(( خمسة عشر عمله )) صوت وصدى

[معلومات العضو ولد زايد وسيع البنايد]

بسم الله الرحمن الرحيم
السلام عليكم ورحمة الله وبركاته
ـــــــــــــــــــــــــــــ
هاذي قصيدتين عباره عن مجاراه
للشاعرين سوف يأتي يوماً من الأيام ويكونوا حديث الادباء ،
علمين من اعلام شعر النبط الحالي .
والشاعر الاول هو الشاعر الكبير والمظلوم إعلامياً ..
خالد بن مدعث بن نفل الخرفاني الدوسري .
والشاعر الثاني هو الشاعر الكبير ..
ناصر بن محمد بن فارس الفريعني السبيعي .
والقصايد عباره عن لغز
عموماً ما أطول عليكم ..
القصيده الاولى (( اللغز ))
. . خمسة عشر عمله . .
وهاذي عملات ابن مدعث , يقول :
..

عذابك يا خفوقي تو ما جاك وتولم له = ما دام انك فتحت الباب لهموم الهوى شلها
اعرف انك بليهيٍ اذا زاد الدهر حمله = يغني له هديره " هاذي احمولك وعدلها "
ليا غنت تقول البيد عطني رقصة الصمله = وليا منه عطاها رقصةً كنه يجاملها
يجامل والمنايا عينها قبر يدم دم له = بعين المكر خزت ، وبعين الحب غازلها
لقى عين المنايا تمكر بـــ( خمسة عشر عمله ) = يموت اليا نظرها وان خذاه الموت قبلها
الاولى ، بنت غيٍ تنقض المجدول وتعمله = ليا غطت ترايبها شقت بالليل جادلها
وثانيهن ، هلالٍ بالسماء ما ينعرف كمله = صخيفٍ لو نقل ريش النعامه ما تحملها
وثالثهن ، معه سيفٍ بحد الموت معدم له = ثمانين الف فارس عن مناكبها معزلها
ورابعهن ، طلع حرٍ مع اللجه معزم له = على صيدٍ قرانيس النوادر ما تحولها
وخامسهن ، ضلامٍ ضيع نجوم الفلك جمله = بقى فيه القمر يضحك مع الضلما ويسئلها
وسادسهن ، عزيزٍ غار عدوانه على زمله = تلقاهم بسيفٍ شيب الدنيا وهولها
وسابعهن ، هنوفٍ تصفق الكفين محتمله = على فرقا الذي بالحب مالت له ، ومال إلها
وثامنهن ، غريرٍ ما يقول من السحا جمله = خجولٍ ليا ناظر عيون الناس خجلها
وتاسعهن ، تقى روضٍ هوى الغربي مقدم له = قراحٍ من سحاب تحت علم العرش وابلها
وعاشرهن ، تثبت قصة " سليمان والنمله " = معاها معجزه والمعجزات الرب يرسلها
وحاديهن ، مهاةٍ في جراهيد الوطا همله = تلفت للقنوص اللي من احماها تجفلها
وثاني عشر ، بحرٍ طلع اللولو على رمله = يبي يرضي ارمالٍ من عصر آدم مزعلها
وثالث عشر ، رسامٍ على الاهرام يرسم له = يدينٍ فوق صدرٍ تسحر الساحر بـ أناملها
ورابع عشر ، من عبرة يتيمٍ دمعته همله = ثمان اسنين من فقده لـ ابوه العين مسبلها
ابوه و مات !! وامه لا تحنّ ولا تبسم له = تنحر صوب دارٍ تهلك الساري مهاملها
بقى مابين وقت وبين عمٍ ما ترحم له = دخيلك يا زمانٍ لعت عمره لا تكملها
وخامس عشر ، من عمر اليتيم اليا ارتكب خمله = عشق له عشقةٍ تفني شبابه ما تناولها
عيونتس يالمنايا تذبح بـ( خمسة عشر عمله ) = لك الله هاذي " العمله " يا ( ابو فارس ) وحللها

..
وهذا هو الرد الذي قال عليه الفراعنه (( الحلّ يحتاج إلى حلّ )) !!
يقول :
..

