عاجل مطلوب الجواب

[معلومات العضو فايز علي الدوسري]

الاخوة استميحكم عذرا في هذا الطلب لان عليه خلاف
والموضوع يتعلق بقصيدة قالها راشد ابن خر الذيب وهو كفو ومطلعها
اشرب الفنجال واكب البيالة
طيب واحب سلم الطيبيني

ومجاراة احد الدواسر عليه بالقصيدة التي مطلعها
عندنا ابن احسين يفعل ماطرا له
يذبح الحايل وهيف للسميني
مجلسه مجلسنا ودلتنا دلاله

المفيد اني ابغى من قائل الصبي لاجاد جيده من خواله
وان تردى فادر انهم خايبيني

ارجو لمن يعرف تلك القصائد ان لايبخل علينا بما لديه لان هناك تحدي على القصيدتين ومع الاسف انني لا أحفظ الا عيون القصيد وشكرااااااااااااااااااا

اخوكم فايز الدوسري

 

 

 

 

[معلومات العضو أبو سعود الودعاني]

اتمنى ان نجد من لديه قصيدة المجاراه كامله

وذكر منها بيت

يقول

الفتى ونطاب طيبه من حلالـــــه

والمراجل ذبحة الكبش السميني


والله اعلم

وتقبل خالص ودي

 

 

 

 

[معلومات العضو مشبعني ذراعي]

الصبي وان طاب طيبه من خواله... وان تردى فـعلم انهم خايبينـي
أشرب الفنجـال وأكـب البيالـة... طيـبٍ وأحـب سلـم الطيبينـي



,’. السلام عليكم ورحمة الله وبركاته .,’

من لا يعرف .. هذين البيتين .. بيتين اشهر من نار على علم ..

قد يجهل البعض قائلهما .. ولكن اكيد سمع بالبيتين من قبل ..

حتى اصبح مضرب مثل يتداوله كثير من الناس ..


قائل هذين البيتين ..

الشاعر / راشد بن حسن بن مانع بن رحيان الضاعني الملقب بــ ( ابن الذيب ) ..

وقيل انه توفي عام 1986م وهو في نجران وكان شايل معه شخص موصله الى قرية في نجران وحصل عليهم حادث وتوفي رحمه الله .. !




راشد بن حسن .. كان يشتغل في شركة ارامكوا السعوديه .. وكان يملك سيارة الشركه ( جمس ارامكوا ) ..!

وكان كل ما شاف له رجلي والا طرقي على الخط يبي احد يوصله يقوم ابن الذيب ويوصله بدون مقابل .. على سيارة الشركه .. !

حتى اشتهر عند البدوان .. لا جا احد يبي يروح مكان ولا عنده مطيه والا موتر .. يمشي في طريقه ويقول عسا يلقاني ( ابن الذيب ) على الطريق والا انا القاه ..!

ويشيلني ويوديني للمكان اللي انا ابيه .. حتى قاموا الناس يطرونه ويحكون فيه وهم لا يعرفونه ولا قد شافوه ..!

جاء يوم من الايام الا عجوز وعندها غنم شوي تعد على الاصابع .. و ( راشد بن حسن ) .. كان مشغول ومتأخر على الدوام شوي ..!

وشاف العجوز وشاف معها غنم تعداها وهملها .. عقب حزت في خاطره واستحى وراعي الطيب ما يجوز عن طيبه وقف الموتر ورجع للعجوز ..!

يوم جاها قالها يا مره انا ابشيلك وبوديك المحل اللي تبينه لكن بدون غنمك .. انا متأخر على الدوام واخاف غنمك تأخرني زياده ..!

قالت له العجوز .. خلاص رح الله يستر عليك يا ولدي ..

انا جالسه هنا انتظر ( ابن الذيب ) ..

هو اللي بيجيب العلم وبيوصلني المكان اللي انا ابيه انا وغنمي .. وهي ما تعرفه .. ولا تدري انه ( ابن الذيب ) .. هو نفسه اللي هي تكلمه ..

يوم انصدم ( راشد بن حسن ) بقولها .. وتعجب !!

قال اركبي يا خاله انا ( ابن الذيب ) وابشري بعزك ..

ابوصلك انتي وغنمك ..

وكانت انظمة ارامكو تمنع السائقين ان يشيلو الرجليه اللي يوقفون السواقين ويطلبونهم توصيلهم على طريقهم .. وشلون توصيل الغنم ؟؟؟؟؟

حتى وصل علم .. لشركه بفعل ( راشد بن حسن ) .. وهدد بالفصل من الشركه اكثر من مره .. وبعض رؤساءه يأسوا من المحاوله معه .. واعجبتهم شهامته ..

وصل العجوز إلى منصاها والمكان اللي تبيه ..





وقال هذى القصيده ...!






