مرثية مها السديري في الامير نايف

[معلومات العضو بخيت الغييثي]

مرثية مها السديري في زوجها الأمير نايف انتشرت قصيدة رائعة ومميزة في مواقع التواصل الإجتماعي على الإنترنت نسبت للأميرة مهـــــا بنـــت محمــــد الأحمــــد الســــديري زوجة الفقيد الأمير نايف بن عبدالعزيز . في هذه القصيدة تخاطب أبنائه وتتذكر لحظات عاشتها مع الفقيد والأماكن التي جمعتهما مع بعض نص القصيدة :

العام يا ام سعود كان الحزن ضيف واليوم دق اوتاده الحزن فينا .. الحزن غيمة غيبت نجمة الصيف وبااسباب جوره ياجواهر شكينا .. غاب الحبيب ولا بقى للهنا طيف والاه يانوره تهاوت علينا .. كن الظهر ياسعود فيه انغمد سيف والصدر صار لكل الاوجاع مينا .. اقول يا محمد متى فارق وكيف واصيح ياسارة متى هو بيجينا .. يانوف من عقبه ترى بسمتي زيف جف الفرح من حولنا وانطفينا .. أبوك يانواف ماله تواصيف وانشد مشاعل كان مثله لقينا .. والكون ياهيفا بلا ظله مخيف واعذر بكانا يافهد لو بكينا .. كان القمر كان البحر والمجاديف كان الحنان اللي بحضنه دفينا .. وكان الملاذ لشاكي الضيم والحيف كم شال عنا كم خذا عن يدينا .. عاش ورحل كله مهابة وتشريف جار الحرم فوق الحكي وان حكينا .. والله لو كان المقدر على الكيف ماغبت يا نايف ولا احنا ظمينا .. كل مارخيت الجفن جدت عواصيف والشوق ثار وفارقتني السكينة .. وشفتك مثل شمس بروس المشاريف نورك يناديني وانا اقول وينه؟ .. والقاك واصحى والمحك راقي النيف حي ولو صلت عليك المدينة .. أحسك بجنبي ماهي تخاريف ياساكن عيون المهاة الحزينة .. في ذا جلسنا بين صمت وسواليف وفي ذا الممر اثنينا كم مشينا .. وفي هالزوايا كم جمعنا مواليف وياما على ذيك المرايا ضوينا .. عشرة عمر ماتنتهي بالصواديف وذكرى تبي تحيا ولو مابقينا .. الموت يانايف كتاب وتصاريف وحنا بحكم اللي خلقنا رضينا ..

مهـــــا بنـــت محمــــد الأحمــــد الســــديري

 

 

 

 

[معلومات العضو محمد راشد النتيفات]

الله يرحم الامير نايف ويسكنه الجنة

وصح السان الاميرة مها

ولاهنت أخي العزيز على النقل

 

 

 

 

[معلومات العضو بخيت الغييثي]

المشاركة الأصلية كتبت بواسطة محمد راشد النتيفات الله يرحم الامير نايف ويسكنه الجنة وصح السان الاميرة مها ولاهنت أخي العزيز على النقل اللهم أمين الله يرحمه ويرحم أموات المسلمين صح بدنك ومن قال مايهان

 

 

 

 

[معلومات العضو شافي بن راشد النتيفات]

صح لسان شاعرتها وسلمت يمين ناقلها

ورحم الله اسد السنة

 

 

 

 

[معلومات العضو بخيت الغييثي]

المشاركة الأصلية كتبت بواسطة شافي بن راشد النتيفات صح لسان شاعرتها وسلمت يمين ناقلها ورحم الله اسد السنة صح بدنك يابوشالح

 

 

 

 

[معلومات العضو نآصر البدراني]

الله يرحم الأمير نايف ويغفر له ويتجاوز عنه


صح لسان الأميره مها السديري وأعظم الله أجرها



لاهنت على النقل أخوي بخيـــــــــت ..