السلام عليكم والرحمة والبركة...
حبيت اني بدايه افيدكم بشيء....وفكرت وش هو الشيء اللي ممكن يفيدكم؟!
وتذكرت اخواني الصغار وقصتي معهم ....وحبيت اقول لكم فكرة بسيطة عن المواقف
الدينيه اللي جمعتني بينهم :
لي أخو بسادس...اسمه خالد...وتفكيره وشكله يدل على انه بزر في رابع !
المهم ماعلينا...كنت اقول له من السنة اللي فاتت يا خالد فيه اشياء واجد في الدين
انت تجهلها واللي في عمرك يعرفها ! اشياء بسيطة في الدين تناسب عمره...
بدايه صرت اقول له الولد الشاطر لازم يصلي في وقت الصلاة بالضبط...ويترك اللعب
في البلاي ستيشن لمدة دقايق يصلي فيها العصر ويرجع يلعب...وهو يقول لي ان شا
الله....ولا اشوفه يصلي في وقتها...بعدين صرت اسولف له ان اللي يصلي في وقتها
فإن الله يحقق له كل أمانيه...ويوفقه ويصير محبوب بين شلة الحارة...وهذي كلها
أشيا المسكين اخوي يفتقدها...قلت له بالتدريج ياقلبي بيصير كل شي سهل عليك...
لاني لاحظت انه يوم يصلي في وقتها و10 لا !! بدأ اخوي بالتدريج ومع مرور الشهور
وانا كلما جيت من الدوام أراقبه واسأله على الخفيف ( من دون غصب وتخويف ) هاه
صليت في وقتها؟ ومن تالي صايرن أسمعه ماغير يقول إيه...
شوي الولد صار يقول لي ودي اصلي كل الصلوات في المسجد...عاد انا استانست...
شجعته وقلت له ترا الصلاة في المسجد فوايدها ماتنعد ولا تنحصى...لانك بتروح
المسجد بتشم هوا وانت رايح وانت جاي ....وبنفس الوقت على عدد خطواتك ربي
بيعطيك حسنات مضاعفه....وبيحقق لك كل أمانيك...وبتصير دافور في القراءة وماحد
بيتطنز عليك لين قريت...خالد صار كل يوم رايح المسجد...أوقات يروح قبلي بصراحه
وأوقات يروح قبل المؤذن من التحمّس! الحمدلله...
بعدين صرت اقول له المسلم لازم يصير خلوق ماهو معربج ماغي ماسك العصا ويضرّب
في العيال ! قال لي والله يا نواف انا بصراحه أرتاع لين رحت المسجد في الليل...
وقت العشا...أحس كل الهنود اللي في الحاره يلحقوني ! قلت له لاتفكر كذا ترا الشيطان
مايبيك تصير أحسن عيال الحارة لانك ملتزم بالصلاة....وقلت له ترا ربي بيكافئك على
شجاعتك وبيحميك من كل شر في طريقك...ما ودي أكثّر عليكم الكلام بس المهم
اني بديت معاه شوي شوي وبالتدريج وعلمته اشياء ماكان يعرفها...وأبشركم الى الان
الولد ملتزم بكل شي....في يوم من الايام...جاني قال لي ...يا نواف تعرف لين جاء عزاء..
وش يقول الواحد عشان يعزي اخوه المسلم؟ قلت له خير وش فيه ؟ قال لا أبد بس
إن خويي ولد عمه توفى الله يرحمه وودي اني اروح أعزي...!!!
ورجعت فيني الذاكرة الى الوراء...تذكرت اني في طفولتي ماحد علمني وش اقول
في العزا؟؟ وكيف اتواصل مع اخواني المسلمين وأواسيهم في أحزانهم...
فرحت له وقلت له قل لهم عظم الله أجركم....الخ.
بس اني بيني وبينكم ماودي الولد يزيد عن اللزوم...ماودي يطلع ارهابي خخخخخ
تراني امزح....بس اني بغيته يترك الجوالات والبلوتوث والنت والبلاي ستيشن ويقسم
وقته مابين اللعب والهياص ومابين القران والصلاه وذكر الله...
من ناحيه أخرى....اشوف أبو جيراننا...ماغير يؤدب عياله بالعقال...امشوا الصلاه بالعقال!
