الزلامي & السديري

[معلومات العضو ابكي واجامل]

السلام عليكم ورحمة الله وبركاته


مراسله بين الزلامي و محمد الا حمد السديري ( رحمه الله ) ..



يقول الزلامي :

يا ونتي يا ما بصدري من الضيـق=من حسة لا جت بداخـل ضميـري
كنيتهـا فـي مغلقـات الصنـاديـق=لين انكسر منها الضليـع القصيـري
قالوا بذلت الصبر مـا فيـه تبريـق=قلت اه من يقدر على الصبر غيـري
مير انتهى واليا انكفى الميّ ما حيـق=سود الليالي عرقلـت خـط سيـري
والله لو اشرب ميّ سحبـن غداريـق=ما ظنتـي يبـرد ظمـاي الغديـري
ولو اشرب الذوب المصفّى على الريق=زاد السعير اللـي بكبـدي سعيـري
خط لفانـي حـرّق القلـب تحريـق=امحق بشـاره جبتهـا يـا بشيـري
انا على عهـدٍ واظـنّ العهـد بيـق=اخر زمان وكـل شـيء يصيـري
راحوا هل النمات مثـل الزواريـق=يسعـون عدوانـي بفرقـا عشيـري
الله يجازي مـن سعـى بالتفاريـق=عن جنـة الفـردوس بالزمهريـري
يا راكب اللي مع خطـاة الطواريـق=ينـوز نـوز الجافـل المستذيـري
مـن وارده مالوعـوه السـواويـق=ولا داج للعبـري وشـال الاجيـري
اخـر طـراز مغلـق الفـن تغليـق=اسبق من الاصوات عبـر الاثيـري
هـافٍ يهيـف بمجرهـد الرقاريـق=يطوي الفيافي طي سلـك الحريـري
عجل ليا دنَّـي وعجـل ليـا سيـق=والطير مـا يمديـه قدمـه يطيـري
عليـه منـدوب ليـا نشـف الريـق=قرم ليـا سـال العـرق بالنظيـري
داس الخطر من دون عهد ومواثيـق=يوم ان ولد الـلاش فكـره يحيـري
خذلي كتاب منسـق القيـل تنسيـق=مكتوم مـا يقـراه غيـر السديـري
محمـد الاحمـد مهـدي الصعافيـق=ليا عدوا اهل الطيب قاضي واميـري
وان حلّـق الدخـان بالجـو تحليـق=اميـر فـي قـود السرايـا خبيـري
وان صار بالجرعات كنّه وتشريـق=قاضي يحل العسـر حـلاً يسيـري
وان جو وبيبـان المنـازل مغاليـق=ريفـاً لهشّـال الخـلا والقصيـري
سلم عليـه وشلـق الهـرج تشليـق=واشرح له الموضوع حالي خطيـري
يعطيك راياً مـا عطـوه المطافيـق=وانا بلشت ومـن بلـش يستشيـري
تراي بادي لك على الرجـم ومويـق=عطشان ضميانن لشوف الصديـري

ردّ السديري ( رحمه الله ) بهذه القصيده :

ونيت وناتـن تحـش المعاليـق=يشيب منها راس طفل صغيـري
ونيتها وانـا بـروس الشواهيـق=في راس مرقاباً طويل عسيـري
وزاد الونين وصفق القلب تصفيق=وصار الونين لجرح قلبي خشيري
ونيت انا لاهل القلوب المحاريـق=مثل الزلامي يوم جـاه النذيـري
العلم جابـه لـي ردي التوافيـق=وقلبه من اللوعات غادي كسيري
ادمن بقلبـه لابسـات المخانيـق=المترفـات مشيّـدات الحجيـري
عزاه للي مـن عيالـن مطاليـق=متمشكلن بين الكمـي والمغيـري
غيمن عداك يدفق الوبـل تدفيـق=لا تستخيله يا مـرو الشطيـري
خلك ورا مران وانتـه بتشريـق=مظنون عينك يـم واد الجريـري
حدوه عنـك البايهيـن المدانيـق=لبليس منهـم بالنمايـم وزيـري
اهل النمايم مخلفيـن العشاشيـق=دايم على الاصحاب شرّن شريري
والبوق عند ملهفـات السماحيـق=عفراً تهزّ اجسامهـا بالمسيـري
اختر حمول الخيل يوم المساويـق=اهل الفعايـل بالنهـار الكبيـري
مروين عطشان الغلب بالمزاريق=شلفاً تلظى بالنهـار الضريـري
من فوق قـبٍ كنهـن المشاريـق=عز القصير الخايف المستجيـري
من نسلهم دور ليا صرت عشيـق=اختر بنـات مذلليـن النحيـري
يوم الطراد تفهق الجمـع تفهيـق=كم طاح قدم نحورهم من عثيري
ان ساعفت من عند ربّ المخاليق=اقطف ثمر مالاق روضاً مطيري
تلقى زهور الورد فوق الزماليـق=عقب المطر يفوح منها العبيـري
اعطيك راياً يطلعك من صعافيق=من صدّ عدّه بالمـودّه غريـري
ان مامشى برضاه يتعب ليا سيق=واحذر يغرّك كل زولاّ غريـري
رشيد قلبي دايمـاً بـه تخافيـق=بين الضلوع ولا لقالـه مطيـري
يكفخ كفيخ موحشاً بـه مسابيـق=حرن يصرّم محكمات المريـري
على حبيبٍ مبسمه ما بعـد ذيـق=ليا ناموا المخلوق همّه سميـري
طفلاً وداده فتـق القلـب تفتيـق=ونثرت من زرق الدموع الغزيري
عين العنود ان ذيروها التفافيـق=شكت وهجّت من فياض الظفيري
أغصون قلبي بالمـودّه مواريـق=ارجي يصادف نزل خلى نشيري
الله جمّـاع القلـوب المشافـيـق=عقب البطا يعقوب فتح بصيـري
رشيد شوفاتـي لخلّـي تراميـق=ينصاب لو شافه طلال الظفيـري
انا معك بالمال والحال بالضيـق=والسيف عندي مغمدن بالجفيـري
ما قال محسن بالشجاع بن عليـق=تلقاه بي عند اشتعـال الذخيـري
قلته ونومي يا الزلامي تخافيـق=يكفيك عن ما بالضمير تعبيـري

وسلامتكم من كل شر

 

 

 

 

[معلومات العضو خالد المشاويه]

الله يرحم السديري وصح لسان الزلامي

لاهنت على النقل الرائع واسمح لنا بالتعديل (( تنسيق الابيات ))

جزيل الشكر والتقدير

 

 

 

 

[معلومات العضو مبارك بن شافي النتيفات]

الله يرحم السديري وصح لسان الزلامي

لاهنت على النقل الرائع

تحياتي وتقديري

 

 

 

 

[معلومات العضو ابكي واجامل]

يشرفني مرورك والله لايهينك على التعديل

 

 

 

 

[معلومات العضو دغش محمد الصخابرة]

الله يرحم السديري

وصح لسان الزلامي

لاهنت على النقل

تحياتي وتقديري