قصيدة ( نصيحة للشباب )

[معلومات العضو علـي الحـبابي]

قصيدة للوالد طول الله بعمره و هي عبارة عن نصيحه للشباب اللي نسأل الله لهم التوفيق و الهدايه
و ان يصلح شبابنا و شباب المسلمين
حبيت اطرحها لكم و تحيه طيبه

يا شباب ألامه الي علقت فيكم الأمل = ما يخيب ظن ألامه فيه ذو عقل لبيب
انتم المستقبل المشرق لنا وانتو الآمل = احفظوا كل الوصايا الي بها وصى الحبيب
طبقوا سنة محمد كلها قول وعمل = و ان حدن اخطاء وتاب فيغفر الله للمنيب
اعملوا بالموجبات و بالكتاب الي نزل = ما تقول القول فيه إلا على كتفك رقيب
لي حفظت اركان الاسلام اعتبر قلبك دخل = في طريق الخاشع الي دله الله للمصيب
وحد الله بالعبادة خالصة صم له وصل = و النوافل لي قدرت فحط لك منها نصيب
سجدتين في ظلام الليل تلبسك الحلل = ما تكودك في الحياة وتنفعك عند الحسيب
ولا تفوتك ركعتين في الضحى خل الكسل = و لا تفوت فرصة التسبيح قدام المغيب
قو ايمانك بالله وامن بالكتاب وبالرسل = و القدر خيره وشره و القضى ما فيه ريب
واجعل الإحسان دايم نصب عينك لا تمل = و اعلم انك لم ترى الله وانه يعلم كل غيب
وان جمعت المال لا تنسى زكاته يكتمل = و امتسك بالعروة الوثقى و بالركن القطيب
طبقوا سنة محمد كلها قول وعمل = و ان حدٍ اخطى وتاب فيغفر الله للمنيب
وأبعدوا عن موطن الشبهات ودروب الزلل = زلة في العمر يبطي صاحب الزلة صويب
واحذروا من سيئ الاخلاق الذميمة و الشلل = لا تقول ان ذا صديق وان الاخر لي قريب
خوة الشلات فيما يزري المولى فشل = نقص دين ونقص عقل وعيب تو الناس عيب
يسحبون الحر بالملواح من راس الجبل = وان وقع بالمصيدة ما عاد نجاه الخبيب
البسوا لبس العروبة واتركوا مشط القذل = واحفظوا زهرة شباب العمر قدام المشيب
شلة ما تجمل الرجال رفقتهم خجل = تجعل الرجال بين الناس في موقف صعيب
ياخذونه بالخديعة والتحايل والحيل = وتنقلب الاصحاب جعريٍ وحصنيٍ و ذيب
والنتيجة في النهاية قاتل ولا انقتل = و القبيلة تشترك في الذنب الاقصى والقريب
يخجل الشايب لما قالوا له ايش الي حصل = ويتصدد من سؤال الناس ما يبغى يجيب
جنبوا عن سكة الي لي عذلته ما انعذل = لي نصحته زعل مني صرت كاني له حريب
وان بلغ سن الرجولة قلت يا حيه عقل = دحترت به شلته مع دربه الشين المريب
وان خذا له في الوظيفة حول شهرين فصل = و انسدح في البيت قال الشايب ارقد لا تسيب
واقرضه بنك المرابي يحسب انه في العمل = واشترى بالقرض له ددسنٍ وجوال رهيب
صور الحارة وفحط واعتبر نفسه بطل = ما درى ان الي يسوي يكسر العظم الصليب
وان عطاه الله حليلة راح في شهر العسل = نسته بأمه و ابوه ونسي حالية الحليب
بعد عشره يوم قالت ويش قومه ما اتصل = تحسب انه مثلها يشفق عليها لو تغيب
اتنشد عنه لا عله من الغيبه وصل = والدموع تهلها من عينها القشرى صبيب
انتهى دوري وقلت اللي حفظت من المثل = واعذروني واحفظوا ما قلت في صدر رحيب
والسلام اختام والتقدير للي ما زعل = والنصيحة تنفع اللي يعرف ان ساسه عريب
بقي دور المجتمع يبحث لفجواة الخلل = المريض ان ما احتمى ما قدر يعالجه الطبيب
لو تعاونا حصل للمشكلة عشرين حل = بين الأسره والمربي والمعلم والأديب
وللمجالس دورها الكافي بتوجيه الرعل = من جلس في المجلس الطيب يحصل منه طيب
لو حد منا غدى له من طرف ذوده جمل = راح يبحث في المراعي ما ترك منها شعيب
والشباب نفكهم في موطن الفتنه همل = وان غدوا منا نقول الله من قطع النصيب
احرصوا تكفون يا شيبان وادعوا بالمهل = راقبوا حزة الاجابة وادعوا الله يستجيب
لا حد منكم يقول بالامر ذا ما لي دخل = الأمانه كايده و الله على الدعوة يثيب
قل لمن ضيع الأمانه يدفع الجزية دبل = في المقام وفي الحلال و كل يوم له طليب
واحرصوا من شي قادم في طريقه محتمل = بعد جات بيوتنا للعنكبوت اكبر صحيب
عنكبوت لي دخل في البيت يبطي ما رحل = صنف غير الاب توب وبلاك بيري و البليب
صار عصر العولمة أشد من عصر الجهل = يزرع التفجير والتكفير في القلب الرطيب
ما نقول إلا عسى ما نبتلاء بأمر جلل = دعوةٍ من خايف من عاقبة الأمر العجيب
يا شباب ألامه الي علقت فيكم الأمل = ما يخيب ظن ألامه فيه ذو عقل لبيب

