قصيدة بداح البرازي السهلي ورد الشاعر سعود البرازي

[معلومات العضو خيال البلها]

هذه مساجلة شعرية بين الشاعر محمد بن بداح البرازي السهلي ورد الشاعر سعود بن محمد البرازي السهلي ..

ياراكب اللـي ماوقـف بالقراشـي=وارد حفيزٍ فيـه دق الثمـن كـاش
صوت المكينة مثل وبـل الرشاشـي=من مدلهمٍ بارقـه يرهـش ارهـاش
يطرب له اللي راح فالدرب ماشـي=وإليا ضرب له هويةٍ ينعش انعـاش
مفروش زلٍ مـن جديـد القماشـي=ويصلح لمنهـو بالمهمـات طـراش
لكزز يهوش مع الطريق اهتواشـي=هوش العديم اللي وقف دون الأدباش
جنـه سـربٍ للمطامـع اعطاشـي=وقف لهم في ساعة الضيق ما انحاش
راحـوا مفايـسٍ وجاهـم خراشـي=من ضرب سيفٍ يودع الفكر ينـداش
ماراح معهم منـه لوكـان حاشـي=غني عن التعريف غصبٍ عن اللاش
لازعزع الرقبا بـه المـر غاشـي=غوش البريق اللي على الجمر غواش
مشهـد الريـان مـرو النمـاشـي=مهنا سهومه بالعدو تفـري الجـاش
والجيب قطـاع السهـل والعكاشـي=منصـاه قـرمٍ للمواجيـب شـواش
سعود بـن مقعـد ولانـي مخاشـي=وجهه لمن ينصاه بالطيـب بشـاش
جعله مجار بجـاه منـش النواشـي=عن شر وقتٍ دورته مثل الأرمـاش
ياسعود شفت اليوم طـاشٍ وطاشـي=له مستمع في دور خـادع وغشـاش
يقلط على المركا وزيـن الفراشـي=كنـه أميـر وبالمناعيـر حشـاش
ويعيـل بالهرجـة بليـا نقـاشـي=مسرد كلامٍ وان بغيتـه ليـا مـاش
ضلوعه بحزات الشدايـد هشاشـي=مافيه كود بجمعـت الفلـس قـراش
صحيـح وقـتٍ صافـيٍ للخشاشـي=لوكان مامنهـم عراميـش وعـراش
والطيب عسرٍ مـا ايتهيـا بلاشـي=يوم الردي في جمع الأموال معتـاش

وهذا رد الشاعر سعود البرازي

يامرحبا واعـداد نبـت الدشاشـي=واعداد ماترس المواني على الطاش
ترحيبةٍ من صادق احساس جاشي=ببيوت منهـو للمواجيـب حـواش
قم يانديبي فـوق عسـر المناشـي=غالي ثمن مايدركـه كـل كتـاش
بي أم صاف اللون مابـه رقاشـي=من جدته يلمع كمـا لمعـة فـلاش
سواقه اللـي مايجيبـه ارعاشـي=يجزم على الطرقه ولاهوب بـلاش
على الشدايد والمواقيـف عاشـي=ما جاه من قطع المسافة توحـاش
يوم ازعجه يسبق رصاص الكلاشي=تله بحفظ الله مع الصبـح مغبـاش
أقفى ودوسه فوق أبنصـه نواشـي=خطرٍ يطير مع الهوى كل ماينـاش
منصاه من يذبح سميـن الكباشـي=ويفرح ليا جاله من البعد طـراش
إليـا نخيتـه فالمواقيـف شاشـي=يوم الردي وقت المواقيـف بـواش
يفداك يابو بداح من كـان لاشـي=ويفـداك منهـو للمناعيـر لكـاش
ومما نشوف اليـوم زاد اندهاشـي=وقتٍ يهين الحـر ويعـز خفـاش
وقتٍ صفا للي سـوات الخياشـي=وهذا زمانٍ شيخـة فيـه الأدفـاش
أهل المصالح والقلـوب الغشاشـي=ماينفعونك لو تبـي وزن منقـاش
والنـذل مايذكـر بظلـه معاشـي=هيار لو يحدث بالأيـام خربـاش
لوكان ماله مثـل مـال النجاشـي=تلقاه عن درب المواجيب ينحـاش
ينبح على المقفين نبـح الرياشـي=ولعروض خلق الله بالأسنان كماش
عليك بالطيـب رفيـع المماشـي=عزيز نفس وقلبه أبيض من الشاش

 

 

 

 

[معلومات العضو خيالية]

صـــح الله لســـااانهم ،، ولا هنت على النقل ،،

 

 

 

 

[معلومات العضو عبدالله الحافر الغييثي]

راعي البلها بيض الله وجهك على هذه المساجله الرائعه ولاهنت ولاتحرم منا من جديدك

 

 

 

 

[معلومات العضو ابو زيد الغييثي]

راعي البلها
بيض الله وجهك على هذه المساجله الرائعه
ولاهنت
ولاتحرم منا من جديدك

 

 

 

 

[معلومات العضو نايف الخييلي]

مساجلة قويه وجزله

وشاعريين مبدعيين

اشكرك ياراعي البلها على طرحها

 

 

 

 

[معلومات العضو خيال البلها]

الله لايهينكم وبيض الله وجيهكم على الردود الطيبة

دمتم وسلمتم

 

 

 

 

[معلومات العضو محمد بن سالم الخضراني]

راعي البلها نقل تشكر عليه بيض لله وجهك


لك التحايا