وش ذا؟ ادري انكم بتقولون الاكيد انهم مطلعين براسه الشيب...بس لا حرام انه
يخليهم في طفولتهم يلتزمون بالغصب واذا كبروا يصيرون دشّير !
لان اكيد بتجيهم عقده ولين كبروا بينتكسون وبيصيرون عكس أول...
اللين والطيب ثم اللين والطيب...يا اخوان ماودي ان الاب فيكم لين راح الشغل ينسى
يدق على ولده ويتطمن على احواله ويسأله هل صليت هل قريت قران؟ ماودي
ان الاب فيكم لين جاء ماغير يملي بطنه غدا ويروح ينام ويقوم المغرب ويروح لأخوياه !
وينسى ان في ذمته ولد لازم يربيه بطريقه طيّبة عشان يطلع بكرا ولد صالح ان شا الله.
ترا انا مو متزوج ولاني في فتره الزواج....توني والسنة الجايه ناوي على الطب ان شا
الله....بس اني اتوقع لين تزوجت ...أبصير صبور مع عيالي وبالتدريج وباللين أبي أحرص
انهم يطلعون عيال ملتزمين...
فيه نقطة غالبيه الآباء نسوها وتجاهلوها...الاكيد انكم عارفين ان المجتمع مكوّن من أفراد
يعني كل فرد بيطلع منه مجتمع....واذا الفرد فاسد فإن المجتمع سيصبح فاسد ..
واذا الفرد صالح فالمجتمع صالح...وأظنها ماتجهلكم هالمعلومه...لذلك فإن تربيه
الاولاد على الصلااااااح شي مهم...وصى عليه الرسول صلى الله عليه وسلم...
بس انه ماقال كرهوهم بالدين وطقوهم واضربوهم وعذبوهم....لا...قال تعالوا لهم
باللين...وحاولوا معاهم بالتدريج....والاكيد انه بينفع معاهم...بس في بعض الحالات
المستعصيه....فإنه يجوز الطق الغير مبرح....يعني انسوا سالفة العقال...
النقطة اللي كنت أبي أذكرها لكم هي أخلاق الطفل....
أخلاااااااااااااق الولد لازم تكون عاليه....واذا الأبو مشى على التربيه الإسلاميه
فإن الولد ( دايركتلي ) بيطلع خلوووق...أبسط شي ممكن الأب يعلم ولده عليه:
1/ ياولدي لك صدقة إن شلت قارورة الببسي عن الأرض...
2/ ياولدي اعطف على اخوك الصغير تراه مايفهم...تراك انت كنت صغير مثله اول !
3/ ياولدي لين رحت المسجد ومريت على الجيران بالطريق سلم عليهم وان بشروك
بشيء بارك لهم وان خبروك بمصيبه واسيهم وعزيهم...
4/ اذا أحد أساء لك ...لاتسيء له...هو اللي بياخذ سيئاتك وانت تاخذ حسناته والله
بيعوضك...بس ان أساء لك صدق وطقّك وأذاك بقوة...فياولدي رح لي أو للمدير..
بس لاتدخل في مهاوشات مالها داعي...
5/ ياولدي اذا شفت احد محتاج فزعتك ...لاتنتظر شيء !
6/ اذا انا اعطيتك بالشهر مئة ريال ...رح للجمعيه وتبرع لك بخمسين ...
ومن هذي الاشياء ياخواني...مدري اذا أنا أفدتكم ووصّلت لكم المعلومه والا لا؟
بس ترا موضوعي واقعي جدا...انا قاعد اشوف من حولي عوايل أغلبهم مو عارفين
يربون عيالهم على الدين الصحيح....
وبالاول وبالاخير ترا الولد يطلع على ابوه....فالأب لازم يكون قدوة صالحه لولده...
وبالتدريج ياخوااان بالتدريج....اصبروا مع عيالكم...تكسبون أجر في الدنيا وفي الاخرة..
والله العالم اني اكتب الموضوع لإفادتكم لخالص وجهه سبحانه وتعالى ....
( تكفون ادعوا لي ربي يوفقني في الزواج وفي الطب...)
تحياتي لكم جميعا/ اخوكم نواف
25-02-2006, 06:16 PM
العرض العادي