تحياتـــي

 

 

 

 

[معلومات العضو ابومبخوت الدوسري]

صح السانك والسان الشايب الله يطول بعمره ويحفظه من كل مكروه

قصيده رائعه وكايفه ,,, اشكرك على طرحها يالحبابي ولاهنت



تقبل مروري وتحياتي وتقديري ,,

 

 

 

 

[معلومات العضو محبكم الدوسري]

الله الله
ماشاء الله تبارك الله
لست في مستوى تقييم الشاعر حفظه الله وهذه المعلقة الرائعة
ولكن الاستفادة منها عظيمة
صح لسان الوالد واطال الله عمره على طاعه
والشكر والتقدير للغالي
علي الحبابي
على هذا النقل الرائع

 

 

 

 

[معلومات العضو علـي الحـبابي]

ابو مبخوت - محبكم الدوسري
شاكر مروركم و تعليقكم الطيب و انتو من هل الطيب

 

 

 

 

[معلومات العضو خيالية]

أسأل الله أن يجعل هذه القصيدة شاهدة له لا عليه

و أن ينفع بها المسلمين والمسلمات

بارك الله في نقلك المتميز ، ووفقك لكل خير ..

 

 

 

 

[معلومات العضو علـي الحـبابي]

جزاش الله خير اختي خياليه و شاكر لش التعليق الطيب

 

 

 

 

[معلومات العضو بنت الذيب]

ابيات درر

صح لسانه ملايين والله يخليلك الوالد ويطول في عمره ان شاءالله

ويعطيك العافيه اخوي علي على الطرح المميز

بارك الله فيك

 

 

 

 

[معلومات العضو علـي الحـبابي]

شاكر لش يا بنت الذيب التعليق الطيب و الله يخلي لش من تحبين

 

 

 

 

[معلومات العضو ابو حسين الدوسري]

صح السانه والله يمتعه بالعافيه
ولاهنت اخوي على على هذي الجزله
للوالده الله يمتعه بالعافيه
خالص الشكر والتقدير

 

 

 

 

[معلومات العضو علـي الحـبابي]

ابو حسين الله لايهينك و الله يمتعك و والديك بالعافيه بعد
شاكر لك مرورك وتعليقك الطيب