قالهـا ابـن الذيـب مـن هاجـوس بالـه
كلـمـةٍ يـلـعـب بـهــا والـبــال يـزيـنـي
قـالـهــا يــومــه طــرالــه مـاطــرالــه
مـن هواجـيـسٍ تشـيـب المرضعيـنـي
حـالـفٍ مـاخـذ عـلـى الطـرقـي ريـالـه
وبـالـثـلاث مـحــرم أنــــه مايـجـيـنـي
لالقيـت اللـي علـى ( السكـه ) لحالـه
يلـتـفـت ويـقــول ويـــن المستحـيـنـي
أوقـف المـوتـر حـيـا وأبــي الجمـالـه
يــوم ولــد الــلاش وجـهــه مايلـيـنـي
الطـمـع فــي كــروة الرجـلـي رذالـــة
.خـص وان جـابـه مـجـال الغانميـنـي
والــردي فــي حـالـةٍ مـاهــي بـحـالـه
واعـويـنــه مــــن كــــلام الطيـبـيـنـي
الـــردي لـــو بـــان مـايـذكـر عـمـالـه
مـايـعـد الـــلاش مـقـصـور اليمـيـنـي
أركـبــه لـعـيـون مـــن زيـــنٍ دلالــــه
ماتـحـاكـوا فـــي قـفــاه الرامـسـيـنـي
مابـغـى غـيـري وانــا مابـغـى بـدالـه
.قـاعــدٍ لـــي بـالـرجـا مـــدة سنـيـنـي
الصبـي وان طـاب طيبـه مـن خوالـه
بـالـخـوال يــســال قــبــل الـوالـديـنـي
أشـــرب الفـنـجـال واكــــب الـبـيـالـة
تــابــعٍ سـلـمــي ســلــوم الأولـيــنــي
ولاقـعـدنــا بـالـعـمـل بــنــا الــرزالـــة
.نـاخــذ العـلـيـا طــريــق الفـايـزيـنـي
غـرنـي بـعـض الـرجـال بكـثـر مـالــه
مادرى ان المـوت فـي حبـل الوتينـي
كيـف ينفعنـي وابـا(..........) خـالـه
مايـقـوم البـيـت دام الـسـاس طـيـنـي
مـاش ويــن الـلـي عـوايـده الجمـالـة
.مثـل ابـن ظافـر حـمـد ليـتـه يجيـنـي
الـثـنـا والـجــود دايـــم فـــي خـيـالــه
عـلـمــه ظــافــر ســلــوم الطـيـبـيـنـي
جـــــوّد الـعـلـيــا ولـزمّــهــا عـيــالــه
وادركــوا مــن علمـتـه دنـيـا وديـنـي
واهنـي مـن بـاع حظـه واشتـرى لــه
وسار في درب النبي وأخزى اللعيني
مـوقــفــه مــاكـــل رجــــــال يــنــالــه
مــن بـغـى مـمـشـاه يـقـعـد مرتـيـنـي
كـم ذبـح مـن حـايـلٍ مــن حــر مـالـه
وعـادتـه لـطـمـة خـشــوم العايلـيـنـي


الله الله ... عز الله إنه شاعر والله يرحمه ويغفر له ويرحم جميع أموات المسلمين ..؟!


و البيتين اللي بأول الموضوع يقال انهم محرفين.. والبيتين الصحيحين كما ذكروا فالقصيده ..


مــــــــــــلاحظه,’ الشاعر راشد بن الذيب هو والد الشاعر المعروف حاليأ ,’

,’ محمد ابن الذيب ,’

 

 

 

 

[معلومات العضو فايز علي الدوسري]

بيض الله وخيهكم على التجاوب السريع ولا هو غريب عليكم وهي عادادتكم مع الشكر الجزيل لكم وتبقى ان يتفضل علينا من يعرف قصيدة الدوسري اللي جاره وقال عندنا ابن حسين يفعل ماطرا له

اخوكم فايز الدوسري

 

 

 

 

[معلومات العضو راشد المسعري]

لاهنت يا " مشبعني ذراعي " على الرد بإيجاز ولاهنت يا"فايز" على الموضوع الطيب ولكما مني الود والتقدير ،،،

 

 

 

 

[معلومات العضو مشبعني ذراعي]

وجهك ابيض اخوي فايز

واخوي راشد حياك ولاهنت على المرور

 

 

 

 

[معلومات العضو فايز علي الدوسري]

لاهنت ياراشد وجهك ابيض ولك الشكر يامشبعني اذراعي على مااوردت والشكر لكم على المرور والمشاركة والتعليق

 

 

 

 

[معلومات العضو ابن الخرج]

السلام عليكم
اختلفت الاقوال على من قائل الابيات اللتى يقول فيها

ياابن خر الذيب عندي لك رساله ... عندنا مثلك رجال(ن) طيبيني
عندنا ابن حسين يفعل ما طراله ... ينطح العايب وهيفن للسميني
كم نقله خبرتن من حر ماله .... لا لقاهم فالبلد متعطليني
ضوهم ضو ودلتهم دلاله ..... شوف عيني وشهدو يالحاضريني
جعل يفداك الردى راعى البياله ... يشرب الشاهى وربعه حاضريني

