كلمات سعودية غريبة

[معلومات العضو أبو سيف الناهشي]

هذي اشهر الكلمات السعودية المضحكة التي تمر أحيانا على الجميع ولكن تستغرب من الأشخاص اللي دائما ما يتكلمون بها... حبيت اوصلها لكم بمفهوم
وإن شاء الله تعجبكم المفاهيم ...
ههههههههههههههههههههههههههه

نبدأ

الدلخ ... انسان غبي جدااااا و يرفع الضغط و ينرفز و اكثر مايعاني منه المدرسين واهله0

المنسم .. هذا راجع الى تهريب الهواء من راسه و السبب هو ان راسه فيه فتق و دايم
تلقاه يغطس راسه في سطل مويه عشان يعرف من وين التنسيم0

المهوي .. هذا مرحلة متأخرة من التنسيم و المهوي وصل لمرحلة متأخرة جداااااااا
بحيث يفقد اهله الرجاء منه 000

السلنتح ... قليل الادب0
جحلط بتشديد اللام ... وهي مرحلة متقدمة للسلنتح0

مزلب .. يعني بايعها بتراب0
مسفح ... يعني طاير في العجة وهو ماعنده ماعند جدتي يعني بالعربي الفصيح من جنب
العارضة0

المسبه او المسبوه ...هو الشخص اللي يكون مروع في صغره لدرجة انه يصبح شبه فاقد
للعقل 000

المفهي ...هذا الله يخلف مهما تقول له او تصارخ عليه تلقاه فاتح فمه وبس ........
وإذا كلف عمره وتفاعل معك رد عليك وقالك هه .....

العله ... هو اللي ماتأخذ انت منه أي شئ ولاعنده استعداد ان يسمع منك مهما حاولت
وهو كالمرض يعلك لين تنفقع مرارتك منه

العربجي ... يظن معظم الناس ان العربجي هو الشخص الشديد حق المشاكل و اللي مايمشي
إلا وهو مشخص ببنت البكار و حاط مفاتيحه في سلسلة و لابس نعال سجادية و يسحبها
تسحيب لين جاء يمشي ودايم فاتح صدره و رازه على فوق و كانك ولد ابوك تكلم معه

المرجوج .... هذا ما عمره صلح شئ صح في حياته مايمديك تفتح فمك الا وطار في العجه
بدون ما يفهم وش السالفة و الارتجاج الحاصل له يختلف تماما عن مشكلة المسبه او
المسبوه حيث يكون الارتجاج هنا نتيجة صدمه وليس نتيجة روعه

المطفوق ... من فصيلة المرجوج ... إلا ان مايميزه هو انه إذا مر من عند كاس او جيك
او إبريق او اي شئ فيه سائل لازم يكبه [[ اي يسكبه ]] برجله وهو مايدري,, ولا تخليه
يمر بجنبك وانت معك صينيه فيها بيالات لانه لازم يطخها بيده او بكتفه ..!!..ايضا لاتخليه
يصب قهوه للضيوف لانه لازم يكب القهوه على ثوب واحد منهم...!!!...

السربوت ... هذا اللي ما يخلي مكان مايروح له وقد كان الاولين يطلقون لقب السربوت
على من يشرب الدخان لكن الحين الله يخلف الناس تدخن بيديها و رجليها ولااحد يقول
لهم شئ

السمرمدي .... وهو من نفس فصيلة السربوت

الداشر ..... هذا قليل ادب مايحب يماشي الا السرابيت

الملكع .... اما هذا فيعرف حتى السكن (( اي الجن )) مقطع السمكة وذيلها ومهما تحاول
تلف وتدور معه تراه فاهم وعارف وش تبي بالضبط فلا تتعب نفسك معه

الخكري .... ببساطة الخكري= نعومة + دلع + ليونة و الله لايبلانا ....
.
.
.
.
.
.
.
.
.
.
.
دمتم بحفظ الله ....

 

 

 

 

[معلومات العضو الشقرديه]

لاهنت اخوي كل الشكر

 

 

 

 

[معلومات العضو أبو سيف الناهشي]

أختي الشقرديه لاهنتي ومشكوره على الرد وما قصرتي تقبلي تحياتي ......

 

 

 

 

[معلومات العضو ابومبخوت الدوسري]

ههههههههههه الله يعطيك العافيه على الموضوع الجميل لاهنت تحـــاتي وتقديــــري

 

 

 

 

[معلومات العضو أبو سيف الناهشي]

أخوي الكبير أبومبخوت الشكرة لاهنت وبيض الله وجهك وما قصرت وأشكرك على مرورك ودمتم بحفظ الله ........