يا ( خالد ) لا تهيضني وأنا قلبي متمم له = على تركت بلادٍ ضاع حابلها بنابلها
تخيلت اربعٍ سودٍ اقصار اعيونهن ثمله = وابن من لا نقض حجه ولا يقدر يحايلها
فوادٍ كل ما وجـّه على دارٍ و يمم له = مقاريد العرب دونه مزهبةٍ فتايلها
نحوسٍ من ردى حظه درج فضه وكون له = من النكبات سبحات مسلسلةٍ سلاسلها
ترى لغزك يا ( ابن مدعث ) ولو حاولت اترجم له = كثير الناس يا ابن الناس جاهلته وجاهلها
وحلّ اللغز في خمسٍ ورا الغارب تهايل له = على عشرٍ قدم عيني تخايلني واخايلها
تشوف أوصافها في غرة المجمول مكتمله = على ذباح أبوها سابت الفنجال وأحملها
الأولى ، عانها بين الجبال السود والرمله = غراميلٍ حمر نشر الشواوي ما تهيلها
وثانيهن ، ليا صامت مقاريد العرب صم له = ولو شفت الديار المجرهده ما تثيلها
وثالثهن ، ثلاثٍ طيرها لا حام لك حم له = تنجلك الليالي السود ولا انته بتنجلها
ورابعهن ، ليا منه شكى الزامل هوى زمله = تغطى والغطا غارات روس القوم يفشلها
وخامسهن ، غراب البين ما حيٍ بيجهم له = اشارة سوّ تدره للقوافل من قوافلها
وسادسهن ، حصانٍ حادسه دبت به النمِله = وعود صيدةٍ منه العوانيد طعم اهلها
وسابعهن ، ولد لا يخدعك لو غرته جمله !! = يصفق ما عدل ميله ولا العدله يميلها
وثامنهن ، لو طوّل لك السبت لا تحيزم له = ما جو الا وعقبه عجيجٍ ترعد مخايلها
وتاسعهن ، حيايا الروض فالمثناه مندمله = والتمت على حس الونس من حدر اسافلها
وعاشرهن ، " سليمانٍ " مضى ما احدٍ جمع شمله = وقفيرٍ غدت به لين كبر وهللها
وحاديهن ، على وضح النقا حذرا تخدم له = عليك بمنةٍ ما احدٍ من العشاق زاملها
وثاني عشر ، بــرًّ لا يغرك ماه واخطم له !! = اذا ما هو حصل كل كلمةٍ في خاطرك قلها
وثالث عشر ، طرفك شف جديده لا يغطى سمله = عصا " موسى " سحر " فرعون " ما غير منازلها
ورابع عشر ، دانـه خلها في شطّها تمله = قراش الحنظله يدمع ولو ما احدٍ بقابلها
وخامس عشر ، ذيبٍ كان قام , انته بعد قم له = (( وسما نفسك ولو هانت فعل كفك يجملها ))

..
اسمحوا لي اذا قصرت في نقل القصايد
لاني بصراحه واجهة صعوبه في نقلها
لاني نقلتها لكم من شريط بــ إلقاء ناصر الفراعنه
واللي سبق ان سمع إلقاء الفراعنه راح يعذرني .
والسلام ختام
بلنتي

 

 

 

 

[معلومات العضو سالم الغريري]

الله يعطيك العافيه

على المشاركه الطيبه


وصدق ان الحل يبي له حل

صح لسانك ولسان الشعار

 

 

 

 

[معلومات العضو عبدالرحمن الشرافي]

أشهد انهم عمالقة وفحول


اخوي / بلنتي الشكره




الله لا يهينك يالقرم على نقل هذه القصيدة الجزلة

للشاعرين جزلين ولهم اسمهم ومكانتهم.

وصح الله لسان الشاعرين.


واشهد انهم أصدقو الحل يبيله حل



ولاتحرمنا من جديدك الجزل


تحياتي