احد يقول ان قائلها ابن عنبر الصخابره واحد يقول ان قائلها مصروري والارجح انها للمصروري وابن حسين زعبي لكنه مع الدواسر من زمان ويعتبر نفسه دوسري وهو محسوب عليهم كان عنده سياره ويقوم بنقل الناس الى اماكنهم بدون مقابل

 

 

 

 

[معلومات العضو فايز علي الدوسري]

بيض الله وجهك يابن الخرج وياليت تتحرى لنا عن قائل الابيات من الدواسر هل هو مؤكد المصروري او ابن عنبر

 

 

 

 

[معلومات العضو نايف الخييلي]

فايز بن علي
الله يعافيــكـ وأسمح لي بالمداخله على إستفسارك فــسحب علمي المتواضع

ان الشاعر اللى رد أو جارا الشاعر العجمي هو ابن عنبر الصخيبري واللى يقول في أولها :

ابن خر الذيب يطراله جماله = عندنا مثله ربوعً طيبيني
عندنا ابن حسين يفعل ماطراله = يلطم العايل وهيفً للسميني

وابن حسين المقصود في الابيات مصروري ويقال انه زعبي وقصيرً عند الدواسر وصايرً أخو لهم



وسلامتك

 

 

 

 

[معلومات العضو فايز علي الدوسري]

بيض الله وجهك يانايف على التاكيد بشأن قائل الابيات علما ان ابن عنبر حد علمي لازال حي الله يعطيه طولة العمر ان شاء الله وبالنسبة لنقل القصيدة بالعكس ترتيب المواضيع وتنسيقها من صالحها

وتقبل تحياتي اخوك فايز الدوووووووووسري

 

 

 

 

[معلومات العضو بدر حمد]

القصة الحقيقية هي كالتالي :

كان عبد الله بن حسين آل عسل من الاجاودة من الغوانم من زعب يسكن الرياض وعنده نقليات ( سيارات لواري ) تنقل بضائع للجنوب ، لنجران واليمن
وكانوا الناس ذلك الوقت في حالة فقر ماعندهم شي ، فالذين على طريق الجنوب مثل نجران ووادي الدواسر والأفلاج والخرج ، يقفون على الطريق ويؤشرون للسيارات المارة ليركبوا معها لوجهتهم ، سواء سيارات عبدالله بن حسين أوغيره ، وكان عبد الله بن حسين يركب الناس في سياراته بدون مقابل ، بل أن المسافرين معه يتقهوون معه من قهوته ويتزودون بزاده حتى يصلون وجهتهم ، وفي الرياض كان المسافرون للجنوب ينتظرون سيارات النقليات لتحمل بضائعها ويركبون معهم في الصنوق حتى يصلون .
وبالنسبة لعبد الله ابن حسين كان يرافق نقلياته إما يركب إحدى اللواري أو يرافق الحمله على ونيت له مع سواقه .
وفي إحدى المرات كان يركب في إحدى لواري ابن حسين مران بن قويد المساعره الدوسري ، ومسعود بن عنبر المقابله الدوسري ، متجهين من الرياض لوادي الدواسر ، وكان المسافرون يغنون قصيدة ابن خر الذيب العجمي التي يقول فيها :
لين لقيت اللي على الرسته لحاله ***** واقف ويقول وين الطيبين
اوقف الموترله ابغي الجماله ***** طيبن واحب سلوم الطيبين
حالف ماخذ على الرجلي رياله ***** والثلاثة والله انها ماتجيني

وهي طويله ..........

فتحادث مران ابن قويد مع مسعود بن عنبر في أن الذي يستاهل المدح هو ابن حسين ، لان ابن خر الذيب ينقل الناس على سيارة شركة أرامكو حيث كان يعمل فيها بينما ابن حسين ينقل الناس على سياراته الخاصة وزيادة على ذلك ياكلون ويشربون من زاده طيلة الطريق .
فقالا القصيدة المشهورة على وزن قصيدة ابن خر الذيب ، ومنها :

يابن خرالذيب عندي لك رساله ***** عندنا مثـلك ربــــــوع طـيــبـيـني
عندنا ابن حسين يفعل ماطراله ***** يركب الرجلي وهيــف للسـميني
كم نقله له خبرة من حر مــاله ***** لا لــقــاهم بـــالبــلــد متـعطـلـيـني
ضوهم ضوه وكيفتهم دلالــــــه***** شوف عيني واشهدوا ياحاضريني

وعبد الله بن حسين بن عسل قتل في اليمن أيام الثورة ، عندما سطا أفراد من إحدى قبائل اليمن على سياراته وهي ذاهبة لصنعا بحملة تجارية ، وكان يرافقهم على ونيت له معه دوسري ـ نسيت اسمه ـ حيث قتل ابن حسين ونجا الدوسري باعجوبة ، وليس لعبد الله بن حسين أولاد ، حسب ماأعرف ولا أدري من الموجود منهم من الذين توفو ا، وأخو ه محمد بن حسين وعياله موجودون الآن في الهدار غرب الأفلاج مع باقي آل عسل .
التفصيل كثير وحاولت الاختصار قدر الامكان



للامانه منقول