معلومات العضو الفقيرلله المسعري]

أونعم والله بهذي الأسرة علومهم طيبة أجداد وأحفاد وهم بلا شك من آل قويد جدهم الأمير شارع بن قويد. هم وعيال عمهم المشخص والكعوت (مبارك ابو ناصر رحمه الله ومحمد ابو معدي وشبيب رحمه الله).

 

 

 

 

[معلومات العضو ناقد بصير]

الاخوان المحايد المستقل ، بوراشد الدموخ ، محمد المسعري ، الفقيرلله المسعري لا هنتوا جميعا وشكرا لمروركم ومشاركاتكم المفيدة.

 

 

 

 

[معلومات العضو إبـراهيـم بـن راكـــان]

ناقد البصر


لاهنت .. مهما نقول مانوفيكم حقكم



لاهنت يـ القرم


نزل هذه القصايد في قسم القائد .. لتوفي حقها ..



ويعطيك العافيه

 

 

 

 

[معلومات العضو بدر ناصر البدراني]

أشكر الجميع على مشاركتكم وتفاعلكم...

لا هنتم..

 

 

 

 

[معلومات العضو بن ذيب]

يعطيكم العافية, بس عندي استفسار عن العائلة الكريمة, ذكر احد الاخوة انهم من ال قويد و جدهم شارع بن قويد, اذا ممكن توضيح هذي النقطة و اذا ممكن ذكر الاسم لهذه العائلة بالكامل وكل عام وانتم بالف خير

 

 

 

 

[معلومات العضو فتىالوادي]

اخي ناقدبصير مشكور على القصه والقصيدة , ,وبييييييييييييييييييييييييض الله وجهك ...